Gathering w/ MST old friends @Tuen Mun

今日行程緊湊，做咗好多嘢...

1. 去郵局︰之前執屋執咗啲完全未玩過嘅玩具、毛公仔出嚟，今日終於的起心肝早少少起身去郵局寄parcel 去斯里蘭卡俾助養小朋友玩...
2. 飲茶︰約咗二姨、三姨、表弟嘅前女友喺新達飲茶...好奇怪嘅組合...
3. 入屯門︰2點半左右同Able 喺大埔出發入屯門，先去吳華屋企，坐咗一陣，第一次見吳華個妹妹心愉，佢眼大大好靚女，nice to meet you~
   然後我哋一行十多人轉移陣地去Emily 位於屯門嘅新居，玩咗一陣board game，食咗少少零食，6點左右就撤退...
   跟住我哋去三聖食海鮮，啲海鮮都幾新鮮，好味~
   食完飯大家搭小巴返上水，喺上水食埋糖水先再搭火車返大埔...返到大埔已經12點幾...

今日可以見到咁多咁耐冇見嘅莫記舊同學，好開心...大家都冇乜點變，依然係傻傻地、爛gag 連連，同時又被發現原來我啲功力都唔弱，haha~失禮失禮...

好期待我哋下次嘅gathering，如果下次可以再齊人啲就好喇 (雖然今次都已經好齊人)... ^.^

很難下的決定 + 食盆菜

今朝先喺Kennis 屋企返嚟，下晝要眠一眠...

喺瞓緊晏覺之際，收到Kitty 嘅來電，佢話約咗Percy、Lolo 6/2 晚去佢哋屋企拜年...噢~又係6/2，較早前叫做應承咗超哥6/2 會同佢 & 同事們一齊去九龍城打邊爐，但係我又好耐冇見過呢班中同，所以最後都係應承咗Kitty 嗰晚上Percy、Lolo 度玩...

-----------------------------------------------------------------------------------------------

瞓醒晏覺，夜晚去咗團契小組其中一個姊妹美儀屋企食盆菜，大家傾吓、講吓無聊嘢都幾開心，食完飯仲一齊睇《珠光寶氣》，之後仲有湯圓食，好飽...

多謝美儀嘅款待，打攪晒、辛苦晒~ : )

到Kennis 家拜年

今日下晝同媽咪爸爸喺大埔中心飲下午茶；飲完之後同媽咪去旺角搵一個一年先見一次嘅姨姨飲杯嘢、傾咗一陣偈；再之後就搭車去Kennis 位於鴨脷洲嘅屋企拜年 + 食飯...auntie 煮咗好多餸，好好味~

食完飯，我同Kennis 匿喺房做咗好多嘢︰

1. 聽歌︰Kennis 個playlist 啲「華語」歌好好聽啊~我好黐線地大聲跟住唱，我知我好嘈，失禮晒...
2. 睇VCD︰睇《忘了．忘不了》(The Notebook)，都幾好睇，最感動係有老人痴呆症嘅女主角臨死之前忽然認得自己老公，仲可以死埋一齊，都好嘅，唔使剩低其中一個傷心...如果未睇過都recommend 大家睇...
3. 睇相︰睇Kennis 啲旅行相，笑爆咀，我哋啲笑聲差啲嘈醒auntie...
4. 傾偈︰傾咗好多嘢，估唔到連咁複雜嘅「醫學」問題我哋都傾得咁detail，護士不愧為護士，失覺失覺...

傾完偈已經凌晨3點幾，其實我真心覺得我呢啲有「自動防盜」system 嘅人自己返屋企應該冇問題，我一定會好安全咁返到屋企，但係Kennis 提議我不如瞓幾個鐘，等到天光先走會好啲...咁我就唔客氣霸咗佢半張床位，瞓到7點先起身，然後自己開門鬼鼠地走，打攪晒...

多謝感冒中嘅Kennis 捱眼瞓陪我玩咁耐，又share 張床俾我瞓，thank you~ ^3^

------------------------------------------------------------------------------------------------

呢兩日feel 到自己有啲唔正常...熟我嘅人都知我係睡寶，睡寶竟然會失眠；熟我嘅人都知我大食，大食積竟然會覺得唔肚餓、可以唔食嘢都得...真係黐黐地...

有人做錯事，所以有強烈嘅不祥預感...算罷啦，所有嘢都係自己一手做成，咎由自取，與人無尤... : (

初三．赤口

今日黃昏上咗嫲嫲度食飯，食完同爸爸去咗旺角閒逛一陣...

無意中俾我喺旺角細細間CD 舖搵到RubberBand 隻CD，終於搵到... : )

-----------------------------------------------------------------------------------------------

今晚我又做咗啲唔應該做嘅嘢，一諗得太多、啲情緒自然會跟住嚟，really sorry about that...

大吉利是年初二

今日本來plan 好下晝同阿姨婆婆佢哋飲完下午茶就上婆婆度，點知俾黃小虹嚇一嚇，真係大吉利是...

話說下晝黃小虹沖涼，沖沖吓都聽到佢咳得好厲害 (註︰佢本身有少少哮喘，又咳咗幾日)，佢突然大聲嗌媽咪，媽咪入到廁所見到佢好喘，面都白晒，差少少就暈，媽咪嗰時已經有少少不知所措、猛嗌「你唔好嚇媽咪...」 (註︰我媽咪本身係比較大反應嘅人)，我拿拿聲打999，喺等救護員嚟到期間我同媽咪抱咗黃小虹上床，佢瞓低之後個人清醒啲，條氣順番啲，終於識應我哋...

救護員上到嚟嘅時候其實黃小虹已經好番好多，不過救護員話佢啲脈搏好微弱，弱到check 唔到，所以都係建議佢入院檢查清楚...之後媽咪陪黃小虹入院check-up，我就喺屋企等佢哋...

Thanks God...醫生話冇咩大礙，都係提佢平時注意飲食、做多啲運動etc...唉...冇事就好喇，真係嚇死人...

媽咪同黃小虹喺醫院返嚟之後，我哋就若無其事咁去婆婆度拜年，打咗陣麻雀，食咗餐好豐富嘅開年飯，留到1點先返屋企...

----------------------------------------------------------------------------------------------

夜晚無線播《小親親》，新年居然會播Aaron 嘅戲，好感動...我又好留心咁睇多一次，章戎 & 吳秋月嘅故事其實冇乜特別，Aaron 當時嘅演技又真係唔係好得，反而覺得兩首插曲《若有所失》 &《討厭喜歡妳》好好聽 (其實一向都覺得好聽，我部MP4 都有呢兩首歌)，而家聽《討厭喜歡妳》更加好聽...

《討厭喜歡妳》 郭富城
討厭苦等妳經過
使我一屋是情歌
討厭知道妳星座
令我每天埋頭埋腦算著因果
討厭歡喜妳的我
得到一半 祈求更多
以後怎麼可 在佳節中一個
寄宿我的被窩
以後如果 再沒如果
沒別人給我痛恨怎可拆夥
快樂煩惱 使我無助
多可恥妳可愛處令我著了魔
憎我在想妳 想妳便憎妳
一種愛怎能夠化作一百種滋味
憎我像憎妳 只好愛惜妳
爭執也無非能深刻的記得妳

鼠年除夕日

今日如常返崇拜，一見到講員係倩儀姑娘就心知不妙...其實都盡力叫自己醒啲，但係真係有難度... ^.^"

完咗崇拜同銓銓食lunch，食食吓有一pair couple 坐喺我哋隔離枱，望一望個男子，好熟口面，再望一望個女子，噢...原來就係我平時睇開一個blog 嘅host (註︰我哋係互不相識0架，只係我無聊地search 到佢個blog，之後keep 住成日睇)，第一次見到佢嘅真身，nice to meet you... : P

食完lunch 之後繼續為屋企部電腦上唔網而懊惱，銓銓話佢得閒，所以我就邀請佢上嚟寒舍幫我睇吓部腦，順便探吓蓉蓉、波波...搞咗一陣，終於搞掂，yeah~慳番$200 唔使搵人上嚟整，如果上唔到網，我今個新年假就會好難過...Thank you 銓銓~

之後夜晚都冇出街喇，媽咪煮飯，黃小虹都有返嚟食飯，a nice new year eve evening...

行程緊密的一天

今日行程緊密，簡列如下︰
09:30 - 12:30 上堂
13:00 - 14:30 Year 2 Elective course seminar
15:00 - 15:30 去吉之島搵媽咪買嘢
16:30 - 19:00 去嫲嫲屋企
20:00 - 23:00 行旺角花墟

今年係我第一次行旺角花墟，其實唔係太多人，都算好行，但係今年賣啲嘢真係好無聊，完全買唔落手...最後居然買咗一隻USB 手指，真係...

因為要沿住特定路線行，行遠好多，行咗好多路先由花墟行到去九龍塘，好攰... =.=

今年總算行過花巿，哈...

Conversation with Richard

今日係放新年假前最後一個工作天，下晝差唔多放工嘅時候已經唔係好想做嘢，老細Richard 就喺呢個時候埋咗嚟我個位，同我講咗一個未講得俾太多人聽嘅好消息，呵呵~恭喜恭喜~我會為佢哋一家禱告... ^o^

之後Richard 本來想繼續做嘢，但係又忍唔住同我繼續討論之前提及過、但係未完嘅話題...今次都算係第一次同Richard 咁認真討論工作以外嘅話題，好多謝佢嘅經驗之談，亦好多謝佢咁撐我，不過恐怕除咗佢一個人之外，其他人都唔係好認同佢嘅想法...我覺得Richard 係一個可信賴嘅人，佢應該可以幫我保守秘密... : P

Thanks for his sharing and support anyway!

南丫島一天遊

今日攞咗一日假，同Ceci、Michelle、Kenise 去南丫島玩...

今日天氣好好，唔太凍，又有少少陽光，我同Ceci 一去到南丫島第一件事就係搵貓貓，然後跟住佢哋嚟影相...好彩有Ceci 呢枝盲公竹，我哋先可以搵到貓地個竇口，先可以見到咁多貓貓... ^.^

影咗一陣相，我哋去咗飲茶，飲完就出發行去風車發電站...原來都幾遠路，要行一大段斜路先去到，我同Kenise 行到索晒氣，雖然好攰，不過上到去個view 好靚、望住個超藍嘅天空好舒服...但係越坐越大風，真係好大的風，我哋食咗好多風，食到大家開始傻傻地亂講嘢，Kenise 好搞笑，笑死我... : D

食完風之後，我哋好想食阿婆豆腐花，幾經辛苦終於搵到...Ceci、Michelle 一人食咗一碗，我同Kenise 食完一碗再share 多半碗，好好味...

臨走嘅時候，我同Ceci 再去影貓貓，影到差啲miss 咗班船...

返到尖沙咀，我同Ceci look 咗一陣LCX...臨分別搭車返屋企嘅時候，我突然好想食雪糕，Ceci 居然肯陪我食，反正都係咳，食貴啲嘅雪糕咳好似抵啲，我哋去咗Haggen Dazs 一人食一個鮮果cone，好好味~咳咗一排，好耐冇食過凍嘢 + 甜嘢，間中都應該有任性嘅時候，咳死罷就...

今日可以同老師們去郊外行吓，又食咗咁多嘢，又見到咁多貓貓，好舒服、好開心...

Open Day 順利完成 + Dinner w/ Wing Wing

經過尋日、今日各單位嘅辛勞，學校Open Day 順利完成，thanks God...

好感恩幫我哋個English Cafe 嘅student helper 個個都好乖、好落力做嘢，我哋先可以run 得咁順暢...雖然啲小朋友有嗌辛苦嘅時候，但係都感覺到佢哋試過親力親為工作之後，深知道做嘢有幾辛苦，對佢哋應該都係好難得嘅經驗...

不過其實呢兩日都有好忟憎嘅時候，因為原來有啲人只會按章工作，明明見到你忙到踢晒腳都唔會主動offer help，本來唔忟都俾佢搞到忟...激死人... >.<

Anyway，呢兩日雖然真係好攰，但係可以幫到手我都好開心... ^.^

P.S. 原來做飲食業真係好辛苦，從事飲食業嘅朋友，辛苦晒~

------------------------------------------------------------------------------------------------

今日辛苦完一日之後，親愛嘅Wing Wing 嚟咗學校等我放工去食飯，呵呵~見到佢好開心，我哋又去咗大埔中心和民食飯，我哋兩個大食妹當然又叫到一枱都係嘢食，然後又一邊食一邊不停口講嘢...

食完飯已經10點幾，本來諗住喺大中送Wing Wing 搭車，但係我哋又想傾多一陣，所以最後都係漫步行返廣福先目送Wing Wing 上車...

好多謝Wing Wing 聽我講咁多嘢，又講咁多佢自己嘅嘢俾我聽，芥蘭衷心多謝芥菜支持~哈哈~ ^o^

P.S. 多謝佢喺台灣帶返嚟俾我嘅手信，thanks so much~ ^3^

Preparation for Open Day

今個星期五、六就係學校Open Day，我會幫手負責英語茶座，我哋會整格仔餅 + 爆谷，呢兩日我同幾位老師就忙於試整格仔餅 + 爆谷，搞到而家一見到啲waffle + popcorn 都有少少怕...

連續幾日不停整餅，啲傷風咳又keep 住未好，個頭又有少少痛，有少少辛苦...本來今日放工之後要返學，但係真係頂唔住，所以冇返...

仲有兩日咋，希望到Open Day 嗰兩日身體會好番少少，如果唔係一定冇力做嘢...

大家都要加油啊~希望一切順利...

I lose my voice...

今日返工嘅時候除咗咳得比尋日密咗少少之外，喉嚨都尚算ok，都仲講到嘢...

放工返到屋企，食飯之前叉一叉電，瞓醒之後居然發唔到聲...oh dear...點解會咁?早知一放工就去睇醫生啦... T.T

------------------------------------------------------------------------------------------------

今日唔知點解成日諗起王菲嘅一首舊歌《我也不想這樣》，好好聽...

忽然間 毫無緣故 再多的愛也不滿足
想你的眉目 想的迷糊 不知不覺讓我中毒
忽然間 很需要保護 假如世界一瞬間結束
假如你退出 我只是說假如
不是不明白 太想看清楚 反而讓你的面目變得模糊
越在乎的人 越小心安撫 反而連一個吻也留不住
我也不想這麼樣 反反覆覆 反正最後每個人都孤獨
你的甜蜜變成我的痛苦 離開你有沒有幫助
我也不想這麼樣 起起伏伏 反正每段關係都是孤獨
眼看感情變成一個包袱 都怪我太渴望得到你的保護

天寒地凍上學去 + 咳咳咳

今日好凍，但係都要爬起身返學...

今日返新嘅英文module《Developing Interaction in the English Language Classroom》，個lecturer 都教得唔錯，同埋好似幾practical，我都係鍾意學啲practical 嘢多啲...

差唔多落堂嘅時候，同學John 無端端講咗句好好笑嘅嘢，我第一次聽，佢話佢朋友話︰「前世殺咗人，今世教語文」haha~雖然有少少灰，不過都幾搞笑...

-----------------------------------------------------------------------------------------------

尋晚咳咗成晚，我都冇食糖，點解會咳0架?由細到大，一咳就會咳好耐，希望咳多一兩日會咳完...

喉嚨好痕、好多痰...救命... >.<

Dinner w/ Julissa & Ying Ying

今日如常工作，放工之後約咗Julissa & 好耐冇見嘅同學瑩瑩一齊喺沙田食飯...

Juli 下星期一就飛去美國定居喇，可能要一兩年後先會返嚟香港...今晚係Juli 飛之前我哋最後一次見面，我哋食飯嗰陣傾咗好多嘢，差啲又俾佢啲搞笑嘢笑死... ^o^

食完飯我哋影咗少少相留念，臨分別嘅時候我送咗一件小禮物俾Juli，希望佢第時返嚟香港都會用得著...真係死火，Juli 未走我已經望佢返嚟，大件事...

Anyway，希望Juli 坐穩機，一路逆風(呢個唔係gag 嚟0架)，去到美國可以好快適應新生活...I will miss her and pray for her always... T.T

Figure out an answer

尋晚臨瞓前問咗自己一個問題，出奇快地諗到答案...

諗到答案之後，總算諗通咗少少，但係諗通又唔等如放得低，只不過係諗到一個令自己好過少少嘅理由安慰自己...

以為諗到理由就冇嘢要再諗，無聊嘅我居然又諗到另一個衍生問題，呢個問題真係冇人會知道答案，算罷啦我...Really think too much...

"In his heart a man plans his course, but the LORD determines his steps." (Proverbs 16:9)

A Sunday in bad mood

今日如常返崇拜，完咗崇拜約咗同事Fanny 返教會正堂，佢同一位弟兄 + 一位姊妹同我講多次關於三福嘅嘢...好多謝佢哋抽時間同我講解...

之後同Fanny 食咗個late lunch...再晏啲就同爸爸去嫲嫲度食飯，食完飯就返屋企...

聽日係放完聖誕假後第一個正常上課天，大家都要加油啊~

----------------------------------------------------------------------------------------------

尋日同今日都好感覺到自己唔想講嘢 + 心情煩躁 + 缺乏耐性...

潛藏嘅自閉徵狀又開始慢慢浮現...Really need to cheer myself up...

HAPPY NEW YEAR!!!

其實以往都冇習慣喺除夕晚出街count down，但係因為今年唔係好想留喺屋企，又好想見一見Kennis，所以尋晚約咗佢喺銅鑼灣見...

尋晚我哋見面之後食完嘢，已經差唔多11:50pm，我哋行咗去Sogo 對出附近馬路同一大班路人一齊望住個大電視諗住count down，過吓一分鐘，過吓又一分鐘，唔知點解嗰個台仲係播緊新聞，一啲倒數嘅意欲都冇，到我哋大家都覺得應該夠鐘嘅時候，就聽到遠處嘅人歡呼起哄，先意識到原來已經過咗12點正...實在太好笑，人人喺度等倒數，點知原來人哋已經數完，點解會咁0架... ^.^"

尋晚真係好感激Kennis 抽時間陪我，佢10點幾先放工，今朝又要5點幾起身返早，但係佢尋晚都陪我陪到1點幾...

衷心多謝「小肥羊」喺回程途中send 俾我嘅窩心SMS，有佢呢個摰友簡直就係我呢一世人最幸運嘅事...佢講得好啱，共勉之...

Wish everyone has a brand new start in 2009!

Happy New Year!

-----------------------------------------------------------------------------------------------

醞釀咗成個聖誕，喺2009年元旦終於證實我嘅淚腺原來冇閉塞...

希望2009年我只會流喜悅、感動嘅眼淚... : )