A belated birthday dinner for 肥佬哥哥

今日如常工作，放工之後約咗筠姐、Percy、Lolo、肥佬哥哥喺九龍城食飯補祝哥哥18/3生日...本來今晚Ric & Kitty 都會嚟，但係最後佢哋都嚟唔到，冇咗佢兩個我哋餐飯真係靜好多啊~

我哋今晚食泰國嘢，唔知點解啲嘢食好似咸咗啲，所以麻麻地好味...食完飯，我哋有送禮物 + 切雪糕蛋糕環節，個蛋糕真係好硬，哥哥同Lolo 切咗好耐先將個蛋糕切成4件，好搞笑...雖然好凍，不過ok 好味...

飲飽食醉，我哋一齊搭車返大埔，我哋喺巴士高談闊論，好嘈，真係失禮晒... ^.^"

返到大埔，我同哥哥咁耐冇見，又邊行邊傾偈，我哋由10點幾傾到12點，終於update 番哥哥嘅近況，感覺良好...好耐冇試過凈係得我哋兩兄妹談心，多謝哥哥讓我重拾昔日「溫暖」嘅感覺，thanks so much! ^o^

參加魚 & Bill 婚禮 + 再一次被爽約

今朝如常返學，返埋今堂，星期六呢個module 就上完...點解啲lecturer 教得好嘅module 永遠都咁快完?大家都好想繼續上呢堂啊...

放學之後返咗教會練多一陣歌，下晝去魚 & Bill 婚禮...今次係我第一次唱婚禮詩班，又係第一次去中大呢個教堂，都幾靚...魚 & Bill 好sweet，好羡慕佢哋... : )

完咗婚禮，又未夠鐘去飲，自己一個喺沙田閒逛，諗住睇《禮儀師之奏鳴曲》，但係嗰個鐘數冇得睇，冇得睇戲，去咗Haggen Dazs 買咗杯雪糕食...食完再行多陣就去酒樓飲...
除咗銓銓之外，其實我完全唔識其他同我坐同一張枱嘅弟兄姊妹，所以好自然銓銓就成為我惟一嘅傾訴對象...傾傾吓，居然又會傾到關於我嘅一啲秘密，仲越講越深入，余老闆真係深藏不露、觀人於微，咁都俾佢推斷得到，小人真係有眼不識泰山... : P

掛住同銓銓傾偈，呢餐飲宴其實我都唔係幾專心，有少少唔係幾好意思...雖然我唔係識咗魚 & Bill 好耐，其實都唔係好熟，但係我覺得佢哋兩個都係好好嘅人，衷心祝福佢哋白頭偕老、永遠幸福快樂~ ^-^
------------------------------------------------------------------------------------------------
今晚飲完之後又被爽約，一次係咁、兩次又係咁，失望 + 無話可說嘅感覺好強烈...

雖然之後知道箇中原因，明白某人有urgent 事要先處理，但係依然有啲唔開心... 而家只有兩個approaches，我太了解自己，Plan A 我應該做唔到，得番Plan B 可以一試...希望我可以朝住Plan B 方向進發...


P.S. I can feel that someone had some improvement these two days even if he did not tell me. I really appreciate that and please keep it up...

Some happy things

今日如常工作，有幾個開心位置︰

1. 之前打算同Wing Wing 睇謝安琪演唱會，我哋諗住買$200 飛，但係買唔到...尋日知道佢加兩場，今日用Manhattan credit card 可以優先預訂，我就麻煩二姨幫手訂飛，終於買到，有得睇喇~yeah~
   
   
2. 今日差唔多放工嘅時候老細Richard 話突然醒起我下星期就有Supervisor 嚟睇堂，問我不如下星期啲堂俾晒我試吓教好唔好喎...如果佢放心俾我教梗係好啦，都唔知恨咗幾耐，如果佢早啲咁講我上星期就唔使咁沮喪啦... ^.^"
   
   
3. 收到Julissa 喺美國寄俾我嘅請帖 & 餅卡，好surprise 啊~多謝Juli 記得我~
   
   
4. 今日下晝Keziah 老師神神秘秘咁叫我跟佢去Art Room 睇啲嘢，原來佢喺SPCA 個website 見到一隻待領貓女叫Sonia，所以專程過嚟Staff Room 叫我睇...隻貓女都幾靚女，haha~老師好無聊啊~ ^o^

<--Sonia

轉變

近呢幾日開始感受到有啲嘢慢慢轉變緊...而且進展唔錯...

神應該開始作工了...Thanks God...


P.S. 求主保守安慰Angel 一家，同埋我最親愛嘅小姐... : )
-----------------------------------------------------------------------------------------------
呢幾日好鍾意聽一首歌...歌詞其實好有意思...

《年度之歌》 謝安琪

曾經攀上的天梯　曾經擁抱的身體
曾經在乎一切　被突然摧毀　霎那比沙更細
良夜美景沒原因出了軌　來讓我知一切皆可放低
還是百載未逢的美麗　得到過又猝逝　也有一種智慧

全年度有幾多首歌　給天天的播　給你最愉快的消磨
流行是一首窩心的歌　突然間說過就過
誰曾是你這一首歌　你記不清楚　我看著你離座
真高興給你愛護過　根本你不欠我甚麼

曾經擁有的春季　曾經走過的谷底
人生是場輕梯　忽高也忽低　不輸氣勢

全年度有幾多首歌　給天天的播　給你最愉快的消磨
流行是一首窩心的歌　突然間說過就過
誰曾是你這一首歌　你記不清楚　我看著你離座
真高興給你愛護過　根本你不欠我甚麼
誰曾是你這一首歌　你記不清楚　我看著你離座
很高興因你燦爛過　高峰過總會有下坡

回憶裝滿的抽屜　時光機裡的光輝
人生豔如花卉　但限時美麗　一覽始終無遺
回望昨天劇場深不見底　還是有幾幕曾好好發揮
還願我懂下台的美麗　鞠躬了就退位　起碼得到敬禮
誰又妄想一曲一世　讓人忠心到底

Dinner w/ Ric @ Tai Po

今日如常工作，冇乜特別事發生，但係我知自己今日啲情緒又唔係好ok...

之前喺MSN 同Ric 傾咗兩句，佢話佢今晚會入開嚟大埔，所以約我今晚食飯...印象中，今次係事隔多年後我哋第一次單獨食飯...

今晚我哋都傾咗幾多嘢，互相update 近況，佢問完我問題，我又問番佢我想知好多年但係又唔敢問嘅問題，多謝佢咁坦白回答，學佢話齋，我真係好榮幸可以聽到真實嘅答案...

好開心我哋可以咁樣坐低食飯傾偈 (其實係我自己之前未ready 啫)，希望我哋可以keep 住互相關心、互相問候...Hope God bless our friendship!


P.S. 多謝大家嘅細心分析 + 力撐，我知道要點樣調適自己嘅心態/心情...I do my best, God will do the rest...

Gonna be crazy...

今個星期真係好難過，因著各種原因，心情好差...除咗尋日因為要返學、返到屋企已經好攰冇時間冇energy 再諗嘢之外，呢幾日放工返到屋企都有股想喊嘅衝動，之後祈完禱就喊到收唔到聲...喊咗幾日，好攰...

呢排真係比較多嘢煩，e.g. :

1. 4月頭就要睇堂，但係我得番兩次、每次只教半堂嘅「實習」機會，完全冇諗過我嘅「實習期」會短得咁緊要，接住Supervisor 就會嚟睇堂，一諗起到時我會死得好轟烈，啲眼淚就會不自覺地流...要問嘅問題我已經問咗，都改變唔到事實，好無奈 + 好無助...
   
   
2. 今個星期日要交功課，但係冇心機做，又唔係好知點做，進度緩慢...
   
   
3. 今個星期六返學要Micro-teaching，要prepare material...呢樣都係花時間啫，都ok...
   
   
4. 最煩就係呢樣...喺呢啲咁down 嘅時候，好想搵某人訴苦，但係某人都自身難保，佢自己心情都唔好、又唔舒服，當然我又唔好意思再煩佢、再加添佢嘅苦惱...但係當我想關心佢嘅時候，佢又毫無反應，即係代表啲咩呢?覺得我煩、唔想應我?還是佢根本唔需要我嘅關心?好冇用...想知，但係又唔夠膽問，因為我怕知道事實...再咁樣我諗我會黐線...
   
   今晚同Wing Wing 講咗好耐電話，多謝佢聽我訴苦，雖然講完一輪都改變唔到啲咩，但係聽到佢把聲心情好番少少，thank you 芥菜~ : )
   
   
   P.S. 每次好想喊、但係喊唔出嘅時候，開聲祈禱啲眼淚就會如泉湧...感謝天父垂聽我嘅禱告...

Micro-teaching

今日返學唔使上堂，做Micro-teaching，我揀咗下星期先做，今日睇其他同學試教10-15分鐘，從觀摩人哋嘅performance 大約都知道邊種teaching method 好、值得學習，又知道邊啲teaching method 唔太work、最好唔好跟住做...

下星期到我喇，仲未諗到教乜，希望到時唔會太緊張...


P.S. 今日心情唔太好，明明有嘢要做但係又唔想做...死梗...

超沮喪...

今日又喺2E 試教一個Grammar item: It is + adjective + that...

雖然整體上我覺得自己今次嘅表現比上次好，冇上次咁緊張，但係我犯咗一個好嚴重嘅錯誤，好沮喪...我發誓以後都唔會再犯相同嘅錯...太唔小心...

一波未平一波又起，都未沮喪完，老細居然同我講另一個噩耗...唉...點解會咁0架...咁我今次真係死梗... T.T

參加秀筠姐姐的婚禮

今日上晝如常工作，要監考，都ok 冇乜問題...1:15pm 監完考就拿拿聲撤退，因為今日攞咗半日假同媽咪、黃小虹去沙田大會堂參加秀筠姐姐嘅婚禮...

今日係我第一次見秀筠「哥哥」(i.e. 新郎，好無聊嘅叫法) & 宇亮「姐姐」(i.e. 新娘嘅細佬's girlfriend)，nice to meet you all...眼見嚟觀禮嘅大部份都係親戚，雖然唔係好多人，但係大家都好開心...多謝陳太、秀筠姐姐邀請我哋嚟觀禮，祝新娘新郎永遠恩愛、幸福快樂！

-----------------------------------------------------------------------------------------------

觀完禮，我又開始肚餓...我哋去咗麻布茶房食tea，我居然喺tea time 食得落一碗飯，好恐怖...

跟住行咗一陣街，又買咗一堆零食...行到7點半左右我哋就返屋企，食完飯仲食腐竹蛋糖水...咁食法，遲早變豬... : P

蓉蓉去打針

今日下晝媽咪同爸爸夾手夾腳捉蓉蓉入去街袋，帶佢去獸醫診所打一年一次嘅防疫針 + 食杜蟲葯，今次係第一次我冇「陪」蓉蓉去睇vet...

根據媽咪嘅描述，蓉蓉今日唔係太驚，一如以往一打完針就9秒9自己行番入去街袋，如果佢喺屋企都肯咁合作就好喇...

今日磅重，蓉蓉而家4.5kg，都仲未夠10lb，但係點解平時抱佢覺得佢咁重呢?唔明......


P.S. 尋晚輾轉反側咗一陣，最終講咗一個電話就將心裡面嘅擔憂放下...開始了解自己發作嘅pattern，下次就知道應該點做喇...(希望唔會咁快有下次 : P)

Regretting...

經過兩日認真嘅思考，今日講咗我認為要講嘅說話...講之前以為自己有決心，就應該做得到...點知講講吓，居然有種心痛嘅感覺，有啲想喊，好耐未試過...

唉...真係覺得自己好麻煩，點解要將一番令人唔開心嘅說話講咗出口，講完先後悔?或者我只要將心裡面嘅想法講俾當事人知，我個心就會舒服啲，嗰一番傷人嘅說話就可能唔使講出口...

可以當我冇講過今日嘅說話嗎?好對唔住... : (

又，忽然諗起王菲首《曖昧》︰

眉目裡似哭不似哭　還祈求甚麼說不出
陪著你輕呼著煙圈　到唇邊　講不出滿足
你的溫柔怎可以捕捉 越來越近　卻從不接觸
茶沒有喝光早變酸　從來未熱戀已相戀　
陪著你天天在兜圈　那纏繞　怎麼可算短　
你的衣裳今天我在穿　未留住你卻仍然溫暖
徘徊在似苦又甜之間　望不穿這暖昧的眼　
愛或情借來填一晚　終須都歸還　無謂多貪　
猶疑在似即若離之間　望不穿這暖昧的眼　
似是濃卻仍然很淡　天早灰藍　想告別　偏未晚

嫲嫲

今朝返教會上第二堂栽培班，上完同「老師」、「同學」一齊食lunch，食完就出咗去嫲嫲度...

每逢天氣潮濕、打風落雨，嫲嫲就會好腳痛，痛到街都落唔到，買唔到餸...見佢明明好痛又要忍住痛一步一步好慢咁行，但係又唔知可以點幫佢嘅感覺真係好難受...

我明白人老咗一定會有病痛，但係可唔可以唔好咁痛呢?呢種長期病患真係會令人意志消沉...The only thing I can do for her is keep praying...God bless her...


P.S. 已經有咁多嘢諗、咁多嘢煩，對於明知唔會有結果嘅事，就要認真地學習放下，可能由得佢自然流失、自然fade away 會比較好...

遲來的email

今朝唔使返學，瞓到12點幾先自然醒，好爽...

跟住成個下晝留喺屋企閒hea，明明有嘢要做又唔想做，真係死火...

夜晚check email，終於收到IEd Field Experience Supervisor 嘅email，佢話打算30/3 - 8/4 期間嚟睇我堂...雖然開始有壓力，不過感恩嘅係，從字裡行間，我feel 到呢位外籍Supervisor 好nice、好understanding，希望到時佢會感受得到我哋已經盡力做好...

Still have 3 weeks to go，開始好驚... : (

Sing K w/ colleagues

今日好凍，我諗我全日講咗超過5次「好凍...」，坐我隔離嘅Ceamy 老師應該差唔多俾我煩死...

今日如常工作，放工之後約咗同事們 (Incl. 超哥、廸廸、銓銓、其偉、Cindy、仲有我嘅honey Wing Wing) 去旺角唱K，好耐冇唱過K 喇，好興奮...

今晚基本上都係懷舊金曲夜，因為我哋唔係太識唱新歌，聽番啲舊歌真係好好聽...除咗唱歌之外，我哋呢班無聊仔又開始影相、拍video，又係其偉嘅「show time」，真係好黐線...救命... ^_^"

唱完K 未夠10點，時間尚早，我哋去咗一間樓上cafe 飲嘢、玩UNO，原來玩呢啲低B card game 都可以睇到大家嘅真性情，又加深咗對大家嘅了解，幾得意...玩到11點幾大家就撤退一齊去搭火車返屋企...

今晚好開心，如果可以有多啲機會同大家一齊玩就好喇... ^o^


P.S. 今日無端端又有少少傻瓜notion，搞到要不停同自己講「算罷啦...」，搞咩呢...

Dinner w/ Colleagues @ UCC Cafe

今日放學之後S4 考Oral，每次考Oral 之前老細就會同外籍老師火拼，估唔到今次我都不能倖免，逼於無奈地加入戰團...亦因為同外籍老師有少少argue，搞到呢兩日心情唔知點咁，怪怪的...下星期一、二到S6 考Oral，希望到時大家通力合作，順順利利考完就好...

----------------------------------------------------------------------------------------------

今日考完Oral 差唔多6點，約咗Ceci、Kenise、Michelle、Candy 去沙田食飯鬆一鬆...我哋今晚又去咗UCC Cafe 食飯 (係我suggest 去呢度食，因為我又想食沙律 : P)...

我哋5個人叫咗5個set，另加3個沙律，以為一人食少少應該食得晒，點知經過一番努力 (尤其係我嘅努力)，都係食唔晒，好0徙嘢，下次都係唔好叫咁多個set 喇...

今晚我哋好黐線，講咗好多爛gag，笑到肚痛，e.g. 專訪「慧思」涉嫌藏毒被捕後嘅心路歷程；探討到底「誰是Do Do」(呢個真係爆笑 ^o^)；商討「如何讓校長以為明天有黑色雷暴警告」，咁大家就唔使返工返學，大家諗嘅時候真係好認真，講到似層層，真嘅一樣，如果真係要做咁大場戲先可以休息一天，咁不如返工好過喇...嘩哈哈~我諗我哋勁笑咗差唔多10分鐘，好辛苦... : D

今晚鬆咗一鬆，笑咗一大餐，心情舒暢不少...明天繼續努力工作... : )

康復

今晚心血來潮睇咗啲6年幾以來都唔敢睇嘅嘢，原來睇咗都冇乜唔好嘅感覺，我諗我真係完全康復...Keep it up! ^-^

其實呢，都要好認真地多謝一個人，雖然佢都有令我唔開心嘅時候，但係佢嘅出現真係幫到我好多...Thanks so much!