下雨天

今日落雨唔想出街，全日留喺屋企執吓嘢、上吓網，好似好悠閒咁...

媽咪放工返嚟，喺信箱收到舊年Percy、Lolo 結婚時、我做姊妹啲相...我同媽咪都覺得某幾張影得我幾ok，如果拎嗰幾張相去相睇都應該呃得吓人... ^o^

-----------------------------------------------------------------------------------------------

之後夜晚又同Wing Wing MSN，唔知點解，其實我同佢一齊共事只係幾個月，但係感覺好似識咗佢好耐咁，咩都可以傾、咩都可以講，感覺真好...

今晚我哋喺MSN 認真地Girls Talk，多謝Wing Wing 唔嫌我煩，仲鼓勵我...我哋大家都要加油呀~唔好咁快灰心...We have to be patient, our Lord will lead us to the right ways...

Thanks anyway and let's add oil together!

Dinner w/ Wing Wing @ Sha Tin

今晚約咗Wing Wing 去沙田報團，希望我哋呢個暑假馬來西亞之旅一切順利啦，十分超級非常唔想又有其他奇怪事發生喺我身上，一生人試過一次就夠0架喇...

之後我哋去咗UCC Cafe 食飯，今晚呢餐好好好飽，補番今日lunch 嗰餐...咁大食，都唔知點算...

今晚又同Wing Wing 傾咗好多偈...Thanks for her sharing!

第一次踩單車

今日Wing Wing 本來只係約咗佢個中學同學 & 中學同學's 6歲小表妹踩單車，老實不客氣嘅我今日冇特別嘢做，所以加入同佢哋一齊踩...其實自從小學二年級學咗幾次踩單車、但係都學唔識之後，今日算係第一次踩單車，我同小表妹一齊踩有輔助轆嘅單車，有妹妹陪我踩，我冇咁樣衰，哈哈... ^.^"

我哋大約兩點半左右喺大圍出發，因為妹妹嗌攰，踩一陣又抖一陣；途中落咗一陣雨，我哋又避咗一陣雨，好彩落咗一陣就落完，又可以繼續踩...我哋踩到差唔多7點先去到大埔，好攰，不過好開心...

今次係我第一次望住個咸蛋黃踩單車，好舒服...好鍾意Wing Wing 喺差唔多到大埔、好想飲寶礦力嘅時候，講咗句「向寶礦力水特進發」，好搞笑，好似賣廣告咁...

-------------------------------------------------------------------------------------------------

踩完單車，Wing Wing 嘅中學同學 & 小表妹先行離開...Wing Wing 冇約人食飯，上咗我屋企坐...兩個無聊妹上網睇無聊嘢，又笑死咗...之後我煮麵一齊食，招待不週，希望Wing Wing 夠飽啦...

Wing Wing 坐到差唔多11點就走喇，因為要趕搭尾班小巴...今日好開心，多謝Wing Wing 陪我玩咗成日... ^o^

Dinner w/ Wing Wing & 銓銓

今晚約咗Wing Wing & 銓銓喺沙田食飯，我哋先去旅行社再睇多次去旅行嘅資料，之後去咗元綠食飯...

我哋又叫到一枱都係嘢食，一邊食Wing Wing 一邊講呢幾日工作上嘅辛酸事...傾傾吓，收到其偉嘅電話，佢話我哋學校都有H1N1 確診個案，oh...點解0架?我哋應該係第一間有老師確診嘅學校，雖然之前高層已經plan 好就算EDB 唔公布全港中學停課，我哋都會自行取消試後活動，而家咁嘅情況，想唔即時停課都唔得喇...有少少突然，希望病咗嘅老師快啲好番啦...

-----------------------------------------------------------------------------------------------

食完飯，我哋行咗去河畔花園join 其偉一齊食糖水，期間Wing Wing 俾咗啲意見其偉，但係氣氛好似唔多愉快，所以我都唔敢再加意見，費事越來越僵...

希望其偉明白Wing Wing 嘅意思，明白大家都係想佢好就好喇... ︰)


P.S. 今晚收到璇璇嘅電話，thanks for her concern，I'll take good care of myself~Same to her!

林峯《Let's get wet 演唱會》

今日放工之後同黃小虹去睇林峯演唱會...好開心...

一開場大家已經好興奮，不停嗌林峯林峯林峯 (註︰係男人聲嚟0架 =.=)，好hyper...阿峯 (好似好熟咁 ︰P) 都唱咗幾多快歌，跳舞都跳得OK...直到現時為止，呢個演唱會係我睇過嘅演唱會中最多嘉賓嘅一個，順序有︰王祖藍、農夫、泳兒、楊千嬅、阿Sa、謝天華，一人同阿峯合唱一首歌 + 獨唱一首，其實阿峯唱自己歌嘅時間唔多...最開心佢有唱《記得忘記》，呢首應該係佢嘅第一首歌，好好聽...

除咗自己嘅歌，阿峯仲唱咗唔少人哋嘅歌，e.g. 《為你鍾情》、《我真的受傷了》、《你不在》、《愛愛愛》&《霍元甲》，都唱得唔錯...不過佢把聲真係太沉，沉到唔係好聽到佢講咩，下次麻煩佢講大聲少少，唔好鬼食泥咁啦，聽得好辛苦... ^.^"

Ending 時，當然係全場大合唱《愛不疚》嘅時間，好感動...我同黃小虹都覺得在座嘅每一個觀眾都真心鍾意林峯，因為不論坐山頂、定係坐貴飛位置嘅觀眾都不斷揮動螢光棒，由開始fing 到完場冇停過，如果唔係真心鍾意一個artist 唔可能咁enjoy fing 足全場...

雖然今晚阿峯唱自己歌嘅時間唔多，但係整體嚟講都唱得幾穩、幾夠氣...阿峯加油啊~期待佢下次嘅演唱會，希望到時買到飛支持佢啦...Good show~ ^-^

-------------------------------------------------------------------------------------------------

聽日黃小虹生日，今晚都唔知算係佢陪我睇林峯，定係佢生日我請佢睇林峯...Anyway, 祝阿妹生日快樂，身體健康，啲咳快啲好番，食多啲嘢啦，成日話減肥，次次同佢食飯都凈係食少少嘢，然後睇住我呢個生蟲家姐不停食...

Happy birthday and wish my dear sister always has good health!!!

Keep praying

今日Ceamy 老師又有少少情緒，從佢嘅說話、語氣，我完全感受到佢有幾難受...不過就算係首領(i.e. 我panel) 都未必可以guarantee 佢任何嘢，我只能夠喺平時講低B 無聊爛gag 引佢笑，令佢開心少少...我記得佢講過有一次佢瞓唔著，祈完禱就瞓到，希望佢會試吓祈禱，求主指引佢嘅前路...

又，今日知道咗一啲嘢，令我更加明白好多事唔係必然...Thanks for sharing your feelings with me...God will lead your way...

Revision w/ students

今日返午堂，之後約咗3個2E 學生去佢哋其中一個屋企同佢哋溫英文...由2點「溫」到7點，其實有一半時間我哋都係講無謂嘢，凈番一半時間溫書，仲有其中一個鐘tea break...不過難得佢哋主動話想溫書，幫得幾多得幾多啦...希望佢哋真係記得今日溫過嘅嘢...

閒聊期間，又了解呢幾個小朋友多咗...一個就連中二小女孩都明白嘅道理，點解我會唔明?真係枉我做咗咁多年人... : (

-----------------------------------------------------------------------------------------------

今日返崇拜知道又開洗禮班，開始諗洗禮嘅問題...唔知今年年尾洗禮好，定係出年年中先洗禮好...今晚問媽咪、黃小虹，佢哋都話今年年尾好啲，anyway，都要上咗洗禮班先，報咗、上完先再講...


P.S. 今日唔知發生咩事，係咁掃跌晒啲嘢...搞咩啊~ >.<

Researching w/ Wing + Dinner w/ 小姐

今日下晝約咗Wing Wing 去旺角一齊攞旅行資料，我哋暫定8月初去馬來西亞，不過有啲擔心如果遲啲中學都要停課，唔知仲有冇假放...攞完資料之後我哋去咗沙嗲王食 lunch + tea，兩隻蝗蟲居然食得晒差唔多3個人份量嘅嘢，好飽......

食完講完一大輪已經5點幾，返大埔同小姐食飯 (我真係飽到食唔落任何嘢，只可以飲嘢，然後睇住小姐食)...好耐冇試過凈係得我哋兩姊妹傾偈，感覺真好...

同小姐道別之後去大眾行咗一陣，買咗本《最好的時光2》，比較鍾意Wing + 方大同嘅故事...
好鍾意本書封底寫嘅呢幾句︰「回憶裡頭最好的時光，總是自動自覺配上了背景音樂。一句又一句的歌詞，成為了我們記錄那個時代日子人物情感的工具。」

開會日 + Dinner w/ colleagues

今日學生唔使返學，朝早開Staff Meeting...之後本來諗住同老師們出街食lunch，但係Ric 約我今日lunch 嘅時候俾林峯演唱會飛 & 保單我，所以最後好搞笑地同老師們去同一個地方食飯，不過我同Ric 坐一張枱、老師們坐另一張枱...

食完lunch 又返學校繼續開科會，我都覺得我哋好efficient，次次都比預計時間早開完，very good...

放工之後約咗Ceci、Michelle、Kenise、Grace 去尖沙咀食飯，我哋今晚食咗餐幾特別嘅俄羅斯餐，其實有live music 聽都幾舒服，不過真係大聲咗少少，我哋要趁佢哋break 嘅時候先講到嘢，好好笑...

今日好似做咗好多嘢，啲時間fully occupied，如果日日都係咁就好喇，就唔會有空閒時間諗無謂嘢...

Being neglected

今日我終於知道自己呢幾日發生咩事...

人與人之間嘅關係原來好複雜，唔係我一廂情願想對人好就可以，要雙方都願意付出先可以維繫...我發覺自己太傻、太多事，可能人哋根本唔需要我呢啲路人甲關心...

我擔心人哋，人哋未必知道；就算知道，都未必會多謝我...我諗我睇人情睇得太重，人哋一個反應、一個表情我都會好在意，實在太傻瓜...

我同自己講，由今日起唔好咁多事，如果人哋當我係朋友，自然會將心事講俾我知，使咩我咁多事主動問人...咁諗可能好消極，但係被忽視嘅感覺好差、好難受...

近來心情好差，都唔知要到幾時先會好番啲...唉...


P.S. 多謝銓銓今日放工之後又陪我做無聊嘢，大感激... T.T

Dinner w/ 肥佬哥哥 & 筠姐

今日放工之後約咗肥佬哥哥、筠姐喺尖沙咀食飯，我哋又去食上次食過嗰間日本嘢...

今晚我又食咗好多嘢，真係大件事，每次唔開心就會好想食嘢，咁食法遲早變肥婆...

多謝哥哥、筠姐今晚落力引我笑，但係我真係唔係好想笑...

呢幾日經常不自覺地嘆氣，好辛苦... : (

心血來潮唱詩歌

今日全日心情都唔太好，但係我仲未諗到點解...

下晝忽然好想唱詩歌，問銓銓放工得唔得閒陪我唱，佢又居然肯陪我...我(哋)唱咗好多首詩歌，唱完之後心情舒暢番少少...

雖然銓銓全程都冇開口唱，但係都好多謝佢肯陪我癲...

《誰曾應許》始終係my favourite，每次唱都會好感動，就算得自己一個唱都會好感動...

《誰曾應許》

誰曾應許 一生不撇下我
每段窄路 誰陪我去走過
誰還領我 於青草恬靜處躺臥 豐足恩惠比海沙更多
誰曾應許 天天看顧著我 晝夜眷佑 連頭髮也數過
誰還以愛驅走心裡懼怕怯懦 那懼路途捲動著漩渦

因你是我主我避難所 我盾牌和詩歌 你是我的高臺我隨時幫助
來吧 用信心讚頌和高歌 你永在我心窩
唯你有永生江河 除你以外不倚靠別個

我究竟算甚麼 神你竟這般顧念我

超哥畢業展@文化中心

今日如常工作，放工之後約咗同事們 (Incl. Fanny、Esther、Cindy、Rebecca、銓銓、其偉、廸廸、Wing Wing) 一齊去文化中心睇超哥嘅畢業展，超哥個design 都幾特別，超勁~

睇完展覽、影咗啲相，我哋一行10人去咗潮樓食飯，又邊食邊笑...好無聊...

今晚可以同大家一齊傾吓講吓真係好...但係今日硬係有少少奇怪嘅感覺，怪怪的......

煲歌時間

今日做咗好多嘢，好似好充實咁...

搭車嘅時候煲林峯啲歌，其實佢啲歌、佢嘅唱功真係唔差...聽番《你並不孤單》，啲歌詞好encouraging...

《你並不孤單》 林峯

你大概自覺不吸引　找不到戀人
你大概路過望別人 一個個熱吻
餐店中　完全賣氣氛
偏你卻是單身　令你不合群
可憐人　從沒有愛侶相擁一吻
你大概自尊心不再　再不敢出來
你大概害怕到未來　一世也沒被人愛
請看開　看別人甜蜜也許是意外
不只你　和自卑比賽

明日或者相愛變傳奇　但是你必先好好生活爭氣　
生命似在垂死　只會被嫌棄　在這殘酷世紀　不斷別離　
能自愛別與世間去比　讓自信優雅地哪愁沒運氣　
上天總找到你　來日註定愛的總愛你

你大概未搞清真愛　要等等不來
你驟看　幸福的一對不見背後漸忘愛
請看開　每段情其實也經歷苦海
不只你　有這種感慨

如若愛在世間總愛你

剪頭髮 + 六．四20周年

今晚放工之後媽咪陪我去剪頭髮，好耐冇試過剪到咁短，雖然唔係好睇得慣，不過都幾爽...

-----------------------------------------------------------------------------------------------

尋日係六．四20周年，今年有好多同事/朋友都有去維園燭光晚會...

我想講嘅係，我咁多年都冇去開，唔想為咗趁熱鬧而去...

縱然我冇大家嗰股熱血，但係我都有感覺...

------------------------------------------------------------------------------------------------

今晚無聊三母女有以下對話:︰

黃小虹︰我今日買咗隻龜公仔...(喺袋攞出嚟...)
媽咪︰幾得意喎...係女仔嚟0架喎...
我︰哈哈~係龜女嚟...黃花龜女...不過佢冇黃花...
媽咪︰插朵黃色花喺佢個頭咪係囉...
黃小虹︰ ......

<完>