2009 中一適應課程圓滿結束

今年嘅S1 Bridging Course 終於圓滿結束，thanks God...

今日係結業禮，其實有少少想同我班學生影啲相留念，不過今日時間實在太緊迫，完全冇空間做呢樣無謂嘢，所以只係喺操場匆匆忙忙影咗兩張大合照，都好過冇... ︰)

總結今年嘅感想︰自我感覺良好。可能因為有實習嘅經驗，覺得自己今年handle 各樣事情都比前年好，再加上今年有一位好幫得手嘅partner 幫我 (雖然有時佢會忙其他嘢唔得閒理我 ︰P)，所以感恩地冇出現咩大問題...

同埋最最最重要嘅係，今年我班學生超乖，乖到初時我有少少擔心佢哋會冇反應...好多謝佢哋呢兩個星期咁合作，喺適當嘅時候都會好投入、好有反應，真抵錫... ^3^

Last but not least, 我覺得今年同啲同事合作/相處得非常愉快，多謝大家嘅包容、幫忙，thanks a lot~

忙碌但充實的一星期

今個星期好似好忙咁，其實只係忙住做Bridging Course 啲嘢，英文科啲嘢完全冇做過，而家成枱都係未放番原位嘅書 (我已經將佢哋移晒去Ceamy 老師枱面喇，哈哈哈~借嚟擺住先啦，佢咁好人應該唔介意嘅)，等完咗Bridging Course 先執喇...

今個星期雖然忙，但係忙得嚟都幾開心，除咗因為又有得入班房教書之外 (雖然只係教簡單嘢)，仲有一個頗為重要嘅主因......或者咁諗真係好傻，不過學Wing Wing 話齋，可能咁樣都係一種幸福呢... ^-^

Still have 1 week to go, let's add oil together!

2009 S1 Bridging Course commences

今年嘅中一適應課程開始喇，今日又舉行咗一個頗為認真嘅開學禮，今日第一次見我嗰班嘅小朋友，first impression 覺得佢哋比較文靜、怕醜，冇其他班咁活潑，希望佢哋warm up 之後會肯講多啲嘢啦...

講番個開學禮，其實我只係負責打PowerPoint & 帶唱校歌，唔知點解會變成其中一個嘉賓，要坐出台前面，有點兒搞笑... ^.^"

一諗起由聽日開始要上堂、又要不停講嘢就有少少擔心，因為我啲感冒好似仲未清，把聲仲未開，又變咗爛聲人...希望過兩日會好啲啦...

Hope everything would be fine...

8號風球的晚上 + 換電話

尋晚12點前都仲好開心，因為收到Julissa 喺美國打俾我嘅長途電話，其實佢之前打過幾次電話俾我，但係因著各種原因我都聽唔到佢嘅電話，今晚終於聽到喇，好開心~Juli 話我知佢喺美國已經搵到工，仲講咗好多其他生活上嘅趣事俾我聽，知道佢喺嗰邊生活得開心就好喇，感謝主...

同Juli 講咗差唔多一個鐘電話，冇幾耐就掛8號風球，起初都只係好大風，只係吹到啲窗砰砰嘭嘭...但係過咗1個鐘左右就開始唔對路，冷氣機與窗框之間嗰條罅開始滲水，天呀~係3個冷氣機位一齊滲...唉...同媽咪一齊用膠枱布、膠盆盛住啲雨水，搞到4點幾先有得瞓...
死啦，而家風季先開始，希望今年唔好打咁多風，就算打都唔好打正我屋企個方向啦唔該... T.T

------------------------------------------------------------------------------------------------

近呢個星期我部電話唔知點解個mon 成日無端端自動變黑 / 自動熄機，我諗佢都係命不久矣，參考各方好友 / 媽咪嘅意見，大家都叫我趁佢未壞得晒快啲trade 咗佢換過部新機...尋日媽咪陪我去買咗部新電話，希望呢部唔好咁快壞...

正因為換電話，我尋晚又做咗啲好無聊 + 好白痴嘅事...好耐冇試過抄咁多字，抄到隻手指有少少痛...Though it's silly and time consuming, I do believe it's worth to do so... : )

Lunch w/ colleagues & watch 《殺人犯》

今日lunch 同同事們出街食飯，一行13人去咗和民 (其實應該有14人先啱，不過我唔記得咗召集一個同事，好論盡，真係唔好意思)...

多謝大家請我哋 (除咗我，仲有Cindy & Fanny) 食飯補祝 / 預祝我哋生日... ^-^

----------------------------------------------------------------------------------------------

夜晚放工約咗筠姐、Kitty、Kitty's 家姐一齊去睇《殺人犯》，我哋初時以為有7:30pm 場，去到先知道原來下一場要等到9:40pm，er...有少少搞笑...
雖然係夜咗少少，不過一心去捧Aaron 場嘅我哋都唔介意，惟有去食飯先，食完先去睇戲...唔知係咪搭車嗰時吹一吹風，食飯嗰陣一邊食一邊開始流鼻水、咳、喉嚨痛，應該係作感冒...食完飯去睇戲，一邊睇一邊流鼻水，好辛苦... : (

講番套戲，我覺得Aaron 做得好好，佢真係肉緊到頸筋 (唔係帶嗰啲頸巾 ^o^) 暴現，唔怪之得佢話拍呢套戲嗰排精神壓力好大喇...其實戲入面嘅血腥場面都唔係好恐怖，最恐怖嘅係筠姐間中會嚇到尖叫，我俾佢啲尖叫聲嚇親多啲...haha...
今晚終於捧咗Aaron 場，遲啲出VCD / DVD 一定要再睇多一兩次...

今晚真係唔係好舒服，下星期中一Bridging Course 就開始，如果到時傳染啲細路就唔好...聽日一定要去睇醫生先得，又要食葯，唉...... >.<

洗禮班．第一課

今日如常返工，放工之後同銓銓食個早飯，然後返教會上第一堂洗禮班...

睇番原本嘅schedule，洗禮班應該由7:30上到9:00，但係思惠姐姐話因為太多嘢要講，所以由今堂開始會改為由7:30 上到9:30...兩個鐘，越上越眼瞓... =.=

呢兩日又開始有兩聲咳，弊...

濕．熱

今日如常返崇拜，跟住返團契...

尋日應承咗爸爸今日一定會上嫲嫲度，所以團契未完就出咗去...嫲嫲屋企真係好熱，猶如一個焗爐，之後仲要做咗一輪體力勞動，熱到差啲抖唔到氣...真係熱死冇命賠... =.="

又，話說我嘅濕熱性肚痛已經維持咗整整3日，今日 & 尋日各飲咗一碗真材實料袪濕茶，今晚已經唔再痛喇， I love 袪濕茶~ ^3^


P.S. 我諗我又睇咗啲唔應該睇嘅嘢，係咪block 咗佢唔知、唔睇比較好?但係呢個方法治標不治本，要對症下葯先可以解決根本問題...唉...

Watch movie & dinner w/ 小姐 & Wendy

今日好開心，因為約咗小姐 & 好耐冇見嘅Wendy 去睇《冰河世紀3》，其實我冇睇過第一、二集，凈係知道應該幾好笑...睇完之後，發覺小姐真係冇介紹錯，啲笑位由頭到尾冇停過，笑到好辛苦... ^o^

睇完戲，我哋去咗食飯，今晚食泰國菜，雖然啲餸有啲辣，但係我居然食到少少，比起以前已經係一大進步...

今晚兩位美人又唔肯收番我錢，請我睇戲 + 食飯，thank you~ ^-^


P.S. 親愛嘅小姐又做咗啲我認為「好有型」嘅傻事，唔知結果會係點呢?希望小姐唔會再一次失望...

Dinner w/ Ric, Didi, Percy & Lolo

今晚約咗Ric、Didi、Percy、Lolo 喺大埔中心Shakey's Pizza 食飯...多謝Ric organize 呢餐飯，更加多謝佢分享嚟餐廳途中嘅「趣事」，我覺得呢個位置係全晚最好笑嘅位置，諗起都好想笑... ^o^

多謝大家請我食飯，可以見到大家真高興...得閒我哋要見多啲，update 吓大家近況...


P.S. 今日食完lunch 之後個肚無端端好痛，應該又係濕熱嗰種痛...聽日要去飲袪濕茶先得喇... : (

Dinner w/ Wing Wing @ Mong Kok

今晚約咗Wing Wing，先同佢去睇衫，之後再陪佢去買Grad Din 抽獎禮物，行到9點半我哋先去和花亭食壽司...

因為我哋好遲先入坐，坐低嗰陣已經差唔多last order，兩個肥妹又驚死唔夠飽叫咗好多嘢食，到最後食唔切 + 食唔晒，要take away...

多謝Wing Wing 今晚請我食飯，又食又拎真係唔係幾好意思...又多謝佢嘅手信 + 生日禮物，thanks so much~ ^-^


P.S. 早兩日又做咗啲我認為好傻嘅事，不過聽完小姐嘅故事之後，忽然有以下感想︰
We have to treasure our time and opportunities to do what we think are worthwhile, otherwise we must regret when we are in the heaven...

買相框 + 切蛋糕

今日如常返崇拜，完咗同銓銓去食lunch...食完lunch 銓銓話唔想返屋企住，就叫佢陪我去德福宜家傢俬買相框放超哥幫波波影嗰張相...

去到德福，竟然見到林峯喺商場簽緊名，原來佢喺嗰度有簽唱會，如果早啲知道我就早啲去啦，不過都借銓銓部相機遠距離影咗幾張相，好過冇... ^^

跟住行宜家，揀咗好耐，終於買咗個應該啱size 嘅相框...買完去美心攞咗個蛋糕，跟住就搭車返屋企...

夜晚食完飯，同3/7 5歲生日嘅蓉蓉一齊切蛋糕，希望蓉蓉身體健康、乖乖地、唔好咁惡死... ^-^


P.S. 今晚臨瞓前，銓銓喺MSN 講咗啲嘢俾我聽，個心又有少少唔知點咁...唔好諗唔好諗唔好諗唔好諗...

一年一度之牛一

今日又係一年一度嘅牛一，唔使返工，成日流流長，總算有街去、有啲特別嘢做過...

下晝Didi 約我喺apm 食tea，我哋去咗意粉屋，一人一個set，好味...多謝Didi update 咗佢嘅最新動向俾我聽，都多謝佢嘅耳環，好靚... ^^

同Didi 食完tea，又返大埔同肥佬哥哥、筠姐、Kitty 唱K，唱咗好多舊歌，其中唱咗Sammi、許志安演唱會medley，其實許志安啲歌都幾好聽，唱完唔知點解仲不停哼住《心血》...
我哋走嘅時候發生咗「走鬼」事件，哈哈~真係好好笑...... ^o^

今晚多謝3位俊男美女陪我過生日，更加多謝哥哥送俾我嘅靚錶錶 & 筠姐送俾我嘅mioggi (雖然唔係好識用)...多謝大家~ ^-^


P.S. 今年send SMS / MSN / Facebook message、打電話俾我嘅朋友比往年多，所以唔打算逐一喺呢度鳴謝大家喇...再一次多謝大家記得我呢個鵪鶉人生日... T.T

Pre B-day events & Yung Yung 5th B-day

今日好似好忙咁，全日冇停過手，好彩要做嘅嘢總算做完...Thanks God...

今日好開心，因為收到Ceamy 老師提早送俾我嘅生日禮物，呢份係我今年收到嘅第一份生日禮物，係靚靚Melody 筆，我諗我會唔捨得用...

跟住又收到Ceci 送俾我嘅好靚好靚好靚 (x 48次) 貓貓杯 & card，真係好靚啊~多謝Ceci~

然後又收到Rebecca 嘅姆明餅餅，多謝Rebecca~

跟住lunch time 首領請英文科同事飲茶，一行14人去咗新達，食到尾聲，居然有壽包嘅出現，大家仲為我唱生日歌 (註︰係傳統中文版)，好搞笑...多謝大家~多謝大家支持~ ^o^

今日keep 住少少hyper 嘅狀態，希望可以last 到聽日啦...

-----------------------------------------------------------------------------------------------

論盡嘅我再獻新猷...

話說尋日其偉幫我約office 同事們今日出街食lunch，首先多謝佢organize...不過後知後覺嘅我尋日放工先知道原來今日首領book 咗枱請英文科同事飲茶，喺只可以二選一嘅情況之下，我揀咗同首領佢哋出去食lunch...

真係十分抱歉，其實問心我係想同office 同事佢哋食lunch 多啲，不過...雖然呢餐飯食唔成，但係我已經收到大家嘅心意喇，再一次多謝大家... : )


P.S. 差啲打漏...今日係蓉蓉5歲生日，Happy Birthday to Yung B~ ^3^

7．1 假期

今日7．1，由細到大我對呢一日都冇乜特別感覺，只係覺得多一日假期可以抖吓、做吓自己想做嘅嘢都唔錯...

睇廣告知道McDonald 又有得換Hello Kitty，好似好得意...今朝媽咪去McDonald 買早餐俾我食，順便幫我換咗個士多啤梨Hello Kitty，士多啤梨身嘅Kitty 好搞笑...

之後下晝約咗廸廸、其偉 & 廸廸's 朋友去太子玩棋，由2點玩到6點，都ok 好玩...玩完棋同廸廸、其偉去女人街行咗一陣，跟住就返屋企...

夜晚MSN 見到Wing Wing，之後又同佢講咗一陣電話...臨收線嗰陣我同佢講唔好意思，因為又咁長氣阻佢咁耐，佢講咗句我覺得好好笑、但係又好warm 嘅說話...佢話「電話嘅發明係用嚟做咩?用嚟講0架嘛...」嘩哈哈~唔知點解我覺得好好笑...

Thanks my sis~You always support me wholeheartedly...Thanks so much! ^3^


P.S. 事實再一次證明忠言真係逆耳，我知道我要對自己所選擇嘅事負責任...總之後果自負就是了...