鄉中gathering

今晚放工約咗鄉議局啲舊同學喺沙田打邊爐,見到雞仔蘭、冰冰、Bobo、威威、哥哥、Kitty、筠姐、阿八、大頭May,好耐冇見佢哋,大家都冇乜點變… ^.^
可能我哋等咗好耐先齊人,所以唔係食咗好耐就要走,返到屋企沖完涼就要瞓覺,听日又要返工… : (

節目豐富的聖誕日

今日係聖誕節,約咗Able 同Victor 哥哥去街街,佢哋帶我去馬會飲茶(第一次去呢啲咁高尚嘅地方飲茶 ^.^”)…飲完茶我哋去沙田UA 睇哈利波特火雞的考驗,今次係我第一次喺戲院睇哈利波特,仲要係英文版,見到几個主角大個咗好多,啲男仔把聲都變晒老牛聲,感覺有啲搞笑,不過都几好睇,只係坐咗兩個半鐘坐到pat pat 同條頸都有啲痛…睇完戲之後我哋去咗食飯,學哥哥話齋,原來聖誕節食中餐仲開心過食西餐…

有Victor 哥哥同Able 陪我過聖誕真係開心,希望佢哋今日都係咁開心就好喇…


P.S. Able 送咗盒hand made 曲奇餅俾我,望落好似好好食咁,好嘢!不過今日哥哥又請飲茶、又請食飯,Able 又請睇戲,真係太客氣,搞到人家有啲唔係几好意思…

好平安嘅平安夜

今日放差唔多兩點先放工,返到大埔食完個快飯上咗Able 屋企幫Victor 哥哥整嘢,整到7點先走…
Victor 哥哥好錫我,佢送咗一條白雪雪頸巾俾我,有聖誕禮物收好開心… = )
離開咗Able 屋企之後去咗大埔中心揀禮物俾哥哥同Able,自己一個人行吓行吓行到9點几先返屋企…

返到屋企開信箱收到小姐寄俾我嘅音樂聖誕咭,好耐冇見過佢啲字喇,又諗起佢以前成日寫信俾我嘅日子…

今晚係平安夜,希望人人都過得開開心心,平平安安, Merry Christmas!!!!!


P.S. Julissa 唔好唔開心啦,聖誕節應該開開心心先係嘛,只要做好自己,就唔使為啲小人唔開心,你有咩唔開心記住同天上面嗰個講,佢一定會俾信心你0架! ^.^

入入入入入單

今個禮拜好多嘢做,日日都搞到差唔多7點先放工,喺新舊system 交替嘅日子,除咗好似平時咁開單之外,仲要不停將啲12月單入落新system,入到頭都暈...用落都係舊system 好用好多,都唔明點解要轉,做到個個都好忟憎,好煩呀…… @.@

秘撈

今日放工約咗Able 同Victor 哥哥喺大埔食飯,食完之後上咗佢哋屋企幫哥哥整理文件…其實真係几surprise 哥哥咁夠膽叫我幫佢處理啲paper work,其實我都唔知做唔做得嚟,希望唔會越幫越忙(如果真係好似佢咁講,我越幫佢就越忙就好喇)… ^.^

食buffet

今日如常返工,放工之後老細請食buffet,同啲同事由公司搭的士去尖沙咀,雖然唔係好多款嘢食,不過都ok 好味…
走嗰陣超凍,原來今日應該着厚啲嘅衫…

探嫲嫲+打針針

今日放工食完lunch 去咗探嫲嫲,好似好耐冇上去喇,曬咗几張畢業相俾佢,佢以為係上次associate 影嗰啲,猛問我"又曬過呀?係咪即係上次嗰啲?",都唔知點解釋俾佢知,好搞笑... : )

坐到5點就返大埔,等爸爸捉咗蓉蓉入去街袋就帶佢去打防疫針,原來而家蓉蓉有成9磅重,個鬼佬獸醫仲用廣東話讚佢好靚o添~ ^o^
本來諗住打完針就帶蓉蓉去洗白白,但係獸醫話其實貓唔係好需要沖涼,啲淋浴露味可能會令佢哋覺得自己仲污糟,沖緊涼嗰陣又可能會發癲整到手腳,所以最後都冇帶佢去...之後帶埋佢去吉之島接媽咪放工,啲姨姨姐姐個個都讚蓉蓉鼻高高好靚女,不過佢驚到震騰騰,食埋飯就同佢返屋企lu...抱咗蓉蓉几個鐘啫,對手仲痺過打完羽毛球,應該仲有几日痺... : P


P.S.尋晚唔知搞乜又發番嗰啲夢,唉...點解會咁0架...

唱k + shopping

今日放自己一日假同小姐、Wendy 去唱k,太耐冇听收音机,好多新歌都唔識唱,都唱咗几多舊歌,可能恨唱k 恨得太耐,可以同小姐Wendy 唱真係開心…

唱完之後我哋去咗行街買衫衫,真係唔可以睇小女人嘅購物慾,一發作起上嚟真係几得人驚…行完街喺仙跡岩飲咗杯嘢我同Wendy 就返歸食飯,小姐就約咗姑爺食dinner…

原來間唔中放自己一日假係咁爽嘅,如果有多几日年假可以任我几時放都得就好喇… ^.^

飲茶茶+媽媽牛一

今日1點放工就返大埔同Able、Victor 哥哥、auntie 喺潮江春飲茶,飲飲吓有好多悉心打扮嘅太太們嚟到打麻雀,嘩,嘈到不得了,本來我哋想坐多陣傾吓偈都坐唔到落去,惟有轉去McDonald 飲嘢,坐咗陣Able 就同auntie 返沙頭角,我就同黃小虹去吉之島接媽咪放工去沙田行西田…

今日係媽媽牛一,我哋喺西田掃完平零食之後去咗翡翠拉麵食飯飯,食完就返屋企lu…希望媽咪身體健康,工作順利…


P.S.呢兩日我隻左眼唔知點解間唔中睇嘢矇矇地,尋朝直情睇唔到個mon 啲字,所以放工去咗睇醫生,佢凈係俾咗支眼葯水我滴,希望過兩日會冇事啦…

HaPpY B-DaY To 小姐

今日如常返工,放工之後約咗小姐同Wendy 食飯飯預祝小姐听日生日,因為小姐放工放得比較晏,我就同Wendy 去和民等位食飯...唔知係等位等得耐咗少少,定係本身有少少唔舒服,差唔多有位嗰陣有啲暈暈地,搞到食飯嗰陣唔係好精神,真係唔好意思…不過見小姐都几鍾意份生日禮物,總算有啲安慰… ^.^"

希望小姐听日同姑爺去海水公園慶祝生日會玩得開心啦,23歲生日一世人得一次0架咋~ ^o^

畢業典禮

今日係畢業禮嘅日子,因為媽咪請唔到假嚟ceremony,爸爸媽咪同我惟有提早9點鐘出發去九龍灣國際展貿中心影相相,不過真係估唔到一個都算几大型嘅exhibition centre 會咁鳥燈黑火,開閃光燈影相又光到好似殭屍咁,唔開閃光燈影又黑到睇唔到樣,真係搞笑… ^.^””

影到11點几夠鐘rehearsal,媽咪同爸爸走先去食嘢,re 到1點放飯,呢頭買完嘢食,未夠1點半就俾人好似趕狗咁趕返入去會場睇唔同科嘅schoolmates 行禮,誰不知一坐低又話唔夠位俾啲guests 坐又叫返我哋出去,唉,玩咩而家?嗰下真係好嬲,好似俾人玩緊咁,啲安排亂成咁真係失禮死人…就喺呢段俾人趕返出去嘅空檔,黃小虹同爸爸嚟到,同佢哋影咗几張相之後就同Julissa周圍搵人影相,同到Anna、Frankie、Pele 叔叔影相真係難得… ^o^
影咗一輪相終於輪到我哋行禮,我同我隔離嗰啲同學好白痴,明明一人影一次group photo,但係我哋行咗兩轉影咗兩次,唔知個攝影師有冇發覺影極都未影完呢? : P
成個ceremony 差唔多5點完晒,留咗一陣我哋就趕返去荃灣還袍,還完之後喺荃灣食埋飯就返屋企lu…

雖然今日個ceremony 冇我想像中咁感動、咁興奮,但係都好開心,一世人得一次嘅畢業禮,我永遠都唔會忘記...如果媽咪都嚟到睇;如果二姨喺香港;如果Able 都抽到時間同我影著住畢業袍嘅相相就會更加perfect 喇...

繼續影相+ 金馬影帝

今日好好好開心,因為今日分別約到四位美人影相食飯…首先晏晝約到Kennis 同Julissa 陪我去HKU 影相相,多謝Kennis 喺百忙中抽時間出嚟同我影相相,如果同唔到佢影就會有啲美中不足…跟住要多謝Juli 嘅禮物,佢送咗個好可愛好軟淋淋嘅畢業Forever Friends bear bear 熊俾我,但係我冇買嘢俾佢,真係衰,多謝Juli,其實佢寫俾我嗰張咭咭嘅說話都係我想同佢講嘅說話,如果呢兩年冇咗佢,我又會好似讀AD 嗰陣自己一個孤伶伶,如果冇佢陪我一齊傾偈食飯、去library 搵書做功課同听我發牢騷,我呢兩年嘅大學生活就會好孤獨…Really thanks~ U.U

影完相相之後夜晚約咗小姐同Wendy 去旺角行街食飯飯,又可以見到兩位美人真係gd,食完飯又同佢哋影咗几張相,見到Wendy 搵到新工之後輕鬆咗好多真係好…

跟住返到屋企冇几耐接到Able 嘅道喜來電,佢話我知Aaron 攞咗金馬影帝,坦白講真係有啲難以置信,實在太開心喇,一路揸住個電話一路喊,我都話Aaron 喺<三岔口>真係做得好好0架啦…… T.T

今日實在太開心喇,真係好~~~~

影相日

今日返半晝,放工約咗Percy、Lolo、Kitty、Didi 、陳生、筠姐、哥哥、Miss Chow、Richard (希望佢唔介意我咁叫佢,因為我都係叫慣呢個名)喺Cityu 影畢業相,可能因為我之前喺屋企冇試著過件袍,所以著嗰陣又有啲論盡,thank you Percy、Kitty 幫我扣好~

唔知係太耐冇試過同咁多朋友一齊,定係喺公司實在悶得太緊要,影相嗰陣唔知點解覺得好開心,雖然有啲曬有啲熱,但係可以見到大家同大家一齊開開心心影一世人(應該)得一次嘅畢業相,真係好,如果筠姐冇咁早走我哋就可以齊齊整整咁影大合照lu…希望喺不久嘅將來我哋又會有gathering 可以聚埋一齊睇相啦... ^.^


P.S. 呢兩日媽咪塊面唔知點解好似有啲抽筋咁唔係好對路,佢今日去咗睇醫生,醫生話佢咩第七條神經線細菌感染,要去那打素做物理治療,其實望落都唔係好嚴重,應該好快冇事…… : )

吃飯

今日放工之後約咗Didi 喺大埔食飯,我哋又去咗仙茶居食,次次約Didi 喺大埔食飯都要佢陪我喺嗰度食,實悶死佢,不過我太愛茉香珍珠喇,好似飲上癮咁… : p

食完飯之後都差唔多10點,Didi 約咗陳生喺火車站送佢返屋企,我就自己返歸lu…

購物慾

死喇~呢几日購物慾超級旺盛,見到好多嘢都好想買,真係大件事……
麻煩大家如果見到我又想買嘢嘅話hold 一hold 住我,如果唔係日日帶飯返公司食都唔夠,可能要行埋路返工先得喇… ^.^""


P.S. 尋日睇報紙睇咗Able 第一篇有名出嘅稿,睇完都戥佢開心,Able 真係威水~　

Aaron Happy B-day~

今日係Aaron 生日,夜晚放工返嚟上網睇留言,好多fans 留咗言同佢講happy birthday,我都喺呢度祝佢生日快樂、永遠都咁fit 咁健康、舞技同演技都越來越進步、同埋可以成為金馬影帝~ ^.^

購物日

前排陪爸爸睇電話嗰陣我又睇中咗一部,又心思思想換,今日晏晝徵召Able陪我去買,本來諗住trade in 咗部舊机幫補吓,但係諗諗吓又唔係好捨得唔要佢,所以最後都係冇trade 到,留番嚟以備不時之需都好…

買完電話之後上咗Able 屋企坐咗陣,跟住又行番去大埔中心飲嘢,飲完再行咗陣我哋就各自返屋企lu…多謝Able 陪我買電話…


P.S. 媽咪又買咗套新Melody 床單俾我,好靚啊~我覺得呢套係4套之中最靚嘅... ^o^

Shopping Day

今日返半晏,放工又約咗Julissa 同Alice 去新都會廣場食和民,食完之後去咗隔離嘅葵涌廣場行街睇嘢食雪糕,Alice 同Juli 都買咗衫衫,我就冇買到,行到4點几我哋就分別喇…跟住去咗旺角搵媽咪同黃小虹繼續行街睇嘢,去味千食飽之後就返屋企lu…

唔知點解放半晝啲時間好似好使啲,又好似過得慢啲咁,唔使返工嘅時間真係爽… ^o^

Aaron 好嘢~

今日喺公司食lunch 嘅時候問容姨借咗份報紙嚟睇,睇娛樂版嗰陣睇到Aaron 憑<三岔口>首次被提名金馬獎最佳男主角,好感動啊~除咗超凡嘅舞技之外,Aaron 嘅演技終於開始得到其他人嘅認同,事實又再一次証明只要佢用心去做,一定會有人識欣賞…… T.T


P.S. 今日係爸爸生日,本來諗住同佢出街食飯,但係原來媽咪返工之前已經整好晒餸,惟有過几日先再算啦…

一年

今日晏晝同Able 去沙田睇<電車男>,都几好睇,好耐未試過睇完一齣戲會覺得開心感動,我諗我都係鍾意睇大團圓結局、開開心心嘅戲多啲…

今日係蓉蓉嚟我哋屋企一周年,佢係舊年嘅今日嚟我哋屋企,唔知佢覺得喺我哋屋企住開唔開心呢?雖然我哋屋企唔大又唔靚,但係都希望佢會feel 到我哋個個都咁錫佢,希望佢以後每一日都乖乖地、健健康康就好喇… ^.^

好感動

今日放工去探嫲嫲,佢隻腳唔痛lu,真係好,希望遲啲再凍啲都唔會再痛啦… ^o^

好頹...

今朝黃小虹又唔肯返學,叫佢返學好似叫佢去死咁,唉…對住佢就快黐線…… >.<


P.S.三年時間,心裏面嘅刺依然存在,好想知道呢條刺几時先會徹徹底底咁消失,如果我可以叻啲就好喇,如果因為咁樣冇咗一段有可能維繫嘅友誼,我會覺得好可惜… : (

醜死怪

今日返工又"賴嘢",又俾周小姐話,本來都冇事忍得住,uncle 嘅"安慰"說話反而令我更加想喊,真係冇鬼用…唉~最唔想發生嘅事終於都發生… T.T

悠閒的公假

今日係公眾假期唔使返工,晏晝同阿姨婆婆飲茶,然後陪爸爸睇電話,最後佢都係trade in咗舊嗰部買咗部新嘅…之後夜啲就同爸爸媽咪食飯,食完又同Able 行海濱傾偈,行到有少少腳痺…

今晚Aaron 又喺apm 搞簽唱會,不過又係要喺嗰度買嘢先有pass,如果專登去到冇得簽又好似好戇居,所以今次冇去lu,唔知多唔多人去呢?听日報紙應該有得睇… ^.^

特別的生日補祝活動

今日如常返工,放工之後約咗Kennis 同佢食飯補祝生日,去咗食越南嘢,好味好味(尤其係牛油雞翼,諗起都流口水 : p),之後Kennis 話想去水晶舖好似睇相咁叫個老闆指點迷津,點知俾人炳到一面屁,真係搞鬼,hahahaha… ^-^”
無端端俾人炳咗一餐之後送咗仲好驚嘅Kennis 去搭車,我就搭車返屋企lu…

呢啲咁特別嘅體驗,都係同Kennis 一齊先至有…


P.S.希望Kennis 真係鍾意份生日禮物,唔係氹我開心就好喇... ^.^

探嫲嫲

今日晏晝同二姨婆婆佢哋飲茶,黃昏同爸爸去嫲嫲度,唔知點解每當開始返風轉涼, 嫲嫲隻腳就會痛,反而夏天潮濕又冇風濕發作,真係奇怪…嫲嫲腳痛冇煮飯,又費事阻住佢休息,我哋坐到7點几就走lu…

爸爸呢期想買電話,我哋行咗去旺角睇電話,行到9點几就返屋企…

如果嫲嫲隻腳搽咗葯酒唔再痛就好喇...... : )

食LUNCH

今日返半晝,放工之後約咗Julissa 同Alice 去荃灣食lunch,其實Alice 已經教我行去食嘢嗰間越南餐廳,但係我搵嚟搵去都搵唔到,最後都係要Alice 接我,真係死得… ^.^”
食完都几好味嘅越南嘢之後,我哋本來諗住行去另一個商場睇戲,但係Alice 已經差唔多睇晒咁多套戲,凈番嗰兩套真係無謂嘥錢睇,所以最後我哋去咗許留山飲嘢傾偈,坐到5點几就各自離去lu…
唔知點解好似好耐冇見Juli 咁,希望好快又可以同佢吹水… ^^


P.S.尋日係Kennis 生日,唔知佢啲friend 點同佢慶祝呢?希望佢以後日日都開開心心,身體健康,次次GPA 過4,佢咁聰明一定過啦… ^_^

好難明的<長恨歌>

今日晏晝飲完茶,同Able 去沙田睇<長恨歌>,睇之前都預咗文藝片一定會有啲啲悶,但係一路睇一路覺得唔係悶咁簡單,而係唔係好明個故事嘅先後次序,再加埋啲間唔中閃出嚟嘅caption,搞到除咗知道鄭秀文不停同唔同男人親熱之外,其他真係唔係好明…唉,我呢啲冇乜腦、又唔想用腦嘅人都係唔適宜睇呢啲咁深奧嘅戲,睇到頭都大埋,下次等Able 放假同佢睇<電車男>應該會開心啲…

睇完之後我哋返大埔食飯,食完之後去咗行海濱傾偈,行完就各自歸家lu…
好似好耐冇試過行咁多路,對腳好攰… ^.^”

簽唔到名嘅簽唱會

尖沙咀個小熊國唔知几時接埋咗,變咗做Sogo,今日Aaron 去嗰度搞簽唱會,黃小虹唔願出街,凈番我自己一個去,唔知係多人去行街,定係多人去睇Aaron,我凈係知道周圍都係人,逼到死,如果就咁逼喺人群之中睇Aaron,我連Aaron 啲頭髮都睇唔到…其實"只要"喺Sogo 消費滿$500就可以排隊俾DVD Aaron 簽名,不過無端端又點會喺嗰度買到$500嘢呢,所以惟有喺上落escalator 嘅時候望多兩眼,跟手影張超超超wide shot… ^^”

雖然今日出去俾唔到DVD Aaron 簽,不過可以遠距離望吓佢,又听到佢唱歌,仲見到咁多人嚟撐佢,已經好開心... ^o^

好興奮~~

期待已久嘅日子終於來臨,等咗差唔多大半年<郭富城舞台寶典@舞林大滙演唱會2004> + <郭富城舞台寶典@飛越舞林演唱會2005二部曲>VCD & DVD 今日終於出,真係等到頸都長,今日全日都懷住興奮嘅心情做嘢,個心凈係諗住快啲做完嘢快啲收工,然後返大埔買碟,點知去到問咗兩間CD 舖都話特別版賣晒,好彩去到第三間仲有貨,不過要$398,比我心目中貴好多,但係學Able 話齋,鬼叫我咁愛佢咩,貴都照買啦… ^_^”

好開心行過咁多間CD舖,間間都播緊Aaron concert,而且搵得咁辛苦先搵到即係多人買啦,真係感動…… T.T

呵呵~我諗嚟緊嘅日子都會不停煲呢隻碟…… ^o^

開工大吉

前晚Able 喺台灣玩完返嚟,今日約佢飲嘢,多謝佢啲手信,有好好味嘅鳳梨酥、瓜子酥& 一隻搞笑膠匙羹,thank you~

听日Able 開始返新工,而家喺番大埔咁近唔使咁早起身,真係好好多...希望佢听日一切順利... ^-^


P.S.從一位朋友得知另一位朋友嘅近況,有啲odd...

自我增值

呢几日Able 同auntie 去咗台灣玩,冇Able send email / 打電話俾我,真係悶死,不過喺呢啲"空餘"時間,忽然好認真咁諗到底我最想做咩工,諗諗吓,我諗我最鍾意都係對住啲字,如果第時可以做啲同文字(只限中文)有關嘅工就好喇,就算人工唔高我諗都會做得好開心……但係我又唔係讀中文出身,如果真係要做呢類工作可能要讀啲course 自我增值吓比較好,等得閒啲就search 吓先……


P.S.睇咗几晚<大奧>,都几好睇,不過次次睇到一半就會喺梳化瞓著咗,如果可以早啲播就好喇... ^.^

發神經

今日晏晝公司唔係好多電話,就連容姨佢哋咁多客都唔係接到好多電話,可想而知呢兩日生意有几靜…唔知咩撩起個大聲公Manager,佢無端端話我冇嘢做,凈係坐喺位,講到好似我有嘢做但係唔做咁,真係黐黐地線,佢自己都有眼見有耳听多唔多電話打嚟落order,呢排生意靜咗佢冇理由唔知,所以听完佢咁講真係冇乜唔開心,只係覺得佢發神經…

唉…生意唔好就搵我嚟發洩,好心你督促班sales 搵多啲客好過啦…………… >.<

悠閒的星期天

今日晏晝飲完茶,約咗Able 去沙田行街,食咗好多嘢,食完tea 又食雪糕,好味好味…
而家一個星期就係得星期日可以真正休息,咩都唔使做,好懷念以前仲返緊學,成日都唔使返學凈係喺屋企hea 嘅日子… T.T

好沮喪...

今日返工好沮喪,坐喺我個位後面嘅叔叔成日哦我,其實我嘅一舉一動佢都睇得一清二楚,唔知點解呢几日更加覺得佢好煩好長氣,過份關心有時可能會變成壓力……
返到大埔同媽咪買嘢嗰陣同佢講番呢個situation,其實都預咗佢一定話:"你份工咁舒服,仲嫌辛苦,做嘢係咁0架啦,咁我點呀?唔通唔做呀?"諸如此類…佢真係exactly 咁講,嗰吓唔知點解覺得同佢講都嘥氣,跟住就當街當巷流馬尿,真係核鬼突…唉…只不過想同佢講吓呻吓啫,我發誓以後都唔會同佢講關於工作上嘅嘢…


P.S.尋晚同阿姨婆婆佢哋食完中秋節飯喺吉之島買咗一盒苦榮小苦妹月餅,呵~好得意,不過啲月餅好迷你…

有人請食飯

今晚放工又約咗Able 返大埔食飯,點知見到佢之後佢話搵多咗個人嚟陪我食,呵~原來Able 個哥哥都嚟,仲請我食飯0添,真係唔好意思,Able仲喺公司拎咗好多黑人牙膏同李錦記醬俾我,又食又拎,真係過意唔去…

遲啲都係要請番哥哥同Able 食飯先得喇… ^-^”

與Kennis 的一席話

今晚約咗好好好耐冇見嘅Kennis 食飯,諗諗吓原來差唔多半年冇見佢,同佢喺朗豪坊吃飯,佢送咗個 Melody 錢箱俾我,雖然我本身已經有一個,但係都好鍾意,只要係佢送嘅嘢我都鍾意0架啦! ^.^
Kennis 話佢暑假上practicum 有好多是非,啲同學成日針對佢,我會覺得可能有人妒忌佢叻啫,不過其實都係好自然嘅事,人多是非自然多,尤其大部分都係女仔嘅時候,所以除咗忍耐之外真係冇乜其他辦法,惟有做好自己本份,唔好理其他人做乜講乜,為咗啲小人整到自己咁嬲真係几笨…

最衰听朝一早要返工,今晚又唔可以傾耐啲,相信下次再見Kennis 應該係佢10月生日嘅時候,希望到時會約到佢呢個大忙人出嚟反啦…


P.S.等咗几個月終於知道last sem 嘅成績,雖然我冇Julissa 3科都係個位數字咁叻,不過都出乎我意料之外咁ok,唔知係咪Frankie 見我哋畢業所以手鬆啲呢,真係感動… T.T

飯局

今晚放工之後兩個Sales Manager 請晒全部sales 同counter staff 食飯,去咗我呢個大鄉里從未去過嘅葵芳新都會廣場食,一路食大家一路講是非,唔知點解真係覺得好好笑…

爸爸個朋友(即係介紹我做呢份工個叔叔)呢几日成日同我講,做嘢叻唔等如做人叻,識做人都好緊要,當然我都好明白呢個道理,但係我唔覺得逼自己帶住個假面具、係唔係都笑騎騎咁奉承其他人就叫做好識做人,做人做到咁虛偽咁假真係好可悲、好可怕…

DRINK ' DRANK ' DRUNK

今日放工約咗Able 喺apm 睇戲,我哋先去仙跡岩飲我至愛嘅苿香珍珠同食咗碗ok 好味嘅麵,然後先去睇<千杯不醉>,唔知係咪睇得太多吳彥祖拼楊千嬅,而且啲笑位又唔係真係太好笑,今次呢套只係不過不失,可能睇第二次已經唔識得笑lu…

睇完戲之後再行咗一陣吉豬島,買咗好好味嘅綠茶蛋糕,跟住我哋就一齊搭車返大埔…今晚雖然唔係見咗Able 好耐,但係有佢听我呻吓、發吓牢騷真係gd…


P.S.今日出咗半個月糧,好奇怪嘅感覺...

偶遇

今朝返工喺公司樓下撞到同學仔Alice,真係surprise,估唔到喺返工嘅地方會撞到同學,原來我哋喺同一幢樓返工,我喺16樓,佢喺21樓,如果就啱時間嘅話搵日可以約佢再約埋喺葵興返工嘅Julissa 食飯… ^.^

忙碌的週末

今日放1點,約咗Julissa 喺葵興地鐵站等,然後一齊去旺角食lunch,本來諗住去飲嘢,但係媽咪打晒鑼、發晒脾四咁搵我陪佢同黃小虹買書(其實係幫手攞書),所以就冇同Juli 飲嘢,真係唔好意思…
陪完黃小虹買書之後行咗陣街,我覺得自己好曳,未出糧就買咗個銀包俾自己,不過媽咪都知我恨買咗好耐,所以都"批准"我買,呵呵~好開心… ^_^
行完街之後上咗嫲嫲度食飯,食完就搭車返屋企,好攰、好眼瞓,好似瞓極都唔夠咁…


P.S.今年冇陪Wendy 過生日,希望佢今年生日都過得開心…HAPPY B-DAY~

提早慶生

听日係Wendy 同Silver 生日,今日放工同小姐去又一城買生日禮物俾Wendy,好在一開始就已經鎖定目標,諗住買個化妝袋俾佢,之後小姐提議買多盒mask,買完之後快手快腳包禮物,包嘅過程好搞笑… ^.^”
包完禮物之後Wendy 放工嚟join 我哋,我哋陪佢食飯,一路食一路傾偈,送埋禮物俾佢,坐到11點先搭車返屋企…好耐未試過三個一齊坐低好好地傾吓偈,真係好…


P.S.終於解開心裏面嘅疑團,更加明白人與人之間所有關係都需要不斷付出,只要其中一方唔想再繼續維持關係,就算係多年嘅友誼都可能會慢慢消失…

頸梗膊痛

呢兩日返工嘅主要工作就係打單、黐label 喺紙辦(唔知點解覺得有啲似喺庇護工場做嘢),全日total 黐咗差唔多4個鐘紙辦,臨放工見到我個manager 周小姐又拎咗一大棟紙辦出嚟,我估听日我又要黐埋佢,諗起都覺得個膊頭好攰… : (


P.S.原來就算唔使點樣體力勞動,凈係齋坐都會覺得好攰,好exhausting…

爛gag 王

今晚放工同Able 返大埔食dinner,去咗好好好耐冇去過嘅明皇食滑蛋雞扒飯,一路食一路搞爛gag (e.g.執髮人員,殺手陳環),我覺得好好笑… ^o^

听日又要早起身返工,好眼瞓… ZZzzzz

愉快的星期天

今日Wendy 難得放假,晏晝同佢行街街,我哋去咗几個地方,去咗新城市廣場、又一城同新世紀廣場閒逛傾偈,行到7點到就分道揚鑣,佢約咗教會啲朋友同大pat 陳食飯,我就約咗小姐佢哋gathering…

諗番真係好耐冇見佢哋,今晚一次過見到小姐、Silver、Gwai、趙肥(而家應該叫趙瘦先啱) & his gf、伍鈿瑋、李志豪、胡凱怡、常芷茵,我哋玩uno,好好笑,好白痴,咁耐冇見佢哋,听番佢哋衰衰嘅笑聲,感覺不錯…


P.S.因為上述其中一人嘅一句說話,尋晚臨瞓個腦又不停轉,不停諗嘢,搞到好夜先瞓得著…

返工工

星期一(15/8)開始返工,第一日我個department manager 請飲茶,之後嗰几日都係學落單、print 單、改單、背紙code,見到嗰堆紙名/code,先知道原來紙都有咁多種,真係背到有啲想嘔…直到第3日我張枱先駁好電話線,我先真真正正拎起個電話嚟听,不過由於我連code 都未背熟,所以主要工作都係接電話,做咗接線生… : (

總括嚟講,呢几日返工嘅感覺都唔錯,啲sales 同其他同事都几nice 几好人,不過見到其他同事好忙咁不停接電話落order,我就呆呆滯滯咁坐喺位望住啲"notes",嗰一刻真係覺得自己几冇用…
希望過多一兩個星期就會上啲手,唔使凈係望住其他人做嘢,自己就坐埋一邊hea…


P.S.其中一位同事叫容姨,佢好好人,好有耐性教我嘢,又會無端端唱歌,又鍾意笑,唔知點解覺得有啲朱咪咪feel… ^_^

再見喇...悠長假期...

听日開始返工喇,好緊張,好耐冇試過逼自己早啲瞓,都唔知瞓唔瞓得著...

返工之後就會冇咁多時間同蓉蓉玩,希望佢喺屋企乖乖地,自己搵嘢玩啦... ^.^

再見喇,我嘅long vacation......希望听日一切順利......

好充實

尋日媽咪爸爸放假,諗住同佢哋去東門行吓,反正我未去過,點知原來我本回鄉証已經過咗期好耐,趁未返工有時間,今朝9點就起身同媽咪去換回鄉証,去埋銀行,去埋吉之島買嘢食,跟住就返屋企...

晏晝約咗好耐冇見嘅小姐飲嘢,知道Wendy 轉咗新工之後成日都要出trip 真係辛苦,遲啲等佢得閒啲,約佢出嚟見吓食吓飯吹吓水就好喇...多謝小姐同Wendy 送俾我嘅頸鏈,好靚啊~我一定會成日帶... ^_^


P.S.今日終於食晒啲葯,食咗7個月終於食完,希望以後唔使再食... T.T
P.P.S. Kitty 生日快樂~今年唔可以同你慶祝,希望你喺Spain 有個好難忘嘅生日!

咬mic

今日Able 放假,晏晝同佢去旺角唱k (我哋稱之為咬mic),好耐冇同Able 咬mic 喇,我哋唱埋啲騎呢舊歌,好好笑,最鍾意歐倩怡首Get It Right,睇住歐小姐著到好似好型咁跳舞,笑到唱唔到... ^o^
咬完mic 之後我哋閒逛咗陣,跟住去吃飯,吃完之後就搭車返屋企lu...

今日雖然唔係見咗Able 好耐,但係好開心,下個星期嘅今日我就開始返工,都唔知到時仲可唔可以咁悠閒咁約佢出嚟反喇... : (

煩x1000000000000000000

直至而家呢一刻,黃小虹已經3日冇返屋企,打俾佢,電話冇電,佢又奉旨唔會打俾我哋...尋晚媽咪發晒癲喊晒話唔見咗個女點算好...唉...都唔係第一次,凈係暑假,佢差唔多一個星期唔返嚟瞓一次,次次都係電話都冇個,第二日就會自己"lan"返嚟,只不過今次唔係一晚,係連續几晚咁解啫...我同爸爸一啲都唔擔心,因為佢一定又喺唔知邊個friend 屋企瞓,又唔敢打返嚟...
頭先開ICQ 終於見到佢online,佢話喺個friend 屋企,听日返,唉...總算知道佢ok...

除咗我之外,都听聞有好几個朋友啲咁上下年紀嘅細佬妹都係咁,一樣係唔鍾意返學,但係又唔知自己想點......點解而家啲小朋友會咁樣?唔鍾意讀書,都起碼諗吓自己想做乜/做到啲乜,佢哋真係可以咩都唔諗,凈係識吃喝玩樂,化妝扮靚,瘟仔瘟女,etc......點解我哋嗰陣唔會咁樣?我哋嗰陣凈係知道要俾心机讀書,就算唔係好叻,都起碼俾心机溫過書、考過試,但係佢哋而家根本唔緊張自己學業,就算考第尾都以為自己好有型、懶係I don't care...唉...天呀~點解會咁0架?好煩好煩,就快俾佢煩死...... T.T


P.S.平時踎低起身見頭暈都好正常,今日坐坐吓企起身都暈,唉...

換新裝

今日心血來潮想換blog 個template,之前個白色底都ok,不過好似有啲齋,而家呢個新嘅好似colourful 啲,希望唔會太難睇... :p

聚舊

今晚約咗Julissa 同groupmate Alice去旺角睇<荒失失奇兵>,等Alice 放工期間,同Juli 行咗陣,Juli 似乎几鍾意我喺韓國帶返嚟俾佢嘅誠俊哥poster & postcard (隔咗咁耐先俾佢...^.^"),Juli 又好客氣咁送番生日禮物俾我,係本關於宗教嘅書,其實上次去書展都已經想買,好彩冇買到,Juli 揀俾我呢本應該會啱我睇...Thanks~

Alice 放工,我哋去咗食飯,食完就睇戲,之前仲驚唔好睇,但係原來好好笑,啲公仔畫得好靚、好精細...睇完之後Alice 走先,我同Juli 去咗飲嘢傾偈,坐坐吓唔覺唔覺就坐到11點,跟住各自歸家,返到屋企差唔多12點…

好耐冇見Juli,感覺真好…希望Juli 好快會搵到另一份筍工… ^o^


P.S.上次同Able 食飯佢送咗條靚靚水晶手鏈俾我,都唔記得多謝佢,thank you~

肚仔痾

蓉蓉由第一日嚟我哋屋企開始去廁所都好正常,但係唔知點解佢前晚無端端痾爛便便,以為佢可能只係食滯咗,痾一次半次都好正常,點知過咗一晚痾得仲犀利,一日之內痾咗5次,諗住帶佢睇獸醫,但係佢死都唔肯入去街袋...打電話去獸醫診所問姑娘,佢話會唔會係太耐冇俾杜蟲葯佢食,可能佢肚仔有蟲,姑娘提議我自己去診所買粒葯返屋企自己餵佢食,咁我就買咗粒葯返屋企...
夜晚等爸爸放工返嚟先餵蓉蓉食葯,隻衰豬係咁掙扎,又lur 番粒葯出嚟,到最後要3個人合力先餵到佢食...

今日佢冇再肚痾,仲非常生猛,係咁撩我哋玩,啲葯真使得,真係要keep 住隔3個月餵佢食杜蟲葯至得... ^.^

找到工作了

send 咗几十封email 搵工,上個星期同今個星期終於有得interview,計埋爸爸朋友介紹嗰份前後in 咗4次,頭嗰3次嘅經驗都尚算ok,啲interviewer 都几好人,問啲問題都唔算好難答,不過如果唔使無端端等足成個鐘先有人記得我嘅存在,感覺會更好...

前日就in 咗爸爸朋友介紹嗰份,要去到葵涌工廠區咁複雜,真係一大考驗,去到明明見到幢樓,但係唔知應該點行過去,又熱又曬,真係...去到見到個interviewer 周小姐,唔知係佢心情好,定係佢真係咁鍾意同我傾偈,講吓講吓不經不覺就過咗45分鐘;又唔知係因為爸爸朋友介紹嘅關係,定係佢真係覺得我ok,咁就in 成咗,不過佢話最快都要8月請齊人先開始返工,都好啦,終於有人請,實在太感動...

唉...最後都係要爸爸幫手先搵到工,都唔知好定唔好,不過算啦,有人肯請都偷笑,仲諗咁多做乜... ^_^"


P.S.二姨前晚喺英國玩完返咗嚟,今日上佢到攞咗好多手信同睇相,thank you uncle & 二姨... ^o^

MST variety show

今晚係莫壽增30周年variety show 嘅大日子,之前本來諗住同Juicy 佢哋一大班人一齊上台唱歌,但係我同Able 練得太少,所以最後都係冇同大家一齊上去唱,Able 仲臨時要開會嚟唔到睇,如果佢都嚟到就更加好喇...

今晚啲節目都几精彩,尤其係last 個音樂劇,真係好大製作,男女主角啲英文好好听、歌又唱得唔錯,雖然某啲位可以做得再好啲,但係都可以話係good show...

其實全晚最開心就係見番好多好耐冇見嘅老師,見到樊太、Mrs Lam、Miss Ma、周景華、李偉玲etc,估唔到樊太竟然仲記得我哋啲名,連我呢啲鵪鶉人佢都記得,真係勁~ ^o^

今晚好開心,見到choir 唱歌又令我諗起當年我哋一個個豆0靚練歌嘅情景,好懷念啊... :D

蓉蓉&我的牛一

尋日係蓉蓉一歲生日,屋企得我同黃小虹,所以冇同蓉蓉大肆慶祝,凈係夜晚開咗罐鱈魚貓罐頭俾佢食當係小小嘅禮物,可能佢食唔慣濕糧,佢食咗好耐先食晒,或者佢都係鍾意食乾糧多啲...遲啲等二姨喺英國玩完返嚟先問佢借天台補番個生日會同蓉蓉慶祝,希望到時佢唔會太驚... ^^

至於今日就係我自己生日,雖然冇人同我大肆慶祝,不過都做咗几多嘢、几開心...今日晏晝同爸爸去飲下午茶;之後就出去嫲嫲度坐咗陣;跟住返嚟大埔同Didi 食飯,食好耐冇食過嘅仙茶居,好味道,Didi 送俾我嗰個"飯盒袋"都好特別好搞笑,好鍾意,臨走嗰陣仲有幸見到陳生,幸會幸會;返到屋企切自己去聖安娜攞嘅蛋糕,好白痴,不過好開心...

尋晚好多朋友send ICQ msg/SMS/打電話俾我同我講生日快樂,喺呢度多謝大家...多謝Percy、Lolo、Kiko、Jackie、Linda、Richard、Julissa、Kennis、Didi、Richard's mom、Wendy、Able、Carmen、小姐,仲有二姨、表姐...Thanks~ ^.^

My b-day cake

B-day gift from Didi

21-25/6 in Seoul

20/6(一)
夜晚10點去到机場攞机票=>等到12點半上机

21/6(二)
韓國時間凌晨5點到埗=>自己一個搭巴士去東大門,表姐同佢個friend 喺車站接我(總算順利)=>返酒店沖涼,然後瞓覺,瞓到兩點先去街=>喺街邊小食亭食lunch (有啲熱,仲有啲貴)=>去買Laneige (表姐幫朋友買咗几千蚊,好驚)=>行超市(買咗包魚仔俾蓉蓉,希望返香港之前唔會碎)=>夜晚去食韓燒(唔係好夠飽)

22/6(三)
lunch 食石頭飯(好辣,原來我都食到咁辣)=>去梨大&新村附近行街(冇買衫,凈係買咗啲護膚品)=>夜晚食雞飯(以為唔辣,點知都係辣到飛起)=>返酒店敷mask

23/6(四)
lunch 食人參雞&鮑魚粥(啲粥好好味)=>行南大門&明洞,買咗好多mask &護膚品(啲sales 好好人,好好笑,不過啲韓國女仔直接將啲tester 搽上面,好恐怖)=>夜晚表姐同佢個friend 食辣窩,我惟有食唔辣嘅石頭飯(好似開始鍾意食石頭飯... ^.^)=>返酒店敷mask

24/6(五)
lunch 食韓式餃子年糕(好味)=>又去超市買好好味嘅餅餅做手信(雖然平,但係真係好好食)=>又去明洞買護膚品(表姐同佢個friend 買得好興奮,買咗好多)=>夜晚食壽司(喺韓國食日本嘢好搞笑)=>陪表姐買衫仔俾佢堂哥個仔=>返酒店=>夾$$落reception book jumbo taxi 听日去机場,夾夾埋埋都爭400 won 先夠,個receptionist 一路數$$ 一路衰衰咁恥笑我哋,但係又好好人咁自己攞400 won 出嚟俾我哋,買嘢買到唔夠$$搭車,真係樣衰... ^.^"

25/6(六)
因為大家都身無分文(冇晒韓幣,又費事exchange 得太多用唔晒),lunch 要食杯麵醫肚=>行商場(本來諗住齋行,但係原來啲舖頭仔都有得碌card,所以買咗條褲+搵咗好耐嘅銀餐具)=>冇$$冇嘢做,提早去机場=>8點上机=>好準時10點半返到香港

真係thanks god,呢几日都好好天氣,一滴雨都冇落過,如果唔係咁好天氣,一定冇咁好玩...

食又食過,玩又玩過,要努力找工作喇... :)

唔捨得蓉蓉

今晚10點要去到机場報到攞机票,搭12點半机,晨咁早5點去到首爾(好奇怪,都係漢城好听啲),跟住自己搭車去東大門,表姐就會喺嗰度等我...
好緊張~今次係第一次自己一個搭飛機,然後仲要自己一個喺唔熟悉嘅地方搭車,雖然表姐教晒我點行點搭車,但係都有少少驚...

連續5日見唔到蓉蓉,而家已經開始唔捨得佢喇... :<

不太快樂的爸爸節

今日晏晝同二姨婆婆佢哋飲茶,飲完同二姨閒逛咗一陣,然後等Able 喺KFC 嗰邊幫手搞完function 就同佢喺仙跡岩飲嘢,坐到6點Able 返屋企,我就上咗二姨度坐,等夠鐘先落去同爸爸媽咪二姨表弟黃小虹吃飯...

7點几落去到扒王之王,門口勁多人等位,好彩尋日book 咗枱,如果唔係實有排等...其實今日除咗係爸爸節之外,都係黃小虹生日,但係個八婆(因為嬲所以較為粗鄙)明知我book 咗7點半枱,8點都仲未到,成日出咗街就冇尾飛砣咁,打極電話俾佢都唔听,8點几先嚟到,嚟到又話唔食嘢,真係俾佢吹脹...

食完飯之後行咗一陣大百佳,跟住就返屋企...個死八婆一返到屋企就瞓覺,我就執行李,執執吓,表姐打嚟,我喺房听,我已經講得盡量細聲,個死八婆竟然話我嘈住佢瞓覺,然後大力掉我啲嘢落地,天呀~咩人嚟0架??我只不過講咗几分鐘電話啫,有几騷擾你呀大姐?真係就快頂佢唔住,再對住佢我好快會發癲... >.<

本來諗住開開心心慶祝吓都搞到咁,真係... :(

下雨天...心情煩躁...

下個星期出發去韓國join 表姐玩5日,今日晏晝去沙田買番份旅遊保險,順便諗住租部電話方便喺韓國同表姐聯絡,格完一輪價之後先發現原來我只可以租番Sunday 嘅電話,CS hotline 嗰位仁兄竟然話所有電話已經租晒,一部都冇,唉...點會一部都冇0架?!真係...咁惟有去到韓國我搵表姐,佢一定唔會搵到我...

搞完一輪之後返大埔,7點几返去莫壽增練歌,真係慚愧,人哋都練咗2次,我先練第1次,見到份譜,又發現原來我已經唔記得點睇譜,連邊行係alto 我都唔識睇,唱唱吓仲跟埋Able 唱soprano,但係啲高音又上唔到,真係死...希望練多兩次,听多啲會熟啲...

練完歌仔之後我哋几個女仔去吃宵夜,吃潮州打冷,可能少食(記憶中好似未食過),覺得几好味,不過食魚嗰陣真係要小心啲...

呢几日不停落雨,好煩...唔鍾意落雨......

和朋友們吃拉麵

今日晏晝要補習,唔知係太耐冇好用心咁計數,定係而家初中嘅數真係難咗,妹妹問我嗰陣都要諗好耐先答到佢,真係cheap...

補完習之後同Percy、Lolo、Kitty 喺大埔中心間味千拉麵食dinner,本來Didi 都嚟,不過佢好似話要提早同爸爸慶祝父親節,所以嚟唔到,如果Didi 都嚟埋就好喇,好耐冇見過佢喇...

食完麵之後搭Lolo 順風車返屋企,其實今日都唔係做咗好多嘢,唔知點解成日都好似好攰咁...老喇老喇....................

大嶼山之旅

啱啱過咗嗰個星期六、日(11-12/6)係公眾假期,班莫記舊同學(Juicy,咖哩,May姐,黎秀慧,Emily,吳進華,李頊珩,彭嘉豪,蘇詠雯,Able)加埋我一齊去大嶼山玩…
去到東涌食完lunch、買完BBQ 嘢食我哋就搭車去渡假屋,大家換好衫就去沙灘玩,我同Able 唔識游水,所以我哋凈係喺岸邊行吓浸吓水,佢哋就攬住塊浮床浮出出面玩,玩玩吓,佢哋番上岸,原來Emily 副眼鏡沖走咗,大家一齊搵,竟然咁都搵得番,真係神奇…4點几佢哋全部返上岸,大家一齊玩好耐冇玩過嘅集體遊戲,玩咗糖黐豆、估領袖、killer,玩糖黐豆嗰陣喺啲沙上面跑好辛苦…
喺沙灘玩到6點几大家就返渡假屋,跟住就係屋出面燒嘢食,可能係太熱太多蚊咬,大家都食好少嘢,燒完之後大家開始打麻雀…我唔係太好打牌,Able 又唔識打,我哋沖完涼就開始眼瞓,兩點几就瞓著咗,當時佢哋仲打緊牌…瞓瞓吓,忽然听到佢哋喺出面嗌到好大聲,仲砰砰嘭嘭,原來佢哋真係玩耍盲雞,真係估佢哋唔到…到天光佢哋先瞓覺,我同Able 先真正有覺好瞓…9點几我哋輪流起身梳洗,Juicy 煎埋BBQ 食凈嗰啲肉肉,跟住仲一人食一支甜筒先走,咁早食雪糕,好癲…
搭車出番東涌巿中心之後一齊去睇戲,睇<史密夫決戰史密妻>,見到Brad Pitt 同Angelina Jolie 兩公婆互打好好笑,不過有少少拖長嚟做…
睇完戲我哋就分道揚鑣,返屋企擺低'行李',去咗吉之島幫媽咪拎嘢返屋企,食完飯就一覺瞓到第二朝…

呢兩日同佢哋玩得好開心,大家成日唔停口咁講嘢&食嘢,好搞笑…期待下次同佢哋嘅另一個活動,應該都會一樣咁開心… ^.^

雲妮鍾情有Aaron

今朝10點903 有Aaron 專訪,已經專登校定鬧鐘起身听,點知都係唔知醒,10點8咁啱媽咪入房先俾佢嘈醒,miss 咗頭半個鐘,不過算啦,听到個半鐘都已經好好…
Aaron 解開咗小蝴蝶拍翼之謎,原來隻蝴蝶係控制台啲人用遙控飛機遙控器控制,所以就算Aaron 唔郁隻蝴蝶都識郁,好得意…Aaron 繼續保持佢一貫長氣作風,人哋phone in 問一個問題佢就講足十几二十分鐘,正一長氣佬… :p

好開心,可以喺收音機听到Aaron 把聲, Vani 多啲請佢上嚟做訪問就好喇… ^o^

相認

今日晏晝飲完茶,補完習,約咗Able…Able 就喺小朋友屋企樓下等我,雖然好耐冇見,但係見番都覺得好有親切感…我哋一路行一路冇停過口傾偈,夜晚去咗紅蜻蜓吃飯,吃完去咗海濱公園散步傾偈,行到11點先各自返屋企,可能我少做運動,所以返到屋企對腳有啲痺,不過好開心…
正如Able 講,如果知道見番會咁開心,早知早啲相認,不過而家見番都未為晚也,我哋以後都要keep 住成日見… ^.^

Encore again

今晚又同媽咪去睇多場Aaron concert,可能因為今晚坐得太高太遠,媽咪又太攰成日"恰"著(我成日用支發光棒棒整醒佢 :p),所以感覺上冇尋晚咁興奮…
不過Aaron 嘅表演同尋晚一樣咁精彩,尤其Aaron 同所有dancers 一齊跳group dance 嗰陣真係好好睇,全部人都咁pro、跳得咁齊、咁有power,真係正到不得了!識得跳舞嘅人(esp.跳得叻嗰啲)真係特別charming,所以難怪我咁鍾意Aaron… ^.^

Aaron呢兩次concert 咁成功,希望佢將來會繼續開,就算時間相隔得耐啲都唔緊要,只要佢肯開一定大把人睇…而家呢一刻希望Aaron 啲頭髮快啲生番出嚟,同埋快啲長番啲肉就好喇,太瘦唔好睇…




P.S.個腦不停哼住<岔口>,噢…有少少失落…

舞台寶典@飛越舞林演唱會2005二部曲

今晚同Kitty 去睇Aaron concert,雖然rundown 同上次part 1一樣,但係一樣咁精彩,咁興奮…

RunDown:
Intro:林海峰讀白,開場跳一段HipHop,演唱會開始...
1. 對你愛不完,第四晚心情
2. 遊園驚夢,一變傾城,風裡密碼
3. 鐵幕誘惑,複製靈魂,聽風的歌,最激帝國,痛哭
4. 絕對美麗,夏意識,Para Para Sakura
5. 失憶諒解備忘錄,望鄉,當我知道你們相愛,愛的呼喚,野草
6. 水手裝與機關槍,越愛越好,誰能代替你,錯愛的呼喚
7. 夢伴,壞情人,無心睡眠,狂野之城
8. 到底有誰能告訴我,我是不是該安靜的走開
9. 岔口,我為何讓你走(唱完之後, 就係色士風時間, 兩首歌各吹了一段),唱下去
10. 飛,動起來,唱這歌,無忌,分享愛(謝幕)

由於頗為興奮嘅緣故,所以思緒又好混亂,組織能力又開始下降,凈係得番呢啲感想:
- 每次喺intro 播Aaron 細個啲相嗰陣,唔知點解都會覺得好感動
- Aaron個光頭好令,不過睇睇吓都唔係咁差
- Aaron 好瘦,好似得番棚骨
- Aaron 啲衫好sexy,條褲好大個窿
- Aaron 今次吹saxophone 好叻,一take 過,perfect~
- Aaron件外套上面嗰隻蝴蝶仔好得意,唔知點解好似真嘅蝴蝶咁對翼真係會拍吓拍吓
- 香港樂壇冇人可以好似佢咁邊唱邊跳都唱得咁好,面不紅氣不喘(雖然偶爾會唔記得/唱錯一兩句歌詞 : p)

唉,好開心,听日同媽咪睇多場$100,希望一樣咁好睇… ^.^

唱歌仔+光頭佬

尋晚同今晚都接到莫壽增舊同學嘅來電,問我有冇興趣喺30周年校慶晚會唱歌,如果有就逢星期五返去練歌…反正未開始找工作,一諗起又有得睇Miss Chan 拍大脾就應承咗喇…唔知點解一諗起Miss Chan 拍大脾就好想大笑… ^o^

今晚Aaron concert Part 2開鑼,頭先上chatroom 睇相,原來佢鏟咗個光頭,oh my god...第一眼睇真係有少少ET feel,不過越睇越ok...如果可以揀嘅話,都係鍾意佢有頭髮多啲... ^.^"
星期五、六有得去睇concert,好緊張...

Mary Poppins

Julissa 今日晏晝嚟咗我屋企,我哋睇咗套應該係二次世界大戰後拍嘅Disney 舊戲Mary Poppins,個女主角Julie Andrews 好靚,唱歌好好听,如果佢仲健在嘅話,而家都應該6、70歲…
睇完戲之後上咗陣網,傾咗陣偈,8點几Julissa 就搭車返屋企lu…

夜晚上網search Julie Andrews 嘅嘢,原來佢就係The Sound of Music 個女主角,唔怪之得唱歌咁好听啦,忽然好想睇番晒佢啲戲…

long time no see

今朝同阿姨、叔叔、婆婆、表弟佢哋喺大埔中心飲茶,飲完之後閒逛咗一陣,跟住就自己去剪頭髮,剪完真係涼快好多,如果唔剪實熱死都似…

剪完就返屋企,正當以為可以慢慢攤抖嘅時候,媽咪竟然話我知我要去補習,唉…對住呢個咁"醒目"嘅小朋友,真係唔想去,但係喺媽咪嘅音波功之下都係逼於無奈要去…

補完返到屋企自己一個食緊隔夜pizza 嘅時候,接到好耐冇聯絡嘅Able 來電,太耐冇听過佢把聲喇,真係唔係好認得,所以好白痴地問咗句:"你係邊位?"…好耐冇同Able講電話,好開心,講咗差唔多一個鐘先收線,臨收線約咗佢下個禮拜日出嚟,好開心…好開心… ^.^



P.S.今晚叔叔返英國,10月又會再返嚟香港玩,希望佢一路順風…

last day

終於交晒全部assignment,一身鬆晒…雖然唔係好知自己寫乜(尤其篇dissertation),好嚴重,不過算喇唔諗喇...
交完嘢同Julissa 喺大家樂食咗個晏tea,跟住就搭車返大埔,落住傾盆大雨行去等車,上到車仲要冇位坐真係狼狽…
返到大埔同阿姨、表弟佢哋吃飯,二姨個朋友(i.e.叔叔)送咗一舊金(一個拎住畢業証書頭帶四方帽嘅千足純金公仔)俾我,話賀我畢業,仲倒咗少少紅酒俾我飲,啲紅酒好苦,成個過程好搞笑…

尋晚差唔多冇乜點瞓過,但係到夜晚都仲未眼瞓,忽然覺得好忐忑…唔知點咁…其實要開始搵工,不過好想攤抖一頭半個月先開始…好攰…好懶…



P.S. Thank you 叔叔~ ^.^

好慘...

尋晚個電話壞咗,"禁"極都唔着,已經心知不妙…

今日做完assignment 本來諗住自己返去交,但係個頭好痛,所以委託咗爸爸幫我返去交,順便幫我拎埋個電話去整…
唉…真係慘無人道…如果要整嘅話,電話裏面嘅所有嘢都會冇晒…天呀~我啲電話save 晒喺部電話度,而家一個都冇,要從頭再set 過;而且我之前影嗰啲相(e.g.蓉蓉,Aaron concert poster,etc)全部冇晒;上次俾$$ download 嗰几首歌仔都冇埋…
點解喎…點解會咁0架?可唔可以唔好咁...... T.T

harrods bag + godiva chocolate

多謝二姨's 朋友嘅禮物,包括:英國空運到港Harrods 袋 + Godiva 朱古力 + 茶包...

見到盒古古力好開心,我哋呢啲窮等人家平時唔捨得買咁貴嘅古古力,而家有得食真係好... ^.^



P.S.不過呢,婆婆今日又講咗啲好'硬耳'嘅說話,唉,好煩,講嚟講去都係呢句,都唔理人感受... >.<

10個懶 + Aaron concert 飛

呢几晚做assignment 做到都几夜,所以尋日同今日都偷懶冇返學,不過今個星期都已經week 12,我諗好多人都想多啲時間做嘢所以冇返學,老師們應該會體諒啩…

今日收到之前打電話優先訂購嘅Aaron concert 飛,坐第17行,對正個台中央,應該會睇得好清楚… ^.^

呢几日好頹,收到啲飛已經係呢几日最開心嘅事…

好過份...

尋晚黃小虹又冇返嚟瞓,電話都冇個,媽咪打電話俾佢都唔听,真係唔知佢想點…咁鍾意去人哋度瞓以後都唔好返嚟啦不如… >.<



P.S.可能呢排多嘢做,又激氣,尋晚臨瞓發咗一個小癲,唉…發洩完都好似冇乜改善… T.T

好多嘢做...

今日交咗Digital Cultures web site 同self-analysis,終於唔使再日對夜對住個web site,實在太好…唔知點解而家啲工作速度奇慢,以前用一晚可以搞掂嘅嘢,而家要足足兩日先做好,仲開始唔捱得夜,做到點零兩點鐘就會好眼瞓,咁我遲兩個禮拜要交嗰10000字點算呀??都唔知做唔做得切… =.=

Julissa 生日+<三岔口>+媽媽節飯

今日係Julissa 生日,HAPPY BIRTHDAY~祝Juli 日日都開心,唔會再成日亂諗嘢,科科都有good grades… ^.^

講番今日做過咩先…今朝上完Frankie 堂之後,我哋去咗PP 食餐豐富啲啲嘅lunch,我覺得自己好衰,冇買禮物俾Juli,希望佢唔好介意…

食完lunch 之後,Juli 返屋企,我就自己一個去amp 睇<三岔口>…之前睇影評個個都讚Aaron 啲戲進步咗好多,所以好期待可以快啲睇…
一路睇一路覺得Aaron 啲戲真係進步咗,好自然,尤其佢知道李心潔死咗喊得好犀利嗰幕真係做得好好,見佢喊得咁淒涼,差啲又跟埋佢一齊喊…
總括嚟講,呢套戲真係几好睇,10粒星滿分我俾8.5粒,因為好緊張刺激,啲槍聲好震撼(esp.戲院左邊喇叭槍聲好响,嚇死人),Aaron 演技大躍進…不過唔知係咪因為穿插四個主角嘅故事,所以有少少亂/虛無,對於我呢啲蠢人,真係有啲難明…

跟住夜晚同婆婆、阿姨、舅父佢哋提早食媽媽節飯,食完之後仲有媽媽節蛋糕食,好飽…

今日好開心,因為睇咗一套Aaron 做得好好嘅戲,very good… ^o^




P.S.今朝黃小虹又唔肯起身返學,到底佢几時先知道自己咁樣好有問題?
P.P.S.各位曾經听過我發牢騷嘅朋友仔、同學仔,辛苦晒….

Tasty cake for Mother's Day

洗白白

今日晏晝同爸爸一齊帶薯蓉去寵物店洗白白,沖完涼香噴噴啖啖肉好好味… :p
蓉蓉比起上次帶佢去街街嗰陣真係重咗好多,一來一回抱住個去街袋,對手好鬼痺,好似打咗兩個鐘羽毛球咁痺…

頭先行過報紙檔,買咗本men's uno,有Aaron、吳彥祖、鄭伊健做封面,影得Aaron 好靚佬,呵呵~好開心…不過呢排成日買雜誌,就嚟買到冇$$...

下個星期日就係媽媽節,冇買/冇諗住買禮物俾媽媽,好似好衰咁,不過媽媽應該唔會嬲嘅… ^.^”



P.S.尋晚<大長今>終於大結局,大部份香港人應該都會好失落… :(

men's uno -- Aaron,Daniel,Ekin

睇靚仔

今日媽咪放假,晏晝同埋黃小虹去amp 行吓...去到先知道原來陳豪、林峯、吳卓羲會去嗰度搞簽名會,食完嘢之後我哋就好無聊地坐喺food court 度等佢哋嚟...由於太多太太們想睇佢哋,我哋凈係坐喺度睇大電視就算lu...喺電視睇佢哋3個都好高大靚仔,林峯啲頭髮好鬈好搞笑...

睇完靚仔之後繼續行街,行到9點先同埋爸爸去打邊爐...返到屋企12點,好攰啊... ^.^

my website

Digital Culures 要整website,但係html 實在太難用,所以最後都係用Frontpage 嚟整...搞咗兩個星期,終於差唔多整好,好彩唔係所有嘢都要自己諗,如果唔係整32頁應該要成個月... ^^""
到而家都仲諗緊個website 交咗之後,到底post 唔post 出嚟俾人睇,不過copyright 的確係一個几大嘅問題,都係交完先再諗喇...

呢期好似好多嘢做咁,但係又唔係好想做,點算....... T.T

新貓糧

薯蓉呢排食多咗好多嘢,一日要倒兩次貓糧,次次個兜兜冇晒嘢食就喵我倒嘢俾佢食,再咁食法好快變大肥貓...

人哋話佢之前食開嗰隻BB 糧比較易食肥貓,所以上個星期攞咗另一隻天然啲、冇咁易食肥貓嘅貓糧sample 俾佢試,估唔到佢咁鍾意食...

尋日訂咗兩包3kg 新貓糧,今日就送到,真係高效率...兩包加埋6kg,應該都食到3個月啩... ^.^"

Natural Balance

煩死人

今日晏晝同黃小虹去旺角、尖沙咀行街睇嘢,本來都好地地,乜事都冇…之後返番大埔同媽咪食飯,食食吓唔知講開啲咩,我又開始話黃小虹,跟住唔知點樣佢又好似好唔忿氣咁喊,後來媽咪又喊埋一份…唉…都唔知點講…

自問都只係盡番少少做家姐嘅責任,佢越來越過份嘅行徑實在令我睇唔過眼…要提醒嘅都已經提醒過好多次,問題在於佢根本唔覺得自己有問題…

返到屋企見到薯蓉,忽然覺得都係蓉蓉最乖,蓉蓉唔會話唔想讀書,唔想返學,寧願而家出嚟做嘢;蓉蓉唔會成日都唔返學,唔溫書唔做功課,日日周街hea;蓉蓉唔會駁咀,話以後都唔想听到我把聲,話我煩;蓉蓉唔會凈係識使錢,貪靚,冇禮貌;蓉蓉唔會好似佢咁衰格…… >.<

last night

補埋今晚,以後就唔使再去帝欣苑同肥仔補習,對我嚟講,帝欣苑已經夠晒遠,每晚一來一回起碼1.5hrs,返到屋企成日攰到咩都唔想做,後日佢仲搬去林村咁遙遠,真係唔可以繼續補…

都好嘅,唔使補習就多咗好多時間做自己嘢,可以勤力番啲啲...不過未來嘅日子將會少咗一部分收入,真係要慳慳地,唔可以使咁多無謂錢… :(

同DIDI 去街

今日晏晝等Didi 放學,然後同佢去觀塘apm 食嘢、行街街,好耐冇見Didi 喇,佢1月生日,我今日先補送番份禮物俾佢,希望佢真係鍾意,唔好氹我話鍾意就好喇… ^.^

行完amp 之後一齊返大埔,陪佢買咗啲嘢,跟住就各自歸家…等大家遲啲考完試、交晒嘢一定要再約出嚟玩…



P.S.從Didi 口中听到一個好耐冇听過、但係成日都會諗起嘅人名,好奇怪嘅感覺….

買到Aaron concert ticket~

今朝本來諗住9點起身快手打電話訂Aaron concert 飛,但係因為太懶瞓,所以11點先起身打,打咗差唔多15分鐘先打得通(真係咁多人睇??係就好喇…),几驚俾人買晒…(好彩)最後都順利買到兩張$300飛同Kitty 睇3/6 最尾嗰場,好嘢~又開始好興奮喇…呵呵~ ^o^

再度生病

經過連續兩日頭痛+周身骨痛+發燒+喉嚨痛之後,今朝返學之前終於頂唔住去咗睇醫生,竟然係喉嚨發炎,點解會咁0架呢?一個完全唔食熱氣嘢嘅人竟然會喉嚨發炎… >.<

今日cultural tourism present,相比起其他group 嘅tour,我哋嗰兩個好似好普通好悶咁,不過算啦,pre 完就算,唔好諗咁多…

唉...連續兩個禮拜唔舒服,唔好再病啦唔該...



P.S.晏晝Kitty 打俾我話Aaron concert Part 2 好似開始賣飛,好嘢~~頭先喺巴士站見到Aaron concert 個廣告,background 同Aaron 啲衫都係綠色,好靚啊~~ ^.^

頭赤

唔知點解今日全日都頭赤赤,周身骨痛,好似俾人打咗一身咁,可能係唔夠瞓,希望瞓番一覺會好啲… :(

天天啊~

今日爸爸放假,晏晝同佢一齊出去嫲嫲度陪佢去銀行…由於嫲嫲行得唔係太快嘅關係,一來一回唔知點解用咗差唔多3個鐘,去完銀行返上嫲嫲度已經5點,再坐多陣就6點几,返到屋企7點…

今日本來冇乜特別事發生,最開心就係喺街行行吓,俾巴士站個雜誌廣吿吸引住,第一眼覺得cover個俊男好熟口面,睇真啲原來係天天嚟0架,好surprise~
送完嫲嫲返屋企之後就即刻落樓下買咗呢本叫HMC 嘅雜誌,不過呢,呢本係男人雜誌,好似唔係好啱睇…但係為咗天天,而且裏面仲有咁多佢嘅靚仔相,乜都抵番晒… ^.^

HMC cover -- Ken Chu

嘔嘔

尋朝媽咪同二姨婆婆去拜山,拜完拎咗啲燒肉返嚟夜晚煮瓜瓜,食完都冇事發生,我哋仲話好味…
今日晏晝食完個杯麵就出咗去同啲同學仔去粉嶺龍躍頭文物徑,越行越想嘔,個胃好似好頂…
返到屋企都係嘔唔出,走咗去瞓覺,瞓瞓吓突然好想嘔,拿拿聲走落床,今次終於嘔得出,仲一連嘔咗兩次,嘔完舒服好多,不過個胃仲係有啲頂住頂住咁,好辛苦…

今日除咗我之外,黃小虹同媽咪都又痾又嘔(爸爸冇食過尋晚啲燒肉所以冇事),罪魁禍首應該都係啲燒肉...
食唔落嘢,又全身攰lai lai,真係死火... :(

返嚟...

去完澳門返嚟,兩日不停地吃吃吃,吃到肥晒,不過啲嘢食真係好味道!
記得細個去親澳門都會去大三巴影相,難得今次帶埋阿女去,所以就同黃小虹帶咗佢去嗰度影相,好無聊呢~ ^.^”
我仲喺嗰度嘅八百伴買咗几樣水森阿土嘅嘢,如果喺香港買一定貴好多,好抵好抵… ^.^
最衰二姨同表弟& his gf 忙住執屋,如果佢哋都去埋多啲人熱鬧啲就更加好玩喇…




P.S.出發之前嗰晚薯蓉隻左眼唔知點解細咗好多,變咗大細眼,搞到出發前仲鬼咁擔心…呢兩日都keep 住打電話返嚟問爸爸薯蓉隻眼嘅情況,好彩冇乜事…今日返到嚟見到佢異常精靈活潑,真係好…

Tyra at Tai Sham Ba

有得唱k

今日同阿姨表弟婆婆佢哋飲茶,之後行几咗一陣大埔中心,行到兩點几就一齊去沙田唱k,呵呵~好感動,自從舊年9月同Wendy 補祝生日唱過之後,到今日先有得再唱,實在太好…

唱完k之後返大埔打邊爐,食完就返屋企執行李(所謂嘅行李其實只係几件衫),听日、後日同媽咪黃小虹三姨去澳門玩兩日,應該會係咁食嘢食嘢不停食嘢…… ^o^

My lovely Tyra

早几日喺yahoo 度以比巿價低嘅價錢bid 咗我第一個大Blythe ,等咗几日終於見到佢嘅真身…
呵呵~好開心,佢真係好靚女,第一次見到佢嘅時候已經覺得佢好似America's Next Top Model 個主持Tyra Banks,所以唔使點諗就幫佢改咗個名叫Tyra…

佢應該會係我嘅獨生女,就算想買第二個都冇銀兩喇… ^^"

Tyra - My 1st Blythe

好番好多喇...

今日放學同Julissa 去海港城訂本教html嘅書,訂咗之後就去探嫲嫲…

上到去,見佢食緊飯,行又行得快咗,好似好番好多咁,實在太好…
見嫲嫲好番咁多,個心都舒服啲,早几日除咗擔心佢健康之外,仲諗極都諗唔明點解有人可以完全唔關心自己親生阿媽,只係擔心已經唔係好多嘅家產將會點分,實在… >.<

嫲嫲

尋日放學之後去咗探嫲嫲,一上到去佢就話佢周身骨痛,自從我哋走咗佢几日都冇瞓過覺,只係食咗好少嘢,問佢睇唔睇醫生,佢終於話好,即刻打俾爸爸叫佢嚟埋一齊同嫲嫲去睇醫生…

今日返學之前又上過去一次,放低啲麵包,幫佢塗咗少少葯油就返學…

add drop

上個星期到今日都忙住搞add drop,好煩,如果add 唔到Anna 就要對住Masato 學用html 整homepage,直到現時為止我都仲未知咩叫html,死梗…

嫲嫲病了

今日晏晝同二姨婆婆佢哋飲茶,之後同黃小虹出發去探嫲嫲,上去之前同黃小虹行咗陣旺角,行到5點几爸爸就打嚟催我哋上去...嫲嫲周身骨痛,行唔到,食唔落嘢,我哋幫佢'摙'咗一陣膊頭,坐咗一陣就走喇...

其實佢自己一個人住,冇人照顧,要茶要水都冇人幫,但係佢又唔鍾意同人住,真係唔知可以點...希望佢好快就會好番...God bless her...

吃飯

今晚約咗小姐同Wendy食飯,食元祿,好味道…好耐冇見過小姐同Wendy,對上嗰次見佢哋應該係佢哋影畢業相嗰日,下次再約出嚟都唔知會係几時,遲啲小姐返新工要返shift就好難約0架喇… :(

听佢哋講返工都几辛苦,尤其Wendy,希望佢哋加油努力,一定要俾心机撐住啊~

Last semester & my 1st Mini Blythe

今日終於返學,一返到去就入錯課室(哥哥仲睇住我入去,好瘀皮… ^^””),問番office先知道原來timetable打錯咗,好多人都入錯,真係…見番好耐冇見嘅Frankie同Anna,真係好…

放學同同學仔食完lunch就自己去咗旺角閒逛,前几日仲心大心細唔知買唔買畢業mini blythe,行行吓見到佢真係几靚女,所以到最後都係買咗佢返屋企…我嘅第一個細b斯斯文文,著晒suit,又有畢業袍著,第時影畢業相可以帶埋佢一齊影…^o^ (唔知同佢改咩名好,遲啲得閒先諗…)

自己閒逛完就搭番車去銅鑼灣陪Kennis買生日禮物俾佢個friend,行到7點左右就搭車返大埔補習…

今日嘅行程好似好緊湊,好攰,听日又返9點,好眼瞓…



P.S.多謝Julissa嘅手信,好靚啊~Thank you~

My Mini Graduation Blythe

天天簽唱會

今日約咗Percy、Kitty 食lunch,好耐冇見過佢哋,可以坐低傾吓偈真係好...最衰我尋晚掛住睇<甜孫爺爺>,之後又睇埋<大長今>,11點几先醒起忘記咗打俾Didi 問佢得唔得閒出嚟食晏,如果可以見埋Didi 就更加好lu...

食完lunch之後,我哋喺二樓人逼逼咁遠眺喺樓下嘅天天,佢掟poster 俾fans 嗰陣都几好笑,天天每掟一次,樓下嘅女士們就尖叫大嗌一次,好好笑,好澎湃... ^o^
如果唔係咁多人嘅話,其實我都想排埋一份,可以近距離望吓佢應該會仲興奮,不過而家可以遠眺佢真人,都已經好開心...之前仲擔心冇乜人嚟,不過原來好多人都鍾意天天嘅... T.T

遠距離睇完天天之後,我哋行咗去睇衫衫,行到4點几我同Kitty一齊返屋企,Percy就去街街...睇吓遲啲可唔可以約埋Didi 出嚟食吓飯吹吓水,不過可能要遲啲先約得齊人lu...

行街街

今日晏晝同黃小虹去咗旺角,主要目的係去驗血,今次個姑娘(係咪叫姑娘呢?)啲手勢唔係太好,拮3次就痛3次,咁粗魯想痛死人咩... :(

之後就同黃小虹閒逛,陪佢睇B女,啲大B個頭太大好恐怖,見到都有啲驚...不過唔知係咪俾黃小虹日夜薰陶,我都好似開始有少少鍾意細B...
行呀行,行到10點几就搭車返屋企...

出面好凍,都係屋企暖好多...



P.S. 尋晚又發嗰啲夢,如果可以揀,真係寧願發會嚇到成個人醒晒嘅噩夢,都唔想發喺夢入面好開心嘅夢,醒咗之後好辛苦...

閒hea 一週

因為新年嘅關係,啲小朋友放假唔使去補習,所以呢几日大部分時間都喺屋企攤抖,應該係瞓得太多,所以好似有少少腰酸骨痛,真係...



P.S. 終於收到timetable,一個星期返6個鐘學,好變態...不過到底咩係Digital Cultures?一堆問號......

年初二

今日要去兩個地方拜年...

首先同黃小虹、爸爸去嫲嫲度,食咗少少嘢,坐咗陣,坐到3點几就搭車返大埔...

返到大埔行咗陣,買咗少少嘢,跟住就上婆婆度...上到去打咗一陣麻雀,真係好耐冇打過,一年打一次,下次打牌應該都係出年新年嘅事...打到7點几就食飯,食完啲大人又打過,咁我就繼續睇甜孫爺爺...睇完之後又落咗樓下買糖水食,食完就返屋企lu...
記憶中前兩年新年超凍,去完婆婆度拜年之後我就病咗,今年唔係太凍,真係好...

過埋今日之後應該都唔使去其他地方拜年,又可以繼續喺屋企發mould...

恭喜發財

今日係年初一,媽咪爸爸都要返工,唔使去拜年,全日喺屋企hea,同薯蓉玩...

新一年祝大家身體健康,唔會再有大大小小嘅病痛;
媽咪隻腳好快好番,唔會再痛;
今年畢業要搵工嘅朋友仔(包括我自己),好快搵到工;
大家愈來愈靚仔靚女,愈來愈省鏡!!! ^.^

總之就恭喜恭喜~




P.S.劉愷威......好可怕......

年三十

今日係年三十,晏晝同黃小虹去咗沙田睇<超人特工隊>,之前以為超能先生會係最好笑嗰個,點知原來彈弓女俠先至最搞笑...
記憶中Disney 好少用人做主角,今次一路睇一路驚嘆所有畫人嘅圖畫都畫得好精細,尤其嗰啲扮真報紙嘅scene,喺相入面嘅人好似真人一樣,真係好犀利...
睇完戲之後行咗一陣街,諗住新年買件新衫,唔知點解睇極都睇唔啱,反而買到一件啱媽咪嘅,算罷啦,都係買唔到0架喇...

夜晚12點几睇睇吓電視屋企電話响,仲以為係黃小虹啲friend 咁夜打嚟,點知原來係表姐打嚟同我哋拜年,好surprise,佢嗰邊都3點几喇,希望佢之後嘅旅程一切順利...

寫日記健康差?

上個星期某一晚听收音機,听到呢則有趣嘅新聞:

"英國一項心理研究發現,有寫日記習慣的人,健康比一般人差,同時亦是最不快樂的一群,他們容易出現失眠、焦慮和頭痛等心理病。研究結果顯示寫日記弊多於利,連研究人員都大感意外。不少精神及心理治療師以往都認為,寫日記有助疏導心靈創傷,令人情緒轉好,增強人體免疫系統功能。格拉斯哥喀里多尼亞大學研究員鄧肯說﹕「透過日記記錄私事、不愉快經歷的人,尤其是那些會翻看日記者,通常健康較差,傾向出現失眠、緊張、頭痛、消化不良及社交障礙等毛病。」
研究顯示,在日記中寫下情緒問題的人,較易患上頭痛及消化不良等健康問題。習慣翻看日記的人中,全具自我反省傾向,他們的健康情況最差,出現焦慮及失眠等症狀尤為嚴重。至於寫自傳、遊記、日程的人士,所出現的心理及健康問題相對較少,但健康仍較從不寫日記的人差。" (quote from Yahoo news)

睇完呢篇報導之後,我覺得自己好似都有呢啲毛病,不過到底關唔關寫日記事呢?真係唔係好肯定...
啲學者講到翻睇日記有咁多壞處,咁係咪即係寫完日記以後都唔再睇會好啲呢?但係...好難唔睇0架喎...盡量啦... ^.^""



P.S. 今日表姐生日,本來諗住打個IDD 俾佢,但係最後都冇打到,希望佢會收到我張ecard 啦...

no mood

今日全日唔知做乜,又唔係好想講嘢,但係一見到黃小虹呢支頂心杉就好想連珠發炮炳佢,再係咁落去恐怕喺不久嘅將來我會嘔血/爆血管而死...

周身骨痛,個肚又痛,嘴唇又乾,好憎咁樣... >.<



P.S. 後知後覺...總好過咩都唔知...

薯蓉拆線

今日薯蓉可以拆線,去之前同媽咪用咗差唔多半個鐘夾手夾腳先將佢'塞'到入去街袋,點知去到原來只要抱住佢,剪咗線頭拎條線出嚟就搞掂,前後都唔使兩分鐘,塞佢入袋仲用得多時間,真係搞笑...睇佢個傷口都埋得几靚,應該好番晒lu...

今日睇報紙,睇到前晚Aaron去領"香港舞蹈年獎",好開心,佢真係好叻!如果佢呢個獎可以喺我交上個sem 嗰份assignment 之前領就更加好,咁我就唔使搵料搵得咁辛苦嚟prove 佢係舞台王者... ^.^



P.S.唔知Julissa 而家喺L.A.做緊咩呢?有啲掛住Juli...

The Hong Kong Dance Award 2005

Aaron & the award

長途電話

今個星期請咗假唔使去肥仔度補習,所以連續3日都好悠閒咁喺屋企hea…

今日晏晝睇睇吓<季節>嘅時候表姐打嚟,佢話應該冇咁快返嚟,听佢講佢去咗好多地方玩(e.g. Gold Coast, Melbourne, Brisbane),好羨慕啊…

有啲掛住表姐,佢快啲玩完返嚟香港就好喇… ^.^

別舔傷口

今日晏晝薯蓉已經做咗絕育手術,去獸醫診所接佢返屋企嗰陣見佢好似好攰咁瞓喺個寵物店用嗰啲大籠入面,好似冇晒力咁,有一個大約3cm 嘅傷口喺佢個肚度,唔知點解嗰下覺得佢好陰公…

返到屋企,麻醉葯過咗,佢食得瞓得玩得,又好似冇乜事咁,不過真係好怕佢跳嚟跳去,又驚佢成日舔個傷口,萬一個傷口爆咗就真係大件事…

希望嚟緊几日佢乖乖地唔好亂嚟...

desex

今日晏晝打咗去獸醫診所度幫薯蓉預約星期日做絕育手術,雖然姑娘話係小手術,30至45分鐘就做完,但係話晒都係手術,一諗起就有啲擔心...
唔知薯蓉做完手術會唔會好痛、好唔舒服呢?不過呢個手術無論如何都要做,如果遲遲唔做,佢下次又係咁樣唔舒服就仲辛苦...
趁佢未做手術可以玩得癲啲就同佢玩多啲,佢做完手術之後嗰10日都唔可以郁動太多0架喇... :(

大個女咯...

呢几日都冇乜特別,都係晏晝喺屋企攤抖,夜晚去補習...

不過薯蓉就好似有啲唔妥...佢嚟咗我哋屋企咁耐都唔係好叫,就算叫都叫得好細聲,但係唔知點解呢兩晚叫得好頻密,仲好大聲,尤其係尋晚,叫得好奇怪,佢喺廳叫我喺房都听到,仲俾佢嘈到成晚瞓唔到,如果冇搞錯嘅話,佢應該係大個女想搵男朋友喇...
唔知佢仲會叫几耐呢?見到佢好似好辛苦咁喺地下典嚟典去,又冇胃口,希望過多兩日冇事就好喇...

visa

今朝陪Julissa 去美國領事館申請visa 去美國搵Mr. White,喺等佢嘅時候本來諗住坐喺領事館出面,但係因為落住毛毛細雨真係好凍,所以就自己行咗去置地附近搵地方坐...唔知係咪中環太多高級食肆,行咗好耐先搵到間JolliBee,一入到去先發覺唔多對路,裏面几乎全部都係外籍人士(包括收銀嗰位),買嘢食嗰陣原來要講英文先听得明...喺咁異相嘅情況下都要硬住頭皮繼續坐,因為咁凍天時費事周街行...

等咗一個鐘左右Juli 就搞掂,佢今次好順利咁攞到visa,希望佢去探愛郎會玩得開心啦~ ^o^

之後Juli 陪我返海富交學費,然後買飯拎上學校食,坐到3點左右Juli 去灣仔搵佢個friend,我就搭車返屋企lu...

唔知開學之前仲會唔會有机會見到Julissa 呢...希望佢介紹俾我嘅"名醫"真係肯幫我就好喇... ^.^"

好累...

尋日同今日爸爸都放假,呢兩日除咗去補習同去旺角驗血之外,仲連續兩日去咗嫲嫲屋企...

唔知係咪行得太多路,對腳有啲痛痛地、痺痺地,下次都係叫爸爸唔好慳嗰几蚊,由旺角行去深水埗,再由深水埗行去油麻地真係好鬼攰...

呢兩日都几凍,尤其出到街更加覺得凍...

好緊張...

今朝晨咁早去同肥仔補習,第一次朝頭早去,感覺唔係太好,除咗因為我好眼瞓之外,最大嘅問題就係佢個細細佬,唔知點解晨早流流咁好精力不停大嗌,真係嘈都嘈死...

補完習之後去咗大埔墟同媽咪爸爸飲茶,飲完之後去咗買貓床俾薯蓉,買完就搭車出中環會合Kennis 陪我睇醫生...
x'mas 嘅時候經過Kennis 一番勸導之後,都係決定快啲睇醫生搞番好塊面,所以今日就邀約佢陪我去睇佢極力推薦嘅專科醫生...一路睇唔知點解好緊張,不過我都覺得個醫生好好人,唔怪之得Kennis 話想嫁俾佢囉... ^O^ 不過呢,啲葯真係好貴,仲要食起碼4、5個月,希望快啲好番,唔該晒...
睇完醫生之後我哋去咗食糖水,原來嗰度就係蘭桂坊,我咁大個人都係第一次去,鄉下妹出城,真係失禮晒...

食完糖水之後我就搭車返大埔上二姨天台同媽咪啲同事&貓貓燒嘢食,本來以為會見到薯仔同小虎,仲可以帶埋薯蓉同佢哋一齊玩,點知去到先知道原來上面有隻狗仔,媽咪話驚薯蓉見到狗仔會驚,所以叫我唔使帶薯蓉過去,最後一隻貓都冇,全晚凈係得狗仔玩...

燒完嘢食返到屋企都差唔多12點,听朝又要晨咁早去肥仔度補習,一定唔知醒...




P.S.食咗葯嘅頭4星期將會不停"清瘡",好擔心...希望唔會太嚇人...

永不停止

空房間 冷掉的咖啡 在牆上的照片 退了色的從前 給我的信 還帶在身邊 一天看一遍
你想說的 我終於了解 停止了心跳停止了心碎 當初沒勇氣接受 請原諒我的脆弱
停止了時間停止了一切 怎麼可能忘記 說愛你 你可否聽見
如果能有機會 再次重來 握著你的手絕不放開 如何才能再次擁有你的愛
停止了回憶停止了呼吸 就當輸了將一切都忘記 至少還能幫助自己
every day every night I'll be missing you babe
every place everywhere I can see your face 停止少了你

愛心無國界& On Ken's Time

今日唔使補習,全日留喺屋企睇電視,成個晏晝凈係睇呢個<愛心無國界演藝界大匯演>,睇到好多好耐冇公開露面嘅歌星出嚟唱歌籌款,又睇到好多災民嘅慘況,一路睇個心一路好"up"...

唔知係咪全日夾夾埋埋听咗好多次大會主題曲<愛>,所以到個節目完咗之後我同黃小虹就好似傻咗咁不停哼住chorus 嗰几句:"不分遠近 不分富或貧 分擔責任同情共慰問 因我亦是人 為救急為活命 將愛心送贈 此際願世上每顆心都靠近"...

今日除咗听咗睇咗好多關於賑災嘅嘢之外,最開心嘅都莫過於終於買到朱孝天嘅首張個人專輯,等咗几年終於等到佢出世,真係望穿秋水...直到現時為止听咗成隻碟兩次,大部分歌都好好听,天天嘅搖滾味同仔仔、旭旭嘅冧冧情歌真係好唔同,我都係鍾意天天呢種band sound 味重啲多啲... ^.^
推介: <永不停止>,<可是我>,<一個好人>,<中計>,<領悟>
(P.S.天天首廣東歌啲廣東話好好笑,好似喺外國返嚟啲廣東話講唔正咁...)

Princess Shu Yung

Princess Shu Yung

今日晏晝好無聊,所以將薯蓉張擺晒pose 靚靚相post 上嚟...

新年伊始

今日媽咪同爸爸都放假,晏晝同佢哋去咗飲茶,飲完之後喺大埔中心閒逛,再跟住就同媽咪一齊去剪頭髮,剪完陪佢哋喺吉之島買完餸、買完嘢食我就去補習...

今日係Didi 生日,好衰地冇陪佢過,不過今年佢有陳生陪都唔使我陪啦... :P 祝佢以後年年生日都有人陪,日日都開心,越來越靚女~
HAPPY BIRTHDAY!!!!!



P.S.今日第一日試用呢個blog,開張大吉...