心情鬱悶

由9月3號開學到而家, 日日都要上Form 2 嗰層on duty, 日日兩個小息 + lunch 上去行, 除咗有啲攰之外, 身體好似開始有少少毛病發作出嚟...

前晚瞓瞓吓覺隻右腳無端端抽筋, 痛到醒咗, 真係好痛...如果大家有印象嘅話, 應該會記得我係有少少靜脈曲張, 照而家日日咁樣上上落落、來來回回、行嚟行去嘅情況嚟睇, 相信喺不久嘅將來左腳都會加入一齊痛...唉, 真係諗起都覺得痛... >.<

另外一樣呢, 就係自己攞嚟嘅, 因為差唔多臨近中秋, 又係食我最愛嘅月餅嘅好時節, 我呢當然又食咗唔少, 所以好似食滯咗, 呢几日個肚都唔係好舒服... ^.^"

唔知係咪因為以上嘅兩項小毛病, 搞到呢几日心情唔多好...頭先上到嚟見到自己個blog 黑沉沉咁, 又pat pat 痕想轉個望落精神啲嘅template 顏色, 我諗而家呢個新template 啲字應該易睇啲、望落應該會醒神啲啩... ^.^