返教會 + 璇璇's visit

今朝跟Office 同事Fanny & 銓銓返佢哋個教會 - 銘恩堂, 感覺良好, 我諗我下個星期應該會繼續返... ^.^
記得几年前都跟過Wendy 返佢個教會一兩次, 感覺都尚算ok, 不過好似有某啲section 唔係好知要做啲咩 (或者係我根本唔係好熟佢哋嘅程序), 所以感覺硬係差少少...

返完教會之後行咗陣大埔中心, 下晝返屋企本來打算瞓陣晏覺, 但係璇璇打俾我話佢入咗嚟大埔, 想上嚟我屋企坐, 咁我梗係唔瞓等佢嚟啦...我哋又雞啄唔斷傾咗差唔多兩個鐘, 冇見璇璇几個月, 璇璇又靚女咗 (佢喺度嗰陣冇同佢講, 因為我怕醜 : P)...仲有, 多謝璇璇喺杭州帶返嚟俾我嘅手信, 我會快啲試食...

好論盡...

今日真係好論盡, 臨放工嘅時候喺學校樓梯口唔記得點樣'kick' 咗一吓, 又跌倒...不過總算係不幸中之大幸, 因為嗰陣啲同事已經走晒, 又冇學生, 所以冇人見到我咁瘀皮嘅狀態, 如果有人見到都唔知會笑几耐... ^.^""

但係呢, 原來仆落啲地磚度都好痛, 雖然冇擦傷, 但係兩個膝頭瘀咗, 好痛...... >.<

與同事們打邊爐

今日要返工, 放工之後約咗Retreat Camp 時嘅cell group 同事們去大角咀打邊爐...今次由Ceci 帶路, 去咗一間比較大排檔feel 嘅舖頭打邊爐...
我哋一行6人竟然坐得落for 兩個人坐嘅枱, 雖然真係有啲逼, 但係啲嘢食真係几新鮮、几好味...咁多嘢食之中, 我最欣賞個薯仔蕃茄 (仲有粟米)湯底, 煲湯拎到嚟嘅時候啲料仲係新鮮, 到開爐先開始煲, 啲湯好好飲...仲有個檸檬薏米水都好好飲, 好重檸檬味但係又唔酸, 好味~

打完邊爐我哋班大食妹居然仲未飽, 我哋又跟住Ceci 行去廟街嗰頭嘅松記食糖水, 一人叫啲share 一齊食, 好好味仲好抵食0添啊...

食埋糖水之後大家終於嗌飽喇, 好滿足呢...同大家一齊食吓嘢、傾吓偈真係開心, 下次再約過... ^.^

頭痛 + 肚痛的平安夜 / 聖誕節

尋日平安夜同今日Christmas 都冇去街, 留咗喺屋企攤抖, 主要原因係因為冇人約& 個頭、肚都痛, 唔知點解痛足兩日, 食咗Panadol 個頭都仲係赤赤痛, 唉...唔知做乜...

今晚早啲瞓希望听日唔痛啦... >.<

蓉蓉B 打針日

由今日開始放一連几日嘅聖誕假, 今日打算帶蓉蓉B 去打一年一次嘅防疫針, 不過捉蓉蓉B 入去街袋又係一項偉大嘅工程, 爸爸几經辛苦先捉到蓉蓉B 入袋, 隻臭B 仲要一入到個袋就開始鬧我哋, 哼~正臭B... : P

震騰騰嘅蓉B 去完獸醫診所打針一返到屋企又生猛番晒, 真係激死... ^.^"

Teachers' Retreat Camp

今朝係學校聖誕崇拜 + x'mas party 嘅日子, 本來都几開心, 但係今朝個崇拜真係超悶, 表演嗰兩位小姐真係盞鬼, 佢哋唱歌個key 高到應該凈係得佢哋唱到, 叫啲學生(even 老師)點跟佢哋一齊唱呢...呢個崇拜真係悶蛋到爆, 連老師都覺得悶, 唔怪之得啲學生都瞌眼瞓...Zzzz...

啲學生放晒學走晒之後, 輪到老師大食會, 食完豐富嘅午餐之後, 全體老師(包括我哋)一齊搭旅遊巴出發去粉嶺camp site 去兩日一夜嘅退修營...

呢兩日大家主要係聽talk / workshop, 聽完我都有啲得著, 不過我諗老師們嘅得著應該更多...不過其實呢兩日嘅camp 最開心係夜晚有機會同啲同事好好傾吓偈, 分享吓大家工作上、家庭上、信仰上嘅感受, 我哋几個人由8點几傾到11點几, 知多咗大家嘅嘢, 感覺上同大家熟咗好多咁, 感覺好好呢...

同埋呢, 今次嘅camp site 真係几靚几新, 基本上同3星級酒店有得比, 最開心係兩個人share 一間房有電視、仲連廁所, 有電視睇又唔使同其他人一齊排隊等沖涼洗面, 好感動啊... ^.^

雖然今次兩日一夜嘅camp 係短咗少少, 不過節目(仲有膳食 : P)都好豐富, 同大家又好似親近咗好多咁, feel so good...唔知下次同大家坐低傾偈會係几時呢?希望好快又有机會啦...

有禮物收...

今朝Office 嘅同事Esther 送咗一本靈修書 + 一個好可愛嘅羊咩咩書籤俾我, 好多謝佢啊~我會用心睇晒本書0架喇...

跟住到差唔多放工嘅時候小雲老師又話有嘢送俾我, ha, 估唔到又係羊咩咩書籤 (好彩唔同色, 一個啡色一個白色), 多謝晒呢...

今日有咁多禮物收, horhorhor~ ^o^

Shopping, eating & playing w/ Kennis

今日本來約好Kennis 同佢影畢業相, 但係Kennis 諗諗吓得我哋兩個人, 冇人幫我哋揸機, 所以想等埋另一個同學出完trip 返嚟先一齊影...

所以今日我哋改變行程, 我哋去咗銅鑼灣行街買x'mas gift (我主要係負責睇、唔係買), 一路行我睇中咗一個Melody & Kuromi 杯諗住買俾自己, 但係Kennis 又話要送俾我當x'mas gift, 多謝晒~ ^.^
=> 行到咁上下我哋去咗食飯, 去咗食越南嘢, 全部嘢食都好好味, 不過好似好熱氣...
=> 食完飯, Kennis 陪我去買一樣小禮物送俾蓉蓉B, Boxing Day 先送俾佢, 希望佢會鍾意玩啦...
=> 之後我哋去咗機舖打機, 打太鼓打到兩個隻手好攰...跟住我哋剩番一人一個金幣, 諗住求其掟彩虹掟埋佢, 點知我亂咁掟都中到綠色 (應該係第二細嘅獎, 我得到一本迷你簿仔), 都几lucky 喎...
=> 打完機玩完一輪之後, 我哋去咗杏花樓食糖水, 好味...
=> 到我哋差唔多分別嘅時候仲出現咗「血的疑惑」, 好搞笑, 不過應該冇事嘅... ^.^"

今日同Kennis 吃喝玩樂咗成個下晝 + 夜晚, 雖然都几攰, 但係好開心呢... ^o^

1212 我的屬靈生日

尋晚係一個頗為難捱嘅晚上, 其實真係好想打電話俾任何一個當時喺我腦海出現過嘅人訴苦, 但係半夜三更, 就算人哋未瞓, 都唔好意思咁夜阻住人哋休息, 所以最後我選擇咗向天父禱告, 因為喺呢啲夜深人靜嘅時候就只有天父未瞓、兼且會耐心垂聽我嘅禱告...祈完禱之後心情總算平伏番少少, 輾轉反側到兩點鐘終於瞓得著...

今日係學校陸運會, 今朝6點几起身, 雖然瞓得唔好, 又唔夠瞓, 但係心情出奇地ok...一去到運動場見到小雲老師, 唔知點解有股衝動要搵佢傾訴, 但係礙於大家都要做嘢嘅緣故, 我哋直到食完lunch 先有時間傾偈...其實同小雲老師傾完偈, 心情已經好番好多, 好似已經諗通咗一啲嘢, 知道自己將來應該點做先唔會再令事件重演...

正當我以為我哋嘅對話就此完結之時, 小雲老師問咗我几個關於信仰嘅問題, 然後問我想唔想決志相信主...可能係因為尋晚喺我最無助嘅時候有天父肯聽我嘅禱告、又賜我勇氣去承認佢嘅存在, 所以我竟然冇再好似以前咁斷然拒絕, 我好馴服咁由小雲老師帶領入到一個稍為安靜啲嘅房間、喺佢同埋另一位老師嘅見證下決志相信主, 我哋3個人一齊合埋眼祈禱, 當我張開眼嘅時候我見到小雲老師喊緊, 見到佢喊我當然又跟住一齊喊, 多謝你啊小雲老師~多謝你嘅鼓勵, 更加多謝你嘅關心、愛護, 從你比我更快感動到喊我就知道你有几愛錫我喇... T.T

唉, 終於親身體驗到咩叫做「塞翁失馬、焉知非福」...

雖然因為尋晚嘅事令我覺得自己好似已經失去咗兩個親人, 但係又因為心裡嘅不快, 忽然讓我有決心、勇氣去承認上帝喺我生命裡面嘅存在...正如Julissa 所講, 上帝已經為我安排咗一間好好嘅學校、老師, 好讓我有机會認識佢, 從今日起我就要學習成為一個上帝悅納喜歡嘅人...

另外, 從今日起我終於可以名正言順地話俾人知我係基督徒 (之前人哋問我, 我會唔肯定地回答︰「我唔知我算唔算係, 我冇返教會, 但係其實我信上帝嘅存在嘅...」: P ), 原來可以堂堂正正地話俾人知自己係基督徒嘅感覺係咁安然舒坦...

今日12月12日係我嘅屬靈生日, 今日已經有几位老師恭喜咗我喇 (唔知點解佢哋會咁快知... ^.^"), 感覺好奇怪但係又好多謝大家對我嘅重視...好多謝大家啊... ^-^

...

原來半夜三更想搵個人傾吓偈、訴吓苦, 但係又搵唔到嘅感覺係咁無助... T.T

第44屆金馬獎頒獎典禮

今晚又係一年一度金馬獎頒獎典禮嘅大日子, 今年Aaron 有份憑《C+偵探》角逐最佳男主角, 所以今晚我又好乖咁坐喺電視機前面等Aaron 出鏡...

其實成個頒獎典禮都几悶, 最乞人憎就係一段喺亞視播、一段喺國際台播, 跳嚟跳去想點唧?真係頂亞視唔住... >.<

好不容易捱到頒最佳男主角, 今次由梁朝偉稱帝, Aaron 冇得3連霸, 不過唔緊要啦, 人家朝偉拍咗咁多年戲都係第3次做金馬影帝, Aaron 只要繼續努力下次又會有机會攞獎0架喇... ^.^

心情不錯的一天

今朝一早老細又如常吩咐我做嘢, 講完一輪正經嘢之後, 佢問我張枱有冇得「攝」磁石, 我話冇啊, 跟住佢就拎咗一pack 貓貓磁石過嚟話送俾我, 呵呵~好開心呢~原來老細都知我鍾意貓 (其實我擺咗蓉蓉B 張相喺枱頭, 如果佢視力正常嘅話應該都睇到嘅... : P), 多謝老細啊~我嘅老細真係一個好到加零一嘅老細嚟0架... (好老土嘅助語詞 ^o^)

跟住今日又俾老細知道咗我當值嗰層嘅中二細路個個都叫我做萩姐 (其實都叫咗差唔多有兩個月喇), 唉, 我都唔知點解我個名一定會俾人加個「姐」字喺後面咁叫, 不過佢哋肯咁叫我即係代表佢哋應該唔憎我, 應該都係好事嚟嘅... ^.^

今日依然好攰, 不過好開心呢...

《C+偵探》之謎

早几日見到《C+偵探》出咗VCD & DVD, 今日終於買咗隻VCD 返嚟睇...今次雖然係喺屋企睇, 但係我都好留心, 因為其實第一次喺戲院睇嘅時候唔係好睇得明邊個殺咗邊個, 今日喺屋企好專心咁睇多一次之後明咗好多喇...但係, 請問有冇人知點解Aaron 會叫黃德斌做雙眼人呢?唔係好明... ^.^"

真係好耐未試過喺屋企睇VCD 睇到坐定定冇離開過張梳化 (除咗換碟嗰陣)；又估唔到喺屋企睇都俾佢啲爆炸、失驚無神跌嘢落嚟嘅場面嚇到個心離咗一離, 真係不愧為驚嚇懸疑鬼片... ^o^

電髮電髮好易發

我啲頭髮又開始去到一個唔長唔短、唔直唔孿嘅階段, 每次見到自己啲頭髮咁樣就好想一係夾直佢、一係電孿佢, 其實直頭髮真係方便好多, 求其梳兩吓就可以出門口, 但係我太少頭髮, 夾直嘅話望落又得番好少頭髮咁, 所以最後都係決定電孿佢罷啦...

今晚趁黃小虹肯陪我去整, 放工之後去咗旺角電髮...電完之後我哋去元綠食咗個late dinner, 原來肚餓嘅時候真係食咩都好味啲... : P

不過一諗起以後每朝要再早少少起身gel 頭就開始覺得眼瞓...Zzzzz...

小雲醫師再次為我診療

今朝監完考, 下晝稍為得閒少少, 小雲醫師又出手為我診療, 今次唔係按摩雙手, 而係按摩雙腿, 其實真係有少少唔好意思, 要老師徒手幫我按腳, 雖然按嗰陣真係好痛, 不過按完之後長伴住我嘅腳筋真係隱咗形, 好似縮番入去咁, 好神奇啊~

小雲醫師真係好好人、又好錫我 (我一廂情願地覺得係 : P), 都唔知可以點報答佢, 我諗我要快啲健康番啲, 唔使醫師擔心我先得喇... ^.^

又去睇Aaron 演唱會

為著今晚嘅Aaron 演唱會, 我尋晚一早就上床瞓覺, 今日如常工作, 到放工嘅時候就懷住興奮嘅心情會合表姐先吃個飯, 然後向紅館進發...

上星期五睇嘅係第一場, 今晚睇嘅係第六場, 雖然今晚呢場早啲完場、我哋又坐得高啲, 但係真係好睇好多, 可能係因為改咗rundown︰今晚cut 咗請女觀眾上台跳舞& 一齊踩單車嗰part；又cut 咗首我好鍾意, 但係應該冇乜人識唱嘅<忘不了> (我諗係我呢啲side cut 王先會鍾意听 : P)...可能因為冇咗兩part 悶嘢所以大家由開場到散場都超high, 最high 嗰part 當然係Aaron 濕身玩水水嗰part 啦, 坐我哋後面嗰几個女仔係咁尖叫, 好搞笑~不過Aaron 跳得太起勁喇, 見佢喺個小水池邊跳邊跣低咗兩次, 但係佢又可以若無其事咁好快企番起身繼續跳, 真係好嘢, 希望佢冇跌瘀個pat pat 啦... ^o^

另外呢, 今晚雖然坐得高啲、又冇咁近個台, 但係當Aaron 喺個amazing 旋轉舞台上面跳舞嘅時候, 我哋就可以好清楚睇到Aaron 喺上面跳緊咩, 原來坐得太低係睇唔到Aaron 0架...

唉, 今晚呢場實在好睇太多喇, 我俾99分, 如果濕身玩水水嗰part 可以唱多几首歌就perfect 喇, 成日都喺人哋最high 嘅時候完場, 真係衰... ^.^"

Aaron 話佢由尋晚已經開始唔捨得個旋轉舞台, 我諗如果我係佢我都會唔捨得個台, 呢個台實在太犀利喇, 我諗都係只此一次, 如果將來有人開演唱會又用佢呢款台 (或者modify 做另一款差唔多嘅台), 實會俾人話佢抄Aaron, 所以完咗呢9場之後呢個amazing 轉轉台應該唔會再喺紅館出現lu... T.T

Aaron 又話佢完咗呢次演唱會應該唔會再開演唱會住, 佢好想做舞台劇喎, 咁希望佢完咗今次concert 好好休息一排, 然後就快啲著手籌備舞台劇, 咁我哋就可以快啲有得睇喇... ^.^

Oral exam finished

經過兩個cycle 嘅oral exam, 今日終於叫做考完 (雖然某啲班仲有三几個學生未考), 終於唔使日日好趕咁陪外籍老師上堂...其實呢兩個cycle 講得好听啲就係喺課室monitor 學生嘅秩序, 實際上我覺得自己係entertain 佢哋多啲, 因為當佢哋有嘢要問老師, 但係老師又考緊試唔得閒理佢哋嘅時候, 我就負責應酬佢哋, 等佢哋問完想問嘅嘢就靜靜地繼續做嘢, 不過其實都唔靜得几多, 只不過叫做有個人理吓佢哋咁啫...

經過呢兩個cycle 嘅忙碌, 開始體會到老師嘅辛勞, 真係辛苦晒...

听日開始考first term lu, 又開始監考嘅一星期...


P.S. 听晚又有得睇Aaron 演唱會, horhorhor~ ^o^

郭富城舞林正傳演唱會2007

今晚係期待已久嘅Aaron 演唱會開show 之日, 我同Kitty 放工之後懷住興奮嘅心情去紅館...Yeah yeah~~

我哋今次坐第14行, 雖然唔係十分近個主台, 但係好近其中一個小舞台, 所以每當Aaron 由呢個小舞台升上嚟 / 行過嚟呢邊嘅時候, 我哋就可以好近距離見到佢喇...

下面就係今晚嘅rundown, 超過一半係快歌, 其餘嘅慢歌我都覺得好好听啊 (有好多都係我成日听嘅舊歌嚟0架)...

1. 舞林正傳
2. 純真傳說
3. 飛
4. 你是未來

---紅海傳說---
5. 極度哀艷的晚上
6. 神經
7. 銀色公路
8. 絕對美麗
9. 親愛的
10. 越愛越好

---反轉紅館---
11. 有效日期
12. 國王的新歌
13. I LOVE YOU SO太愛你
14. 風裡密碼
15. 我為何讓你走
16. 鐵幕誘惑
17. 戀愛態度1998
18. 到底有誰能夠告訴我
19. 望鄉
20. 失憶諒解備忘錄
21. 聽風的歌
22. 忘不了
23. 唯一色彩
24. 愛情
25. 愛的呼喚

---電影片段---
26. 三岔口
27. 臨行
28. 狂野之城
29. 唱這歌
30. 動起來
31. 著迷
32. 這夜心情

今晚我覺得最精彩嘅除咗係Aaron 精湛嘅舞技之外, 仲有個360° 旋轉舞台, 個台真係好勁, 可以成個棟企轉, Aaron 同啲dancers 一齊企喺啲格格裏面跳舞, 真係好amazing...仲有呢, 就係最後encore 嗰part Aaron 濕晒身玩踢水, 估唔到喺紅館都可以咁樣玩水, 真係high 到不得了, 不過佢着住套白色衫, 條褲又鬆, 真係擔心佢會走光俾記者影到相... : P

唔知點解睇完今次呢場, 就好自然同上次舞台寶典比較, 如果上次嗰個我俾95分嘅話, 今次呢個我會俾90分, 因為佢換衫換得好似密咗啲, 中間有少少悶場, 如果下次可以唱多几首歌先換衫, 或者換衫嘅時候有多啲visual 嘢睇吓, 氣氛應該會keep 得好啲...同埋呢, 佢今次啲衫好怪, 冇上次嗰啲咁靚, 上次嗰啲着得佢靚仔好多, 今次啲衫真係麻麻...

嗯...雖然好似仲有進步空間, 但係我覺得第一場算係唔錯0架喇, 21/11 我會睇多場, 希望到時Aaron 會記熟啲歌詞, 唔好好似今晚咁lur 就好喇... ^.^"

香港國際貓展2007

今日晏晝同黃小虹去咗喺會展搞嘅貓展, 今年係我哋第一次去貓展, 一次過可以見到二百几隻唔同品種嘅貓貓, 好開心啊~啲貓貓全部都好得意, 不過人同貓都由朝去到晚(展覽時間12nn-8pm), 好多貓貓比完賽都開始眼瞓喇, 又開始喺籠入面Zzzzz, 喺陌生嘅環境都瞓到覺, 真係強...

去得比賽嘅貓貓大多數都唔怕陌生人, 佢哋見到咁多素未謀面嘅人拎住一部部相机對住佢哋都唔驚, 真係好叻...如果我哋蓉蓉B 都咁叻唔怕陌生人, 我哋就可以帶佢去見吓世面喇... ^.^"

Didi 加油~~

今晚Didi 放學之後打電話俾我, 唉~一見到佢嘅來電顯示, 我就已經覺得自己好衰, Didi 之前咁唔開心嘅時候我都冇主動打電話俾佢關心吓佢, 而家反而要佢主動打俾我, 我真係好衰...對唔住呀... T.T

講番正題, Didi 講番佢之前同陳生嘅對話俾我听, 真係听完火都嚟埋, 呢啲咁嘅衰人, 明明自己做錯事, 仲同Didi 講埋啲咁決絕嘅說話, 到而家Didi 開始放低, 又返轉頭搵番人, 真係搵鬼睬佢...Didi 要叻啲啊, 如果想以後好過啲就唔好再理佢喇, 再理佢嘅話盞自己日日都疑神疑鬼、提心吊膽, 老土啲講句真係長痛不如短痛, 狠心啲咪鬼再理佢啦...

Didi 加油~支持你啊~ ^.^

買阿王演唱會門票的小插曲

其實尋朝一早起身就知道一個頗為驚嚇嘅消息, 今日總算settle 咗, 所以可以安心地打番篇blog 講述番成件事嘅來龍去脈...

話說之前我託媽咪個同事(阿珊)幫手搭上搭訂Aaron 演唱會飛, 一路等呀等, 等到11月頭都未收到啲飛, 我已經有少少擔心, 因為仲有11日就開show, 到而家都仲未見到啲飛真係好心急...

點知尋朝媽咪就同我講, 話阿珊都係早兩日先知道佢個朋友原來一張飛都攞唔到, 除咗我之外, 原來仲有34個人託咗阿珊買飛, 但係而家一張飛都冇, 佢俾人鬧到傻咗, 真係慘...正當我以為我哋應該都冇飛冇得睇之際, 好彩演唱會又加開一場(本來我哋買17/11, 而家加開16/11, 反而16號呢場變咗第一場), 阿珊就問我哋改睇16號得唔得, 咁我問過Kitty 都ok (本來我啦、Kitty & Kitty's bf 一齊去睇), 咁我哋就改睇16號嗰場, 不過Kitty 嘅男朋友就睇唔到lu...

呼...差啲冇得睇, 真係驚嚇...雖然而家比之前講嘅第5行遠咗, 但係總算有得睇, 點都要唔該晒阿珊, 不過呢, 如果真係冇得睇, 我諗我會喊... ^.^"

去郭sir 的喜宴

今日如常返工, 又繼續同外籍老師一齊上堂嘅「頻能」日子, 放工嘅時候都几攰, 但係今日係郭sir 擺結婚酒嘅大日子, 佢請咗我哋几個TA + 老師校長一齊去, 所以攰都要撐大對眼去飲喜酒... : P

原來郭sir 唔係請咗好多學校嘅同事去, 啱啱好坐到一圍枱, 同郭sir、郭太影完相, 大家就開始起動食嘢...整個晚宴其實冇咩特別令人興奮難忘嘅節目, 所有嘢都簡簡單單, 但係從郭sir 、郭太所講嘅深情對話, 都感受得到佢哋深厚嘅感情, 好感動呢...

喜宴到11點左右就完, 大家各自搭車歸家, 搭車嘅時候大家都開始瞌眼瞓, 如果听日唔使返工就好喇... ^o^

今日雖然攰咗啲, 但係都好開心, 祝福郭sir 同太太白頭到老、永遠都咁恩愛...

與莫記同學偶遇

今日唔使返工, 晏晝同媽咪& 黃小虹行又一城, 行去Food Court 食嘢嘅時候無端端听到有人嗌我個中文名, 回頭一望見到兩個好熟口面嘅女仔, 第一下我認得其中一個係江燕兒, 但係另一個真係諗咗差唔多5秒先認得出係黎婉雯, 真係唔好意思... ^.^"

計落我哋應該有差唔多8年冇見, 佢哋兩個都靚咗、lady 咗(呢排成日咁樣形容啲friend), 真係唔係好認得...不過我覺得黎婉雯一眼就認到我真係好厲害呢, 黃小虹話人哋認到我係因為我咁多年都冇進步過, 諗諗吓都啱嘅, 我會認真諗吓點樣改善呢個問題... ^.^

1st term oral exam starts...

11月中左右啲學生就開始考1st term exam, 而oral exam 通常都係喺正常上堂時間進行, 所以今個星期就要開始考oral 喇...又由於考試嘅時候兩位老師(外籍老師 + 原本嘅科任老師)都要專注要考試嘅學生, 其餘唔使考試嘅學生就好自然會趁機傾偈/作反etc., 所以由今日開始我就要同埋兩位老師一齊上堂維持唔使考試嘅學生嘅秩序, 亦即係話外籍老師上几多堂我就要上几多堂......

唉...今日「好好彩地」只係上4堂, 但係落咗堂又要好趕咁去當值, 兩個小息 + lunch 都奉獻晒俾啲細路, 真係又攰又肚餓...今日搞到成2點几先有時間食飯(平時人家12點几就食飯0架嘛...), 真係有少少胃痛... T.T

有點兒不敢想像下個星期要上6堂嘅日子會係點, 只希望到時會搵到少少食飯同去廁所嘅時間...... : (

與同事們打羽毛波

原來逢星期四啲學生放學後會喺hall 練羽毛球, 校務處嘅同事就相約我哋几個TA 今日一齊打羽毛波...諗諗吓, 我應該差唔多1年几冇正正經經做過運動, 打之前我估自己一定執波多過打波, 但係打打吓又好似習慣咗啲啲, 終於打波多過執波喇, 好感動...不過其實我都唔係打咗好耐啫, 由6點打到7點, 隻右手已經有麻痺嘅感覺, 我諗我真係太耐冇做運動, 阿婆真係要郁動多啲先得喇... ^.^"

Anyway, 多謝同事們相約我一齊打波呢, 同大家玩都几開心呀, 下次再打過! ^o^


P.S. 之前提及過懷疑患上重病嘅老師今個星期復工, 雖然佢身體裡面嘅壞細胞仍然未被消滅, 但係醫生證實咗佢唔係患上cancer, 真係學老師們話齋要好好感恩...希望老師繼續努力, 好好接受餘下嘅療程, 早日完全康復! God bless him!

Dinner w/ Julissa

今晚約咗Julissa 去尖沙咀食飯, 然後陪佢去利時揀佢11月尾同男友去會展飲嗰陣着嘅靚裙...啲裙真係好靚好輕, 但係條條都薄到差唔多透明, 真係肥啲都着唔到, 好彩Juli 夠瘦, 所以着得好好睇呢(不過靚嘅嘢通常都唔平, 真係戥佢男友肉赤... : P)

Juli 揀咗靚裙放下心頭大石真係好, 希望Juli 唔好再為呢啲小事(我覺得唔係大事囉 ^.^)而瞓唔着, 瞓得唔好11月尾影婚紗相就唔靚女0架喇... ^o^

HAPPY BIRTHDAY TO AARON!

今日係Aaron 生日, 希望佢身體健康、工作順利、keep 住咁型咁靚仔, 仲有演唱會演出成功! ^.^


P.S. 我「應該」係會去睇17/11 & 21/11 兩場Aaron 演唱會, 不過直到而家呢一刻我都仲未收到任何演唱會飛...到底啲飛几時先到手呢?啲飛一日未到手, 個心都唔係好定, 如果冇得睇我會發癲... >.<

水運會

尋日同今日一連兩日都唔使返學校, 因為呢兩日我去咗馬鞍山泳池(so-called) 「帶領及照顧」參加學界校際游泳比賽嘅學生, 但係其實今年得6個人參加, 佢哋識自己搭車去、又識自己出去食lunch, 唔使比賽嘅時候佢哋又會喺看台走嚟走去同自己啲friend 玩, 其實佢哋都好少時間坐喺我身邊要我照顧, 所以呢兩日自己一個人都几無聊, 好彩之前PE 老師提我帶啲嘢去做、唔好悶親自己, 咁我就拎咗部NDS 去玩, 咁先冇咁無聊咋...

不過又多得呢啲突發嘅工作, 我先有机會去好少去嘅地方, 如果冇記錯, 我應該係第一次去馬鞍山, 真係失禮晒... ^.^"

經過呢兩日咁無聊嘅日子之後, 都係寧願有嘢做, 啲時間會易過好多...

黃薯蓉到我家3周年紀念

今日係帶蓉蓉B 返屋企嘅3周年紀念, 眨吓眼蓉蓉B 就嚟咗我哋屋企3年喇, 託賴蓉蓉B 都几健康活潑, 成日自己同自己玩都玩到跑嚟跑去好似好好玩咁, 仲越嚟越為食, 一見我哋開飯就嗱嗱聲走埋嚟坐喺我哋腳邊等我哋俾嘢佢食, 佢個大肚dum 越嚟越大喇, 希望唔會過肥啦, 就算真係過肥都係我哋一手造成... : P

不過呢, 我哋真係冇乜時間陪蓉蓉B 玩, 個個返到屋企都攰到死, 希望蓉蓉B 自己一個都唔會覺得悶就好喇... ^.^


P.S. 呢几日忽然好想了解吓自己個腦嘅構造, 點解我仲會記埋啲已經冇意義嘅日子? 仲記嚟做咩呢? 5年喇...好想打自己... >.<

Dinner w/ Kennis

今晚約咗Kennis 喺銅鑼灣食dinner, 不過我哋今晚嘅重點唔係食飯, 而係一路行街睇衫一路傾偈(基本上我哋次次都係不停講講講 ^.^")...食完飯, 行街行到10點几又係時候各自歸家休息, Kennis 好好呢 , 佢陪我行去灣仔碼頭搭船返屋企, 一路行我哋又諗番起以前喺灣仔讀SPACE 嘅日子, 好懷念啊~(阿婆又開始想當年喇... ^.^)

一路行一路行, 我哋經過啲車行, 超近距離(其實只係隔住塊玻璃)見到兩架鮮黃色林寶堅尼, 嘩~原來林寶堅尼係好核突0架, 個樣好怪, 都唔明點解啲人(包括Aaron) 會用咁多錢買一架咁醜樣嘅車... : P

今晚好開心呢, 間中見吓Kennis 真係人都醒神啲... ^o^

P.S. 真係如我所料, 我隻左腳間中又有少少抽筋嘅感覺, 唉...痛... >.<

跟Julissa 返教會

今朝應Julissa 嘅邀請去咗佢教會听講道, 講道嗰位小姐只得3隻手指, 但係彈得一手好好嘅鋼琴, 佢上過電視0架喇, 可能係因為呢個原因所以吸引咗好多新朋友(包括我)嚟到一睹佢嘅風采...

跟完Juli 返教會, 下晝我仲有一個非常重要嘅任務, 就係陪Juli 去銅鑼灣睇吓啲結婚時著嘅鞋...啲鞋成3、4吋踭, 如果我著一定即時仆死, 不過啲鞋閃令令真係几靚, 但係都几貴, 對對都千几、二千蚊, Juli 話唔平得婚紗几多, 如果我係佢, 我諗我寧願買婚紗都唔捨得買鞋... ^.^"

陪完Juli 睇鞋之後就同佢分道揚鑣, 然後去旺角會合黃小虹, 今次就到黃小虹陪我睇衫喇, 因為下個月要去飲, 所以想買件靚少少嘅衫, 不過睇極都睇唔啱, 算啦, 應該仲夠時間買嘅...

今日全日不停行行行, 好攰, 我feel 到听日對腳又會痺...唉... : (

與小雲「醫師」對談

今日差唔多放工嘅時候喺樓梯口撞到小雲老師, 我問番佢前日係咪唔舒服所以冇返工, 佢話唔係, 原來係因為佢其中一隻貓貓(佢有4隻貓貓)喺10月1日腎衰竭死咗, 佢好傷心所以前日返唔到工...佢好詳細地描述當日嘅情形俾我听, 如果我係佢我一定喊到收唔到聲...

由細到大我都養過唔少小動物(凈係倉鼠都唔記得養過几多隻), 每次佢哋死嘅時候我都喊到豬頭咁, 除咗係唔捨得佢哋之外, 仲有少少擔心佢哋死咗之後唔知會去咗邊...但係頭先听完miss 講, 又覺得佢講得几啱, 佢話天父會好好看顧佢創造嘅每種動物, 所以就算小動物唔及人類咁珍貴, 佢哋死咗之後就算上唔到天堂天父都會帶佢哋去到一個無憂無慮、唔會有疾病痛苦嘅地方, 所以其實我哋都唔使太過傷心(講講吓好似係佢安慰番我轉頭)...點都好, 希望miss 唔會傷心太耐就好喇...

同miss 傾完貓貓嘅事之後, miss 無端端叫我俾隻手掌佢睇, 以為佢想幫我睇掌相, 原來唔係, 佢只係想由我手掌嘅氣色睇吓我身體好唔好...小雲「醫師」真係好厲害, 佢只係睇一睇我隻手掌嘅顏色分佈就睇得出我身體邊度唔好, 佢嘅診斷仲準過我而家睇緊嗰個中醫...之後佢仲撥咗寶貴嘅15分鐘出嚟幫我按摩雙手, 佢話手掌都有好多穴位, 如果按多啲血液循環好啲, 啲血行得好啲, 我啲毛病就會好好多喎...

真係辛苦晒小雲醫師, 佢自己唔開心仲要為我服務, 我得閒都會幫自己按吓手, 一路睇電視一路按都唔錯... : P


P.S. 媽咪個朋友有兩張Aaron concert 飛多咗出嚟, 約咗表姐陪我一齊睇, 呵呵~好開心, 總共睇兩場, yeah... ^o^

《偶然遇上的驚喜》

呢兩日個腦不停哼住一首好好听嘅詩歌, 我記得第一次听呢首歌係喺學校嘅詩歌早會, 嗰時一路听個心一路湧起一種好感動嘅感覺...呢几日諗起呢首歌嘅時候感動嘅感覺更加強烈...真係好好听0架, 有興趣可以听吓...

《偶然遇上的驚喜》

曾經 踏遍路途千萬里
途中 跌到過 攀不起
無助的心感困累 全然交瘁
無助身軀早已沒力氣
徬徨中 遇見熱誠的膀臂
人潮中 踫到您 多驚喜
前路即使千尺浪 得您在身旁
縱使呼呼風雨 仍覺甚美
能在絕望孤單中 偶然遇到您
是我根本不配受的福氣
來日禍困迎面 滿途挑戰
能贈我勇氣 完全是您
(年月縱過去 未忘掉您)
　
http://hk.geocities.com/littletweenty/21.htm

悲喜交雜的中秋節

今日係中秋節, 啲細路可以提早放學, 晏晝老師們就可以一齊大食會, 然後有團契...今日團契嘅氣氛本來已經几沉重, 因為有几位老師嘅分享都關於家人嘅生老病死...

听完之前嘅老師分享, 心情已經有啲heavy, 估唔到最surprise 嘅消息校長會喺最後先講...校長話其中一位老師尋日覺得唔係好舒服, 放工去睇醫生, 醫生同佢檢查完之後check 到佢身體好唔妥, 就即時捉咗佢入醫院, 校長仲話呢位老師應該要接受几個月嘅治療, 所以今日返唔到學校同我哋一齊過節...唉, 一听到要接受几個月治療都估到發生咩事, 希望呢位老師可以堅強啲面對, 早日康復...

听完一輪沉重嘅嘢之後, 我自己一個人去咗沙田睇Aaron 套新戲《C+偵探》, 今日係套戲第一日上畫, 差唔多半院滿座 (^.^"), 以Aaron 嘅戲嚟講算几多人睇0架喇...初時仲以為呢套只係一套懸疑 + 少少搞笑 (i.e. Aaron 式爛gag) 嘅戲, 睇睇吓先發現原來呢套仲係恐怖片嚟0架, 佢會失驚無神跌啲嘢落嚟、又有骷髏骨又勁多血又爆炸, 不過又唔會令人十分之驚嘅, 只不過係估佢唔到所以嚇親啫...
睇晒成套戲之後覺得都ok 好睇, 總好過嗰啲《重案黐孖Gun》(唔明點解佢啲戲名硬係要食字, 今次《C+偵探》又係...唉...好笑啲咩? ^.^"), 起碼今次呢套有劇情有故事, Aaron 啲演技仲越嚟越自然, 如果大家想睇戲、但係又唔知睇咩戲好, 《C+偵探》都係一個唔錯嘅選擇嚟0架... ^o^

今日嘅心情起伏太大, 夜晚返到屋企同媽咪黃小虹食完飯之後都呆呆地, 希望听日會好番啲...

心情鬱悶

由9月3號開學到而家, 日日都要上Form 2 嗰層on duty, 日日兩個小息 + lunch 上去行, 除咗有啲攰之外, 身體好似開始有少少毛病發作出嚟...

前晚瞓瞓吓覺隻右腳無端端抽筋, 痛到醒咗, 真係好痛...如果大家有印象嘅話, 應該會記得我係有少少靜脈曲張, 照而家日日咁樣上上落落、來來回回、行嚟行去嘅情況嚟睇, 相信喺不久嘅將來左腳都會加入一齊痛...唉, 真係諗起都覺得痛... >.<

另外一樣呢, 就係自己攞嚟嘅, 因為差唔多臨近中秋, 又係食我最愛嘅月餅嘅好時節, 我呢當然又食咗唔少, 所以好似食滯咗, 呢几日個肚都唔係好舒服... ^.^"

唔知係咪因為以上嘅兩項小毛病, 搞到呢几日心情唔多好...頭先上到嚟見到自己個blog 黑沉沉咁, 又pat pat 痕想轉個望落精神啲嘅template 顏色, 我諗而家呢個新template 啲字應該易睇啲、望落應該會醒神啲啩... ^.^

Aaron 又開演唱會喇~

今年11月中Aaron 又開演唱會喇, 媽咪嘅其中一個同事係佢fan club member, 咁就梗係搭佢幫手買前啲靚啲嘅飛啦, 佢好犀利啊, 幫我哋買到頭場第五行嘅飛, 呵呵~好開心呢~又開始好期待喇, 好耐冇試過坐咁前喇, 又開始好興奮喇...呵呵呵~ ^o^

Wendy 的大日子

今日係Wendy 洗禮嘅大日子, 好開心Wendy 邀請埋小姐同我一齊去觀禮(係咪咁叫嘅呢?), 見到Wendy 嘅daddy、mammy & 妹妹都有嚟, 真係好...

我唔係基督徒, 唔知喺呢啲日子應該要講啲咩祝福佢, 只希望Wendy 信主之後, 無論發生咩事都好, 都能夠靠著主嘅力量好好渡過每一日... ^.^

開始發作了...

由今個學期開始我哋啲TA 日日都要喺兩個小息 + lunch time 上課室樓層當值(i.e. 行嚟行去睇住啲細路唔俾佢哋搞事), 上個星期都仲好好地, 今個星期佢哋就開始發癲喇...

今日佢哋玩得興起, 一路傾偈一路搞近住走廊嘅百葉窗, 搞搞吓一拍落塊玻璃度塊玻璃就裂咗喇, 仲要唔止一塊, 係連續兩塊, 唉...可唔可以唔好咁激動呢大哥...真係俾佢哋激死, 好彩冇整親啫, 如果俾啲碎片彈到割傷真係唔知點算...

唉...只不過係開學嘅第二個星期啫, 就開始嚟料, 遲啲唔知會變成點...求主保守帶領... ^.^"

世事難料

今日一邊做嘢一邊MSN, 見到Didi, 原來Didi 差唔多一個星期前遭逢到一個重大打擊, 唉...又會咁嘅, 上兩個星期先見完Didi, 嗰陣見佢好正常, 又冇提起話唔開心, 世事真係好難預料, 尤其係感情嘅事, 好多嘢話變就變, 冇人會知道下一步會演變成點...

其實都唔係好知可以點樣安慰Didi, 只可以叫佢振作加油, 因為除咗佢自己之外真係冇人可以幫到佢...希望Didi 諗通咗好快冇事, 然後有番胃口食嘢、又有番心机做嘢就好喇...God bless...

與老細的一席話

今日同我個Panel Head 一路行一路閒聊咗几句(真係冇乜机會可以同佢閒聊), 佢問我有冇打算讀吓書、進修吓, 真係講開又講, 我就將我早前報PGDE 嘅嬲爆事件講咗俾佢听, 然後我哋落咗tuck shop 一路食lunch 一路詳談(喺度做咗咁耐都係第一次同老細兩個單獨食晏0架咋, 好怪!)...

我哋邊吃邊傾, 老細講咗好多老師不為人知嘅辛酸史俾我听, 佢苦口婆心地叫我要諗清楚自己到底係咪真係好鍾意教書, 如果唔係真係唔值得花4年時間讀書, 然後做一份辛苦到嘔嘅工作...佢仲提議我轉做政府工, 話如果留意到啱嘅都會話聲俾我听喎, 搞到好似好想趕我走咁, 好搞笑...

听完老細嘅一席話, 我諗我真係要再好好考慮清楚自己係咪真係咁想教書...我覺得老細除咗係一個好老細之外, 仲係一個好稱職嘅輔導員呢... ^.^

Lunch w/ Ship

今日晏晝約咗璇璇喺新達食lunch, 真係多謝璇璇山長水遠由屋企入嚟大埔同我食lunch, 感覺上好似好耐冇見璇璇咁, 見到佢好開心呢...下個星期璇璇又開始返學, 希望佢返工返學點忙都好, 都有足夠時間休息、唔好成日頭暈作嘔就好喇...


P.S.1. 多謝璇璇嘅生日禮物, 本貓貓schedule + 貓貓貼紙好靚呢~Thank you~
P.S.2. 我同璇璇識咗一年喇, 喺肥佬度做咗10個月嘢嘅最大得著就係識到璇璇呢個好妹妹, 老土啲都要講句, 希望我哋嘅友誼可以一直維持落去... ^.^

Dinner w/ Didi & Kitty

執咗兩日儲物室, 今日繼續好努力地執執執, 唉...唔係好明點解啲嘢會亂成咁, 執咗3日先叫做執到有番條通道行吓, 真係好攰...

執完成日嘢, 返屋企梳洗一番之後夜晚同Didi & Kitty 喺大埔中心食飯...做咗成日嘢我諗大家都攰喇, 我哋唔係坐咗好耐就打道回府喇...下次等Percy 出完trip 返嚟我哋再約過吖...


P.S. 多謝Didi 嘅生日禮物, 個melody & kuromi 電話繩好得意, 我已經掛咗喺電話度喇... ^o^

Sing K w/ colleagues

尋日係其中一位TA 同事Heidi 嘅last day, 同啲同事一齊出街食lunch 嘅時候, Heidi 無端端話好想唱k, 講講吓, 就約埋今日放工一齊去唱lu...

Yeah, 好開心呢~我諗我差唔多一年冇唱過k 喇...同大家唱k 都几開心呢, 不過略嫌唱得太少, 我哋6 個人5點几去到, 唱到7點就要埋單, 不過埋完單之後大家諗到一個蠱惑嘅方法唱耐啲, 就係點咗兩首超長嘅歌嚟唱, 一首係古巨基嘅勁歌金曲, 另一首係Don & Mandy 唱嘅超合金曲, 兩首都超長, 好似唱極都唱唔完咁, 我哋由差唔多7點10分開始唱呢兩首歌, 唱到7點半先唱完, 仲俾人催我哋走, 好搞笑呢, 下次都試吓用呢個方法先... : P

P.S. 希望Heidi 好快會搵到一份合心意、又做得開心嘅工啦...

檢查暑期作業日

讀咗咁多年書, 都係第一次听啲學生要喺1/9 開學前專程返學校check 校服儀容 + 暑期作業...唉, 真係俾佢哋激到吐血...

話說尋日 + 今日兩日班主任們同我哋一齊喺hall 度收學生啲暑期作業, 然後逐本逐本揭開睇吓多唔多空白頁, 有就摺角, 唉...真係摺到想成本暑期作業車落佢哋度, 差唔多3份1 本冇做過都夠膽交出嚟, 明知返嚟學校係check 暑期作業, 就算真係唔識做都求其寫啲字扮做咗吖, 乜都唔寫即係算點, 當老師盲0架?!

唉...大又係咁, 細又係咁, 真係激死人... >.<

Useful advice

經過一個星期不停向人呻之前嬲到爆嘅事之後, 呢几日嘅心情終於好番少少...平伏落嚟之後, 又諗番起早兩日其中一位英文miss 嘅提議, 佢話如果我真係有心教英文, 可以喺今年讀番個英文course, 考晒試、過晒benchmark, 出年先再讀PGDE, 嗯...听落好似係一個几perfect 嘅planning, 但係而家都8月尾喇, 應該報咩都報唔切喇...

不過無論如何都多謝呢位miss 嘅advice... ^.^

嬲爆爆~

7月尾嘅時候終於下定決心報BU 嘅PGDE 讀, BU Registry 嗰邊第二日就打俾我約我3/8 去interview, 但係因為我嗰日應該請唔到假想約過另一日去in, 當時嗰位小姐咁樣同我講︰「唔緊要, 你返去問吓先啦, 如果你真係嚟唔到就通知我啦...」

咁第二日我打番電話俾嗰位小姐話佢知我3/8 真係去唔到, 但係打極電話去都冇人听, 如是者我就留咗3次相同嘅voice mail 等佢覆我, 但係等來等去都冇人覆, 直到我打第4次電話去終於搵番嗰位小姐, 佢話會睇吓安唔安排到另一個interview, 仲叫我等佢電話...

又如是者, 我又等呀等, 等咗成個星期, 今日終於忍唔住主動打電話俾嗰位小姐, 得到嘅答覆竟然係︰「已經收晒生喇喎, 你嗰日去唔到interview 就冇得再in 0架喇...」

唏, 邊得咁0架, 首先, 如果佢第一次打俾我嘅時候就同我講如果我3/8 去唔到interview 就冇得再約過, 我一定會請假去in；第二, 我第二次同嗰位小姐聯絡嘅時候佢仲話會再安排另一個interview, 如果你只係得一次interview 就早啲講吖, 搞到我心掛掛咁多日等佢電話, 真係不知所謂... >.<

唉...啲同事叫我投訴佢, 話嘈吓佢可能會俾我in, 甚至會有offer, 不過諗諗吓都係算罷啦, 就算真係嘈到佢俾offer 我, 我而家都唔想讀佢喇, 反正當日係因為除咗BU 之外其他3間U 都close 晒application, 都係諗住唔好嘥多一年先報口碑最差嘅BU 嚟讀, 如果有得再揀一定唔會揀BU...

唉...而家冇得讀, 要等多一年, 可以有多一年時間考慮清楚到底自己係咪真係好想做老師, 都好嘅...如果出年真係想報就會早啲、揀過間好啲嘅學校嚟讀...

八號風球@Karl's home

由尋日開始放一個星期大假, 因為之前已經約好其他Bridging Course 嘅同事(包括︰Heidi、Peggy、Samuel、傑)今日一齊上Karl 喺屯門嘅新居玩, 所以我哋無懼八號風球打到嚟都照原定計劃去Karl's home housewarming...

人齊之後我哋玩咗好多益智遊戲︰UNO、UNO 層層疊、Wii...玩完Wii 之後我更覺我手腳唔協調嘅情況真係好嚴重, 明明拎住個remote 但係郁極都郁唔到、指極都指唔到想指嘅地方, 唉...真係失禮晒... ^o^"

本來唔諗住玩到咁夜, 但係Karl's gf - Polly 好好招呼, 佢好好心机煮咗餐好豐富嘅晚餐俾我哋咁多人食, 食完dinner 之後我哋坐到9點几先走...

今日玩得好開心呢, 多謝Karl & Polly 嘅款待, 辛苦晒Polly, 啲嘢食好好味呀~有机會再上嚟打搞過...

P.S. 又諗起我哋玩緊UNO 嘅時候大家忽然一齊跟住唱<歲月風雲>主題曲, 投入到好似唱K 咁, 好搞笑~ ^O^

傍住你放榜

今日會考放榜, 一朝早就進入戒備狀態︰朝早喺學校幫升到中六嘅學生計分選科, 等佢哋交晒留位費之後我哋就離開學校出發去聯招中心(迦密聖道中學)幫手...

去到聯招中心, 巧遇鄉中嘅兩位老師(教Geography 嘅黃毅兒老師& 中國文學嘅水鏡老師 : P), 同黃毅兒老師寒暄咗几句, 看來黃Sir 近況不錯；至於水鏡老師, 佢嘅一身打扮十年如一日, 相信應該都別來無恙... ^.^

同老師寒暄一番之後, 又努力地計分、走出走入「拉客」, 到5點完晒成個收生第二階段嘅時候, 30個理科學額順利收晒學生, 但係文科就仲有十几個位...之不過又唔係凈係得我哋學校仲有文科位, 原來好多間學校都係咁, 可能今年啲文科生好低分, 冇乜人夠14分啩...見到佢哋咁徬徨無助, 有啲仲驚到喊咗出嚟, 真係愛莫能助, 希望未搵到學校嘅同學听日會喺天朗氣清嘅好天氣搵到學校啦, 如果听日落大雨, 佢哋走嚟走去搵學校就會好狼狽0架喇...


P.S. 黃小虹都係今日放榜, 喺完全冇溫過書嘅情況下考到呢個分數, 都唔知讚佢叻好, 定係話佢懶好...個衰妹諗住報其他嘢讀, 我同媽咪都唔望佢讀完呢個course 之後會學到好多嘢, 但求佢肯勤勤力力準時返學、準時交功課已經好好喇...

中一適應課程完結了

為期兩個星期嘅中一適應課程今日完結, 今日學校搞咗個結業禮, 邀請咗啲家長、嘉賓出席；完咗結業禮之後, 啲細路要喺猛烈嘅陽光下步操, 以只係練咗3次嚟講, 都算操得唔錯0架喇, 希望佢哋今次操完之後第時做其他嘢都一樣有恆心、有毅力啦...

又題外話, 話說啲細路落去參加結業禮嘅時候喺走廊嘈到拆天, 我用咗連自己都覺得几大聲嘅聲浪鬧鬼佢哋...之後有兩位同事話番俾我听, 話佢哋喺佢哋自己嘅課室入面都清楚地听到我鬧人(P.S. 啲課室係閂晒門窗0架!), 哈~突然覺得自己好勁...我諗呢兩個星期我最大嘅得著就係練大咗把聲, 我都係而家先知道原來自己可以咁大聲, 我都要多謝番啲細路...

篤信班嘅同學9月開學之後應該會去咗唔同嘅班別, 希望大家都可以保持聯絡, 努力學習, 加油加油... ^o^

早會分享

今朝早會輪到我分享, 第一次喺百几、二百人面前分享, 講嘅仲要係我唔熟悉嘅題目 - 篤信, 竟然由一個非基督徒講directly related to Christianity 嘅嘢, 真係大整蠱...由尋晚諗script 嘅時候已經開始緊張, 直到今朝講完, 啲同事話我講得好好, 啲學生應該會覺得我係基督徒, 听到佢哋咁講都放心啲... ^.^"

听日就係中一適應課程嘅最後一日, 有少少唔捨得啲細路...ha... ^.^

決定了...

密集式地考慮咗兩個星期, 今日終於有決定...

只係凈番呢個机會, 如果錯過咗, 又要等多一年...

既然大家都鼓勵我, 即管一試, 只要press submit, 便成了...

Dinner w/ 小姐 & Wendy

今日繼續係S1 Bridging Course, 今日啲細路唔使上堂, 凈係要上生活課同玩集體活動, 見佢哋玩得都几開心, 有水彈玩喎, 我都開心啦... ^o^

湊完啲細路玩完一日之後, 夜晚約咗小姐& Wendy 喺尖沙咀食飯, 又有幸約到兩位美女食飯真係開心, 佢哋仲送咗禮物俾我, 耳環、Melody 筆& Melody 夾夾都好靚呢, 多謝晒~

希望8月底左右又可以再見兩位美女啦... : P

中一適應課程的第二天

今日係中一適應課程嘅第二日, 今日先正式上堂, 可能因為之前已經準備好上堂用嘅material, 所以上堂跟番procedure 就可以, 唔係太亂...至於啲細路, 今日嘅表現尚算ok, 大部分細路都肯跟instructions 做嘢, 只係某几個特別傾偈傾得犀利(尤其係我嗰班 U.U), 可能听日真係要隔離佢哋先得喇...
反而上班主任課就真係亂咗啲, 原來佢哋真係需要好清晰嘅指令, 又要不停提醒佢哋乜嘢係應該做、乜嘢係唔應該做, 但係時間真係唔夠用, 所以唔能夠執得好正, 唉, 听日要花多少少時間講耐啲、講清楚啲規矩喇...

希望听日嘅課堂順利啦...

P.S. 今日嘅感動位置︰今日有几位同事不約而同地話我把聲好似開咗、大聲咗, 可能今日嗌得勁, 開咗少少聲, 好感動啊~ ToT

中一適應課程開始了...

今日係中一適應課程嘅第一日, 第一次正正式式入課室攞住支咪同啲學生講嘢, 心情唔係十分之緊張, 但係見啲細路呆呆地冇咩反應咁, 又驚佢哋唔知、唔明我講乜, 所以好長氣地講完又講, repeat 又repeat, 一個重點起碼講咗兩、三次, 感覺上啲時間好似唔係好夠用咁, 又好似有啲亂, 希望經過今日之後听日會smooth 啲就好喇... ^.^"

一年一度的書展

今日唔使返工, 晏晝同黃小虹去書展, 真係超多人, 由搭車、買飛入場、入到去展館, 整個過程都逼人到不得了, 全程好似逼緊巴士咁, 再加上我哋嘅高度, 就算逼到埋去啲攤位都睇唔到啲書, 唉...真係睇得辛苦...

不過此行尚算收穫豐富, 書 + 無聊嘢都買咗唔少, 好重呢, 希望遲啲有時間睇得晒啲書啦... ^.^

準備中...

今個星期好似唔係好忙, 但係其實又要keep 住準備由下個星期一開始嘅中一適應課程, 越係預備得充足就越緊張, 唉...真係好驚應付唔到班細路...希望佢哋唔會太曳啦... U.U


P.S. 今朝返工前睇到Julissa 尋晚send 俾我嘅SMS, 話佢個朋友已經平安無事, 雖然未知詳情, 但係知道佢平安就好喇, thanks god!

婚紗展@會展

Julissa plan 咗出年4月結婚喇, 今次感覺好真實, 唔係得個講字喇...雖然佢男朋友而家喺美國, 但係佢哋打算今年11月喺香港影結婚相, 所以今日放工之後應Julissa 嘅邀請同佢一齊去會展嘅婚紗展book 定到時影結婚相嘅嘢, 原來凈係影結婚相都有好多嘢要預備, Juli 應該會開始好忙好緊張呢...好開心好開心啊~ ^o^

題外話, 今日返工唔使formal dressing, 所以着番平時啲便服同Juli 去婚妙展, 坐低冇几耐個sales 居然問我(哋)係咪教書, 噢, 人家已經着得咁casual 0架啦, 點解都覺得我(哋)似教書0架?乜我(哋)真係咁似miss 咩?又話我哋個樣細個, 我估我哋可能仲大過嗰兩個sales 呢... ^.^''

如果可以IE 一點

今日要幫手搞中一新生註冊, 要喺hall 幫手, 臨放工嘅時候俾人激親, 哼...真係可惡...俾人激完之後更加感覺到講說話之前一定要三思, 正所謂言者無心, 听者有意...諗諗吓, 如果佢可以變得IE* 啲, 講嘢應該會令人听得舒服啲... : (

* IE 即係Invitational Education – 啟發潛能教育, 主張以正面方法欣賞、尊重、鼓勵、信任學生, 我哋學校好buy 呢個concept 0架... ^.^


P.S. 今晚繼續keep 住打電話俾Julissa 問佢朋友嘅情況, 個傻妹又一路講一路喊, 又叫我如果有事唔開心一定要同佢講, 千祈唔好好似佢個朋友咁, 無端端唔見咗...唉, 我都唔知講咩氹番佢好...搞到我都眼濕濕...希望佢朋友快啲返嚟啦... T.T

冼Sir 榮休晚宴

我學校嘅副校長 - 冼sir 較早前宣佈退休, 今日學期終結業禮嘅時候部分老師一齊喺hall 唱咗首冼sir 成日唱嘅詩歌送俾佢, 唱唱吓估唔到冼sir 會走埋嚟同我哋握手, 我feel 到企我前面嗰几位miss 感動到唱唔到落去, 其實都真係几感動... T.T

今晚我哋同佢喺小白鷺餐廳搞咗個榮休晚宴, 差唔多全部老師、同工都有嚟(差唔多90人), 氣氛好好、好熱鬧, 其中一位都就快唔喺度教嘅miss 仲即場用saxophone 吹奏校歌, 然後大家一齊跟住唱(不過我唔識唱), 唱完仲一齊朗讀校訓, 氣氛好warm... ^.^

希望冼Sir 退休之後可以好好享受生活, 可以達成佢返老還童嘅心願啦...

P.S. Julissa 個朋友到今日依然音訊全無, 真係令人擔心...

失蹤

今日食lunch 嘅時候收到Julissa 嘅SMS, 佢話佢個好朋友失蹤咗差唔多兩日, 音訊全無, 佢朋友嘅家人已經報咗警, 但係仲未有消息, 傻妹Juli 喊到收唔到聲, 唉...真係弊...

就算我唔識Juli 嘅朋友, 听到呢個消息個心都唔舒服、都擔心佢朋友會遇到意外, 更何況Juli 同佢咁好朋友呢...Juli 問我點解一個人好好地會無端端唔見咗, 我都唔識答佢...

只希望Juli 嘅朋友快啲平平安安返屋企, god bless...

Thanks for Able's present!!!

今日都係如常工作, 臨放工嘅時候接到Able 嘅來電, 佢話今晚放工之後會上嚟我屋企俾啲嘢我喎...

到咗8點几, Able 就上咗嚟, 我哋好耐冇好好坐低傾偈喇, 傾咗一個鐘左右啦, 佢送咗一條好靚嘅頸鍊俾我, 簡單得嚟又好特別, 總之就係靚啦, 平時出街都可以帶, thank you ar~ ^.^

Dinner w/ Kennis

今日上晝都係如常做嘢, 下晝就出咗去school visit, 差唔多大部分嘅中英數科老師一齊去咗阮鄭夢芹小學做學術交流, 其實即係各科嘅中小學老師一齊坐低傾吓而家啲中小學生嘅課程程度, 我校嘅老師們都好驚訝阮鄭啲小六學生學嘅嘢竟然仲深過我校啲中一、二課程, 真係犀利...

同埋呢, 我都好耐冇返過母校喇, 見到啲課室、枱櫈覺得好有親切感, 不過啲老師應該好多都係新加入, 好多我都唔識嘅, 感覺有少少陌生+ 奇怪...

去完school visit 之後未夠鐘放工, 返咗學校做多一陣嘢就夠鐘放工喇, 又出咗旺角同Kennis 食飯, Kennis 想食壽司, 所以我哋去咗元祿食壽司...估唔到我哋嘅食量都几驚人, 一路講嘢一路食嘢都食到咁多, 真係勁~ ^.^

今晚同Kennis 傾咗好多嘢, 佢又問起一個已經好耐冇人問過嘅問題, 其實都真係只有佢先會咁直接問我, 唉...真係知我者莫若Kennis, 唔使我講佢都已經估到我諗乜, 真係我嘅好朋友~仲有呀, Kennis 送咗個靚靚melody 保溫水壺俾我, 好靚呢, 多謝晒, 不過我驚我唔捨得用... : p

今日好似又有少少頻撲, 不過攰得嚟好開心... ^O^

P.S. 今晚未meet Kennis 之前去旺角地鐵站攞錢嘅時候又撞到Julissa, 真係約都冇咁啱, 我哋真係好有緣啊~

My B-day

今朝出門口返工開電話就見到Didi、璇璇、Ric 尋晚send 俾我嘅SMS, 多謝大家咁夜唔瞓send SMS 俾我(我尋晚未夠12點就瞓咗喇), 真係辛苦晒...

跟住之後做嘢& 夜晚食飯期間都收到大家嘅來電、SMS, 多謝Julissa、Kennis、Able、表姐、小姐、Wendy、張珮瑛、Percy、Lolo...多謝大家咁有心打電話、send msg 俾我, 大家記得我生日真係好感動呢... T.T

今晚冇街去, 咁啱爸爸媽咪又唔使返工, 媽咪就留喺屋企煮飯俾我哋食, 食完飯之後仲切咗個几好味嘅cheese cake, 好味好味, 好飽好飽... ^o^

今日係我嘅牛一, 尋日都係蓉蓉B 3歲生日, 今晚我哋食飯嘅時候開咗罐雞肉can food 俾蓉蓉B, 佢都几鍾意食, 不過成日食呢啲can food 會好肥, 過時過節過吓口癮好喇...

嗯...今年都冇咩特別嘅生日願望, 只希望蓉蓉B & 各方親朋好友都身體健康、工作順利、日日都開開心心就好喇... ^.^

Dinner w/ Julissa

今日係頗為節目豐富嘅一日...

首先今朝一早就超趕超多嘢做、又要開會；跟住晏晝全部英文科老師總動員一齊去咗新達飲茶 + farewell 好好人嘅Evian、Caroline & Ms. Noreen；食完lunch 之後又好匆忙咁趕返去開會, 好攰啊...點解有咁多會開0架...?!

好不容易捱到放工時間, 拿拿聲碌落巴士站搭車出旺角同Julissa 食飯...喺見到Juli 之前又去咗買啲低B 無聊嘢俾自己, 我買咗一對着三點式嘅melody + kuromi 公仔, 本來諗住凈係買kuromi 0架咋(因為佢件bikini 靚啲 : P), 但係凈係得kuromi 一個又好似好孤獨咁, 所以就一次過買晒兩個喇...佢哋個衰樣真係好好笑... ^o^

買完公仔俾自己之後就meet Juli, 我哋去咗壽司亭食壽司, 一路食嘢例牌又係一路不停講嘢, 好開心呢...Juli 送咗一個好靚嘅貓貓牙籤座俾我, 好靚啊, 多謝Juli~遲啲調完位之後我會拎佢返學校做裝飾...

今日做咗好多嘢, 好攰好攰, 但係好開心... ^.^

回歸十周年

不經不覺, 香港已經回歸咗10年, 坦白講我自己對呢件事冇咩太大感覺...

不過近兩個星期成日听到身邊嘅人話政府搞咁多慶祝活動只會令人有一種錯覺以為香港真係咁太平盛世、歌舞昇平, 實質只係粉飾太平...

一連睇咗咁多日有關回歸嘅節目特輯, 見到有人選擇大肆慶祝, 又有人趁機遊行表達訴求, 如果香港喺未來嘅日子都可以繼續體現呢種集會自由、言論自由其實已經算係唔錯喇...

希望香港未來嘅十年、二十年、三十年都安定繁榮就好喇...

Surprise!!!

今日差唔多放工嘅時候, 校務處嘅秘書小姐神神秘秘咁叫我落去搵佢, 又唔話我知咩事喎, 一路行落去嘅時候一路諗︰「死喇, 會唔會係做錯嘢呢?」
落到去, 佢笑笑口咁俾封信我, 唏...原來係有人工加...嚇得我吖...跟住老細同我講番呢件事, 仲叫我見到校長就同佢講聲多謝...點知轉個頭就見到校長, 我就同佢講多謝啦, 佢仲同我握手0添, 好搞笑... : P

從老細口中又知多咗少少大家對我嘅評價, 原來真係只要做好自己, 其他人都會感覺到你用心去做0架...總之就多謝大家嘅認同& 鼓勵, 我會繼續努力0架喇...呵呵呵~ (又開始發癲... ^o^)


P.S. 今日其中一位好好人嘅miss 過咗嚟我個位同我傾偈, 雖然唔係傾咗好耐, 但係同佢傾偈嘅感覺好舒服...希望我都可以成為佢口中所講又乖、又馴服嘅貓啦... ^.^

Dinner w/ Kennis @Temple Street

原來又已經差唔多半年冇見過Kennis, 今晚約咗佢食飯, 我哋無懼炎熱嘅天氣去咗廟街食蠔餅...

雖然成日都嚟呢邊探嫲嫲, 但係咁耐都未試過喺度食嘢, 真係冇介紹錯喎, 啲嘢又平又好食, 唔怪之得咁多遊客都鍾意食啦, 我覺得個feel 有少少似喺台灣士林夜市食嘢咁, 不過真係几熱, 一路食一路流汗... ^.^"

今晚可以見到Kennis 好開心呢, 多謝佢遠道喺埃及帶返嚟送俾我嘅書籤...同埋呢, 都係最老土嗰句, 唔使理人哋講咩, 做好自己就得0架喇... : )

Hair cut @端午節

今日咁啱爸爸都有假放, 晏晝一齊去咗剪頭髮...剪剪吓, 隱約見到有几個細路隔住玻璃向我揮手 (嗰陣我除低咗眼鏡), 帶番眼鏡睇真啲, 原來係學校啲學生, 噢~點解佢哋會認得我0架!?喺呢啲時候俾佢哋見到, 真係好奇怪 + 好樣衰... : (

剪完頭髮之後, 閒逛咗一陣就返屋企喇, 條街真係好熱, 個人好似就嚟會溶咁......

補祝爸爸節 + 預祝黃小虹生日

為咗補祝尋日爸爸節& 預祝黃小虹听日生日, 今日放工之後我哋去咗Pizza Hut 食飯, 試咗新嗰個Chessy Bites 批, 都ok 好食, 不過啲芝士都几滯, 食咗一塊已經滯滯地...
跟住食完飯, 我同黃小虹都好想食蛋糕, 所以又攞咗個蛋糕返屋企切...一打開個盒, 蓉蓉B 就好八卦咁走過嚟聞聞貢, 好似好想食咁, 正一為食貓~

今日食咗好多嘢, 好開心~ ^o^

讚賞

今日本來係短週唔使返工, 但係老細想我今日返去幫佢手一齊做埋啲濕碎嘢, 所以今日就返半晝工...

一返到去見到老細, 佢就好開心咁同我講, 話佢尋日同其他科嘅老師一齊北上玩咗一晚 (唔知玩咩啦吓, 佢冇講 : P), 佢話其他老師都有提起我, 話我勤力、仲讚我做嘢態度好喎...哈, 好搞笑, 其實以我呢啲比較鵪鶉嘅性格 (再加上座位嘅關係), 都好少主動同其他科嘅老師傾偈, 所以真係估唔到佢哋提起我之餘, 仲讚我, 其實都有少少開心嘅, 不過始終覺得自己做得未夠好, 要再努力啲先得喇...
(P.S. 希望老細唔係講啲假嘢嚟氹我開心啦... ^o^)

So Far So...Close

近呢几年除咗Aaron 嘅CD 之外, 都好少買其他CD...為咗支持重返香港樂壇嘅孫耀威, 今日急不及待買咗佢隻新碟返屋企, 有10首新歌 + 10首舊歌, 雙CD 單碟價, 好似好抵咁...

听過啲新歌, 大部份都几好听, 啲melody 都几順耳、几易跟住唱, 唔錯唔錯...不過有兩首係快歌 (即係好似Aaron 唱嗰啲快歌), 孫耀威唱呢種咁有beat 嘅歌感覺好奇怪又好搞笑...至於舊歌, 大致上都好听, 一路听<愛的故事上、下集>, 一路諗番起中一、二時期嘅無聊低B 嘢, 真係好低B... ^.^

試听後推介︰思前戀後、戀愛宣言、愛她因為愛你、永遠保護你、自愛、無一倖免


P.S. 原來孫耀威唱歌把聲會間歇性似蕭正楠............ U.U

Good show

由上個星期開始, 黃小虹就不停話好想睇張繼聰喺藝術中心開嘅演唱會, 講咗几日自己又唔去睇吓有冇飛, 個show 今晚做喇, 以為今日應該未必買到飛, 點知今日晏晝去睇竟然仲有飛賣, 所以今晚我哋就一齊去咗灣仔藝術中心睇張繼聰嘅演唱會...其實我冇買過佢嘅唱片, 又冇download 過佢全部嘅歌嚟聽, 所以我听過又識唱嘅歌其實好有限...不過可能因為場地細, 個台同觀眾又近,我諗就算大家唔係好識跟住唱, 都會跟住打拍子, 所以氣氛、感覺都好好啊~

個人認為佢唱歌、跳舞都唔錯, 睇得出好盡力; 隊band 又彈得好 (尤其彈bass 嗰位), 所有嘢都配合得啱啱好, 真係好鍾意睇呢啲live band show, 氣氛好好, 好正呢~
惟一美中不足嘅地方就係個show 太短喇, 8:30pm 唱到10:30pm 就完, 真係好似短咗少少...不過離遠可以見到謝安琪、少爺占、李逸朗, 臨走之前黃小虹仲同王貽興影咗張合照, 總算補番數, haha~


P.S. 成場最感動嘅位置應該都係張繼聰唱 《Mad U So》&《將繼衝》全場大合唱嘅時候, 好感動...希望佢繼續努力做多啲好音樂、做個好爸爸啦... ^.^

熱貓一隻

近排天氣咁熱, 我哋冇毛都熱成咁, 蓉蓉B 都熱到成日四腳朝天大字形攤喺地下抖涼, 見佢好似熱到冇晒心机咁, 諗住開冷氣大家一齊涼吓, 但係唔知點解蓉蓉B 唔鍾意涼冷氣, 就算我哋夜晚開冷氣瞓覺佢都會自己出廳瞓, 所以一到夏天我哋好少机會可以同蓉蓉B 親近一番, 唉...都係鍾意冬天多啲, 因為可以同蓉蓉B 一齊瞓... : )


P.S. 今日係8/6, 亦即係璇璇生日, 希望佢心裏面所有願望都能夠順利達成, 日日都開開心心, 薯仔又健健康康, HAPPY BIRTHDAY!!! ^o^

我的右腳

今朝行返工嘅時候, 右腳腳板底開始隱隱作痛, 返到學校睇過, 又好似冇乜唔妥...但係經過一日嘅走動之後, 放工嘅時候真係痛到不得了, 一睇之下, 唉, 原來我腳板底生咗粒雞眼...噢, 原來真係好痛, 試想像當你用正常嘅力度行每一步路嘅時候, 疼痛嘅位置就會受壓, 每行一步就痛一下, 如果唔就住啲力嚟行就會痛到飛起... >.<
爸爸話行得多就會生雞眼, 諗諗吓呢几個月我都真係行得几多路, 日日都走上走落十几廿次, 再加上着埋啲又刮腳又窄嘅皮鞋, 想唔生嘢都几難...爸爸呢位過來人俾咗醫生開俾佢嘅雞眼藥膏我搽, 希望快啲好番, 如果唔係有排痛... T.T


P.S. 尋日我去書局睇書, 見到璇璇寫嗰篇文章, 叫<難忘你的叮嚀>, 作為一個膚淺嘅讀者（我讀書唔多, 唔敢亂俾comment）, 我覺得璇璇寫得好有感情, 依我嘅愚見, 如果璇璇用多少少四字詞 / 成語可能會更好...總之都係嗰句啦, 璇璇好叻女啊, 要繼續努力啊~ ^o^

學校的畢業典禮

今日係學校畢業典禮嘅大日子, 經過各人連日來嘅準備, 呢日咁特別嘅日子終於來臨...今日位位老師都悉心打扮, 人人都好開心、好精神咁出席, 感覺真好...

一般嚟講, 喺畢業典禮進行期間, 老師們會着住畢業袍坐喺台上面睇住成個頒獎過程, 但係由於有一部份老師要喺台下幫手上唔到台嘅關係, 唔夠老師坐台, 我哋几個TA 又奉命拿拿聲着起件畢業袍一齊上台坐...喺「柔和」嘅黃色射燈照射之下, 除咗有少少熱之外, 唔知點解越坐越眼瞓, 真係差少少就瞓着, 希望冇人發現... : P

我仲以為我呢世人除咗副學士& Degree 畢業嗰陣有机會着畢業袍之外, 應該唔會再有机會着畢業袍, 點知原來仲有得着喎 (我着嗰件係紅色邊0架, 同我Degree 時着嗰件一樣0添0架), 好感動...

雖然我唔係好認識今日嘅中五中七畢業生, 但係見到佢哋好乖咁大大聲唱詩, 又跟住牧師帶領同老師講多謝, 嗰一下真係有少少眼泛淚光, 我真係好渣呢... ^.^"

Dinner w/ Pretty Ship

今日好開心啊, 因為終於可以同璇璇 (仲有佢個妹妹, 真係几似靚璇璇 ^.^) 喺銅鑼灣食飯, 我哋當然又係不停口咁講嘢, 講嘢仲多過食嘢, 希望冇悶親妹妹...食完飯之後, 我哋去咗CitySuper 閒逛, 一路搞人啲嘢一路講嘢, non-stop talking and talking, haha...行到10點几, 因為我听日要返工, 所以就依依不捨咁同璇璇& 妹妹分別喇, 希望喺不久嘅將來又可以再見璇璇啦... ^o^


今日有4 個P.S., 如下:
P.S.1. 我今日提早送咗份好老土嘅生日禮物俾璇璇, 係一枝筆嚟嘅, 真係好希望佢會繼續努力寫作 (雖然而家好少人會用筆寫嘢, 人人都用電腦0架啦, 所以其實都係象徵式咁將我呢份希望傳達俾佢啫 : P), 希望璇璇唔嫌棄啦...
P.S.2. 今日好難得有机會可以同Panel Head 傾咗兩句偈, 佢真係好好, 我會好好思考佢對我講嘅說話, 我會努力0架喇...
P.S.3. 今日好好彩, 又見到嗰個好似阿邊個嘅同學, 仲唔只一次0添, 咁都可以開心, 好變態... : )
P.S.4. 頭先返屋企等車嘅時候, 抬頭望見一個好大好圓好光嘅月亮, 呢排成日落雨, 好耐冇見過咁清嘅夜空喇, 真係好...

悠閒的星期六

今個星期短週, 今日唔使返工, 可以好悠閒咁瞓到自然醒, 真係開心...本來同Julissa 暫定今日一齊食lunch, 不過Juli 有事唔得閒, 惟有再約過啦...

咁個晏晝就吉咗出嚟, 冇乜邊度想去, 就去咗嫲嫲度；之後去尖沙咀買啲去角質cleanser 用, 唔知今次呢隻好唔好用呢?如果好用嘅話再推介俾大家... ^.^

跟住夜啲返到屋企食完飯, 睇超級無聊嘅<萬眾同心公益金>(但係又真係几好笑嘅... ^o^), 睇睇吓開始悶, 黃小虹提議不如開隻Fucky Dance VCD 出嚟一齊跳吓舞, 黃小虹真係渣, 跳一陣就嗌攰, 我就懶係勁咁捱晒成隻碟先收工, 跳咗差唔多一個鐘, 開住冷氣跳都出晒汗, 真的不錯喔~ (唉, 實不相瞞, 其實我呢排好似參加咗勁食大賽咁食極都唔飽, 肥咗喔, 如果再唔郁動多啲真係不得了... ^.^”)


P.S. 好開心呢, 終於約到璇璇出嚟食飯, 星期五我哋就可以見面傾餐飽喇, yeah~ (璇璇︰你好叻女啊﹗你要對自己有信心先得0架, 一定要keep 住努力寫作, 第時你可能會成為一位出色嘅作家0架﹗姐姐永遠支持你~ ^O^)

病假

今朝起身真係唔係好舒服, 頭暈暈, 個肚又唔舒服, 一諗起返到學校要走上走落應該會好辛苦, 所以請咗一日病假, 瞓瞓瞓不停咁瞓, 瞓到4點几先起身去睇醫生...

今日咁曳冇返工, 希望今日冇乜特別事發生, 听日返到去唔使follow up 太多嘢就好喇... : )

不太順利的一天

今日全日都好似有少少阻滯咁, 感覺唔多好...

首先, 今朝返工嘅時候, 一路行個肚一路隱隱作痛, 返到學校去完洗手間好返啲, 但係之後成朝個肚都仲係赤赤地, 唔知點解... T.T

跟住晏晝一路做嘢都冇乜特別事發生, 但係做做吓我部電腦被人徵召咗去活動室, 冇咗部電腦真係咩都做唔到, 好無奈...

再跟住到放工嗰陣, 諗住去廁所遮架攞返把遮出發走人, 入到廁所, 我把遮唔見咗, 好沮喪......唉, 唔知邊個咁「唔覺意」攞咗我把遮, 好彩咁啱有老師諗住搭的士去廣福, 我就跟車一齊走, 如果唔係咁大雨都唔知點走......

雖然以上事項只係芝麻綠豆嘅小事, 但係夾夾埋埋搞到心情唔多愉快, 希望听日會順利啲... ^.^

最後的監考日 & Happy Meal

今朝最後一次出去監考, 本來冇咩特別, 之不過考考吓, 有個女考生要去toilet, 咁我要陪佢出去, 佢一出個hall, 就一支箭標咗去廁所, 原來佢肚痛, 咁我就喺廁所「陪」咗佢差唔多8分鐘...最搞笑嘅係個女仔其實係衝咗入男廁, 到佢解決完、出咗廁所我就同佢講︰「其實呢, 你知唔知我哋頭先入咗男廁?」佢就好緊張咁話︰「係咩?我唔知呀, 我其實痛咗好耐, 痛到震晒先舉手咋...」haha, 佢應該真係好痛... ^.^”

跟住夜晚同媽咪、黃小虹去Pizza Hut 食母親節飯, 個餐好抵、好多嘢食, 好好味、好飽呢... : P

What a happy day~

今日English Department 同公民教育組一齊搞咗個派花活動, 只要啲細路肯寫嘢喺張母親節咭上面, 放學嗰陣就可以去操場換一枝康乃馨送俾媽咪, 都几多細路嚟換花, 但係佢哋掛住換花漏低晒啲咭, 好好笑~派完之後見仲有啲花冇人攞, 我哋就一人攞咗一枝帶返屋企俾自己媽咪, so happy~

放工之後同Kitty、Percy & Lolo 喺大埔食飯, Percy 同Lolo 成日都唔喺香港, 約到佢哋吃飯真係好開心呢...等下次Percy 出完trip 返嚟, 我哋再約出嚟吃個飯吖, 如果下次可以再齊人啲就更加好... ^.^


P.S. 希望Percy 身體可以快啲健康強壯番, 唔好再入醫院就好喇...

2nd Term 成績表

其實啱啱過咗呢個2nd Term 嘅成績表出咗几多問題, 中、英文科都有好多錯漏, 今日校長特別抽時間hold 咗個meeting 同我哋講番呢件事...其實呢, 我諗校長都知道係邊啲人嘅疏忽, 咁佢當然唔會當面直接指摘邊個, 但係佢咁慎重其事hold 個meeting 都係想大家知道件事嘅嚴重性, 希望下次Final Term 大家都小心謹慎啲, 盡量唔出錯就好喇...

正因為呢件事, 令我更加感受到我哋嘅Panel Head - Richard 同Assistant Panel Head - Evian 都非常非常好人兼好脾氣, 無論佢哋几多嘢做、几嬲都好都仲識講笑, 永冇黑面, 就算發生咗事都唔會話人, 咩都自己頂晒, 唔怪之得其他老師都話佢哋係好大佬 (Evian 係女仔嚟嘅, 成日都好開心、好好笑容 ^o^) & 好上司...希望我哋大家一齊努力, 唔好再有鑊俾佢哋孭就好喇... ^p^

又陷入苦惱中...

之前心煩嘅事總算解決咗一半, 餘下落嚟嘅事就要慢慢再解決, 不過而家總算搵到解決方法, 都可以暫時放低唔使咁煩...

近呢兩個星期, 又開始為自己嘅前途而苦惱...我發覺自己越來越鍾意而家份工, 但係如果一直做TA 又好似冇乜發展空間, 如果唔做TA 轉做老師嘅話又要再讀多個PGDE, 仲要就算我想讀都唔知人哋收唔收, 唉~不過好多嘢唔係話我想讀 / 做就可以, 都係再花多啲時間考慮清楚比較好, 免得做錯決定...


P.S. 頭先睇電視講開點樣可以增強記憶力, 話聯想對記憶好重要, 我成日記埋咁多無謂嘢, 我諗我嘅聯想力應該唔弱... ^.^"

我個膊頭...痛...

尋晚放工返到屋企, 左邊膊頭個骹位就開始痛痛地, 初時冇為意, 以為瞓醒一覺就會唔痛, 點知今日仲痛過尋日, 郁一郁就痛, 唔郁都赤赤地, 都几痛...唉...

有見及此, 今日就去咗影碟舖 (其實係賣大陸CD 嘅影碟舖) 買咗兩隻教師發展日跳嗰啲舞嘅VCD, 諗住一嚟可以郁動吓減吓肥, 二來可以郁吓啲手腳, 個膊頭可能會冇咁痛...頭先跳咗40分鐘就跳到出晒汗, 真係唔錯, 最搞笑係教跳舞嗰個導師不停重複一句︰「你跳亂了沒關係, 只要你跟着動就好!」又俾佢知道人家跳到亂晒, 不過跳咗一陣好似真係鬆啲冇咁痛...希望過多兩日唔再痛就好喇...


P.S. 今日去大埔墟嗰間匯豐銀行, 喺counter 等緊個staff 幫我搞手續嘅時候, 突然見到威威企喺個staff 後面"yapp"晒手咁無聲地叫我, 好搞笑, 原來威威去咗匯豐做teller, 真係好久不見...

Tea w/ 小姐& Wendy

今日五‧一假期, 唔使返工, 好高興能夠約到小姐& Wendy 兩位美女一齊去沙田食個tea, 對上嗰次我哋三個一齊坐低傾偈應該係舊年嘅事...今日係紅日假期都約到兩位美女真係太難得... T.T

雖然今日我哋唔係傾咗好耐, 不過都講咗几多嘢, so good...同埋呢, 希望小姐唔好介意我諸事八卦問咁多, 因為我同Wendy 都想知多啲、知清楚啲...

下次我哋再約出嚟嘅話, 如果小姐可以帶埋佢個新朋友俾我哋識吓(兼過吓目)就好喇... ^.^"

教師發展日

今日係教師發展日, 由細到大都好想知道啲老師喺呢日會做啲咩, 今日有幸參與, 終於知道做咩喇...

今日唔使返學校, 學生放假, 全體老師（包括TA）移師去突破嘅campsite 做好多嘢︰首先一齊唱詩、睇聖經、分享；然後分組討論今後學校嘅發展方向、有咩不足嘅地方需要改善、present 討論結果；再跟住就食lunch；之後就係活動時間, 可以揀跳Funky Dance 或者社交舞（我揀咗Funky Dance, 其實跟唔到beat 又手腳唔協調, 不過真係好好笑, 笑都笑到肚痛 : P ）；跳完玩完就可以搭車返沙田解散...

其實今日傾正經嘢嘅時間唔多, 不過可以輕輕鬆鬆同啲老師玩吓、傾吓閒偈真係好難得...

不過呢, 其實今日感受最深嘅就係唱詩&分享嘅時間, 因為唱詩嘅時候老師們唱得好投入、好大聲；分享嘅時候几個miss 都感動到一路講一路喊, 我開始感受到雖然呢間學校嘅學生唔係好乖、又唔係好有學習動機, 但係因為老師們好團結、好齊心, 所以就算俾啲學生激到几嬲、几唔開心都好, 啲老師都唔會捨得離開呢間學校... T.T

忽然間覺得, 如果第時我唔再喺呢間學校做, 我都會以曾經喺靈糧堂劉梅軒中學工作過為榮... ^.^

監考again

今朝又去咗另一間學校監考, 可能因為上几次都去同一間學校(仲受到不錯嘅款待), 所以今日去到呢間真係覺得有點兒攰(企足兩個鐘都冇張櫈坐吓, 我只係想有張櫈坐吓啫...), 又唔可以行吓(驚影響到學生嘅收音機接收), 噢, 對腳真係好攰...下個星期都係去呢間, 應該都係冇櫈坐...... >.<


P.S. 今日喺大埔中心閒逛嘅時候, 行吓行吓, 突然听到有人喺隔離嗌︰「Miss...y!」嘩, 原來係我看嗰班功輔班嘅學生, 嘩, 好驚呀~行行吓都會撞到學生(其實都唔奇嘅, 間學校又喺大埔), 不過咁樣俾佢嗌一嗌真係好驚嚇, 以後就算喺大埔兜圈都要打醒十二分精神... ^.^"

好學生

尋日又同嗰個唯一一個知道我姓咩嘅學生傾偈, 佢而家差唔多日日lunch 時間就嚟搵我, 其實我都未正正式式教過佢, 佢就已經好客氣地讚賞我, 真係傻仔嚟嘅, 不過我都覺得佢好乖呢, 希望佢呢種俾班中大部分同學認為異類嘅乖學生可以繼續全力以赴做到最好啦, 如果每班都多几個呢啲咁乖嘅學生, 我諗啲老師應該會更加俾心机教好佢哋...


P.S. 因為一個有少少變態嘅原因, 開始鍾意Day 3 喺Tuck Shop on duty, 雖然要早少少返去, 不過都真係几開心, 越諗越覺得自己變態...... ^.^"

Tea w/ Able

差唔多個几月冇見過Able, 今日終於約到佢食個tea 傾吓偈, 知道寶B 轉咗新工, 暫時都返得几好几ok, 希望佢會做得開心...

同埋呢, 多謝寶B 喺日本買俾我嘅手信, 個Marie 鎖匙扣好靚好得意, 啲綠茶睇落都好似好好飲咁, 我會慢慢嗒真啲味...Thank you! ^o^

請核分

原來而家啲學生 / 老師真係好忙, 除咗學校嘅考試、測驗、默書、quiz 之外, 仲要做好多教統局嘅甚麼TSA、SBA etc. 評核, 我到而家都仲未分得清楚邊樣打邊樣...又正因為今日係交SBA 分上教統局嘅deadline, 所以尋日好似好趕好忙咁核分, 睇咗成日睇到眼到朦...

今朝仲早咗少少返去, 睇多次啲分有冇錯, lunch 之後終於搞掂晒, 好嘢...真係不禁要講句辛苦晒~


P.S. 而家先發現, 原來我仲好鍾意孫耀威... ^.^

第26屆香港電影金像獎頒獎典禮

今晚早咗食飯, 食完飯就靜心等候睇金像獎...嘩~好開心, <父子>總共攞咗5個獎, 阿仔最犀利, 攞咗<最佳新演員>、<最佳男配角>兩個獎, <父子>仲攞埋<最佳電影>、<最佳編劇>、<最佳導演>, 好厲害呢~雖然Aaron 今次攞唔到最佳男主角, 不過輸俾劉青雲都總算心服口服, 今次攞唔到就下次攞, 橫掂呢期Aaron 都好似拍咗几多戲, 出年可能有机...

今屆金像獎又圓滿結束, 希望下年Aaron 可以成為金像影帝啦~

P.S. 我尋日又睇咗一次<父子>DVD, 總共睇咗4次喇, hahahaha~ ^o^

悠閒但持續心煩的一星期

因為啲細路同老師都仲放緊復活假嘅關係, 今個星期教員室日日都異常寧靜, 應該冇一日超過10個人喺教員室, 所以呢几日都好努力咁「搵嘢做」, 如果唔係真係會悶到暈低...

最令我心煩嘅問題其實都仲未解決, 不過就算真係諗到解決方法都唔係一時三刻就可以完全KO 個問題, 希望可以快啲搞掂佢, 好煩好煩啊~ >.<

P.S. 多謝關心我嘅朋友仔(esp. 璇璇), thanks!!!!!

暫時放低

今日心情好番好多, 基本上都係唔諗佢、當冇事發生, 呢種斬腳趾避沙蟲嘅做法其實都係我一貫嘅做法, 喺未有好嘅解決方法之前盡量唔好俾佢影響到心情就算喇...

今日同爸爸上完嫲嫲度行緊去金魚街嘅時候, 接到璇璇嘅來電, 原來佢就喺附近, 有得見璇璇好開心呢, 不過要佢同佢朋友仔專程行過嚟金魚街會一會我, 真係唔好意思...又要璇璇同我分憂, 真係sor, 成日都要佢擔心我, 唉...我會乖0架喇, 唔使擔心我喎~ ^.^


P.S. 我呢啲後知後覺嘅人, 早几日先知道小姐同姑爺嘅事, 希望姑爺繼續努力工作、努力生活!

Tears

好耐未試過好似呢几日流咁多眼淚......

如果喊1000次、10000次, 喊到眼盲就可以解決問題嘅話, 我寧願喊盲對眼......

心煩

當事人一副事不關己嘅態度, 令我哋呢啲被認為多管閒事嘅人想幫都唔知可以點幫......

唉......個頭好赤......


P.S. 連最親嘅人都唔可以相信嘅感覺真係好差......

灰

今日好想打人、殺人, 或者俾人殺......

完全唔明白點解會咁樣......

一次係咁, 兩次又係咁......

睇嚟都係無藥可救, 只好認命......

監考員

3月尾, 又係考A-Level 嘅時候, 由今日起將會有几次去其他學校監考嘅机會...

今日雖然都有少少「蝦碌」場面, 但係都總算無驚無險咁渡過咗......其實監考都真係几無聊, 不過見到啲學生好努力、好緊張咁埋頭苦幹, 唔知點解好自然會跟住佢哋一齊緊張起嚟......

嚟緊仲有几次要出去監考, 希望一切順利...... ^.^

忙碌的一星期

下個星期啲細路開始放復活節假, 所以今個星期忙住搞佢哋去英國交流團啲嘢, 差唔多日日都OT...今日仲全日冇停手, 好攰啊...不過一諗起下個星期有几日假放可以瞓餐飽就開心... ^.^”

早几日詩歌早會嘅時候唱咗一首好好听嘅詩歌, 唱完覺得好感動, 呢首歌叫<牽引>, 歌詞如下:

《牽引》
迷失，祢以恩手帶引，
流淚，祢會輕抹淚痕。
越過千山萬重，分擔傷痛，
誰會像祢一樣。
如今，感激主牽引，
回望我一生足印。
我不再下沉，不怕苦困，
暴風中祢結伴同行。
神呀，祢救我於深淵裡，
榮耀永歸全能神。
讓我此生讚頌祢奇妙應允，
願我一生仰望祢。


P.S. 下個星期<向世界出發>介紹摩梭女兒國, 之前睇書、上網都睇過唔少關於女兒國嘅風土人情, 我自己做功課都做過, 但係電視介紹呢個地方應該都係第一次, 好期待呢...不過如果個主持唔係梁詠琪會更加好... : P

被認出了

話說今日有個學生喺教員室門口嗌”Miss Wong, Miss Wong...”, 嗌咗几次都冇人理佢, 跟住有個miss 走埋嚟同我講原來個學生係搵我...第一次有學生搵我, 都有少少開心嘅, 因為其實冇乜學生知道我姓乜, 原來呢個學生就係早兩日上Oral 嗰班其中一個學生, 唔怪之得佢知道我姓乜啦...同埋呢, 佢問我啲英文點先會進步, 嘩, 喺呢間學校居然會有學生問呢啲咁有教育意義嘅問題, 實在太令人感動... T.T


P.S. 又係搞爛gag 嘅時間︰話說原來每一班裏面都會有一個學生負責收同學訂飯嘅order form, 呢位同學原來叫做「膳長」......真係唔該晒呢位「膳長」人翁...... ^o^

甩繩馬騮

繼上兩個星期啲細路考試, 所以已經試過監考之後, 今日又有新嘢玩, 就係陪個外籍miss 入班房看住班細路上oral 堂...基本上成堂我都冇講過啲咩, 只係喺佢哋舉手問啲字點串嘅時候答吓佢哋, 同埋叫佢哋唔好再玩咁, 唉...班馬騮真係嘈到人都癲, 原來我哋嗰個generation 真係乖好多, 學啲老師話齋, 呢度啲細路真係癲0架... >.<

不過其實除咗啲細路難教啲之外, 其他嘢都尚算ok, 希望遲啲會慣啦...

Best wishes

因為尋日已經上咗嫲嫲度, 所以今日唔上喇, 晏晝同二姨婆婆飲茶先知道二姨身體出現咗啲問題, 遲啲應該要做手術, 做完手術之後應該就會冇事, God bless her...


P.S. 上個星期部notebook 唔知做乜壞咗, 連window 都入唔到, 今日終於的起心肝拎去俾人整, 好彩唔係壞得好嚴重, 全部file 都keep 得番, 真係好... ^.^

人有相似

今朝一早返到學校喺tuck shop on duty 行嚟行去, 行吓行吓見到一個大約F.3 - F.4 左右嘅男同學, 佢個樣真係好似一個人...雖則話人有相似唔出奇, 但係點解會似得咁緊要0架!? 好得人驚, 晨早流流唔好咁樣整蠱我好嗎? >.<


P.S. 今日俾啲細路笑死, 佢哋真係「天真活潑」、「心直口快」... ^.^”

反思

學校啲老師差唔多全部都係基督徒, 呢排唔知係咪近得佢哋多, 又令我開始反思自己到底算唔算係基督徒...有啲老師話其實我已經算係, 但係有啲又話未算...有啲迷茫...

肥妹蓉蓉

今朝蓉蓉B 自己坐咗喺個磅上面郁都唔郁, 咁就可以順便睇吓佢几多磅...蓉蓉B 而家有成10磅重, 比起初初嚟嘅時候重咗差唔多一倍, 蓉蓉而家變咗做肥妹喇, 唔可以再係咁落去, 真係要狠心啲俾少啲零食佢食先得喇... ^.^

出街食lunch

食咗葯, 今個星期好番好多, 冇乜鼻水又冇乜點咳, 真係好...

今個星期啲細路考試, 老師(都包括我哋啲TA嘅)可以出街食飯, 今日好榮幸得到5位靚女老師們嘅邀請, 一齊去咗新達飲茶...今次亦都係我返呢份工第一次出街食飯, 原來真係會食得開心啲0架... ^o^

下個星期啲細路考完試就冇得出街食飯0架喇, 又要等到下次佢哋再考試先得喇... : (

我病了

可能係連續兩晚都瞓得唔好, 再加埋學校實在太大風, 今朝起身唔係好舒服, 仲好似有少少發燒…今日喺學校不停流鼻水、咳, 放學之後去咗睇醫生, 嘩, 啲葯水難飲到不得了, 食完葯之後食咩都冇味...返工第二日就病鬼咗, 真係冇用... >.<

天氣時冷時熱, 大家都要小心身體啊~

於學校工作的第一天

今日第一日返學校工, 要6點几起身, 尋晚臨瞓又驚唔知醒, 所以瞓得唔好, 瞓咗好似冇瞓過咁…返到學校認識咗啲新同事, 大約知道要做啲咩工作, 大致上冇咩問題…全日最得意嘅位置就係last 嗰堂我要落hall 睇住班學生上週會, 今次主題係詩歌分享, 但係呢, 唔知點解會唱<愛得太遲>、<最佳損友>, 詩歌反而唱得兩首, 而班學生又真係好投入咁企晒起身跟住唱, 好搞笑…可能太耐冇踏足過中學嘅hall, 入到去又令我諗番起以前讀書時嘅情景, 好懷念…

今日第一日總算無驚無險咁過咗, 希望之後都一樣順利...


P.S. Able 今朝撞到一個舊同學, 從呢個同學口中得知另一個同學嘅近況, 哈哈哈~真係好搞笑, 多謝寶B 話俾我听… ^o^
P.P.S. 今日又收到助養小朋友寄嚟嘅信(其實係佢媽咪寫嘅, 佢都未識字), 佢媽咪話小朋友下個月就開始返pre-school 喇, 佢哋仲起咗間新屋, 真係好… T.T

Petmate 電動過濾飲水器

話說爸爸以前有種開細細盆嗰啲茶樹盆景, 但係好耐之前盆茶樹已經枯晒, 而喺茶樹花盆嘅左邊有一個吉咗嘅位置純粹用嚟裝水, 奇怪嘅蓉蓉B 由第一日嚟到我哋屋企開始就主力去花盆裝水嘅位置飲水, 其實一直都冇乜問題, 不過可能呢排天氣暖咗, 早几日竟然見到有几隻蚊滋喺盆邊飛嚟飛去, 應該都係時候幫蓉蓉B 搵過第二個飲水嘅容器...

其實貓咪好鍾意飲流動嘅「生水」, 所以好多時候貓咪都鍾意喺你開水喉嘅時候走埋嚟飲水喉水, 既然係咁, 早兩日就訂咗個電動過濾飲水器俾蓉蓉B...等咗成個晏晝, 部飲水器今晚送咗嚟喇, set up 咗一輪, 終於見到啲水經過過濾器流番出嚟, 望落流水淙淙咁, 希望蓉蓉B 肯飲多啲水, 毛毛都靚啲... :-D

Last day of part-time job

今日係返part-time 工嘅最後一日, 尋日同今日都好無聊, 因為冇乜嘢做, 所以就不停口咁同個靚女同事傾偈...又因為我哋個event 有駐場相士幫啲客睇相, 見冇乜客, 相士就輪流贈咗我& 靚女同事兩句...

今次算係第一次俾人睇相, 嗯...點講呢, 某程度上佢都講得几準嘅, 不過我諗我要再仔細咀嚼佢提點我嘅位置...

我開心返咗几日工就識到個新朋友, 希望Athena 之後一切安好... ^.^

恭賀新禧

恭喜發財!

眨吓眼就到新年, 不過今年好似冇咩新年氣氛, 硬係覺得唔係好熱鬧咁...打番前几日做過啲咩先...

年三十
一路睇<父子>DVD 一路幫媽咪封利是 --> 跟住執CD 櫃, 掉咗好多好舊好明顯唔會再听嘅CD --> 食飯 --> 上網仔

咁就過咗一日lu, 本來諗住出去行吓, 但係唔係好想出街, 所以冇去到...後來黃小虹買咗個几大個嘅跳跳虎氫氣球番嚟, 蓉蓉B 好驚個波, 驚到唔敢行出廳, 好搞笑... ^o^

年初一
同爸爸黃小虹去嫲嫲度拜年, 落咗巴士過馬路嘅時候竟然撞到Julissa, 我哋真係好有緣 --> 跟住喺嫲嫲度食完飯就返屋企喇

年初二
同媽咪黃小虹去婆婆度拜年 --> 食咗好多嘢, 飲咗好多湯, 好飽 --> 夜晚佢哋打麻雀, 我就睇電視, 11點几就返屋企lu

年初三
瞓到好晏先起身, 冇出街, 喺屋企hea 咗成日, 不過都仲係好似好攰咁...

呢几日就係咁過咗喇, 希望新一年大家都事事如意, 身體健康, 心想事成!

氣頂

今日本來都係如常做嘢, 冇咩特別事發生, 但係下晝因為一個師奶嘅無理投訴, 搞到我哋無端端俾商場個customer service assistant 噴到一面屁, 真係想反問番佢憑咩話我哋, 我哋又唔係under 佢, 係佢個阿頭叫我哋咁做0架咋, 阿頭唔喺度就扮晒嘢, 真係頂... >.<

哼, 我忍佢, 佢再咁同我哋講嘢, 到last day 嗰日我就同佢個阿頭講佢咁嘅態度同我哋講嘢, customer service 吖嗱, 都唔知咩service...

HAPPY VALENTINE'S DAY

今日都係一如前兩日咁做嘢, 冇咩特別, 照樣係8點收工...不過今晚Able 專程入嚟屯門等我放工, 然後一齊去pizza hut 食好耐冇食過嘅pizza, 仲順個便送埋啲生日禮物俾寶B, 唔知佢鍾唔鍾意呢, 希望佢唔介意係cheap 嘢啦 (佢用開嗰啲貴嘢我買唔起 ^.^")...

嗯...衷心希望出年嘅情人節我哋唔使再互相陪伴就好喇... : )

找到工作了

今朝9點又去尋日interview 間學校補寫番篇文俾個阿sir, 其實我覺得寫得麻麻地, 應該合格啩...個阿sir 話今日下晝或者听朝會打電話俾我通知我請唔請我, 咁樣會令人好緊張0架喎...

寫完篇文已經10點, 又趕去屯門返工, 一路都尚算專心咁做嘢, 但係等到6點都仲未收到個阿sir 嘅電話, 以為係篇文寫得唔好所以出事...點知隔咗15分鐘左右, 個阿sir 打嚟喇, 話ok 冇問題, 學校決定聘請我, 實在太好喇, 終於搵到工做喇, 根據初步觀察, 我都几鍾意呢間學校, 啲學生同老師望落都几nice 几友善, 希望會做得開心啦...

好多謝一直鼓勵我同支持我嘅朋友仔 (esp. 璇璇), 多得你哋嘅鼓勵我先可以安然過度徬徨嘅搵工階段, thanks a lot!!!


P.S. 今次係第一次100% 靠自己、冇靠人事關係搵到工做, 原來真係會有少少成功感... ^.^

3rd interview

今朝本來11點就要去到屯門返part-time 工, 但係返工之前又要趕住9點去interview, 所以今朝好似好趕咁...今次都係in teaching assistant, 去到學校等咗差唔多半個鐘先見到兩個interviewer (佢哋係英文科老師), 跟住好似傾偈咁同佢哋用英文傾咗20分鐘左右, 之後個阿sir 提議不如等陣見埋校長喎 (其實嗰時已經差唔多10點, 要趕去搭車0架喇), 但係人哋咁講唔通話唔得閒咩, 咁就見埋校長喇...同校長用中文傾咗一陣, 以為走得, 點知之前個阿sir 問我可唔可以留低寫少少嘢, 唉, 我真係遲晒到要趕住走, 惟有問個阿sir 我可唔可以听日嚟過寫番篇文俾佢, 好彩佢好好人話ok 冇問題咋...唉...喺唔太清醒嘅情況下又中又英咁講嘢, 其實真係tune 唔切台, 都唔係好知自己講咗啲咩... ^.^""

離開咗學校之後拿拿聲趕去搭車去屯門, 去到其實遲咗半個鐘, 好彩之前同個partner 夾好咗, 話咗俾佢知我會遲少少到, 有佢頂住個檔口都放心啲...今日返工做嘅嘢都ok 唔太難, 有啲似以前返旅發局份summer intern, 不過今次好似仲簡單啲0添...開始倒數, 返多6日就返完喇, 好嘢...


P.S. 今日好似好頻撲, 不過都几開心, 因為今日in 完臨走嗰陣個校長講咗句 : 「嗯, 几好吖, 應該冇咩問題...」哈, 第一次interview 俾人讚, 好開心... ^o^

Part-time job

多得二姨介紹, 由听日開始有7日part-time 工返, 由听日返到16/2, 然後放4日新年假, 跟住再返埋21/2 & 22/2 就返晒喇...係就係遠咗少少, 但係喺零收入嘅情況下, 有啲收入總好過有出冇入, 我會努力0架!!!


P.S. 今日係Able 生日, 寶B 同屋企人過, 所以今日冇見佢...或者要遲少少先可以約番佢食飯補祝佢生日喇, 點都好啦, 希望嚟緊嘅日子佢事事順利, 日日都開開心心啦... ^.^

薯蓉近照

近來天氣越來越反常, 記得以前年年農曆新年都凍到不得了, 但係而家先2月頭, 年都未過, 就熱到日日廿几度, 好似好暖好猛太陽咁, 所以蓉蓉B 近期最愛嘅活動就係攤喺窗邊曬太陽兼睇兩隻行得好快嘅巴西龜...

今日下晝有啲無聊, 同蓉蓉B 影咗几張相, 不過佢成日都唔望鏡頭, 好難先影到佢個樣...

唉...今個冬天都唔知有冇凍咗一個月, 再過多十零廿年香港應該會冇冬天0架喇... : (

Melody & Kuromi 扭蛋機

今日買咗樣好得意又好好玩嘅Melody 玩具俾自己, 係1 set 6 部Melody & Kuromi 迷你扭蛋機, 每部都係得10cm 高, 啲扭蛋真係可以扭出嚟0架, 凈係幫啲扭蛋、扭蛋機黐貼紙都黐咗成個鐘, 媽咪都話得意, 哈哈~ 我諗我呢世都係咁低b 0架喇… ^o^

阿荗整餅又失敗了

今晚見冇乜嘢做同黃小虹試整蛋糕, 其實已經好簡單, 唔係好多工序, 但係都焗唔到一個放得入口嘅蛋糕, 唔知點解面頭金黃色好似好靚咁, 但係原來中間未熟…點解咁難整0架?!

好沮喪…等我再研究吓點整先會成功, 希望唔使好耐就會整到一個唔太難食、食咗又唔會肚痛嘅蛋糕啦… ^.^”

好久不見

原來已經差唔多個几月冇見過Able, 今晚約咗佢喺大埔食飯, 雖然唔係坐咗好耐, 但係都傾咗好多嘢, 知道寶B 做嘢嗰度都做得唔太開心, 希望佢加油努力, 捱多一排, 然後搵過另一份好工先quit 而家呢份, 話晒而家呢間都算穏穏陣陣大公司, 有offer 先走會好啲啩…

haha, 又諗起頭先同寶B 講開嘅搞笑嘢, 一諗起嗰吓"bu 唧"就好想大笑… ^o^

火燭???

今日下晝唔知點解好眼瞓, 走咗去瞓晏覺, 瞓瞓吓忽然听到出面個警鐘響, 以為有人「困lift」 (打唔到平時講開嗰兩個字), 睇閉路電視又冇事喎; 但係望防煙門又真係見到有人喺樓上行緊落嚟喎, 唔係真係火燭呀fa? 諗住打電話落管理處問啦, 又冇人听, 正當我同黃小虹懊惱緊點樣將蓉蓉B 放入去街袋、帶埋佢一齊逃生之際, 終於打得通管理處個電話, 個男子話應該係警鐘誤鳴, 唔係火燭喎, 唉, 真係嚇死…就係咁, 個警鐘一路響咗差唔多15分鐘先停, 好驚嚇…

唉…唔該唔好再有下次, 真係會好騰雞0架… ^.^”

2nd interview (第二個interview)

今朝瞓到朦朦朧朧之際, 忽然屋企電話響, 原來係叫我去interview, 嗰陣係8:50am, 個小姐話想我9:45am 去到, 我問可唔可以晏少少, 跟住個小姐就話:「咁10點好嗎?」嘩, 真係晏好多喎... ^.^"

收線之後就盡量快速梳洗妝身, 喺勁「頻能」嘅情況下, 10:06am 去到, 盡趕0架喇, 唉...跟住就見一個男校長 & 一個女副校長, 凈係睇個女副校個樣都知佢係啲几難服待嘅人, 反而個男校長全程笑笑口咁, 真係「得意」...嗯...in 完之後冇乜感想, 如果佢真係請我先算...

同埋呢, 我想知其他人有冇試過一個鐘頭前接到電話, 要你一個鐘後去到interview 0架?上晝打嚟叫我下晝去都好啲吖, 搞到人哋一啲準備都冇, 有冇急得咁緊要呢... >.<


P.S. 返屋企嘅時候接過派傳單姨姨嘅樓盤傳單, 佢笑笑口咁講咗句:「祝你買到層靚樓...」ha, 承佢貴言...

睇腳

記得舊年生日嗰日自己走咗去北區醫院排期睇腳, 今日終於有得睇, 咁啱媽咪都放假, 所以就晨咁早一齊去睇...去到醫院見到啲櫈坐滿晒人 (大部分都係公公婆婆), 仲以為要等好耐, 點知等咗唔夠半個鐘就有得見醫生, 俾醫生睇過我兩隻藍筋少少暴現嘅小腿, 佢好淡然咁話:「冇嘢嘅, 少少靜脈曲張啫, 未去到要做手術, 好嚴重嗰啲先要啫, 如果唔痛就唔使理佢0架喇...」哦, 都估到其實好小事, 不過問一問好似安心啲咁啫... (題外話: 點解啲醫生個個都咁後生嘅?啲樣好似F.5 0靚仔啱啱踢完波頭髮濕濕咁款, 如果俾佢哋睇症, 會唔會有啲唔放心呢?! : P)

睇完腳之後, 同媽咪食早餐 & 喺上水閒逛, 逛咗一陣就返大埔陪媽咪電髮 + 染髮, 嘩, 喺salon 等咗媽咪差唔多5個鐘, 條腰有少少赤, 跟住就買餸返屋企煮飯食...

今朝早咗啲起身, 所以好眼瞓...Zzzz...

1st interview

尋晚屋企人發生咗啲唔知點講好嘅事故, 相信知道發生咩事嘅人都會瞓得唔係太好, 正因為瞓得唔好嘅緣故, 表姐今日冇返工, 同表姐食完lunch 之後我就出發去觀塘interview, 終於開齋喇, 好感動…

因為預鬆咗少少時間, 早咗去到, 等咗一陣就見到interviewer, 由我講第一句說話直到我離開, 全長大約10分鐘, 又唔敢話答得唔好, 但係因為之前上咗佢個website 備晒課, 所以唔係太多問題要問, 不過呢, 其實咁快講完會唔會唔係太好呢?有啲擔心, 希望會有好消息...

in 完之後自己去咗apm 閒逛, 逛到6點就搭地鐵去旺角同Julissa 食飯...好似好耐冇見Juli 咁, 雖然今晚唔係見咗好耐, 但係都傾咗好多嘢, 希望Juli 嘅Supervisor 肯幫佢解決佢嘅問題就好喇...

唉...唔知下一次interview 係几時呢?快啲又有就好喇...

神秘的咕咕

貓咪好多時都會發出「咕嚕咕嚕」聲, 初時我都唔知點解, 後來睇咗啲關於貓貓嘅書, 先知道原來係咁嘅...

神秘的生理現象 　　
貓咪這種極為神秘的生理現象, 很多科學家認為, 呼嚕聲並非從喉嚨部位所發出, 這是由胸腔主靜脈內的血液震盪所發出來的聲音。在靜脈通過橫隔膜的時候, 靜脈周圍的肌肉會收縮, 例如貓咪弓起背時, 截斷了血流, 產生震盪, 而震盪的聲音通過充滿空氣的支氣管和氣管, 就成了呼嚕呼嚕聲了。

貓咪何時會呼嚕呢？ 　　
貓咪呼嚕的情形有很多種, 到目前為止, 科學家仍然在研究當中, 不過貓咪在下列的情形下, 容易有呼嚕呼嚕聲產生：
1. 滿足的時候：當貓咪愉悅、滿足的時候, 牠會發出呼嚕呼嚕聲音來表示牠很高興、很滿意。
2. 想撒嬌的時候：貓咪很自在、隨興, 不會整天一直黏著你, 但是如果是牠想找你, 常都是呼嚕呼嚕的走向你, 希望得到你的關心與疼愛。
3. 想吃飯的時候：很多愛貓的朋友一定都有這樣的經驗, 你的愛貓每天早上都會呼嚕呼嚕的把你「踩醒」, 除了想撒驕外, 牠更是要告訴你「我要吃飯」。
4. 遊戲的時候：每當貓咪突然開始在房間裡, 一直快速來回移動, 雙手好像是聲樂指揮家一般, 不知在比些什麼, 狀似很靈活的樣子時, 牠是在邀你, 跟牠一起玩, 這時會有呼嚕呼嚕的聲音產生。(P.S.：不可以敷衍牠, 要跟牠玩一下！)
5. 不安的時候：貓咪有著比人類更為敏銳的感覺器官, 當牠發現氣氛很奇怪或是牠遇到了不能處理的問題時, 也容易呼嚕呼嚕, 例如夫妻吵假、情侶相罵等貓咪會呼嚕呼嚕, 有的貓咪甚至還當起和事佬, 會呼嚕呼嚕的跑到吵架兩造中間, 希望這場戰爭趕快結束。

(Quote from http://www.hkcats.org/phpBB2/viewtopic.php?t=2561)

近排天氣凍, 蓉蓉B 每晚上嚟我張床瞓嘅時候都會咕得好大聲, 如果夏天蓉蓉B 都肯黐我瞓就好喇... ^o^

無事常相見

近來好喜歡黎明首新歌<無事常相見>, melody 几好听, 黎生又唱得几舒服, 最好就係啲歌詞, 真係好有意思...

<無事常相見>
絕對肯認頭　是你好友 你最新往事　拿來懷舊
別為向上遊　遺忘密友 別生疏得太久
跟你預約緃使艱難 也是值得聚一餐 難道這都算大貪
世上號稱知己　聚於一起 然而題目關於商機
從微時開始相識的人　怎可放棄

＊隨時愛相見　便見面　未怕疏遠了十萬年　
年中雖無事也見見　談笑風生聽你表演　
情人每一天　亦見面　願你可偶爾別纏綿　
見你當擺喜宴　永未曾講錢　你我最值錢＊

＃跟你沒計算的感情　永沒利益的陰影　唯獨笑得太大聲＃

暢論大家心聲　大膽反映 毫無防衛那怕沒命
難求童真一般的心情　揮灑個性

REPEAT＊＃＊

採肥貓 = 探肥貓

呢個星期大部分時間都喺屋企上網找工作, 開始有少少悶悶地…今晚約咗璇璇上佢喺西灣河嘅屋企探肥貓薯仔, 好緊張啊…

喺銅鑼灣join 咗璇璇之後, 我哋就搭地鐵去西灣河, 喺璇璇屋企樓下買咗啲嘢食就上佢屋企…哈, 薯仔真係好肥好得意, 又唔怕陌生人, 我去到冇几耐薯仔就坐上我對腳, 好重啊, 如果蓉蓉B 都唔怕陌生人一定好好玩…薯仔又好似几鍾意我帶俾佢嘅玩具, 如果璇璇有時間可以多啲同佢玩, 我諗薯仔會好開心0架, 又可以順便同佢做吓運動減肥嘛… ^.^

今晚可以見薯仔, 又可以同璇璇傾咁耐偈, 好開心呢…下個星期璇璇又要開始返學喇, 加油呀, 唔好捱壞自己啊…

聚首一堂

12月中二姨又去咗英國搵uncle, 今晚返嚟香港喇, 咁啱已經唔記得有几多年冇見嘅瑋煜表弟又喺美國返咗嚟玩, 今晚成棚人約埋食飯兼同婆婆預祝听日生日…
咁多年冇見表弟, 見佢之前我同黃小虹都有啲緊張, 我哋都諗唔知表弟而家變咗咩樣, 好白痴…表弟嚟到, 見佢同上次差唔多高(好彩冇乜再高… ^.^”), 不過今次返嚟大個咗、多嘢講咗, 冇上次見佢咁怕醜, 同埋唔知點解佢啲廣東話好似仲流利過上次, 好奇怪…

希望表弟返美國之後繼續努力讀書, 遲啲佢又會去法國讀Master, 可能又要3、4年後先會再見喇…加油加油~

HAPPY NEW YEAR

今日又係新一年嘅開始, 希望學璇璇咁講, 06年啲衰嘢走晒, 07年啲好嘢就會跟住嚟就好喇… ^o^
新年願望都唔少, 總之事事順心就好喇…haha~

HAPPY NEW YEAR~~


P.S. 好多謝璇璇呢几個月嚟鼎力支持, 如果唔係得璇璇成日听我呻到樹葉都落, 呢几個月我都唔知點過喇, thank you… T.T