答案

今朝喺毫無心理準備嘅情況下、得到一個等咗幾日嘅答案，感謝天上嘅爸爸，祢真係有垂聽我嘅禱告，好讓我唔使再等咁耐，其實等待都係一種折磨...

雖然呢個答案並唔係我最希望得到嘅答案，不過都好多謝你將心入面嘅想法講俾我知...

因為一早已經有心理準備，所以心情還可以，唔使擔心我...

I would be okay. Hope you would be fine, too.

Hope God bless our friendship.


P.S. 多謝肥佬哥哥，每次同佢傾完偈，就算心情本來幾唔好，都會開心番，因為佢實在太搞笑...Thanks so much...
P.S.2 我要再多謝一個人，就係Able，真係唔知點多謝佢好...只可以講句: You're my best friend... ^.^

參加錫安團的聚會

今日如常返午堂崇拜，完咗崇拜之後有特別節目...

話說尋日收到同事Esther 嘅電話，佢邀請我今日去佢哋錫安團嘅聖誕感恩祈禱會(類似係啲咁嘅gathering 啦)，我見今日下晝都ok 得閒就應承咗佢，完咗崇拜我就跟佢一齊過去玩...大致上感覺不錯，好多謝Esther 嘅邀請 + Fanny 嘅招待... ^_^

總結一下整體感覺...唔知係咪人少啲、大家真係會close 啲，感覺上錫安嘅團友都幾nice，大家都可以好casual、好自然咁傾偈，感覺上冇石浪嘅弟兄姊妹咁正經、咁拘謹...如果同我第一次返石浪嘅時候相比，我覺得錫安嘅弟兄姊妹雖然年紀比我大少少(只係少少啫，大家都係廿幾歲啫 ^.^)，但係從佢哋嘅分享都聽得出佢哋小組中嘅弟兄姊妹關係真係好親密，大家好似一家人咁互相關心、彼此代禱，呢種感覺我喺石浪真係一啲都feel 唔到...

其實石浪係咪真係唔太適合我呢?如果轉去錫安會唔會感覺好啲呢?要認真為呢個問題祈禱...

-----------------------------------------------------------------------------------------------

今日靜落嚟嘅時候繼續俾同一個問題纏繞住...我係如果心裡面有問號就要問清楚嗰種人，到底係我自己太悲觀、諗多咗，還是真係如我所料呢?無論結果係點，我都好想知道答案...

解鈴還須繫鈴人，一切都要等繫鈴人返嚟先解決到...希望我捱得住...

煩

尋日喺屋企自閉咗一日，今日點都要出街行吓，如果唔係應該會黐線...

喺大埔中心同媽咪爸爸飲完茶，再閒逛咗一陣，返到屋企又執咗一陣嘢，照計應該冇乜空閒時間諗嘢，但係唔知點解一靜落嚟個腦又不停轉，諗住同一個白痴問題...

唉...好煩呀...點解會咁0架?! : (

Tea w/ Able @ x'mas day

今日係聖誕節，因為各種原因，心情其實麻麻...

下晝約咗Able 出嚟食咗個tea，同佢傾咗陣偈、笑咗一陣，心情好番少少...

我知道無論我心情好定壞，都有好多好朋友stand by 聽我發牢騷，好多謝你哋...

Merry x'mas!!!


P.S. 今日好似又諗通咗少少嘢，就係凡事都要學懂放輕鬆，因為好多事都唔係我一個人可以控制，要學懂全然交上，天父一定會為我好好安排...

我的台灣之旅泡湯了

本來23/12 - 28/12 我應該身在台灣，因為我嘅失敗 + 低能，我而家已經返咗嚟香港，唉...真失敗...

話說23/12 嗰晚我哋一行4人已經抵達台灣機場，正當大家一齊去搞落地簽証嘅時候，先發現原來我本passport 嘅expiry date 唔夠半年，只係得4個月，嗰啲關員話我一定要搭飛機返香港，唔可以入台灣境...本來地勤小姐話安排我搭即晚機返香港，但係因為太夜已經冇機飛返香港，我只可以喺機場酒店住一晚，第二朝搭8點機返香港...當我目送3個朋友離開嘅時候，除咗無奈之外，仲差少少想撼頭埋玻璃，撼暈自己就算(我係認真地有咁諗過)，真係好好好失敗...

去到酒店(其實間酒店係連接住機場，我完全冇離開過機場呼吸過台灣嘅空氣)，即刻買電話卡打電話俾媽咪，估唔到佢居然一句都冇鬧我，仲好positive 地安慰我，話好彩我唔係搭咗好多個鐘頭飛機去咗好遠嘅國家，咪當自己好豪地遊咗個飛機河囉...識咗佢廿幾年，我都係而家先知原來媽咪有時諗嘢都幾正面，聽完佢咁講，個心都舒服少少...

打完電話俾媽咪、Able，有啲肚餓，去咗搵嘢食，嗰陣只係10點幾，諗住去Starbucks 坐一陣，點知咁早就收舖，得番間牛肉麵未收，食咗碗麵就返上房沖涼瞓覺...

咁大個，都係第一次自己一個人住一間酒店房，覺得自己好豪...其實間房都幾大幾靚，但係得自己一個又真係有少少驚，好彩因為實在太攰，一上床就瞓著，仲一覺瞓到morning call 叫醒為止...

7點鐘，梳洗好就去機場搭飛機，9點半就返到嚟香港...

我諗我往後嘅人生大約都會係咁，因為我嘅論盡 + 低能，將會試好多人哋唔會試嘅嘢，我諗屋企人、熟悉我嘅朋友應該都會慢慢習慣，唔會再被我嘅'surprise' 嚇親...

算啦...整定我要留喺香港過聖誕...Taiwan~I'll be back! : )


P.S. 當一個人徬徨無助嘅時候，最難受嘅並唔係孤單嘅感覺，而係搵極都搵唔到想搵嘅人，只係想聽一聽佢把聲、穩定一下自己嘅情緒啫，原來係咁難...

很想哭...

心裡又被大石頭壓著，很不好受...

很想大哭一場，哭過後應該會舒服一點...但真的哭不出來...

看來我的眼淚在很久以前已經流光了...

----------------------------------------------------------------

看來我的直覺也很準確，不知應否為此感到高興...

算了吧...再一次証明凡事也不要太認真，看得太重只會令自己難過...

08 Retreat Camp

返埋尋日學，同學就開始放聖誕假，佢哋上晝完咗聖誕崇拜 + 聯歡會之後就可以放學...同學走晒，老師們就喺學校食咗餐聖誕餐，之後我哋就出發去沙田突破青年村參加兩日一夜嘅退修營...

感覺上今年嘅退修營特別有意思，因為今年係學校10周年，retreat camp 嘅主題都係圍繞住關愛文化，我哋一入到camp 就要合力砌一件禮物送俾學校，總覺得大家同心合力完成一啲任務嘅時候，嗰種團結嘅感覺好touching...再加上尋晚聽到幾位老師喺靈糧工作多年嚟嘅感恩分享，真係好感受到佢哋喺靈糧工作有好多值得感恩嘅地方，真係好感動...

今朝臨出camp 嘅時候，我問新同事曦文(註︰佢未係基督徒)對於join 呢個camp 嘅感覺，好開心聽到佢話對基督教有啲正面嘅改觀，我知道以曦文一個咁有自己原則想法嘅人嚟講，要徹底改變佢對基督教嘅觀感並唔係一件容易嘅事，所以聽到佢咁講真係好開心，呢個絕對係一個好開始，希望佢會慢慢改變對基督教/基督徒嘅感覺...

其實都好多謝學校安排retreat camp 讓我哋有相交嘅時間，我哋又好似了解大家多咗啲，同時又被老師們發現原來我啲破壞力都幾驚人，真係失禮晒... ^.^"


P.S. 最近3個星期開始習慣喺每晚臨瞓前嘅禱告為一個我原本冇mention 過嘅人祈禱，really hope God bless him... : )

Shopping w/ Kennis

今朝如常返崇拜，返完崇拜食埋lunch 就出去旺角搵Kennis 陪佢買x'mas gift 送俾人...

我哋喺旺角行咗一陣，Kennis 發覺佢想買嘅嘢原來喺旺角好難搵，反而好多都喺銅鑼灣買得到，跟住我哋又轉移陣地搭車去銅鑼灣...

去到銅鑼灣，Kennis 話唔知係咪對鞋唔舒服，對腳有啲痛，我哋好傻地交換鞋著，好搞笑...

我哋喺銅鑼灣行咗好多地方，行完Time Square，又行Sogo，喺McDonald 食咗個快dinner 之後，仲去埋維園行工展會，可能我哋太夜去，除咗冇乜人行之外，連貨都得番好少，感覺上好似已經係最後一日俾人買晒啲貨咁，冇乜嘢買...

行完工展會我哋各自歸家，雖然有啲攰，不過又可以同Kennis 玩，好開心呢... ^.^

Lunch w/ Julissa & Photo taking w/ my lovely colleagues

今日節目豐富、行程緊湊，so happy~

首先，今日約咗Julissa 喺沙田食lunch，今次好可能係Juli 嫁去美國前我哋嘅最後一次見面(希望佢走之前可以再見多佢一次啦)，我哋又傾咗好多偈，雖然佢未有咁快走，但係已經開始有少少唔捨得佢喇，好冇用... T.T

同Julissa 食完lunch 之後，返咗大埔同Wing Wing、超、廸廸、銓銓、美貞佢哋喺大埔海濱公園同Wing Wing 影畢業相...Wing Wing 真係好鍾意跳起嚟影相，我哋好難得先影到正經嘅相...我哋一路影一路笑，笑到肚痛，好辛苦... ^o^
本來其偉都會嚟影相，但係佢媽咪唔舒服入咗醫院，所以佢嚟唔到，如果佢嚟埋應該會仲開心呢...

影完相之後我哋夜晚又去沙田食飯，一日去兩次沙田、同唔同嘅人食兩餐唔同嘅飯，有少少搞笑...

今日雖然有少少勞碌，不過可以見到大家、同大家玩，好開心啊~

Special Day

今日係我決志信主一周年，時間過得真係快，記得舊年嘅今日係Sports Day，我喺大埔運動場決志，咁快就一年...感謝主，呢一年我都過得好平安、好喜樂...Thanks God! ^.^

今日亦係要交assignment 嘅deadline，對住呢份assignment 真係有少少束手無策，我尋晚做到3點都仲未做完，惟有放工之後去IED 做埋佢，原本盼望11點半可以完成，因為要趕尾班巴士，點知都係搞唔掂...諗諗吓，反正都係要搭的士返屋企，不如慢慢諗、proofread 多幾次，搞搞吓，凌晨3點先做完，返到屋企3點半...哈哈...好眼瞓... ~.~

終於交咗份唔係好知自己寫咩嘅assignment，希望個grade 唔會太差...

不想上學

今日放工之後又要去浪澄灣IED Town Centre 返學，經過上星期第一堂嘅experience 之後，今日真係超級唔想返...

返到去，個吹水lecturer 又不停廢0翕，佢係就係prepare 咗powerpoint，但係基本上佢成堂都冇點講過啲points，下半堂仲要係超無聊嘅discussion + 所謂嘅presentation，天呀~點解會咁0架?讀咗咁多年書，都係第一次咁唔想返學，簡直係浪費大家時間... >.<

忙裡偷閒 出街食晏

今日都算有啲忙，不過忙中又愉到時間同老師出街食lunch，真高興...我同Michelle、Clara、Kenise、Ceamy 老師一齊去咗和民食lunch，難得可以出街食lunch 真係好，Michelle 話我哋好似放監咁，好搞笑~

食完lunch 我哋又趕返學校，如常工作...臨放工之前我又modify 啲marksheet，可能望住個excel 表太耐，個頭有少少痛...

放工之後返廣福嘅茶餐廳同好耐冇見嘅Ric 飲杯嘢，傾咗一陣偈，之後我就返屋企，佢就join 啲friend 慶祝生日...多謝佢專程就我喺廣福見面，又，順便預祝佢聽日生日快樂! : )


P.S. 呢個星期生活習慣 & 心態上都有啲轉變，雖然唔知道之後嘅事會係點，但係都希望係一個好開始... ^.^

放工去shopping

今日如常工作，放工嘅時候諗住返屋企，點知同事阿Sam 走過嚟撩我去 i.t 買衫，我又抵受唔住誘惑同咗佢去又一城 i.t...

因為阿Sam 之前買咗嘢，我哋可以憑單半價買正價貨品，抵好多呢...我哋一人買咗一件褸，阿Sam 個friend 又買咗個袋，大家都有收穫... ^o^


P.S. 今日知道一個學生嘅爸爸因病去世，願主保守安慰佢哋一家...

Dinner w/ 小姐 & Wendy

今晚放工約咗小姐、Wendy 喺尖沙咀食飯，好開心...諗諗吓原來我哋差唔多冇見1年半，大家都忙，真係比較難約...

我哋今晚去咗海港城Dan Ryan 食飯，啲嘢食好大碟，都ok 好味... : P

我哋今晚傾咗好多嘢，工作上嘅嘢、聖誕plan 去旅行但係可能去唔成、中學同學邊啲結咗婚 etc...我哋8點坐低，估唔到一傾就傾到11點，nice talk~

食完飯之後我哋喺海港城出面影咗少少相，我哋好耐冇試過一齊影相喇... : )

今晚可以見到兩位elegant ladies 好開心啊，希望農曆新年前我哋又可以再約出嚟見吓啦...

An unexpected news

今晚早食完飯，上網開MSN，喺毫無心裡準備嘅情況下知道咗一啲嘢...

點解會咁0架?實在有啲突然...件事本來已經好複雜，而家越搞越messy...

我諗我真係需要少少時間冷靜、消化...

Sunday afternoon w/ Kennis

今朝本來校好電話個鬧鐘起身返崇拜，點知原來電話冇電，鬧鐘冇響到，我扎醒嘅時候已經係12點幾...

起身之後食咗少少嘢，4點出發去旺角同Kennis 行吓街講吓嘢...我哋真係掛住講嘢，都冇認真地睇嘢買嘢，喺人多擠逼嘅旺角一路行一路講嘢真係好辛苦...

行咗一陣我哋去咗朗豪坊Food Court 食飯，我又好大食地食晒成碟河粉，肥死...

今日可以見到Kennis 好開心啊，知道佢喺新工作環境同啲新同事相處得唔錯，真係好...不過佢近排都腳痛，希望佢對腳可以慢慢好番，唔好成日痛就好喇...


P.S. 爸爸今日上咗嫲嫲度，嫲嫲冇事，原來佢尋日以為門鐘聲係鑽嘢聲所以冇開門(註: 嫲嫲係撞聾0架)...嚇死人咩...冇事就好喇... ^.^"

擔心

尋晚只係瞓咗3個鐘就起身返學，好眼瞓...今日係呢個英文course 嘅最後一堂，下個星期六可以瞓晏啲，yeah~

Lunch 同3個同學去咗Ied 嘅酒樓飲茶，食物、service 都好一般，應該唔會再去第二次...

食完lunch 之後返屋企瞓咗一陣，之後搭車去嫲嫲度...我同爸爸上到去按咗好耐門鐘嫲嫲都冇開門，爸爸話嫲嫲可能見天黑唔敢開門，跟住我哋就走喇...爸爸話佢聽日返工前會再上去睇吓嫲嫲喎，其實我個心有啲驚，希望嫲嫲冇咩事...


P.S. 今日全日心情麻麻，我又開始發作......到底我仲要用幾多時間先會好番呢? : (

My 1st teaching + Gathering w/ Wing Wing & colleagues

一個星期嘅English Week 完滿結束，今年一如以往請咗人嚟學校做drama，今次做《阿拉丁》，我覺得好好睇，啲學生都睇得幾投入，今年應該比舊年有氣氛好多... : )

今日係我入2E 試教第一個Grammar item 嘅日子，真係好緊張，講完1 part 就有少少dead air，啲黑板字又超核突，支咪又唔夠長搞到我要放低支咪先寫到黑板嘅最邊邊位置，總之就唔ok 啦...

不過啲細路對我都算係唔錯，全程都好乖、好靜(當然有部份瞌眼瞓、唔係好留心聽我講)，其中某幾個仲不停答我問題，讓我知道佢哋明白我講緊乜嘢，多謝佢哋俾反應我，下個星期請佢哋食糖先... ^.^

其實都有心裡準備會教得唔好0架喇，因為我真係未試過正正式式教佢哋textbook 裡面嘅知識，再加上老細喺度就更加緊張，如果有機會再試，希望可以放鬆少少，再prepare 得好啲就好喇...

---------------------------------------------------------------------------------------------

今晚放工有街去，約咗Wing Wing、廸廸、超、其偉、銓銓、小雲老師喺尖沙咀食飯 + 影相，我哋喺Pizza Hut 食飯，之後去咗碼頭附近影相，今晚好大風，喺相入面嘅我哋應該全部都係披頭散髮... ^o^

影完相，大家意猶未盡，一齊搭車返沙田搵個地方坐低傾偈...嗰陣都差唔多12點喇，啲舖頭都閂晒門，我哋就好似啲夜青咁坐喺沙田大會堂出面啲樓梯傾偈...傾傾吓就傾到3點幾，我哋仲夜過啲夜青走，真癲喪...

----------------------------------------------------------------------------------------------

今晚又可以見到Wing Wing，好開心，又可以同同事們慢慢分享我哋嘅內心世界，好難得有咁嘅機會呢... : D


P.S. 今日同小雲老師傾咗好多偈，而Wing Wing 又幫我證實咗一啲嘢，我諗我知道應該點做...

與Kennis 詳談

今晚我好難得咁精神，可以同Kennis 講一個咁長嘅電話，連本來想留番星期日見到佢先講嘅topic 都一次過講埋，好長氣...

但係我哋好似越講越灰、越講越心0翕，我哋應該係諗得太多喇...

好耐冇試過煲電話粥，好懷念當年我哋日日見面唔停口講嘢嘅日子... ^o^


P.S. 呢兩日隻右腳好似冇咁痺，不過演變成少少抽筋...Kennis 話我咁樣可能係中風嘅先兆，啋過佢，冇句好說話... >.<

Sunday afternoon w/ Able

今日如常返崇拜，一邊聽講道嘅時候一邊諗「如果可以帶黃小虹返嚟聽呢個講道就好喇」...

完咗崇拜後同銓銓食lunch，之後約咗Able 行吓街傾吓偈...我哋留守喺大埔，又傾咗好多嘢，知道佢屋企近排發生咗啲事，希望Able、哥哥可以多啲陪吓auntie，有Able、哥哥嘅支持，我諗auntie 會好快開心番... : )

行到6點幾，Able 要同哥哥、auntie 食飯，我都諗住返屋企...點知媽咪話唔想煮飯，我就同媽咪、黃小虹喺八號花園食飯，仲好搞笑地俾我哋「撞破」一個約會... : D

今日又行咗好多路，隻腳唔係好舒服，希望會慢慢好番啲...


P.S.1 原來今日Aaron 喺apm 有簽名會，miss 咗0添...
P.S.2 上星期某日老細同我講，下星期想俾我試吓教佢班2E，教其中一個Grammar item，嘩~好驚喎...希望handle 得到...

What a busy week

今個星期開始忙碌地準備下個星期English Week 嘅嘢，整board、預備material，日日做到冇停手，唔明點解啲嘢好似整極都整唔完咁，好彩今個Sem 星期三嗰個module 已經完結，今個星期嘅weekdays 唔使因為返學而趕住走，可以留夜少少都唔怕...

唔知呢排身體機能係咪出現問題，由星期一朝早開始，我嘅右腳由膝頭以下至腳板都好麻痺，感覺就好似壓住咗隻腳好耐，之後起身痺痺地嘅感覺...星期一我都以為痺一陣會冇事，但係今日已經係第5日，都仲係痺，點解呢?應該冇大礙啩，已經開始習慣呢種感覺，只要行路、行樓梯嗰陣唔會仆親就得啦... ^.^"

希望快啲痺完......


P.S. Something is distracting my attention recently...But don't know whether it's good or not...Hope everything will be ok...Thanks for 其偉's reminder anyway~ : )

難捱的課堂

今朝如常返學，今日呢堂真係好難捱，除咗悶之外，lecturer 同其中3位同學差唔多用咗1/3堂時間辯論完全唔關writing 事嘅topic，我哋被逼要聽佢哋4個發表偉論，oh dear...希望凈番嗰兩堂佢哋會忍一忍口俾我哋聽吓書啦...

今日涼咗好多，終於有少少凍嘅感覺，就嚟11月中先開始凍，好可怕...香港就嚟冇冬天喇... : (


P.S. 呢兩日忽然好想提醒自己 + 身邊嘅人︰Don't be childish! Be considerate and optimistic!

Presentation ^_^

今晚如常返學，不過今晚同平時有啲唔同，因為今晚唔係上lecture，而係要present 嚟緊份final assignment 嘅outline...好耐未試過present，仲要冇咪，所以又有少少口窒窒，不過lecturer 冇乜點彈啲content，仲好例牌、好客氣地話very good，咁即係應該ok 啩，如果照住呢個concept 做應該唔會出事...

present 完之後tutor 派番上次嗰份assignment，未攞到手之前我仲同隔離位講我驚好低分，點知居然有A-，好開心，好耐冇試過攞A-，不枉我捱咗晚通霄...A pretty good start... ^.^

始終都覺得功課係要自己做，真係唔可以借人哋啲功課嚟「參考」，自己努力過如果成績好嘅話係會開心好多0架... : D

又係教師發展日

今日又係教師發展日，今次邊度都唔使去，喺返學校搞...今日節目豐富，上晝係詩歌敬拜 + 專題講座 + 教學分享 (今次仲係我第一次自己一個人企喺全體老師面前present，好彩只係2分鐘，但係我都feel 到自己有少少口震震，都係「多得」同組嘅其中一位老師「欽點」，冇得話唔好 =.= )...

完晒上晝嘅session 之後同老師們去咗大埔中心飲茶，我哋又食咗好多嘢，6個女子居然食咗$316，好嚇人...lunch 之後我哋又返學校，各自參加分組活動，我揀咗整「焗釀雞翼」，因為有家政老師一定唔會出事嘅recipe，所以都整得ok，唔難食... : )

完晒一日嘅活動之後已經4點幾，5點幾就同老師們 (包括︰Angel、Gene、Grace、Ceci、Kenise) 一齊搭車去尖沙咀一間叫ECF Cafe 嘅餐廳食飯補祝Grace 生日...我哋當然又係叫到一枱都係嘢食，全部都好好味，Angel 冇介紹錯~ ^.^

食完飯時間尚早，我哋閒逛咗一陣，我仲買咗一個袋俾媽咪做生日禮物，而家買咗遲啲就唔使專登抽時間出去買喇...

今日由朝玩到晚，雖然攰但係感覺不錯，如果聽朝唔使早起身返學就更加好喇... ^_^

Sports Day + Dinner w/ Wing Wing

今日同聽日都係學校Sports Day，今日做嘅嘢都唔係太辛苦，純粹喺有冷氣嘅紀錄室入比賽結果data，另外下晝有一段時間要去接棒區幫一幫手...其實呢兩樣duty 都唔辛苦，有冷氣嘆都不知幾爽，不過原來同4個電腦科嘅男老師一齊屈喺同一間房做嘢都幾辛苦，佢哋入data 嘅時候如果遇到奇怪狀況，就會一人一句用好pro、好肯定嘅口吻討論一番，我同另一位TA 同事曦文又唔係好聽得明佢哋講咩，嗰一刻真係有啲無奈...曦文話呢啲係男人與男人之間嘅競賽，大家一齊show off 自己有幾pro，其實真係有啲嘈... >.<

完咗一日工作之後，夜晚約咗Wing Wing 喺沙田食飯，好開心...喺搭火車去沙田嘅時候因為同其偉、阿超一齊搭，我話俾佢哋知我約咗Wing Wing，佢哋兩個又話想join 我哋，然後我哋4個去咗McDonald 坐咗一陣，傾咗一陣偈、又發咗一陣癲，好搞笑... ^.^

其偉、阿超走咗之後我同Wing Wing 一路喺商場兜圈一路傾偈，行行吓我哋見到一個上咗年紀嘅伯伯唔知係抽筋定係中風，無端端企唔穩、嘴角流血然後暈低咗，唔知佢有冇事呢?God bless…

之後我哋去咗UCC Café 食飯，兩個肥妹(: P)一邊食食食一邊冇停過口講嘢，食完意粉 / 飯，仲食咗一大碗沙律(冇錯~我哋係調轉次序嚟食~)，好好味、好飽~原來我哋真係好大食... : )

聽Wing Wing 講喺新學校嘅工作尚算順利，雖然多咗嘢做，但係可以入課室教學生都覺得有滿足感，聽到佢咁講就放心喇... T.T

今晚好多謝佢聽我講一大堆無聊仔嘢，又幫我分析，聽完佢嘅「專業分析」之後我個心立時定咗好多，好多謝佢... : D

Dinner w/ Able @ McDonald

近一兩個月都唔係好想返團契，今晚都唔係好想返，所以約咗Able 食飯...

Able 話想試McDonald 個和風芥末雙層魚柳包，我哋就喺新達McDonald 食dinner...食完就上咗佢屋企傾偈...

近幾日俾一啲事困擾，多謝Able 聽我分享，同佢講完舒暢不少...Thanks~ ^_^

休息一天

今晚返學要交功課，尋晚做到好夜先做完，今朝起身嘅時候超頭痛 + 周身骨痛...其實要撐住返工都返到，不過我知自己一定會不在狀態、完全唔知自己做緊乜，所以最後都係請咗一日假...

下晝去咗睇醫生，醫生話我感冒，俾咗一堆葯我食，食咗一次就去返學，食完好眼瞓...

上堂嘅時候終於交咗功課，交咗就算，唔好諗咁多...

希望聽日有力做嘢... : )

Wing Wing's last day

今日係數學TA Wing Wing 嘅last day，我哋成班同事約好咗今晚同佢食餐farewell 飯，本來我今晚要返學，但係因為大部分同事都能夠喺今晚出席呢個飯局，我決定逃學一次...

放工之後我哋喺office 集合，總共13人（包括︰Fanny、廸廸、Esther、傑傑、超、Rebecca、銓銓、Cindy、美貞、其偉、曦文、我 & Wing）一齊去大埔墟新街市其中一間叫三小姐嘅大排檔食飯...

原來我哋真係好無聊，啲餸菜好唔好味都係其次，狂影無聊低B 相先係重點...著名攝影師超哥（: P）親自操刀幫Wing Wing 同我哋各人影咗好多低B 相，真係好好笑~ ^o^

食完飯之後大家各自歸家，凈番Wing Wing、其偉、銓銓 & 我4個去咗新達許留山一邊食糖水一邊閒聊，10點左右就分別喇...

唉...雖然Wing Wing 喺靈糧只係做咗4個月，但係唔知點解好似識咗佢好耐咁...其實好難得喺工作嘅地方認識到啱傾嘅同事，連office 同事都成日笑我哋行孖必，Wing Wing 走咗又得番我自己一個行單必，真係唔捨得佢走...不過佢嘅新工作的而且確會challenging 好多、又可以吸收多啲教學經驗，無論如何都比留喺靈糧好，希望佢好快適應新工作環境、同事、學生...

God bless her~ ^.^

當年今日

今日......並唔係年年都會記得今日，但係今年竟然又記得......

已經過咗咁多年，絕對有理由相信有關人士已經忘記得一乾二凈，我仲記住呢啲無謂日子做咩呢？真係冇鬼用...... : (

好緊張

上星期五臨放工嘅時候趁老細稍為得閒少少，我問佢可唔可以由下星期開始跟佢上2E 堂，佢話冇問題...

咁我下星期就開始跟佢入課室睇佢上堂、順便了解吓呢班同學仔喇，好緊張... ~.~

波波的哥哥抵達新居

今日好似好忙咁......「行程」如下︰

1. 朝早返Ied 返學；
2. 放學之後約咗同事銓銓喺大埔中心食lunch；
3. lunch 之後我哋去大埔墟接貓義工小姐 & 波波嘅哥哥（其實佢叫Simba）上銓銓屋企，今次亦都係我第一次見銓銓本身養開嘅大貓 - 波子，波子好肥好得意，有少少似加菲貓，而Simba 就出奇地好似好熟地頭咁，落咗地幾分鐘就舒服到攤喺地下；
4. 安頓好Simba 之後我哋送貓義工小姐返大埔墟搭車，銓銓順便買少少嘢，跟住我哋就各自歸家喇...
   

今日有少少熱，「行程」又有少少緊密，所以ok 攰...不過見到Simba 而家有個家、有人錫，少少攰算得啲咩吖，只要波子同Simba 相處融洽就得喇... : )

郭富城舞林正傳演唱會2007/08 DVD

上星期已經買咗Aaron 舞林正傳演唱會2007/08 DVD，1 set 有晒07 + 08，正~

今日閉關喺屋企做功課嘅時候一邊睇一邊做（其實掛住望電視都唔係好留心做功課 : P），Aaron 陪我做功課，正~ ^.^

P.S. 今日係好友Kennis 嘅生日，衷心祝佢工作順利、身體健康、 日日開心、唔好忟憎... ^.^

波波的哥哥和姐姐有家了~ ^o^

今日好開心~首先係同事銓銓confirm 咗佢會領養波波嘅哥哥，yeah~之後義工小姐話我知波波嘅家姐喺早兩日都俾人領養咗，新屋企喺觀塘，真係好~ ^o^

而家兩小貓都搵到新主人，唔使好似其他大貓咁等極都未有人要，thanks god...


P.S. 今日放工前同老細傾俾邊班我實習，點估都估唔到竟然係2E...唉...到時真係要求主加力... : (

探訪波波的姐姐和哥哥

之前提及過同事銓銓有意領養波波嘅家姐/哥哥，今晚放工就同佢一齊入元朗睇貓貓...

熟我嘅朋友都應該知道我認路有幾「叻」，幾經辛苦，終於安全地帶到銓銓去貓義工小姐嘅屋企...去到見到波波嘅家姐 & 哥哥，佢哋同波波真係一模一樣0架，只係size 唔同，好得意...佢哋都好健康活潑，又肯玩玩具，又唔怕陌生人，同波波啲性格一樣呢... ^.^

我哋同小貓們玩咗都有差唔多半個鐘，銓銓似乎都幾鍾意佢哋，仲好似有少少心思思想要晒兩隻0添呀...要啦要啦，一次過帶晒佢哋兩姊弟返屋企啦，咁我得閒又可以帶波波去佢屋企同家姐、哥哥玩嘛... : P

Visiting Julissa's home

闊別咗香港4個月嘅Julissa 較早前由美國返咗嚟香港，趁今日大家都唔使返工，約好咗下晝上佢屋企玩兼睇佢喺美國影嘅相...

Juli 俾咗好多相我睇，尤其喜歡佢喺加拿大同老公結婚簽紙時影嘅相，佢哋兩個（仲有佢老爺奶奶）都笑得好開心，真係好...Juli 又俾我睇佢哋喺美國間屋嘅「間隔」相，外國啲屋真係大得緊要，就連小貓虎虎都可以自己一隻瞓晒成個basement，好羡慕虎虎啊~ ^.^

大約過多一至兩個月Juli 就真係嫁去美國喇，可能要幾年後先會返嚟香港，我諗呢幾年我都會好掛住Juli...不過見到佢同老公咁開心，都好戥佢哋開心呢~ ^o^

國慶前夕的快樂晚上

今日如常工作，放工後節目豐富，好開心... : )

• 開心1︰話說今日阿超帶咗部即影即有相機返嚟，而廸廸就負責帶好靚嘅Hello Kitty 相紙返嚟，到差唔多放工嘅時候，我哋幾個TA 就落咗Office 同Office 同事一齊影相，因為啲Kitty 相紙實在太靚，少女們(^.^")一見到10款唔同嘅相紙「碌」出嚟都興奮莫名，好好笑... ^.^


• 開心2︰放工之後同老師們（包括︰Gene、Ceci、Kenise、Michelle、Angel、Candy）一行7人去尖沙咀食飯補祝Ceci 生日 + 預祝Gene 生日...本來我哋想去試吓Fat Angelo's，但係因為book 唔到枱所以冇得試，之後好彩Kenise 早咗去到海港城睇吓邊度有位，最後我哋去咗Suzuki Cafe，仲有得坐窗口位，我哋一邊睇幻彩詠香江一邊食好好味嘅嘢食，so nice... : P


• 開心3︰同老師們食完飯，我先行離開搭車去太子嘅一間樓上cafe join Wing Wing、其偉、銓銓、廸廸、廸廸's friends 一齊玩棋，我哋玩親都係意識不良嘅game，包括︰打鴨、走私貨物、黑社會幫派互相廝殺鬥多錢，好好玩、好搞笑...下次如果唔知同啲朋友去邊度gathering，去呢間cafe 玩都係唔錯嘅選擇... ^_^

今晚玩到咁夜雖然好眼瞓，但係一諗起聽日國慶放假唔使返工、可以瞓到自然醒就好興奮...呵呵呵~~

Dinner w/ Wing & 銓銓

今個星期又打風，雖然星期三都要返工，但係硬係有少少holiday mood...再加上Wing Wing 嘅請辭，令我哋又多咗個講極都講唔完嘅話題，更加唔係好知自己做過啲咩... ^.^"

今日放工，掙扎咗一陣唔知返唔返團契，知道銓銓都唔係好想返，Wing Wing 又「邀請」我哋一齊食飯，夜晚我哋3個就一齊去咗我嘅至愛和民食飯傾偈...我哋又叫到一枱都係嘢食，然後又唔停口咁講嘢食嘢講嘢食嘢，傾咗好多平時好少機會傾嘅嘢（尤其係銓銓，講咗好多佢平時好少講嘅感受俾我哋聽）...Thanks for sharing~Let's add oil together la~ ^.^


P.S. 我一直都覺得blog 係好私人嘅地方，可以暢所欲言地將自己嘅感想打出嚟；又一直以為只有幾個舊朋友會睇我嘅blog，我都係今日先知道原來有啲我估唔到嘅朋友/同事會上嚟睇...我知道有時我打嘅嘢可能會令某啲人唔開心，真係好抱歉，我真係冇心批評/指責任何人，希望大家睇過就算，唔好咁上心... : )

與同事們喪笑唱K之夜

今日如常工作，放工之後同同事們（包括︰Wing、其偉、廸廸、銓銓、阿超、Cindy）去沙田唱K…原來...大家都係傻0架，一路唱一路笑到傻，我都係第一次唱K 嘅時候會影相 + 拍video，好笑到不得了... ^o^

我哋唱咗好多舊歌，最爆笑應該係其偉唱《大熱》嗰陣，其次應該係其偉 & 阿超唱《遙遠的她》，笑爆咀...原來大家仲會唱埋歌與歌之間、唔係自己點嗰啲歌，仲要係好投入嗰種，好搞笑...臨走嗰陣仲要好激動地唱埋《火熱動感La La La》，見到Aaron 個「靚仔」冬菇頭 + 爆笑舞姿，差啲笑死... : ]

其實聽日大家都要返工，但係大家都意猶未盡，由6點幾唱到11點幾先捨得走，希望聽日知醒起身返工啦...

今晚玩得好開心，遲啲再去唱過！呵呵呵~


P.S. 銓銓之前提過想養多一隻貓，所以我今日問佢有冇興趣領養波波嘅哥哥 / 家姐，佢話有興趣啊~不過要問埋佢媽咪意見先...希望有好消息啦~ ^_^

兩隻小貓待領

今晚本來心情已經麻麻地，因為屋企樓下又搞嗰啲有人唱歌嘅晚會，喺正我屋企樓下個籃球場，好鬼嘈，嘈住人睇電視，好嘈呀~~ >.<

跟住check email，數個月前俾波波我嗰位貓義工小姐send 咗個email 俾我，佢話波波嘅哥哥、家姐仲喺佢屋企未俾人領養，但係佢屋企本來已經有兩隻狗、一隻貓，實在冇辦法再養多兩隻小貓...而且佢哋一日一日長大，超過6個月大俾人領養嘅機會就會越嚟越渺茫，遲多少少佢或者會忍痛帶佢哋去愛協，到時佢哋可能會被人道毀滅...

我知道呢個世上有千千萬萬嘅流浪貓狗，我哋冇可能全部救晒、全部帶晒返屋企，但係難得義工小姐救咗佢哋3兄妹，又照顧得佢哋咁好、咁健康，如果到最後都係冇人要佢哋、要被人道毀滅嘅話，我真係寧願佢哋做流浪貓，起碼唔使咁早死... T.T

真係好希望遲啲會有好心、又適合嘅主人肯領養波波嘅哥哥、家姐，God bless them... : (

小貓嘅資料︰
http://www.hkcats.org/phpBB2/viewtopic.php?t=60257

波波第三次打針 + Tea w/ Able

今日繼續放中秋節翌日補假，冇乜特別嘢做，下晝同媽咪一齊帶波波仔去獸醫診所打埋第三支針...佢今次好叻仔，冇驚到震騰騰，又冇乜點郁嚟郁去，隻肥仔而家8磅重，比上個月重咗兩磅幾... @_@

同波波打完針，食埋lunch 就返屋企...之後5點約咗Able 喺新達仙跡岩飲杯嘢，傾咗一陣偈，7點就返屋企食飯...

Able 聽日開始返新工，希望佢都適應到新環境、新同事啦... : )

林峯Your Love 簽唱會

話說屋企部電視機上星期開始short short 地，上星期五媽咪終於去吉之島買過部新嘅，適逢今個星期有promotion 凡購物滿$800 就可以換一隻林峯CD + 簽名証，媽咪買完電視機幫我去換埋CD + 簽名証，所以今日我就100個無聊地同一班妹妹仔一齊企喺大埔超級城等林峯嚟唱歌、簽名喇...

其實我都有定心裡準備可能會見到學生，點知真係見到一個，我哋仲一齊企、一齊等，有個伴都好嘅，冇咁悶，不過真係有少少尷尬... ^.^"

林峯都幾nice，佢唱咗幾首歌，又同fans 玩咗兩個無聊遊戲，之後簽名嗰陣我同佢講中秋節快樂，佢都同我講番中秋節快樂啊~呵呵~我真係好無聊呀.................

P.S. 其實我一向都有少少鍾意林峯嘅，既然有簽名証，唔好0徙咗佢嘛... : )

BBQ w/students @school

上個星期幾個學生約我今日放學之後join 佢哋班喺學校搞嘅BBQ，第一次有學生邀請我join 佢哋嘅gathering，好surprise~ ^.^

今日放工之後就落咗學校後山join 佢哋，班細路個個掛住打波，差唔多7點先透好爐，燒咗唔係好多嘢食，差唔多9點就要清場，連佢哋一早預備咗嘅遊戲都冇時間玩，惟有留番下次旅行先玩啦...

雖然今晚同啲細路唔係玩咗好耐，不過同佢哋好似熟絡咗少少，希望遲啲又會有學生約我一齊玩啦... : )

殘奧馬術2008

尋日朝早老細同我講︰「校長唔知喺邊度撲到250張殘奧馬術門票，我想你聽日都同啲學生一齊去。」我聽完第一個反應係︰「哦！好呀！我都冇諗過去睇，有得免費去睇梗好啦！」咁我今朝就同中一 + 中六學生一齊去睇殘奧馬術喇~ : )

其實一路上搭車、行進、到達會場，啲學生都算乖，所以我都有機會靜靜地睇咗一陣賽事...如果唔係一邊聽評述一邊睇賽事，其實都真係唔係好明隻馬踏吓踏吓做緊咩，不過如果聽埋評述就知道啲運動員個個都好厲害，佢哋大部分四肢唔健全，其中一個運動員兩隻腳都接受過截肢，佢騎馬嘅時候要用繩綁住兩隻大腿令對腳唔會兩邊搖嚟搖去，雖然佢比賽嘅表現唔係十分突出，但係真係好佩服佢嘅毅力、勇氣...

今日天氣幾好，所以好曬，我哋睇咗大約1個鐘左右就離開，雖然啲學生唔係睇得太留心（佢哋不停嗌好熱，應該唔係好知人哋做咩0架喇），但係今次有機會參與，對佢哋嚟講應該係好難得嘅經驗...（對我嚟講都係好難得嘅經驗啊~ ^.^）

Dinner w/ Percy、Lolo、Kitty、Didi

今日如常工作，放工之後約咗Percy、Lolo、Kitty 、Didi 喺大埔中心和民食飯，我哋叫咗幾多嘢食，我食咗好多... ^.^"

食完飯我哋上咗Percy、Lolo 屋企，一邊食雪糕一邊睇《家好月圓》一邊睇佢哋啲結婚相，真係好多本相簿，逐本逐本慢慢睇都睇咗差唔多兩個鐘...

好耐冇見Didi 喇，今晚見佢精神不錯，希望好快我哋又會再gather 啦... : )

返學 + 與Kennis 去街

今日係星期六，上晝要返大埔IEd 上堂，今日上英文，都幾有趣，唔係太悶，估唔到我哋都有遊戲玩，仲差唔多玩咗半堂... : )

放學之後約咗Kennis 去街，我哋約喺旺角見面，先去飲茶（當年讀書時代我哋經常兩個人去飲茶，邊食邊講嘢）；之後去咗行街睇嘢，我買咗本Melody + Kuromi schedule，雖然12月先用得，但係買咗睇吓都開心，而Kennis 就買咗對應該好舒服嘅女仔鞋，如果佢著過之後話好著，可能我都會買返對返工著；之後我哋又一齊食dinner，食完又行多一陣街就各自歸家喇...

今日聽Kennis 講咗好多嘢，好多謝佢肯同我分享、又讓我可以同佢一齊分擔，希望佢遲啲心情會好番啲啦...嚟緊嘅星期一Kennis 開始返新工，希望佢適應到新環境、新同事，會做得開心就好喇...

第一天上學去

今日如常工作，放工之後懷住少少興奮嘅心情出發去浪澄灣嘅IEd town centre 返學...

其實5點先放工，5:15離開學校，真係冇可能5:30準時去到上堂，我已經以比平時快嘅步速前進，都要6:30先去到，點解其他人會咁快坐定定0架呢?唔通佢哋好早放工?佩服佩服...

上完堂差唔多8:30，返到屋企9:30，啱啱好趕得切一邊睇《家好月圓》一邊食飯...不過真係好攰，希望遲啲習慣咗會好少少啦...

開學了~~

今日又係一年一度開學嘅大日子，見到闊別咗個半月嘅學生們都尚算精神奕奕(其實我自己都好眼瞓，好耐未試過咁早起身喇)，希望今年佢哋會乖啲、勤力啲啦... : )

Opportunity Cost

今日本來有地方要去，但係真係好唔想去...計過opportunity cost 之後，都係決定唔去喇...我唔去嘅cost 只係$100，不過如果去嘅cost 就係︰$100 + 數小時 + 車費 + 食飯錢 + 冇得睇奧運閉幕典禮...

今日好曳，為咗唔去呢個地方講咗個大話，要怪就只好怪自己當日太蠢，點解要話自己今日應該得閒呢?我發誓一定唔會再有下次... >.<

IED Orientation Day

好彩今朝起身嘅時候已經改發3號風球，今日喺IED 嘅Orientation Day 先可以如期舉行...

今朝8:45就去到IED，聽咗唔同嘅talk，見埋其中一個tutor，整體感覺不錯...

3/9 就開始返學，以後逢星期三放工之後要趕去奧運站附近嘅town centre 上堂，星期六朝早就返大埔，諗起就有少少頭暈...

壓力開始來了... : (

9號風球

今日真係打得成風，仲要係9號風球，雖然唔使返工，但係差唔多開學喇，老師要不停開會之餘，我哋都好多嘢要準備，今日唔使返工啲嘢又要下個星期先做到，好矛盾...

教展日

今日又係開學前嘅教師發展日（簡稱教展日），今次去香港青年協會賽馬會西貢戶外訓練營day camp，嗰度環境幾靚，有少少似曾相識嘅感覺，係咪中學時期去過呢?老人痴呆又發作，真係唔記得喇...

今日教展日嘅活動都係如往常一樣，有詩歌敬拜、講道時間；又有個人靈修時間，我哋可以隨意揀地方靜靜地靈修，但係我明知自己怕熱又大汗，仲學人懶寫意咁坐喺湖邊靈修，又熱又曬，本來唔係好熱都曬到差啲溶；跟住又有小組分享（我被編排到一組好「特別」嘅組別，不過大家都有分享，尚算ok）；lunch 之後有校長介紹來年學校十周年嘅主題，大家小組討論嘅時候一諗起十周年一定有好多搞作就開始唉聲嘆氣，一諗起就知道到時有排忙...

做完正經嘢之後，老師們（包括︰Ceci、Kenise、Gene、Angel、Michelle、新老師Candy）加埋我一齊拉大隊去西貢食海鮮，雖然我唔係好食得海鮮，但係我都有食其他餸，都好好味...見到嗜吃海鮮嘅Gene 食到津津有味，啲海鮮應該好新鮮、好好食... : P

食完飯大家知道鸚鵡差唔多打到嚟，都趕住返屋企...途中我又同另一位老師 - 綺雯老師傾偈，佢知道我將會讀PGDE 都有少少surprise，不過佢好好人，講咗好多有效維持課堂秩序嘅方法俾我聽，如果有機會我會試0架喇...

今日由朝「玩」到晚，真係幾攰，但係有機會同老師們分享工作上/生活上嘅嘢，感覺好好... ^.^


P.S. 任何人知道我將會教書都好surprise，佢哋surprise 我絕對可以理解...希望遲啲返埋學，學多啲實用嘅classroom management skills，到實習/真正教書嘅時候可以「搞得掂」啲細路啦...我會努力0架喇...

楊宗緯《星空傳奇演唱會》

今日放工之後見時間尚早，去咗大埔中心行一陣，行大眾買文具嘅時候順便睇埋CD，哈哈~好開心~其實一路睇文具嘅時候已經聽到播緊楊宗緯喺台灣開嘅演唱會CD，見到CD 同DVD 價錢相差唔係好遠，所以就買咗隻DVD 返屋企喇...呵呵~

喺返屋企之前仲買咗新一期嘅小新，成日都有「不理不理左衛門」，好無聊啊~ ^o^

Visiting Sai Kung w/ Able

今日長週返上晝，1點放工之後就搭車去沙田join Able 展開我哋嘅「西貢hea 爆飲飲食食一天遊」...

以下就係今日嘅行程︰

• 3:00pm: 食late lunch，今餐去咗一間叫「旺泰特食」嘅舖頭食泰國嘢，食咗生菜包、一啲都唔辣嘅黃咖哩雞 + 飯、鹹魚炒芥蘭，好好味~ : P
• 4:30pm︰悠閒閒逛， 影無聊相
• 5:30pm︰去Starbucks 一人買杯嘢飲坐咗個半鐘
• 7:00pm︰又閒逛，又影無聊相，今晚個月光好大好圓，好靚啊~
• 8:00pm︰去之前同老師們去過嘅Pepperonis 食dinner，叫咗一個細pizza、烟三文魚沙律、炸雞拼盤，全部都好好味~
• 9:30pm︰繼續閒逛，又一人食一杯雪糕車軟雪糕，真係好飽喇~ : )
• 11:00pm︰有啲攰，搭車返屋企...

返到屋企差唔多12點半，行咗成日真係好攰...不過今日全日都好hea、好悠閒、好舒服，又食咗好多好味嘅嘢，又同Able 傾咗好多偈，好開心~多謝Able 陪我玩咗成日~~ ^_^

Dinner w/ Gene & Janice

今晚應Gene 嘅邀請，同埋Janice + 我3個人喺大埔食飯...

我哋今晚去咗御八築地食飯，6點半左右開始食，食到8點左右就食完...之後去咗Rainbow 食糖水，感覺好搞笑，人哋飯都未食我哋就食糖水，實在早得太緊要... ^o^

食完糖水，又傾咗一陣偈，9點左右我哋就分別喇...遲啲Janice 轉咗去新學校教，我哋應該會少啲機會見面，希望喺不久嘅將來又可以再一齊飲食一番啦...

發洩不滿

經過尋日嘅一件小事，心裡面又有團火想發洩......

我一向都知自己係一個唔鍾意social 兼有少少自閉傾向嘅人，只不過我尋日更加感受到我真係好唔鍾意同啲只能夠傾到表面嘢、兼夾自以為是嘅人一齊食飯、吹水etc…

其實呢幾日媽咪入咗醫院，我好無聊地喺MSN 度打咗句嘢話「媽咪入咗醫院請代禱」，一啲好有心嘅同事/朋友見到句嘢都會問候吓我/我媽咪，就連平時超多嘢講、見到我會寸寸貢嘅多咀學生都會安慰我話「你媽咪冇事嘅」，我真係唔係好明白點解一個都算成日見（起碼一個星期返團契+崇拜時會見兩次）嘅舊同事+團契組員，一聽到我話媽咪因為血色素低所以入院，就滔滔不絕發表偉論「解釋」俾我聽點解血色素低會好大件事，發表完偉論之後一句問候說話都冇又繼續同佢男友討論佢哋之後放假去玩嘅嘢...

作為一個廿幾三十歲嘅成年人，我諗聽到身邊嘅人嘅親人入咗醫院，熟唔熟都好，都會問候一句啩？點解一個自以為好虔誠、又自以為熟讀聖經嘅基督徒會對他人嘅事咁漠不關心？呢一刻我終於知道原來真係有一啲自以為信咗主好多年，但係行為上依然做唔到聖經所講嘅so-called 基督徒...

其實我真係好唔想每個星期五返團契之前同佢&佢男友一齊食飯（主要原因係我唔想同佢哋講嘢，講完都冇response，佢哋聽完只會繼續講番只有佢哋聽得明，而我又唔方便插咀嘅嘢；其次係佢哋兩個好難頂 >.<）；我更加唔想連星期日完咗崇拜都要同佢哋兩個食lunch...由得我啦，我寧願自己一個人靜靜地食，都唔想同佢哋傾埋啲完全冇內容嘅嘢，我真係唔怕悶，我怕嘈0架咋！~.~


P.S. 我知道其實我冇資格批評任何人，但係真係忍咗好耐，sorry...

波波第二次打針

今日下晏帶咗波波去打第二支針，佢今次叻仔過上次，雖然都有少少驚，但係已經冇上次咁震，打完針仲識自己行番入去街袋...

波波今次磅重比上次重咗1磅多啲啲，如果我好似佢咁一個月重1磅就死火喇... ^.^"

媽媽出院了

住咗兩晚醫院之後，今日中午媽咪終於可以出院，醫生check 過啲基本嘢都冇咩問題，輸咗兩包血，唔使攞葯就走得，可能遲少少覆診先開葯俾佢啩...

呢兩日都冇心情去街，大部份時間都留喺屋企陪蓉蓉、波波（其實係佢哋陪我︰P），主要活動就係下晝去醫院探媽咪，3日假期就咁過咗... : (

去IED 註冊 + 媽媽入醫院

由今日開始放3日大假，連埋星期六、日共放5日，其實都冇乜邊度想去，只係攞幾日假攤抖吓...

今日下晏去IED 註冊，影埋相做學生證，前後用咗半個鐘左右就走得...

之後諗住join 做完定期body check 嘅媽咪去食tea，點知一去到，媽咪就話姑娘啱啱打電話俾佢，話佢啲血色素好低，要即刻入院check 清楚啲...7點左右我就陪佢入院，之後就返屋企喇...

感覺上好似好緊急咁，希望媽咪冇事啦... : )

Dinner w/ Able @ 和民

都有好一段日子冇見Able，今晚約咗佢喺大埔中心和民食飯，一如以往，我哋又叫咗好多嘢食，大部份嘢食都好味，不過其中一個明太子意粉就唔係好得，一人食咗一碟仔就唔想再食喇...(有啲浪費，sorry~)

今晚Able 講咗好多佢嘅近況俾我聽，希望個傻妹唔好諗太多...佢又送咗生日禮物俾我，係Kuromi fing 頭公仔 + Melody & Kuromi 橡筋，thank you~~ ^_^

心情愉快的一天

執咗幾日，學校個位終於有番啲活動空間，枱面終於有番啲位做嘢，不過地下仲有N箱嘢未執，下個星期先算喇...

今日同一位電腦科老師閒聊，佢知道我將會讀PGDE 後，講咗啲佢覺得我可以改善嘅地方，我都好同意佢嘅講法，我會努力學習、努力改善，希望到我成為真正嘅老師嗰陣會做得好啲啦...

呵呵呵~~一諗起老細又飛咗去澳洲探老婆就開心，今個暑假(直至14/8)我都冇王管，雖然都有嘢做，但係老細唔喺度始終都輕鬆好多...Yeah~


P.S. 頭先睇璇璇個blog，估唔到個傻妹會打啲咁嘅嘢，點都好啦，多謝佢咁正面嘅「描述」，我哋大家都要努力啊！^o^

Dinner w/ colleagues @ 青葉日本料理

今日如常返工，放工之後約咗老師們(包括︰Ceci、Michelle、Gene、Kenise)去旺角兆萬一間叫青葉嘅日式放題食飯，預早慶祝Kenise 生日...

我哋點咗好多嘢食，三文魚、甜蝦、南瓜天婦羅、牛肉鍋、吉列生蠔、燒雞翼、燒秋刀魚、燒雞軟骨etc.，食咗好多嘢，好好味...不過限住兩個鐘內任飲任食時間太短喇，想邊食邊傾吓偈都有少少趕，如果可以食耐少少就更加好喇... : P

相信遲啲暑假老師們又會相約飯聚一番，希望到時佢哋又會約埋我呢個聚人一齊玩啦... ^_^

蓉蓉 & 波波的近照

Dinner w/ 璇璇

今晚放工約咗差唔多半年冇見嘅璇璇喺尖沙咀食飯，佢帶我去食韓國嘢，好耐之前睇雜誌都介紹過呢間餐廳，啲嘢食真係唔錯，石頭飯 & 炸醬麵都好好味，如果有機會都可以再去試埋其他嘢食... : P

食完飯之後我哋行咗陣街睇衫，不過唔係好睇得啱，啲衫款好似怪怪地咁，都係睇吓算喇...

跟住經過啲整gel 甲 / 水晶甲嘅舖頭，璇璇忽然心血來潮話想試整一次，搞到我都心思思想試一次，但係如果今晚一齊整會整到好夜，不如搵日等我哋兩個都得閒，又搵到一間口碑好嘅就去試一次啦...

今晚可以見璇璇，好開心呢...希望好快又可以再見到佢啦... ^o^

Sing K w/ Kitty、筠姐 & 肥佬哥哥

今日繼續喺學校執嘢，夜晚放工之後約咗Kitty、筠姐、肥佬哥哥去旺角唱K...我諗我哋太肚餓喇，我哋好似想食buffet 多過想唱歌，不停行出行入攞嘢食，好搞笑...

唱到中途，Kitty 嘅男朋友都嚟咗一齊唱，我點咗幾首Aaron 嘅歌，佢都識唱喎，喺Kitty 嘅薰陶之下果然係勁...

唱到10點幾我哋就走喇，唔知幾時再約到佢哋出嚟玩呢? : )

調位

今個星期staff room 非常混亂，因為又要調位...唉~

全個staff room 差唔多70人同一時間執嘢、搬嘢，逼到行都冇位行，人人都心情煩躁...呢頭pack 完，嗰頭又要unpack，好煩呀~凈係見到一箱二箱就已經心煩，盼望下星期頭可以執好晒所有嘢，有番個位坐就好喇...

如果可以揀，希望我呢一世都唔使搬屋... : P


P.S. 新位好開揚，應該唔可以成日開MSN，再見喇~親愛嘅朋友，有咩事就打電話俾我啦...

A Very Happy Birthday

今日如常工作，lunch 嘅時候office 同事 + lab. technician + 老師為我搞咗個小型慶祝飯聚，我哋叫咗pizza 返嚟學校一齊食，好熱鬧、好開心啊~

佢哋真係好好人，特此鳴謝︰
Esther、Fanny、Rebecca、 Ellen、銓銓、廸廸、傑傑、超、Bowie、Raymond、Cindy、Wing、其偉、小雲老師、Jack & Helen。

感激大家嘅厚愛，million thanks!!! T.T

放工之後約咗好耐冇見嘅Kennis 喺旺角食飯，我哋去咗元綠食壽司，Kennis 又話唔係好肚餓，點知佢攞吓一碟攞吓又一碟，到後來都唔知食咗幾多碟喇，總之就好飽啦...我哋成晚都唔停口咁食嘢同講嘢，好開心，但係都幾攰... ^.^

今日收到好多親朋好友嘅SMS/MSN/Facebook/電話祝賀，又要特此鳴謝︰
Able、Kitty、Didi、璇璇、Ric、auntie Venus、Percy & Lolo、 Wendy、小姐、張珮瑛、表姐、瑋煜、二姨、Heidi、Gene、Angel、Ceci、Grace 、Kenise & Richard (我panel head) 。

好多謝大家記得我生日，希望冇打漏... ^o^

P.S. 今日放工嘅時候望見天空有兩劃應該係直昇機飛過造成嘅煙霧，我覺得有啲似一個十字架... : )

Pre-birthday celebration @ Home

今日下晝3點半就離開學校，出咗何文田攞番學生參加朗誦節得獎嘅cert...攞完就搭車去APM 會合媽咪 & 黃小虹行咗一陣街，喺吉之島買咗一大袋零食，之後再喺美心攞咗個蛋糕就返屋企喇...

返到屋企，開咗一罐吞拿魚 + 蟹柳嘅貓罐頭俾蓉蓉B 食，因為今日係蓉B 4歲生日啊~ ^o^
蓉B 一見我拎住隻碟、聞到陣香味就一邊大聲喵一邊跟住我行，佢平時好少咁激動，好搞笑...唔使5分鐘，蓉B 就食晒碟魚，好似好好味、好鍾意食咁，之前仲驚佢唔鐘意食0添...

跟住夜啲食完飯，我就同蓉B 一齊切蛋糕，希望蓉B & 波仔乖乖地、聽聽話話、唔好再有蚤、唔好生蟲蟲、唔好病，總之身體健康就好喇... ^.^

HAPPY BIRTHDAY TO YUNG YUNG B!!!

Pre-birthday celebration @ Pink Salmon Restaurant

今晚放工約咗老師們喺油麻地一間叫Pink Salmon 嘅餐廳食飯，佢哋好好人，幫我提早慶祝生日，仲請我食飯，真感動... T.T

嗰度啲嘢食好好味、又大碟，我哋order 咗5個dishes，有海鮮拼盤、豚肉鍋飯、牛扒、(Gene 最愛嘅)豬手 & 海鮮焗天使麵，全部都好好味啊~而且嗰度環境都幾舒服，值得再去幫襯... : P

食完飯我哋行番去旺角行咗一陣街、睇吓嘢，行到差唔多11點就各自歸家喇...

今晚好開心，多謝Ceci、Michelle、Gene & Kenise 咁有心同我慶祝生日! ^_^


P.S. 玩完返到屋企，第一時間幫蓉蓉、波波滴葯水，然後又周圍狂噴一支叫Biokill 嘅滅蟲劑，希望聽日喺蓉、波身上嘅蚤會死晒啦，如果唔係有排痕... >.<

極度恐慌

今晚真係嚇破膽......

話說今晚抱波波仔嘅時候赫然發現一隻好似黑芝麻大小嘅小昆蟲喺佢肚上面急速前進，爸爸一睇就知道係蚤，天呀~~點解波仔會有蚤0架?跟住再望一望蓉蓉B，佢白色嘅毛毛上面都有一隻相同嘅小昆蟲前進緊，oh my god......點解連蓉B 都有0架?救命呀~~

唉...仲要咁啱用晒啲滴頸杜蚤葯水，最快都要聽日買咗番嚟先可以幫佢哋滴葯水，唉...今晚應該會成晚覺得好痕咁瞓...... : (

Let's move!

學校新整咗一間gym 房俾老師 & 其他同工做gym，我今個星期好乖，星期二 & 星期四放工之後都落去做咗一個鐘左右運動...雖然我只係喺跑步機上慢行(連跑都冇跑過一步 : P)，同埋踩咗兩下單車，但係總算郁動過，起碼我行緊 / 踩緊嘅時候心跳有快到、有出汗，都算有做過運動啩...

希望下星期放工之後都抽到時間 & 有恆心去慢行一陣、踩一陣單車，move 完嗰晚真係瞓得好啲0架... : )

與老師們唱K

今日放工之後約咗老師們一齊去旺角唱K，我哋由6點几唱到11點几，唱足5個鐘，好強勁，唱到有少少聲沙...

多謝Ceci 點咁多n 年前嘅鄭中基舊歌(e.g.《相思無用》、《你的眼睛背叛你的心》)，一見到阿鄭生當年咁飄逸嘅長髮不停被風吹起，大家都笑到肚痛...跟住又要多謝Gene 點劉美君嘅《最後一夜》，Gene 嘅唱腔唱呢類歌好搞笑... ^_^

今晚大家都唱咗好多歌，應該都几盡興，如果聽日唔使咁早起身返工就更加好喇... ^.^

波波第一次打針

今朝如常返崇拜，完咗崇拜就同團契組員飲茶...之後下晝就同媽咪帶波波仔去獸醫診所打第一支防疫針，波波仔一去到診症室嘅枱面就成身震晒，估唔到平時咩都唔驚嘅百厭星都有細膽嘅時候... ^o^

波波打完針，之後陪媽咪去換新電話，換完就返屋企喇...今日好熱呀，熱死人咩... >.<

強勁的Facebook + <戀愛1/2>

近呢几日開Facebook 嘅時候發現數名小學同學add 我，嘩~Facebook 真係好強勁，十几年完全冇聯絡嘅小學同學都可以聯絡番，好厲害...好彩呢啲小學同學冇乜點改英文名，如果佢哋改咗英文名、樣又變咗咁多，可能真係唔認得佢哋...... ^o^"

另外，今個星期學生考試，老師們下晝可以早走，所以下晝staff room 比較冷清，又係我一邊做嘢一邊聽歌嘅好時機...呢几日我又聽番Aaron 啲舊歌，又聽《你是我的1/2》(呢首歌係當年Aaron & 彭羚嘅廣播劇《戀愛1/2》嘅主題曲，好好聽0架!!!)，一邊聽又一邊諗起Aaron 飾演嘅夏崇哲 & Cass 飾演嘅孔尚雪嘅故事...如果可以再聽番個廣播劇一次就好喇... ^.^

畢業典禮順利完成

經過上星期嘅順延，學校嘅畢業典禮今日終於順利舉行...記得舊年我哋幾位TA 都要著畢業袍坐喺台上面做人肉佈景板，今日都一樣要...

今日我都係揀番紅色邊嘅畢業袍嚟著，始終都係鍾意紅色邊多啲...記得舊年我坐喺台度坐坐吓有少少瞌眼瞓，今日冇喇，今日我好聚精會神，主要原因係因為我今日坐中間嘅位置...

畢業禮around 兩個鐘，完咗企起身嘅時候有少少腳軟 + 頭暈(我俾風吹正個頭，吹咗足足兩個鐘)，真係辛苦晒大家... ^_^"

畢業禮終於順利完成，祝願所有畢業同學都考到好成績，前程錦繡！

為蓉蓉B & 波波仔添置的新設備

今個星期蓉蓉B & 波波仔開始成日扭作一團玩摔跤，望落雖然好似打得幾激烈咁，但係根據我哋嘅觀察，佢哋雖然互咬對方，但係應該唔係好用力咬，所以應該唔會受傷...我反而有少少擔心佢哋打交嗰陣波波仔對後腳會撐到蓉B 對眼，因為蓉B 有幾次同佢打完交之後都流眼水，希望佢哋打多幾次之後會識得就住嚟打啦... ^.^"

今日天氣好番少少，下晝去旺角買咗一個裝貓糧嘅按鍵式儲糧桶，返到屋企將啲貓糧倒入個桶度嗰陣好開心，希望真係keep 到啲糧保持新鮮，咁我遲啲就可以買大包啲嘅貓糧，可以慳番啲錢喇...哈哈哈~ ^.^

滂沱大雨下的一天

今日本來係學校一年一度畢業典禮嘅大日子，但係成朝都落雨落到倒水咁，仲掛埋黑色暴雨警告，所以畢業典禮要順延到下星期六舉行...

亦因為今日嘅天雨關係，我全日都冇出過街，喺屋企瞓完就食，食完就瞓，好耐冇試過全日留喺屋企喇，好hea...

希望下星期六天氣會好番啲，如果唔係畢業典禮唔知要順延到幾時先搞得成...

嘔

今日如常做嘢, 已經多嘢做, 仲要肚痛, 真係有少少暈...

差唔多放工嘅時候, 小雲老師見我唔舒服, 佢又幫我按摩手嘅穴位, 按按吓忽然有股想嘔嘅感覺, 都趕唔切去廁所, 我就喺位隔離個垃圾桶嘔咗出嚟...

嘔完真係舒服啲, 不過有少少腳軟, 本來要去補習都冇力去喇, 夠鐘放工就搭的士返屋企...

諗諗吓, 我諗我應該係食錯嘢...話說我lunch 係食吉之島超市嘅兩餸飯, 根據過往嘅經驗次次食完吉之島超市啲餸我都會輕微肚痛, 只不過今次嚴重啲嘔啫...

喺呢度奉勸大家千祈唔好買吉之島超市啲餸, 原來除咗我之外仲有啲朋友同事食完吉之島啲餸都會唔多妥, 所以真係唔好買啊~


P.S. 多謝小雲老師打通我啲經脈, 如果唔係我應該冇咁快嘔得出... ^.^"

接薯波返屋企

今日等埋媽咪放工, 我哋就出發去元朗接貓BB 返屋企, 我哋幫佢改咗名叫薯波, 希望佢聽得明呢個係佢個名啦...

接咗波波之後就拿拿聲返屋企, 途中我哋都覺得裝波波個去街袋好似有啲臭味, 以為係錯覺, 返到屋企先知道原來波波喺袋度大咗便... ^.^"

之後我哋將波波放咗入貓籠, 佢叫得好大聲、好淒厲, 但係一放佢出嚟又唔叫喇喎, 真係俾佢激死...不過蓉蓉同波波始終都係第一次見面, 所以我哋瞓晒覺嘅時候都係放波波入籠比較好, 佢要叫就由得佢叫啦...

至於超細膽嘅蓉蓉, 唔知點解好驚, 佢匿埋喺衣櫃唔肯出嚟, 唔知佢係俾波波啲叫聲嚇親, 還是見到咁大個貓籠所以驚呢?

希望冇膽蓉蓉B 過一兩日唔驚就好喇...

<萬世歌王>

今晚放工之後同Able 去文化中心睇<萬世歌王>, 今次係我第一次睇詹sir 嘅show, 真係full house, 我哋咁遲都仲買到飛真係好彩...

可能今日都几攰嘅關係, 唔係太投入到, 凈係覺得︰

1. Opening 詹sir 扮Aaron 跳舞跳得好好, 啲step 跟得好足 (雖然力水爭少少 : P), 呢part 我睇得好開心；

2. 跟住詹sir 一人分飾兩角, 好精神分裂, 笑到肚痛；
3. 之後佢又唱 《Thousand Mountain I Go Alone》 (問過媽咪呢首歌應該係叫<楚留香>), 仲要全場大合唱, 笑爆咀 。

除咗某啲自問自答位悶咗少少之外, 其實大致上都几好睇, 不過如果第時再睇詹sir 嘅show, 我諗我唔會買咁貴飛喇, 睇最平飛其實都唔會差太遠... : P

第一次參加祈禱會

因為Percy、Lolo 註冊結婚嗰日我冇返到主日學, 而咁啱嗰日導師梁姑娘一早已經plan 好帶我哋去醫院探訪, 所以我無緣參與...亦由於我冇去到醫院探訪, 所以梁姑娘叫我去番今晚嘅祈禱會補數, 然後做番少少功課...

今晚係我第一次返祈禱會, 主要係詩歌敬拜, 一邊唱一邊祈禱, 感覺不錯...

第時有時間又有機會嘅話希望可以返第二次啦...

快被氣死了

今晚返到屋企, 只係問咗一個問題, 跟住就俾人掟嘢......黐線唔該睇醫生, 唔好搵我嚟發洩~~

不知所謂!!!!!!!!!!!!!!! >.<

<若你能看見>

今朝返崇拜, 唱咗呢首歌, feel 到在座嘅女士們都唱到喊(又聽到好多攞紙巾聲), 搞到人家都差啲跟住喊...忽然坐我隔離嗰位女士伸隻手過嚟同我握手, 真係thank you... T.T

<若你能看見>
如若你能看見藍天，能望到千朵白雲隨風轉，
願你不忘記感謝神，能看見絕未必然。
如若你能聽到潮聲，能聽見千萬狂濤飛濺，
願你不忘記感謝神，能聽見乃主恩典。
環顧世上不知幾多眼睛，連自己雙手亦無從一見，
若你抬頭仍舊見藍天，請緊記凝望多遍。
環顧世上數不清的耳朵，連父親聲音亦從未聽見，
若你偶然緩步至岸邊，請多聽潮浪一遍。

Supper w/ Kitty & 肥佬哥哥

今日好忙好多嘢做, 6點几先離開學校去粉嶺補習...補完己經差唔多9點, 然後返大埔同Kitty、肥佬哥哥喺大埔中心食飯, 最衰歸心似箭嘅筠姐冇等我哋就返咗屋企, 如果筠姐都嚟埋仲開心...

食完飯意猶未盡我哋去咗食糖水, 又傾咗一陣先分道揚鑣...

雖然12點几先返到屋企, 但係好耐冇見肥佬哥哥同Kitty, 講咗好多嘢, 好開心呢... ^o^


P.S. 多謝肥佬哥哥喺公司攞俾我嘅靚錶sample, 我會帶0架~ ^.^

探訪即將加入的家庭成員

今晚放工入咗元朗探訪打算帶返屋企嘅貓BB, 之前我同暫養嗰位小姐講電話嘅時候誤會咗, 以為今晚就可以帶BB 返屋企, 點知原來要等嗰位小姐嚟埋我屋企家訪、同埋等BB 夠兩個月大戒埋奶先可以帶佢返屋企, 係有少少失望, 不過唔緊要啦, 學嗰位小姐話齋, 就算佢而家俾我帶BB 返屋企, 我都冇時間、心機每隔4個鐘餵一次奶, 等多兩個星期先帶佢返屋企都好喎...

其實3隻BB 都好活潑、好得意, 不過我只可以帶佢哋其中一隻走咋, 希望其餘嗰兩隻BB 好快搵到好主人啦...


P.S.呢兩日睇新聞睇到四川地震後嘅畫面, 唔知講咩好...求主安慰生還嘅人、醫治受傷嘅人... :-(

Percy & Lolo 大婚 - 順利完成

尋日同今日都好忙碌, 因為呢兩日係Percy、Lolo 結婚嘅大喜之日, 又係我第一次做姊妹, 好緊張又好開心...

呢兩日雖然唔係真係好多嘢做、更加唔係做到冇停手嗰種, 但係原來行行企企先係最攰...

Anyway, Percy、Lolo 嘅婚禮、婚宴總算順利完成, 祝福佢哋白頭到老、開開心心!

恭喜恭喜!!! ^o^

最後倒數

今晚本來約咗肥佬哥哥放工食飯, 點知佢到7點几都未放得工, 凈番我自己一個喺大埔中心食...之後9點几就同Kitty 結伴上Percy 屋企同其他姊妹傾佢結婚嗰日玩新郎嘅遊戲...

傾完11點几, 好眼瞓...

最後倒數︰仲有3日...希望到時一切順利... : )

Dinner buffet w/ Julissa and Alan

今朝如常返主日學, 完咗同Heidi、傑傑食完lunch 就返屋企妝身, 因為今晚要去Julissa 同佢未來老公Alan 請我哋食嘅dinner buffet...

今晚好開心, Juli 請咗佢嘅best friends (呵呵~好榮幸地我都係其中一個)食呢餐buffet, 今次係我第一次見Alan, 佢好成熟穩重, 應該會照顧得Juli 好好...

睇咗佢哋嘅婚紗相, 影得Juli 好靚、佢哋兩個好sweet 啊~多謝Juli 請埋我去分享佢哋嘅喜悅...God bless... ^o^

P.S. 多謝Able 尋日聽我發洩, 講咗出嚟舒服好多... ^.^

十分充實的一天

今日又係教師發展日, 今次喺番自己學校搞, 唔使專程搭車去第二間學校, 老師有老師喺學校有talk 有嘢玩, 學生就唔使返學, 真高興...不過我今朝去咗第二間學校監考, 監考完join 老師們喺大埔中心飲茶, 飲完茶先返學校繼續下半場...

完咗喺學校嘅下半場後, 同同事們一行10人去咗旺角中心唱k, 我由6點唱到差唔多8點就走喇, 因為又要趕住去下一場...就係同Percy、 Lolo 結婚嗰兩日嘅兄弟姊妹食飯...

今日過得好充實, 仲好眼瞓... Zzzzzz..........................


P.S. 我啲情緒病又來襲, 唔係好掂......

與Able 看電影

今日5．1勞動節, 放假一天, 約咗Able 去沙田睇戲閒逛一番...我哋去咗睇<柴犬奇蹟物語>, 好感動...睇之前都預咗會喊, 不過冇諗過會喊得咁犀利...真係失禮晒... T.T

好耐冇睇過戲喇, 多謝Able 陪我睇戲呢...

So dizzy...

呢兩日唔係好舒服, 好頭暈, 成日不自覺地重複已經講過嘅嘢, 好彩呢兩日唔使做啲要好集中精神嘅緊要嘢, 如果要就真係死得...

聽日有一日假放, 好嘢...

好暈... @.@

計劃增添家庭成員中

今個星期係English Week, 忙咗一個星期終於完成, thanks god...

蓉蓉B 近來好開心, 日日都撩我哋同佢玩, 但係實在真係太攰, 返到屋企就好想瞓覺, 都冇乜時間心情陪佢玩...所以近几日又心思思為蓉蓉B 添個妹妹 / 細佬陪佢玩...

努力物色合眼緣貓B 中... ^o^

3號風球懸掛的一天

今日打風, 朝早出去另一間中學做會考監考員嗰陣吹到頭都差啲甩, 遮都唔知反咗几多次, 好狼狽...下晝本來要去補習都因為太大風雨而cancel 咗, 之後返咗屋企悠閒地瞓咗個晏覺, 好耐冇試過瞓晏覺喇, 好爽~ : )

夜晚依然好大風, 閂晒門窗都聽到呼呼風聲, 超細膽嘅蓉蓉B 嚇到行嚟行去坐唔安、瞓唔落咁, 好好笑...之後仲搞笑, 忽然有隻大烏蠅飛咗入嚟, 蓉蓉B 好緊張爬嚟爬去想撲隻烏蠅, 後來隻烏蠅終於走咗, 如果隻烏蠅唔走蓉蓉B 實跳嚟跳去撞跌晒啲嘢...

希望聽日會好天氣啲啦, 好憎落雨... >.<


P.S. 早几日喺學校食完lunch 無端端好胃痛, 好耐冇試過痛得咁緊要, 好彩伏喺枱閉目咗一陣就冇咁痛, thanks god...可能我個胃開始受唔住我咁樣食嘢法, 開始抗議喇, 我諗我真係要收歛一下...

看似很忙碌的生活

今朝如常返崇拜, 不過由今個星期開始又會忙碌少少, 完咗崇拜仲要返埋主日學, 懶係多嘢做咁...

呢排真係有啲攰, 除咗星期五、日返教會, 星期四、六、日都要補習, 攰到真係隨時都瞓得著...又瞓極都覺得好眼瞓...

雖然呢几個月會辛苦少少, 應該都頂得住啩, 加油啊~ ^o^

與Able 共渡的假期

今日有一日清明節假期, 約咗Able 去街玩...今日係悠閒吃喝玩樂一天遊...

我哋首先超級悠閒地由大埔搭271去尖沙咀, 先去茶餐廳吃一個tea；然後搭船去灣仔, 再由灣仔行去銅鑼灣行街睇嘢；行咗都唔知有冇兩個鐘又食飯, 今晚食越南嘢, 啲撈檬好好味~跟住我哋又好悠閒地由銅鑼灣行返去灣仔搭船返尖沙咀, 再一人食兩個Haagen Dazs 雪糕球先搭271返屋企...天呀~點解我哋會食得落咁多嘢0架??!! ^.^"

今日食咗好多嘢, 好開心啊~最開心就係同Able 喺通利買咗兩張詹sir 嘅<萬世歌王>飛, 5月尾先有得睇, 好期待呢~

與同事們遊山頂和尖東

今日同Ceci, Grace, Gene, Michelle, Kenise & Janice 外出遊玩, 我哋今日去嘅地方根本就係外地遊客嚟香港必到嘅景點, 簡列如下︰
第一站︰山頂 (第3次去蠟像館 *.*)
第二站︰尖東海傍
第三站︰星光大道

話說我哋12點左右去到山頂就搵嘢食, 最後揀咗阿甘蝦餐廳食lunch, 因為我哋之前食咁多次飯都冇為食物影相, 難得今日大家都有帶相機, 所以喺啲食物仲係完整嘅時候就不停為啲食物影相, 個waiter 以為我哋係遊客, 問我哋喺邊度嚟, 笑死我哋, Janice 答佢話我哋喺九龍嚟, 哈哈~好搞笑~

食完lunch 我哋就去蠟像館, 一心以為又可以同Aaron 個蠟像影相, 去到先知道原來Aaron 個蠟像暫時離館, 要4月先返嚟, 噢~好失望~我哋都係無緣再見, 不過我都同其他明星影咗好多相(尤其係劉華, 因為 Ceci & Janice 好鍾意佢, 不停同佢影, 我又唔執輸影埋一份 ^o^), 我哋影咗好多相啊, 好好笑~~

之後我哋搭船返尖沙咀, 喺文化中心出面有好多福娃燈飾, 我哋又開始影相, 逐個逐個影, 影咗好耐, 仲睇埋幻彩詠香江先去行星光大道...

去到星光大道, 第一次好認真地尋找Aaron 嘅手印, 原來Aaron 嘅手印喺成條星光大道嘅最盡頭, 唔怪之得次次都見唔到啦...

行完星光大道, 我哋喺Sogo 嘅Food Court 食埋飯就各自歸家喇...

今日由朝玩到晚, 好高興呢~~如果可以見到Aaron 蠟像應該會更加高興~ : )

深圳一天遊

今日跟媽咪返深圳玩咗一日, 佢同朋友修甲, 我就俾人幫我按腳, 按嗰陣好痛, 但係按完好舒服, 之後行咗幾個鐘都冇腳痛, 勁~~

今日喺深圳買咗好多嘢, 開始覺得香港啲嘢好貴, 要慳啲使先得, 要努力儲錢, 加油努力~ : )

意想不到的「驚喜」

今日冇出街, 喺屋企悠閒地hea 咗一日, 黃昏嘅時候同Julissa 講咗一陣電話, 原來Juli 嘅婚事遇到少少阻滯, 佢好唔開心, 如果我係佢我應該都會好似佢咁, 不過聽完佢同未來老公嘅「後著」之後, 我又覺得不妨一試, 反正機票已經買咗, 過去美國短住一排試吓同未來老爺奶奶相處吓都好喎...

原來人生就係充滿咁多意想不到嘅「驚喜」, 隨遇而安吧, 總會有解決方法的啊~ ^.^

Tea Buffet & shopping w/ Able

今日約咗Able 去街玩, 以我呢啲「餓」底 (同事們話我同另一個同事都係「餓」底, 因為我哋一日到黑都食嘢 ^.^"), 放假去玩都係諗住食...

晏晝我哋去咗都會海逸酒店食Tea Buffet, 啲嘢食都几多款式, 樣樣都好新鮮, 又好快refill, 我哋由3點半食到5點半冇停過, 臨尾仲一人食咗兩杯Haagen Dazs 雪糕, 好好好飽~ ^.^

食到咁飽, 我哋之後去尖沙咀閒逛睇吓衫, 仲喺海港城撞到古兆輝同佢嘅「新朋友」, 見到佢而家有個「新朋友」, 真係好...

今日同Able 玩咗成日好開心, 多謝Able 陪我食埋啲咁肥嘅嘢...

楊宗緯的首張專輯 - <鴿子>

尋晚媽咪居然買咗楊宗緯嘅CD 返嚟, 似乎真係好鍾意佢...

我今日拎咗隻CD 返學校一邊閒hea 一邊狂煲...好好聽啊~聽咗几次已經開始記得啲歌詞跟住唱, 正~唔買都試聽吓啦~

推薦歌︰
幸福的風；鴿子；洋蔥；重來好不好；存愛；你看

楊宗緯加油啊~~ ^o^

海洋公園一天遊

今日本來都係如常返學校做嘢, 但係有幸得到小雲老師嘅邀請, 今日可以外出工作, 任務就係同小雲老師一齊帶27個學生去海洋公園玩...哈哈~好高興~

到達目的地之後, 啲細路各自去唔同嘅地方玩, 我就同小雲老師結伴同遊...我哋都係悠悠閒閒行吓睇吓動物, 去咗大熊貓園探安安佳佳、盈盈樂樂；去海洋館、鯊魚館睇魚；去咗兒童王國玩旋轉木馬、砵砵火車頭 (^.^")；又玩什麼昇空飛球；又去睇海豚表演...

本來行吓睇吓嘢都几開心, 不過喺我哋睇海豚表演嘅時候見到啲好失禮嘅嘢, 真羞家...話說開始表演之前, 一個老伯同一個小女孩 (相信應該係自由行) 行咗出梯級與座位之間嘅小空地, 小女孩踎咗喺度, 跟住小便...嗰度又冇坑渠, 小女孩嘅小便沿住梯級一直向下流...

唉...唔係有心歧視中國同胞, 但係佢哋嘅行為有時真係好失禮...如果今日玩咗成日都冇見過呢啲隨地吐痰、隨地小便嘅「異象」嘅話, 我諗我今日會玩得更盡興... ^.^

A tired but happy day~

今個星期真係忙到人都癲, 前晚、尋晚都7點半先走(我其實係放5點...), 好攰, 不過總算整好晒啲細路 & 老細去澳洲交流團要用嘅嘢, 總算搞掂晒...

今日4點几老細拖住個裝滿學校嘢嘅喼離開教員室嗰一刻, 老師們同佢講一路順風, 好似送緊佢机咁, 好搞笑...嗰一刻我除咗為自己完成手頭上最urgent 嘅嘢而鬆一口氣之外, 一諗起老細飛咗, 即係嚟緊嘅兩個星期我都冇王管、冇人會吩咐我做嘢就好開心喇, 真係可以好好hea 吓、抖吓...呵呵呵~ ^o^


P.S. 今日仲有另一個開心位置︰話說我份contract 二月尾已經完咗, 要再renew, 今日校長親自上嚟教員室俾份contract 我簽, 我見到人工比我expect 嘅加多咗(其實都估到應該會加少少嘅 : P), 我口快快講咗句︰「咁多嘅...」校長就話︰「你應得嘅...」聽到校長咁講, 好開心...再加埋呢兩日得到其他老師嘅讚賞, 真係好感動...我會努力0架喇, 同時我都要學習欣賞自己...Thanks so much~ T.T

Dinner w/ Able

今晚放工之後約咗Able 喺大埔食飯, 我哋去咗喺海寶花園一間叫御八築地嘅舖頭食日本嘢, 我呢啲村姑食嚟食去都係識去和民, 第一次去試呢間, 啲嘢食都好味喎, 叫咗好多嘢食好飽~~

Able 又幫呢間舖頭改咗個英文名, 叫Uba Judy, 救命~黐線0架... ^.^"

到訪Percy、Lolo 的新居

今日如常工作, MSN 見到Percy, 佢話今晚Kitty & Miss Chow 會上佢新居坐, 我放工去完粉嶺補習之後都上咗去坐...

間屋裝修得好靚, 好乾淨整齊, very nice~席間我仲試埋條姊妹裙, 几驚著唔落...我諗差唔多到Percy、Lolo 結婚嘅時候我就不能夠咁放肆食咁多嘢喇, 咁肥失禮人就唔好啦... ^.^"


P.S. 一諗起Percy、Lolo 結婚嗰兩日, 我又聯想到其他嘢, 真係諗得太多喇, 算罷啦...

靈糧堂聯校教師發展日 + 西貢半天遊

今日又係一年一度嘅靈糧堂聯校教師發展日, 上晝我哋去咗馬鞍山靈糧小學聽talk + workshop, 完咗之後我就同Ceci, Angel, Gene, Kenise, Michelle & Grace 去咗西貢半天遊...

我哋首先去Pepperoni 食咗一餐好豐富嘅lunch, 食完之後大家都諗唔到做咩就悠閒地閒逛, 行吓街睇吓嘢...行到6點左右Angel & Michelle 走先, 凈番我哋5個去咗行海邊、傾吓偈...臨走之前我哋仲去咗食糖水, 好味~

今日好悠閒、好開心, so relaxing~ ^o^

Lucky 死了...

尋日又如常去土瓜灣補習, 補完習之後去嫲嫲屋企...上到去已經覺得唔係好對路, 因為門鐘壞咗冇聲, 但係又冇狗吠聲(平時Lucky 會吠0架嘛 – Lucky 係一隻唐狗), 我企咗喺門口應該都有15分鐘, 阿嫲先聽到我敲門, 跟住一開門阿嫲就攬住我喊話隻狗死咗...

見到阿嫲喊得咁淒涼, 我又諗起Lucky 平時好乖好聽話, 然後又跟住佢一齊喊...因為我唔夠膽睇Lucky 嘅屍體(更加唔敢 + 唔夠力清理佢嘅屍體), 所以留喺阿嫲度嘅個几鐘我都冇睇過Lucky 嘅「情況」, 只係喺廳度陪住阿嫲...

直到今日等爸爸放工我哋先一齊上去幫佢清理Lucky, 我都唔敢睇, 我估應該係瞓咗覺咁啩, Lucky 咁乖, 希望佢可以上天堂... ︰)

Dinner w/ Julissa@APM

今日終於唔使放學後考oral, 所以稍為得閒少少, 不過放學後又要做替工幫手做功輔班導師(其實都係睇住啲細路做功課, 唔好俾佢哋發癲), 所以都係6點半先走...

放工後約咗Julissa 喺APM 陪佢買結婚戒指 + 食飯...其實Juli 一早已經睇中咗一對戒指, 本來諗住即刻買, 但係佢啲手指太幼喇, 要訂做先有佢size, 所以未有得即場帶對戒指返屋企...

之後我哋去咗Italian Tomato 食飯, 好好味啊~我又再一次表演我嘅大食本領俾佢睇, 我食晒成個set 再加一件芒果cheese tart, 好飽, 好好味~~~

呢几日真係好攰, 個頭間中有少少赤, 應該都係唔夠瞓累事... : (

Aaron Kwok De Show Reel Extension Live in Concert 2008 (Again)

今日晏晝去粉嶺補習, 然後好趕地由粉嶺搭火車返大埔再轉E41去博覽館睇尾場Aaron concert...

今晚rundown:
01: 舞林正傳
02: 純真傳說
03: 飛
04: 你是未來
05: 分享愛
06: 動起來
07: 親愛的
08: 銀色公路
09: 絕對美麗
10: 越愛越好
11: 有效日期
12: 國王的新歌
13: I Love You So太愛妳
14: 風裡密碼
15: 我為何讓你走
16: 鐵幕誘惑
17: 戀愛態度1998
18: 望鄉
19: 最激帝國
20: 失憶諒解備忘錄
21: 聽風的歌
22: 愛的呼喚
23: 三岔口
24: 對你愛不完
25: 狂野之城
26: 個個讚你乖
27: 唱這歌
28: 著迷
29: 這夜心情
30. 臨行
31. 強

今晚嘅rundown 大致上同上次差唔多, 係多咗encore 部分...Aaron 完咗最尾玩水嗰part 之後, 隔咗几分鐘就著住浴袍出嚟, 感覺好似出嚟打拳咁, 好搞笑~跟住Aaron 「懶感觸」地講咗几句, 然後唱咗<臨行> & <強>...

今晚Aaron 好叻, 佢彈琴彈得好順(係埋尾嗰几個音停得耐少少), 好叻呀~完咗今次演唱會之後, 又要等多4年先可以再喺紅館(或者其他場館)睇到Aaron 嘅個唱喇, 4年後見~ ^.^

做姊妹

今日如常忙碌地工作至6點半, 做做吓嘢同Percy MSN, 佢話想搵我做佢姊妹...噢~真係超surprise, 因為上次我哋食飯(已經係1月嘅事, 時間過得真係快), Percy 都冇話想搵我做佢姊妹(印象中佢好似凈係同Kitty 講過), 咁我就一心以為自己凈係去飲佢嘅喜酒, 估唔到Percy 居然會搵埋我...

好開心, 但係又好緊張, 因為我未做過姊妹, 一諗起要著啲我平時唔會著嘅衫(e.g. 超少布嘅裙 + 露趾鞋)就有啲擔心...Anyway, 好多謝Percy 搵埋我呢~ ^o^


P.S. 多謝Percy 早咁多通知我, 咁我就可以早啲著手「修葺」吓自己喇... ^.^"

疲累的一星期

今個星期係好漫長嘅一個星期, 因為今個星期除咗要陪外籍老師考oral 之外, 星期一至四放學後都要幫手考中四、中六oral, 日日都搞到起碼6點半先走, 好似做咗好多嘢咁, 好攰...

下個星期要繼續作戰, 希望撐得住...


P.S. 話說二姨同三姨喺嚟緊嘅星期六(23/2)又去睇Aaron 演唱會, 呢場係尾場, 諗落我其實應該未睇過Aaron concert 嘅尾場, 所以我又拜託二姨幫我買多張23號嘅飛, 咁我就可以同佢哋一齊去睇多次Aaron 演唱會喇(雖然唔係同阿姨一齊坐, 我自己一個坐第二度, 不過都ok 啦, 反正我凈係望住Aaron 0架啫 ^o^)...
諗落好似好癲咁...Aaron 今次總共開咗16場演唱會(Part 1: 9場 + Part 2: 7場), 我就睇咗4場, 但係如果今次唔睇, 又要等4年先再有機會睇到Aaron 開自己嘅個唱, 所以有得睇一定要睇多次... ^.^

Dinner w/ Able & Auntie

今晚放工之後約咗Able、auntie 喺大埔中心食飯, 好耐冇見auntie, auntie 別來無恙, 精神几好, 希望auntie keep 住身體好、心情好啦...

食完飯同Able 邊踱步返屋企邊講無聊爛gag, 差啲笑到抖唔到氣... ^o^"

是晚精選爛gag︰
1. 寶湖里 = 寶 (Able 個寶) 狐狸；
2. 十六不搭喜趣來 = 九唔搭八翡翠台；
3. 去M.A.C.度修眉 = Macsomate

唉...100個無聊, 連續不停笑, 好辛苦... ︰)

Aaron Kwok De Show Reel Extension Live in Concert 2008

今日返工好多嘢做, 感覺上好似由8點開始冇停手, 但係做到6點都未做完, 好攰...

不過未做晒啲嘢都要走喇, 因為我要趕去亞洲國際博覽館睇Aaron 演唱會...好彩車程唔算太耐, 準時去到Arena, 好興奮... ^o^

入場前, 我喺Arena 出面嘅攤位買咗個Aaron 坐住火紅電單車嘅figure 公仔, 其實上次Part 1 已經心思思好想買另一款細個啲嘅, 但係又唔捨得買, 今次見呢個大啲、Q版啲, 所以就買咗喇, haha~好搞笑~

今晚 rundown︰
01: 舞林正傳
02: 純真傳說
03: 飛
04: 你是未來
05: 分享愛
06: 動起來
07: 親愛的
08: 銀色公路
09: 絕對美麗
10: 越愛越好
11: 有效日期
12: 國王的新歌
13: I Love You So太愛妳
14: 風裡密碼
15: 我為何讓你走
16: 鐵幕誘惑
17: 戀愛態度1998
18: 望鄉
19: 最激帝國
20: 失憶諒解備忘錄
21: 聽風的歌
22: 愛的呼喚
23: 三岔口
24: 對你愛不完
25: 狂野之城
26: 個個讚你乖
27: 唱這歌
28: 著迷
29: 這夜心情

今次Part 2 大部分都係快歌, 成場氣氛都好好, 完全冇悶場, 不過就辛苦Aaron non-stop 不停跳, 但係大家都好high 好開心, 坐最前面嘅人差唔多企晒起身, 好似去咗舞池咁, 好興奮啊~

今次唔敢太癲買咁貴嘅飛, 所以坐得遠咗少少, 但係都睇得尚算清楚, 不過影相就真係遠咗啲, 張張相Aaron 都好細粒, 同埋個地下好震(因為坐我隔離嗰位女士睇得好興奮, 不停搖擺, 所以雖然相機已經有防手震功能, 但係啲相都好矇 ^.^"), 如果100分滿分, 今晚我會俾110分, 超好睇, Aaron 好勁啊~

之後12點几返到屋企, 收到IEd 寄俾我嘅信, 拆信嘅時候真係手都震埋...Thanks god...IEd 收咗我讀PGDE 喇...雖然大家都話IEd 係4間有得讀PGDE 嘅institute 中最易入嗰間, 但係對於我呢啲對自己冇乜信心嘅人嚟講, 有學校收我已經好感動喇, 仲邊有資格揀吖...所以真係要再一次感謝天父... T.T

今晚整晚都心情興奮, 希望開心興奮嘅感覺可以延續多几日...

Dinner w/ Able

今晚約咗Able 喺大埔Pizza Hut 食飯補祝佢前日生日, 一路食一路搞爛gag, 食吓笑吓都几好, 唔使成日諗住啲激氣嘢...

我今年似乎終於揀啱生日禮物俾Able, 佢好似几鍾意份禮物, 真係好, 不枉我搵得咁辛苦... ^_^


P.S. 放咗足足一個星期假, 聽日又要6點半起身喇, 諗起都眼瞓...Zzzzzz......

十級激心

尋晚嘅凌晨, 應該唔係好時辰......

首先, 3點左右收到同事嘅SMS 話佢外婆唔舒服入咗醫院；之後, 3點几接到一個令我几愕然嘅電話, 因為我冇諗過呢個人會有我電話, 仲打俾我, 而且講埋啲咁嘅事俾我知, 真係几驚嚇；然後瞓到半夜5點又接到呢個人嘅電話；到9點几又接到一個...

簡單嚟講, 就係冇覺好瞓, 因為聽完第一次電話已經十級激心, 再加上斷斷續續嘅來電, 瞓咗等如冇瞓...

其實我真係唔係好明點解呢個世界會有啲咁自私、咁任性、不知自愛、不知廉恥、不知所謂嘅人, 連阿媽都管佢唔到, 我更加冇辦法管佢, 佢要放縱自己、自甘墮落我都阻止唔到, 但係唔該喺佢做任何事之前先諗吓會唔會影響到身邊嘅人吖, 成日出咗事先識返嚟求救, 次次都要人執手尾, 真係完全唔知佢想點......

今個新年, 其實我一啲開心嘅感覺都冇, 俾個完全唔理人感受嘅人搞到自己咁, 真係好傻瓜... >.<

恭喜發財!!!

今日已經係年初四, 恭喜發財, 祝大家身體健康, 工作順利, 心想事成!!!

呢几日都係去婆婆、嫲嫲度拜年、食開年飯, 唔知係咪呢几日食得太多肥膩嘢, 好似有少少食滯咗, 睇嚟聽日要食少啲嘢先會舒服番啲... ^.^"

團年飯 w/ colleagues @Friday

今日比尋日更加冇嘢做, 今日真係几hea...好不容易捱到6點, 等埋Cell group 同事Ceci、 Michelle、Gene、Grace 一行5人去咗尖沙咀嘅Friday 食團年飯, 我呢啲鄉下妹第一次去Friday 食美式dinner, 基本上由落order 到埋單都要講英文(個waitress 啲英文好搞笑 ^.^), 食咗好多Ceci 推介嘅美食, 好味道~

食完飯我哋意猶未盡, 去咗杏花樓食糖水, 食埋糖水先有飽嘅感覺, 真係大食到呢... ^.^"

今晚有机會同大家食團年飯好開心呢, 如果Angel、Kenise 都嚟埋就更加開心喇...

悠閒的工作天

今日啲細路開始放假, 喺學校基本上冇咩特別嘢要做...Lunch 同office 同事去咗大埔墟食上海嘢, 俾大家知道咗我原來咁大食... ^.^"

下晝差唔多放工嘅時候, 好同事其偉專登用咗大半個鐘教我查經, 真係好多謝佢...


P.S. 今日依然好凍, 啲手指依然腫腫地, 希望聽日會好啲...

My fingers......

近呢几日啲手指其實腫腫地、有啲痛, 初時以為只係凍得滯凍僵咗、冇咁靈活啫, 但係暖番啲都仲係痛, 諗番應該冇整親, 唔知點解會咁...

夜晚爸爸話我應該係對手凍得滯, 所以關節位痛...佢幫我搽葯油, 搽嘅時候猛屈我啲手指, 超痛, 痛到眼水都流埋...不過搽完葯油好似舒服啲, 冇咁痛...

唉...我呢啲阿婆唔係好捱得, 可唔可以唔好咁凍呢???我日日都要喺走廊行嚟行去當值, 真係好鬼凍, 我哋嗰度仲要比大埔嘅「平地」低兩度左右, 真係凍到骨都赤~~~快啲回暖就好喇...

Dinner w/ Able

今晚唔使返團契, 放工之後約咗好耐冇見嘅Able 喺大埔中心和民食飯, 我哋食咗好多嘢啊~我都覺得今晚我哋叫嘅嘢食全部都好好味...
我哋食咗兩個几鐘就傾足兩個几鐘, 我諗我哋真係太耐冇見喇, 所以一見到面就好多嘢想同對方講...今晚好開心呢...

希望快啲又可以見Able 啦...

是晚爛gag︰一個冇生命嘅鐵鏟, 估兩個字。
.
.
.
.
.
.
.
答案︰死鏟 ^o^

Goodbye uncle~

今晚同Kennis 講咗一陣電話, 知道佢哋今朝送咗uncle 上山, 叫做做完晒應該做嘅事...

雖然uncle 嘅肉體離開咗呢個花花世界, 但係我相信uncle 去到另一個國度都應該會過得好好, 因為uncle 係一個好好嘅人...雖然我唔係見過uncle 好多次, 但係我唔會忘記uncle 親切嘅問候、慈祥嘅面容...


P.S. Kennis 又開始講番無聊嘢喇, 我一向認識嘅Kennis 返嚟喇~Yeah!!!!! ^o^

Kennis 爸爸出殯

今日Kennis 爸爸喺殯儀館設靈(係咪咁叫嘅呢?), 放工之後去咗靈堂鞠咗個躬, 買咗個花圈俾uncle...我坐咗1個鐘左右, auntie 同姐姐都好傷心, 反而Kennis 同細佬就冇乜嘢, 可能Kennis 喺醫院見得多呢啲場面, 所以堅強啲啩...
靈堂入面有香有煙, 比較焗, auntie 喊喊吓見頭暈, 跟住出咗外面大喊咗一陣好似好番啲, 希望auntie 喊咗出嚟會舒服啲...

返屋企嘅途中心情依然沉重, 希望天父會安慰看顧Kennis 一家, 又保守uncle 嘅靈魂得到安息...

週日崇拜

計埋今日, 已經連續5個星期返崇拜, 但係今朝太凍唔願起身, 遲咗少少到, 要等到唱完詩歌先入得, 有啲樣衰, 不過總好過冇到...

記得上個星期牧師講道, 講咗其中一節經文「光照在黑暗裡，黑暗卻不接受光。」（約一5）, 嗰一刻又令我諗起黃小虹...唉...

IED PGDE Interview (Finished)

今朝11點半去IED in PGDE, 先group discussion, 後written test...今次group discussion 少人啲, 3個人一group, 啲問題深入過上次CU 嗰啲, 一路答個心都有啲驚驚哋...之後written test 作文, ok 啩, 寫寫吓都唔係好知自己寫乜...總括嚟講, 今次點都應該表現得好過上次, 希望是但一間收我啦... ^.^


P.S. 呢几日好凍, 尤其喺學校當值嘅時候, 凍到騰騰震, 一行完就拿拿聲匿番入教員室, 我個位隔離有部唔係好覺有暖風出嘅風琴式暖爐, 開咗總算暖番少少...但係都仲係好凍~~~~~

CU PGDE Interview (Finished)

今日長週, 上晝要返工, 下晝就去咗中大In PGDE...

唉, 筆試做得好差, 反而interview 就ok...都係唔掂多過掂0架喇...

剩番下個星期六Ied 嘅last chance, 希望呢次可以表現得好啲...

打邊爐@Rm 101

今日係學校旅行嘅大日子, 照理我其實都要一齊去旅行幫手看住啲細路, 但係因為我又冇看飯、又冇看閱讀課, 所以負責ECA 嘅老師都唔知編我呢啲無主孤魂去邊班好, 所以我就可以唔使去lu...

喺呢啲冇學生喺學校嘅日子, office 嘅同事邀請埋我一齊喺學校打邊爐, 我哋一人買啲料返嚟, 原來一人買少少都已經有好多嘢食, 我哋一路食仲一路打機(打孖寶兄弟賽車), 女士們一路打一路喺度大叫(因為成日唔知行咗去邊), 好好笑~ ^o^

如果啲細路成日都唔喺學校就好喇, 咁我哋就可以成日開party 喇...

Kennis, 加油啊~

尋晚臨瞓前收到Kennis 嘅SMS, 佢話佢爸爸中風過咗身, 真係好突然...上星期五先同Kennis 通過電話, 都冇聽佢話佢爸爸唔舒服, 估唔到星期日就會唔喺度...

夜晚放工打咗幾次電話先搵到Kennis, 我識咗佢6、7年, 從來未見過佢喊、或者隔住電話聽佢喊, 今次係第一次, 佢一路講我都唔知點安慰佢好, 仲好冇用地跟住佢一齊喊... T.T

真係好突然, 明白大家有好多說話來不及講, 有好多嘢想大家一齊做但係又未做...唔好責怪自己, uncle 都唔想見到你哋唔開心...Kennis 要堅強啲啊, auntie 好需要你嘅安慰、照顧...

May uncle rest in peace...


P.S. 今日喺MSN 同Didi 傾咗一陣偈, 好開心有Didi 同Kennis 呢兩位好朋友永遠都知道我心裡面諗咩, 就算我唔講出口佢哋都會估中晒我嘅心事, 仲不斷鼓勵我, 好多謝佢哋...喺佢哋關心我嘅同時, 我都一樣咁關心佢哋, 希望佢哋心裡面嘅傷痛可以早日痊癒...Hope all my friends can always be happy...

CU PGDE interview

今晚check email, 中大send 咗個mail 嚟叫我今個星期六去PGDE interview, 好緊張...

唔知筆試會考咩, 又唔知interview 會問咩...又開始好驚喇... >.<

Anyway, 盡力去做, 神一定會為我揀選一條最適合我嘅路...

Half day-off and Sing K w/ colleagues

繼上個星期六之後, 今日繼續係家長日, 某幾位cell members 星期六已經見晒家長、今日唔使返學校, 佢哋就提議我哋下晝一齊去玩, 咁我又攞咗半晝假同大家一齊去旺角唱k...

早到嘅同事們(Angel、Gene、Kenise、Ceci)由12點唱到差唔多6點, 遲啲到嘅(Michelle、Grace、我)都由2點唱到6點, 唱咗好多歌呢~估唔到我哋(正確嚟講應該係阿Gene : P)嘅歌庫容量咁大, 連陳慧嫻嘅<千千闕歌>、<傻女>、草蜢嘅<飛躍千個夢>etc.都唱埋, 好犀利又好搞笑~

唱完之後大家各自有約, 所以就分道揚鑣lu...下次有機會我哋再約過出嚟唱k 吖, 仲要叫埋Sam Sam, 有埋Sam Sam 一齊唱應該會更加好玩, 而我就會繼續細細聲伴住大家唱, 希望大家聽到啦, haha~ ^o^

可憐的小貓

花貓遭吊打掟街重傷 13/01/2008

冷 血 「 貓 殺 手 」 現 身 黃 大 仙 ， 手 執 一 隻 小 花 貓 的 尾 巴 ， 「 倒 吊 」 拳 打 腳 踢 ， 更 不 理 牠 淒 厲 哀 鳴 ， 將 花 貓 活 生 生 從 七 樓 掟 落 一 樓 平 台 ， 身 受 重 傷 ， 愛 護 動 物 協 會 派 員 將 貓 兒 送 交 獸 醫 搶 救 ， 警 方 正 追 緝 「 貓 殺 手 」 歸 案 。

現 場 是 富 山 邨富 仁 樓 七 樓 走 廊 ， 其 中 一 單 位 的 女 戶 主 陳 太 （ 六 十 七 歲 ） ， 昨 午 三 時 許 在 屋 內 睡 午 覺 ， 突 然 聽 到 貓 的 慘 叫 聲 ， 她 探 頭 望 出 ， 赫 見 一 名 男 子 站 在 走 廊 盡 頭 的 欄 河 前 ， 狠 狠 地 執 一 隻 花 貓 的 尾 巴 ， 一 邊 走 動 一 邊 向 貓 拳 打 腳 踢 ， 花 貓 不 斷 掙 扎 及 慘 叫 。

一 分 鐘 後 ， 陳 太 突 然 聽 到 一 聲 淒 厲 的 貓 慘 叫 聲 ， 她 再 探 頭 查 看 ， 發 現 該 男 子 急 步 向 電 梯 方 向 離 去 ， 花 貓 則 不 知 所 終 ， 她 心 知 不 妙 ， 連 忙 偕 同 孫 兒 走 出 ， 向 樓 下 望 去 ， 發 現 花 貓 倒 臥 一 樓 平 台 ， 身 受 重 傷 ， 下 顎 、 口 鼻 及 前 腳 均 流 血 ， 身 體 緩 緩 郁 動 ， 立 即 報 警 及 通 知 兒 子 趕 返 。

狂 徒 廿 餘 歲 警 兜 截 無 果 當 時 陳 太 兒 子 正 在 旺 角 逛 街 ， 接 報 馬 上 趕 返 ， 他 本 身 領 養 五 頭 貓 ， 由 於 救 貓 心 切 ， 曾 要 求 立 即 抱 走 花 貓 求 醫 ， 惟 被 警 員 拒 絕 ， 擾 攘 數 十 分 鐘 後 ， 愛 護 動 物 協 會 派 出 兩 名 職 員 到 場 ， 將 花 貓 送 交 該 會 的 獸 醫 搶 救 ， 花 貓 屬 於 雄 性 及 已 成 年 ， 頸 部 戴 有 藍 色 頸 帶 ， 估 計 有 人 飼 養 。 大 廈 管 理 員 在 現 場 張 貼 通 告 ， 找 尋 受 傷 花 貓 的 主 人 。

據 陳 太 稱 ， 懷 疑 「 貓 殺 手 」 年 約 廿 餘 歲 ， 穿 灰 色 波 恤 及 牛 仔 褲 ， 警 員 在 附 近 兜 截 ， 但 沒 有 發 現 。 陳 太 指 貓 殺 手 「 冇 人 性 ， 好 得 人 驚 」 ， 其 子 則 感 到 憤 怒 及 悲 傷 ， 促 請 警 方 全 力 緝 兇 。

香 港 群 貓 會 幹 事 陳 靈 怡 對 事 件 表 示 憤 怒 ， 「 貓 殺 手 已 經 唔 係 幾 個 重 災 區 （ 深 水 、 旺 角 、 灣 仔 ） 出 現 ， 周 圍 都 有 ， 仲 唔 止 一 個 」 ， 她 促 請 警 方 正 視 虐 貓 個 案 ， 認 真 處 理 ， 亦 希 望 警 方 可 彈 性 處 理 虐 貓 個 案 ， 讓 市 民 可 在 愛 護 動 物 協 會 人 員 到 場 前 ， 先 將 貓 兒 帶 往 就 醫 ， 避 免 耽 誤 診 治 。

Ref: http://orientaldaily.on.cc/


睇完呢啲報導, 真係好想問吓做出呢啲咁殘忍嘅事嘅人, 點解要咁對啲小動物, 如果佢哋唔鍾意啲貓貓狗狗咪唔好理佢哋囉, 做乜要打人哋、整傷人哋呢?真係超變態... >.<

發呆

今朝起身唔知自己想做乜嘅感覺比尋晚更嚴重, 凈係想坐喺度發呆...坐坐吓, 終於諗到自己發生咩事...

要怪就怪自己太多事, 聽埋啲唔應該聽嘅說話, 然後又胡思亂想...想喊但係喊唔出, 唉......

後來諗起不如試吓祈禱, 終於喊得出...Thanks god...我知如果唔喊過我之後會keep 住死屍狀態, 喊咗出嚟舒服好多, 然後又覺得自己為咗呢啲事而喊好白癡...

諗番轉頭, 其實我啱啱知道嘅事根本就係我晚晚祈禱求神保守嘅事, 而家神垂聽我嘅禱告, 真係保守看顧呢位朋友, 我其實係咪應該開心先啱呢?好矛盾...但係我真係開心唔到... : (

呢期啲情緒好波動, 要嘗試調節返去normal mode...

Dinner w/ my friends

今晚約咗Didi、Percy、Lolo、Kitty、Ric、筠姐喺大埔中心Pizza Hut 食飯, 好耐冇見大家, 大家別來無恙, 真係好...

席間, Percy & Lolo 宣佈佢哋今年5月會結婚, 恭喜晒~其實真係好開心0架, 不過唔知點解大家聽到Lolo 咁講嗰陣都唔係好識俾反應, 真係唔好意思... ^.^"

食完飯我哋仲上咗Percy、Lolo 仲裝修緊嘅新居參觀, 希望裝修師傅快手啲, 快啲完工我哋就可以快啲上去玩喇... ^.^

返到屋企唔知係攰、定係有少少唔舒服, 硬係覺得唔多妥, 希望聽朝瞓醒會好啲...

A chat w/ Didi

今日係Didi 生日, 尋日打咗個電話俾Didi 提早同佢講生日快樂, 又順便同佢傾咗一陣近況...其實作為一個朋友, 我梗係唔係好贊成Didi 嘅做法；但係如果設身處地喺Didi 嘅立場諗, 我又會明白點解佢做唔到...唉, 事到如今, 依我嘅愚見, 其實唔使太在意其他人嘅睇法 (屋企人除外, 因為佢哋知道咗實情應該會好激動), 只要自己覺得舒服、心安理得就做啦, 唔好顧慮太多, 已經夠忙、夠多嘢煩0架啦, 仲諗咁多就會黐線0架喇...


P.S. 下個星期五約咗Didi、Kitty佢哋食飯, 後來諗諗吓先記得原來之前約咗同事星期五晚跟佢返團契, 唔怪之得硬係好似有啲嘢要做咁...不過咁難得先約到大家食飯, 我諗返少一晚團契都ok 啩(反正我係第一次返, 都未分組 : P), looking forward to see my dear friends...

HAPPY NEW YEAR!!!

新年快樂！

希望新一年所有事情都有好開始, 唔好再有咁多心煩嘅事就好喇... ^.^