1/4 - 16/4 雙週記

1/4/10 (Thu):
放工帶波波去打針，好好笑，佢叫到好似人類BB 喊咁，本來媽咪想買埋餸先返屋企都費事喇，佢叫得太大聲，都係拿拿聲返屋企好啲...

2/4/10 (Fri):
連續10日復活假期嘅第1日，晏晝冇嘢做，夜晚同弟兄姊妹食完飯就返教會受苦節崇拜...崇拜完同佢哋去食糖水，食完就返屋企...

雖然看似平淡，但係其實一啲都唔平淡...

4/4/10 (Sun):
呢兩日明明要開始睇readings，但係冇心機睇，無聊地打咗兩日NDS Cooking Mama，打得機多個人呆呆地...

呢兩日心情好怪、好複雜，唔知點咁，好辛苦...

5/4/10 (Mon):
下晝約咗Able、Ric、李斯維喺沙田唱K，唱完時間尚早喺Starbucks 傾咗一陣偈先道別...

之後dinner 同Able 去食pizza，好味~雖然唔係同佢哋傾咗好多偈，但係都好舒服、好開心... ︰)

6/4/10 (Tue):
同媽咪、爸爸，仲有團契弟兄姊妹去蒲台島玩，本來諗住行吓山，但係我好冇用，行咗一陣就開始腳痛，如果跟大隊行足全程，相信我對腳應該會痛死咗...

冇行山，同媽咪、爸爸喺碼頭買魚絲試吓釣魚，最後當然釣唔到，不過呢次係我第一次釣魚，都幾得意...

雖然冇同大家一齊行，但係難得媽咪、爸爸肯一齊嚟，a good start...

7/4/10 (Wed):
令我心情複雜嘅事終於完結，不過不祥預感隨之而來...

如果真係有咩要發生，不如快啲俾我知，越拖得耐越辛苦...

8/4/10 (Thu):
再次證明我啲預感幾準，其實都係2選1，好大機會會係呢個結果...雖然一早有心理準備，但係親耳聽到依然會好難受...

唉...好冇用，太激動嚇親哥哥，記得當年都冇咁激動，真係黐線... T.T

9/4/10 (Fri):
本來約好Kennis 同佢去南丫島行吓，但係好抱歉，前一晚瞓得好差又發惡夢，真係不在狀態，唔係好想去...多謝Kennis 最後都肯出嚟陪我食tea、傾偈，之後仲陪我睇戲，睇《志明與春嬌》，都幾好笑，睇完心情好番少少...

成個下晝俾Kennis 沒收電話，分別嗰陣先同個電話重逢，見到數十個未接來電 + 數個SMS，個心好唔舒服，救命...

11/4/10 (Sun):
本來可以返到團契，但係心情唔好，又未備課，所以冇返...

呢兩日不停聽孫耀威隻新碟《Man in the mirror》，其中一首新歌《如果生命還有歌》好好聽，啲詞寫得好好，好想將呢首歌點俾一個人聽，不過我唔應該再諗住呢個人...

到底要點做心情先會好番呢?What should I do?

《如果生命還有歌》孫耀威
http://www.youtube.com/watch?v=KeACfjxVWXQ

今天我隨便跌墮 終得到了釋放
疲倦透人像滿身塵埃不再可愛
如若要在人群中閃躲 可以做落幕的花朵
花瓣片片墮落為了離開

還記得心愛情歌 還記得生命如果
再踏步行前就或許聽到更多愛戀的歌
和弦餘下太多 愛我的不捨別過
一個夢抓緊仍然未算不可

還記得相愛如初 跟她分手後如果
再學習從頭地讓鏡內那個他愛我很多
仍然還剩太多 愛我的會痛幾多
如若愛不愛誰 會是誰沒珍惜 這生還未過

單身有權利慶賀 不必太過悲壯
無謂營造倦透的人生怎會精彩
其實要在人群中閃躲 躲不過的原來是我麼
擁不到你在懷內也可先擁抱我一個

還記得心愛情歌 還記得生命如果
再踏步行前就或許聽到更多愛戀的歌
和弦餘下太多 愛我的不捨別過
一個夢抓緊仍然未算不可

還記得相愛如初 跟她分手後如果
再學習重頭地讓鏡內那個他愛我很多
仍然還剩太多 愛我的會痛幾多
如若愛不愛誰 會是誰沒膽識 讓愛再來訪

日後就算膽驚怯懦
再學習重頭地讓鏡內那個他也越強越壯
錯愛過沒錯摸 墜落花瓣後結出果
如若愛不愛誰 世上誰沒珍惜 不可能是我

16/4/10 (Fri):
呢個星期係長假期後嘅上課天，日日做到冇停手，喺學校除咗上堂嗰陣，其餘時間唔係好想講嘢...放工返屋企，又唔係好想講嘢，又開始自閉...

今個星期嘗試做緊啲嘢，可能好老土，但係可能真係要斷絕來往先可以徹底忘記一個人/一啲事...雖然哥哥話俾我知咁做未必有用，問心我自己都唔想，但係少啲接觸應該會好啲...

希望下星期返工會feel comfortable 啲...

3/2010 月記

2/3/10 (Tue):
放工約咗哥哥、Kitty、筠姐喺大埔墟新街市食飯...本來呢餐飯算係幫筠姐farewell，但係...無端端多咗一個人，搞到我哋3個好似搭枱咁...

Btw, 希望筠姐過到日本好快適應新生活啦...

14/3/10 (Sun):
夜晚同團契弟兄姊妹上深圳食飯，又去舊年同媽咪 & 黄小虹食過嗰間品村食日本嘢，啲嘢食都算新鮮，不過唔知點解好似冇上次咁好味...

間中同大家玩吓食吓嘢都幾開心，希望好快又有機會再同大家飲食一番... ︰D

17/3/10 (Wed):
星期一爸爸公司其中一隻餵開嘅流浪貓病咗，佢叫「小黑」，佢間中會返爸爸公司食嘢/瞓覺，爸爸見佢病咗帶佢睇獸醫，獸醫話佢病得好嚴重，有貓愛滋，要人道毀滅...

夜晚放工同爸爸一齊去獸醫診所睇佢，陪咗佢1個鐘左右，之後我睇住佢打針，佢好以瞓著咗咁返咗天家(其實都唔知動物會唔會返天家，不過佢應該係一隻乖嘅小動物，希望佢返到天家)...

呢次係我第一次見佢，亦都係最後一次，見咗佢1個鐘就喊足1個鐘...親眼睇住一隻本來仲識喵、仲想俾人抱嘅小貓沈沈睡去，個心好痛... T.T

如果佢返到天家，希望佢以後都唔會再有病痛、日日都食得玩得瞓得，做一隻快樂嘅小貓... ︰)

20/3/10 (Sat):
下晝Wing Wing 有街去，但係又想夜晚同我食飯，惟有等佢打俾我...等呀等，等到8:30pm 佢先由荃灣入嚟大埔同我食飯，我哋去咗大埔墟食粥麵，食完其實已經好飽，居然仲食得落糖水...如果我第時唔舒服、冇胃口食嘢，應該見一見Wing B 就會有番胃口... ^-^

P.S. 希望傻妹Wing 對學生嘅事唔好太上心，佢哋知道老師關心佢哋已經好足夠0架喇...加油加油~十卜十卜~

23/3/10 (Tue):
又係睇堂嘅月份，今年又係同一個supervisor 睇我堂，今年班2A 令我好擔心，好彩今日都順利過關，下次係最後機會，要再準備得好啲先得喇...

放工同老師們 (Incl. Michelle, Ceci, Keziah & Kenise) 去尖沙咀食飯，今餐食好味高級西餐，係就係貴咗少少，不過間中豪一次都ok 嘅...

離開嘅時候諗住搭巴士，Keziah 話佢爸爸架的士可以兜埋我返大埔，實在太好喇~咁大個女第一次由尖沙咀搭的士返大埔，好勁~麻煩晒uncle~

24/3/10 (Wed):
放工同哥哥、Kitty 喺大埔食飯，去咗富山食日本嘢，哥哥話富山好味過和民，我覺得差唔多啦，不過富山啲嘢食多款式就真嘅，如果食厭咗和民都可以嚟呢度...

又同哥哥、Kitty 傾咗好多偈，同佢哋傾偈好開心，佢哋好好笑... ^o^

27/3/10 (Sat):
朝早如常返學，放學之後去咗旺角睇戲，睇《歲月神偷》，都ok 好睇，李治廷真係好似王力宏... ︰)

睇完戲去咗波鞋街買鞋，終於買到對平Converse，good~

2/2010 月記

唔知點解越來越懶update 呢個blog，不過懶極都要每個月update 一次...

7/2/10 (Sun):
經過一輪臨急抱佛腳式嘅溫習，終於到咗考LPAT (基準試) 之日...考試日天氣通常都唔太好，一早落住大雨搭車去觀塘某中學，由9點考到3點 (有lunch break)，太耐冇考試，考3份paper，好攰...

Listening 好唔掂，聽到寫唔切；其餘Reading & Writing 叫做ok 啲...算罷啦，考完就算，唔好再諗...

8/2/10 (Mon):
終於考完LPAT，可以鬆一鬆，放工約表姐一齊睇Aaron 套《白銀帝國》...等咗幾年，好彩趕得及落畫前睇到，都幾好睇，情節幾緊湊，不過都幾heavy，睇完個心有少少0翕...

遲啲出VCD 一定要睇多次...

9/2/10 (Tue):
放工約咗老師們 (Incl. Michelle, Candy, Ceci & Keziah) 喺又一城食飯，呢餐應該算係生日飯 (Keziah & Candy 2月頭生日) + 團年飯...

食物好好味，同老師佢哋傾偈又好開心，預祝大家身體健康，生活愉快~ ︰)

14/2/10 (Sun):
大年初一，唔使拜年，下晝同表姐、三姨、黃小虹去沙田睇《花田喜事2010》...真係麻麻地，好多位都笑唔出，早知睇第二套啦...

睇完戲，去咗買嘢上表姐屋企打邊爐，除咗一般打邊爐食材之外，仲有新鮮厚切靚魚生，yummy~~ ︰P

15/2/10 (Mon):
大年初二，一如以往都係上婆婆屋企拜年，佢哋忙於打麻雀，我就無無聊聊睇吓電視、食吓嘢...

A (quite) boring but relaxing new year day...

19/2/10 (Fri):
應同事廸廸嘅邀請，同其他同事 (Incl. Fanny, Cindy, 美貞、虹、虹's friend Kathy) 去咗佢嘅新居打邊爐...好搞笑、但係又非常唔好意思嘅奇事發生咗，就係打打吓邊爐，屋內嘅牆身有水流落嚟，應該係室外太凍、室內太暖，啲水蒸氣散唔到形成一幅山水畫...真係唔好意思... ^-^"

Btw, 多謝廸 & 堅嘅款待...

20/2/10 (Sat):
晏晝同二姨、表姐、媽咪上深圳按摩，夜晚返大埔打邊爐...唔知點解每次按摩嗰陣都覺得ok 舒服，但係過後一定會覺得仲痛過未按之前...我估我應該係受唔到力，諗住按摩吓舒服吓都唔慣，妹仔格真係妹仔格... ︰(

24/2/10 (Wed):
下晝請咗半晝假去考LPAT Oral，由5點等到差唔多7點先有得考，等都等到呆呆地...又考得麻麻地，但求pass 就得0架喇...

26/2/10 (Sat):
又要交assignment，明明word limit 600字，唔知點解會做咗差唔多2000字，希望ok 啦......

咁就過咗充實又忙碌嘅2月...

18-31/1 雙週記

18/1/10 (Mon):
又講咗一個電話，其實講來講去都係同一番說話...唉............ T.T

19/1/10 (Tue):
一早心情就有啲激動，呢個連鎖反應實在太強，見到某啲人/事就會聯想起某啲人，唉...好辛苦，個心好痛，好想喊...要不停同自己講「深呼吸、深呼吸...」先可以吞番啲淚水，救命... ︰(

20/1/10 (Wed):
放工約咗哥哥、筠姐喺大埔食飯，去咗陳漢記食煲仔飯，食完飯去咗McDonald 食雪糕，飽...席間，筠姐講咗個重大秘密俾我哋知，我同哥哥聽到O 晒咀...點解會發生啲咁嘅事0架?希望筠姐知道之後應該點做...

Btw, 多謝哥哥、筠姐聽我發牢騷，都係佢哋最錫我，我會聽話0架喇... T.T

26/1/10 (Tue):
星期日晚又發生咗啲事，複雜嘅事情 + 複雜嘅心情，唔知可以用咩字去形容...

連續幾日傷心夾雜住擔心...唉...好難過...快啲冇事就好喇... ︰(

27/1/10 (Wed):
放工又同哥哥、Kitty 喺大埔食飯，去咗富山食日本嘢，好味...食食吓，發現原來坐我哋隔離枱嘅其中一個妹係我學校嘅學生，好彩之前講嘢唔係好大聲，應該聽唔到...

我哋食咗好多嘢，又傾咗好多偈，同佢哋傾完偈心情好番少少，得閒一定要再約出嚟啊~ ︰)

29/1/10 (Fri):
放工約咗Ric 喺大埔中心食飯傾偈，雖然我哋唔係傾咗好耐，但係間中同佢傾吓近況都好開心...

大家都要加油~ ︰)

1 - 17/1 雙週記

呢兩個幾星期繼續busy...

1/1/10 (Fri):
心情依然好差，繼續做喊包，但係之前應承咗小姐 & Wendy 夜晚同佢哋食飯，所以夜晚苦瓜乾嘅口面同佢哋去尖沙咀行街、食飯，我哋去咗食好味sushi...

見完佢哋心情好番少少，thanks my sis...

6 - 7/1/10 (Wed - Thu):
一年一度嘅Sports Day，今年幫手做跳遠裁判，連續兩日吹風 + 踎低起身，個頭有啲痛 + 少少暈，星期四晚本來要返學，但係唔太舒服，所以好曳冇返...

14 - 16/1/10 (Thu - Sat):
Open Day 又來了...今個星期忙住prepare Open Day 啲嘢，又要拎學生啲文返屋企打，未到正式Open Day 嗰兩日已經開始攰...

15-16/1 係連續兩日嘅Open Day，今年係10周年校慶，重頭戲係由學生主演嘅音樂劇 - 《在籃板上喝采 NBN》，全體教職員參加完感恩崇拜就接住睇呢齣musical...睇後感就係啲學生都做得幾好，比起綵排嗰陣認真好多，睇完綵排真係擔心佢哋會失禮街坊，好彩最後都perform 得唔錯，good show!

今年英文科都係搞booth + English Cafe，做咗兩日waitress，好攰...再一次向從事飲食業嘅人士致敬(記得舊年都係咁講)...

16/1 忙完學校啲嘢，夜晚去咗同事Duncan 嘅婚宴...恭喜~

17/1/10 (Sun):
學校搞10周年聚餐，全世界都要出席...我估大家忙咗成個星期其實都仲好攰，不過難得可以見吓啲舊生，我諗老師們應該都好開心嘅...

未有舊生嘅我哋惟有自己玩，不過我哋咁文靜，都係傾吓偈、吹吓水算喇...

Busy 2 weeks 就咁過咗...

12/2009 月記

過咗頗為忙碌嘅11月，12月更加可怕...

1 - 18/12/09:
每到年尾又係交功課嘅日子，呢兩個星期差唔多每晚放工返到屋企都係睇readings，然後諗份功課應該點做，其實都好想快啲做完，了咗件心事，但係放工返到屋企真係好眼瞓，次次都係打咗少少嘢就開始眼瞓，好攰...

11/12 交第一份功課，18/12 交埋第二份，交完一身鬆晒，可以安心過聖誕... ︰)

23/12/09 (Wed):
唔使返工，約咗好耐冇見嘅Kennis 玩...我哋先去銅鑼灣食嘢、行街，然後去佢屋企又食嘢、傾偈、同佢隻賓尼兔 - 小賓玩...我哋好無聊，開住Youtube 啲歌跟住唱，根本同唱K 冇分別...兩個長氣人傾極都傾唔完，傾到兩點想返屋企，但係媽咪、Kennis 都話咁夜，不如喺佢度瞓到天光先走...於是我又喺Kennis 屋企玩過夜，同佢食埋早餐先返屋企...

原來我同Kennis 已經識咗8年，我哋約好10周年嘅時候食餐好嘅慶祝一下...多謝Kennis，可以識到佢呢個咁「特別」嘅朋友真係我嘅榮幸...︰D

25/12/09 (Fri):
呢日係我 (仲有同事銓銓) 洗禮嘅大日子，好開心好多好朋友、好同事、阿姨都抽時間嚟觀禮，排名不分先後，希望冇數漏，包括︰Didi、Ric、哥哥、Louise、Able、小姐、Wendy、Fanny、Esther、Gene、其偉、二姨、三姨、媽咪、爸爸、黃小虹。

其實成個浸禮我都好緊張，好驚自己論論盡盡失禮人，好彩最後都冇出事...呢日同大家影咗好多相，好開心，多謝大家嘅祝福、禮物...洗咗禮之後希望自己安排到多啲時間投入教會生活，最緊要係多讀聖經，成日俾人challenge 心情都唔係幾好...

26 - 27/12/09 (Sat - Sun):
呢兩日同同事Sam & Anna 去澳門玩咗兩日，食咗好多想食嘅嘢，雖然每樣都只係試少少，其實都食咗好多0架喇...

我哋仲去參觀好靚嘅教堂，又去行公園睇動物，two relaxing and happy days...

28 - 30/12/09 (Mon - Wed):
吃喝玩樂咗兩日，跟住呢3日就辛苦，呢3日要帶學生去河源交流團，朝朝天都未光就起身，除咗瞓覺嗰6個鐘，差唔多全天候看住班學生，好彩我看嗰班學生算乖，如果唔係仲辛苦...

Btw，感謝主保守帶領，呢幾日天氣都算ok，行程順利，希望佢哋喺嗰3日有所得著...

31/12/09 (Thu):
本來呢日喺屋企休養生息，心情尚算ok，但係講咗一個電話，心情又跌落谷底...唉...由除夕喊到元旦，呢個new year 對我嚟講一啲都唔happy...

「我雖然行過死蔭的幽谷，也不怕遭害，因為你與我同在，你的杖，你的竿，都安慰我。」(詩23:4) 我知道天父定必保守看顧...... ︰(

11/2009 月記

而家已經係2010年1月，而家先得閒打番啲entries，好慚愧...其實自開始寫blog 以來，真係未試過兩個幾月一篇entry 都冇打，唔想就咁荒廢咗個blog，所以要一次過簡短地update 番呢兩個月做過啲咩...

2 - 6/11/09 (Mon - Fri):
呢個星期係English Week，之前要prepare 呢個星期嘅遊戲 + board + idioms etc.，好忙...個人認為今年嘅English Week well-organized 過之前一兩年好多，學生都好似enjoy 過前一兩年，老師們 & 我嘅努力都冇白費，感恩...

希望之後嘅English Week 都好似今年咁成功就好喇...

8/11/09 (Sun):
呢日係團契懇親日，去南生圍 & 挪亞方舟，之前應承咗組長幫手喺旅遊巴上面帶一個簡單問答遊戲，都尚算順利...呢日雖然唔係同其他弟兄姊妹們 & their parents 傾咗好多偈，但係大家都玩得幾開心，期待下次再有機會同大家outing 一齊玩...

15/11/2009 (Sun):
呢日係同事廸廸結婚嘅大日子，朝早返完崇拜、數埋奉獻，就同其他同事去觀禮...廸廸今日好靚，佢老公阿堅都好靚仔，見到佢哋幸福開心嘅笑容，搞到我同Wing Wing 忽然恨嫁起嚟...

觀完禮，同同事們食咗個tea，本來諗住返屋企，Wing B 話約咗啲中學同學去唱k，問我去唔去，唔怕醜嘅我又無聊地跟埋去...Wing B 啲中同有啲都幾搞笑，佢哋仲講Wing B 嘅秘密俾我聽，笑死...

呢日好似做咗好多嘢咁，btw，Congrats to Tik & Kin!

19 - 30/11/09:
一年一度嘅校際朗誦節，今年有好多Form 1 同學報名參加，學校唔放心佢哋自己去比賽場地，所以我差唔多隔日就要陪佢哋去，一去就一個上晝，學校啲嘢都做唔切...又令我開始懷疑自己嘅工作能力，係咪真係慢得咁緊要...

經過呢個幾星期，我又開始唔舒服，咳 + 傷風，本來堅持唔食藥，但係咳得太緊要，食咗藥先好番啲...

忙碌嘅11月就咁過咗，緊接住係更忙碌嘅12月...

13/10 - 23/10 週記

Summary for recent 2 weeks...

13/10/09 (Tue):
放工之後約咗Able，買dinner 上佢屋企食...好耐冇見auntie，可以同auntie 傾吓偈真係好...食完dinner 睇咗一陣電視，之後同寶B 入房傾偈...

傾傾吓有電話，好曳地掛住講電話，悶親寶B 唔好意思...

聽日係一個特別嘅日子，點解仲會記得0架?仲記嚟做咩呢? ︰(

16/10/09 (Fri):
放工有TA 飯局，同阿曦、阿虹、Kelvin、其偉去咗九龍城食飯，食泰國嘢，食完仲去食糖水，好飽...

原來我哋都幾八卦，不停講人哋啲嘢 (嚴格嚟講都算係是非)，失禮晒... ^.^"

17/10/09 (Sat):
上晝要返學，放學之後約咗銓銓喺大埔中心食lunch...食完銓銓要返屋企攞相機，我又跟埋上去順便探Simba & 波子，Simba 同薯波真係好似樣，一樣唔怕陌生人，好得意... ^-^

攞完相機同銓銓出發去山頂睇超哥個雙鏡相展，波波好威水，佢張相出過兩次相展，又上過電視， 如果佢知道應該都覺得自己好威...

睇完超哥個相展，同銓銓搭巴士落中環，下次不論上山定落山都係搭纜車比較好，我哋搭巴士搭到一個頭暈一個作嘔，嗰十蚊真係唔慳得...去到中環兩個都頭暈暈、肚空空，去咗翠華食dinner，食完搭船返尖沙咀，喺LCX 行咗一陣就搭271 返屋企...

A tiring but relaxing day...

23/10/09 (Fri):
放工約咗Ceci、Michelle、好耐冇見嘅Grace 喺旺角食飯，我哋去咗食雲南菜，都幾好味... ︰P

呢餐飯我哋食足3個鐘，講咗好多學校嘅趣聞俾Grace 聽，一路講一路笑到肚痛，笑得太厲害咳到傻... ^o^

希望好快又可以再見Grace 啦...

3/10 - 10/10 週記

Busy week, summary again...

3/10/2009 (Sat):
中秋節，唔使返學...下晝同媽咪去咗大埔墟買餸，之後就返屋企...夜晚食完飯冇地方去，留喺屋企同蓉蓉、波波玩，跟住就瞓覺lu...

Not special but relaxing Mid-autumn Festival night...

4/10/2009 (Sun):
朝早返中堂崇拜，之後同阿姨婆婆飲茶，再之後又返教會幫手數奉獻...今次係我第一次幫手數奉獻，7個人數咗差唔多1個鐘，好厲害...

之後隔個星期日都要返教會幫手數奉獻，雖然只係小小嘅事奉，希望係一個好開始...

8/10/2009 (Thu):
學校旅行，今年終於都要一齊去...天氣好好，冇落雨又唔係太曬，真係好...

我跟Form 2 去馬鞍山郊野公園，初時仲擔心冇嘢食，到後來唔使自己燒，學生自動拎嘢俾我哋食，so good~

唔知係咪喺空曠地方嗌得犀利，再加埋食咗啲熱氣嘢，喉嚨開始有少少熱熱地，應該唔會喉嚨痛啩...

雖然有少少攰，但係可以同啲細路一齊玩都幾開心... ^-^

9-10/10/2009 (Fri - Sat):
又係一年一度嘅學校Retreat Camp，今年去烏溪沙，個campsite 雖然唔係好新，但係地方好大，行吓都好舒服...

其實個camp 嘅內容冇咩特別，反而有一個意想不到嘅位置...就係我哋居然喺嗰度見到林峯、馬國明拍戲~我哋差少少就可以同佢哋合照，不過因為工作人員阻撓，所以影唔到...嗚嗚~ ︰(

出咗camp 居然唔係好眼瞓，同老師 (Incl. Gene, Angel, Cathy, 仰) 去咗新世紀睇戲，睇《生命最後一個月的花嫁》，唉~我哋又俾啲trailer / 廣告呃咗，真係唔好睇，明明好簡單嘅情節拖到好長，睇到大家差啲瞓著...

睇完一場悶戲，我哋去咗Spaghetti House 食tea，食完笑完一大餐先返屋企...

呢兩日好充實，可以同老師們一齊渡過weekend 都幾開心... ^-^

國慶日afternoon w/ Wing Wing

今日冇特別嘢做，約咗Wing Wing 去銅鑼灣吓行街食吓嘢...

行街之前我哋去咗食lunch + tea，又去食rice pizza，都幾飽，食完已經4點幾...唔知係咪我哋呢啲新界人唔係好行得慣港島區，行咗兩個商場都覺得唔係幾好行，啲嘢又唔啱買，所以行吓睇吓算喇...

行到6點左右，骨精Wing 約咗媽咪返大陸揼骨，Wing Wing 帶我去食埋超好味心太軟就搭車走喇...呢個心太軟真係好好好好味，好濃朱古力味，再加埋個Vanilla 雪糕，一凍一熱，好好味~ ︰P

多謝Wing Wing 今日陪我玩(食)咗一個下晝，thank you~ ^3^

BBQ w/ 團契組員@Kitty's home

今晚同團契組員 (Incl. Kitty、Fanny、Rachel、Tina、Heidi、Man、Viola、Alice、Elsa、美儀) 家聚，去咗Kitty 屋企BBQ，多謝Kitty、Kitty's daddy、Kitty's mammy 嘅款待，真係打攪晒...

今晚食咗好多好味嘅嘢，有海鮮、豬扒、雞翼 etc.，之後仲食Haagen Dazs 雪糕月餅、生果，好飽...今晚同大家傾咗啲偈，又熟絡咗少少，a nice gathering... ︰)

返到屋企沖完涼打電話俾Wing Wing，由12點幾講講講，講到4點先收線，好癲...好多謝佢捱眼瞓陪我講咁耐...聽日又可以見Wing Wing，haha~

Dinner w/ colleagues @ UCC Cafe

尋日係Ceci 生日，今晚約咗老師們 (Incl. Ceci、Michelle、Candy、Angel、Kenise & 明芯) 去沙田UCC Cafe 食飯幫Ceci 補祝生日...

唔知點解每次我哋去UCC 就會諗到好多搞笑嘢 (e.g. 如果第二日打風落雨唔使返工嘅話，我哋做咩好)，又講起好多人哋嘅笑料，好低b，但係真係好好笑... ^o^

今晚又食咗好多好味嘅嘢，yummy~

Looking forward to our next gathering! ^-^

筠姐結婚了~

今日係筠姐結婚嘅大喜日子，好開心啊~

今日行程有少少緊湊︰
1. 8am 起身梳洗妝身去ied 返學；
2. 2pm 約咗Percy、Kitty、哥哥、哥哥's 女朋友 -- Louise (Nice to meet you!) 搭車去科大觀禮；
3. 之後去Mega Box 閒hea 等夠鐘飲喜酒，飲完返到屋企11點幾...

今日筠姐好靚、新郎(Nice to meet you too!) 又好靚仔，祝佢哋相親相愛、永遠幸福!

20/9 - 25/9 週記

今個星期好似有啲攰，又懶，打summary 算喇...

20/9/2009 (Sun):
下晝上嫲嫲度坐咗一陣，然後同黃小虹行旺角，食埋飯先返屋企...好耐未試過同黃小虹兩姊妹一齊行街傾偈，感覺真好... ︰)

22/9/2009 (Tue):
如常工作，放工之後同阿姨、婆婆佢哋提早食中秋節飯...我懷疑食完一大碗飯再食咗啲糯米飯所以食滯咗，個肚好似脹住脹住咁，我同媽咪講我有咗4個月BB... ^-^

23/9/2009 (Wed):
繼續如常工作，放工之後約咗小姐喺大埔食飯，小姐又陪我去食仙茶居(人哋而家改咗名叫日月居，但係都係叫慣仙茶居)，又飲我的最愛--茉香珍珠，好味~食完飯小姐陪我行返廣福搭車，一路行又一路講無聊嘢，講開Mickey Mouse 把聲好虛，又笑死咗... ^o^

24/9/2009 (Thu):
學生提早咗少少放學，2:30pm 開始開埋上次未開完嘅Staff Meeting，坐到差唔多6點先開完，好攰...跟住又要返學，多謝小雲老師順路車我返學，唔使自己搭巴士返已經好好多喇...

25/9/2009 (Fri):
今日約咗超過半年冇見嘅Able 食飯，好耐好耐冇見過寶B，有好多嘢想同佢講...我哋去咗沙田食飯，食rice pizza，幾得意，我哋又叫到一枱都係嘢食，差唔多食晒，好得人驚...最恐怖嘅係食到咁飽，之後仲去Ruby Tuesday 食dessert，好好味，不過真係飽到上心口...

好多謝long time no see 嘅寶B 請我食咁豐富嘅dinner & dessert，好多謝佢啊~我哋以後要keep 住見多啲，我唔想又半年先見佢一次... ︰(

Interesting lesson + dinner w/ Wing Wing

今朝要返學，起身嗰剎那又有少少情緒，好彩之後上完堂就冇事...

今日上堂教NSS 其中一個elective - Poems & Songs，上堂嘅時候我哋每人作咗兩篇poems，都幾好玩...我諗到真係要教嘅時候啲細路應該會肯試作...

放學之後同兩個同學喺大埔中心食完lunch 就搭車出旺角閒逛，哈哈~終於買番孝天今年1月出嘅第二隻個人專輯《Getting Real》，收到咁埋都俾我搵到，真係好...

買完CD 唔知做乜好，約咗Wing Wing 6點半行街食飯又未夠鐘，忽然好想去搞搞個頭...我知，我知我少頭髮，但係真係keep 住鬈頭髮好耐，把心一橫拉番直佢...好耐冇試過整頭坐咁耐，坐足4個鐘，坐到腰骨有少少痛，不過好開心，因為間salon 播Aaron 《舞林正傳演唱會》VCD，睇晒成場，好感動...整完個頭其實唔係好睇得慣，不過Wing BB 話ok，應該ok 啩...

今晚同Wing BB 去咗譚魚頭打邊爐，又一邊食一邊勁講嘢，我諗我哋有語障，一係講到啲嘢lur 埋一舊，一係就調轉晒啲字嚟講，笑到肚痛... ^o^

To Wing BB: 多謝你抽時間聽我講嘢/陪我，同你一齊好開心...你都要加油，唔好俾咁大壓力自己，盡力做好自己份內事就可以，如果唔開心記得記得記得話我知啊! ︰)


P.S. 前晚又自言自語咗一輪 (陳年精神病又復發)，忽然諗到一樣嘢，又覺得自己好低能，天呀~到底我要到幾多歲先會冇咁低能呢?