Goodbye Good Value~

今日係last day, 今朝例牌同老細食早餐, 之後就返上office 執埋啲嘢, 計埋出糧啲數, 臨走嗰陣老細又「語重心長」咁講咗啲「肺腑之言」(但係我听完覺得好可笑), 未夠12點半老細就叫我走lu…
一個返咗5個几月、差唔多係我一手一腳set up 嘅地方, 估唔到離開嘅時候一啲唔捨得嘅感覺都冇, 我諗我真係好想離開…

算罷啦, 而家早啲走可能係好事, 我諗我會hea一排先開始努力找工作, 希望媽咪唔會哦我啦… : P

倒數

今日係我最後一日幫老細整麥皮, 一諗起以後唔使再整就開心…

自從上次駁老細咀事件之後, 差唔多3個星期冇見過清潔姨姨芬姐喇, 今朝去廁所嗰陣撞到佢, 本來想同佢講聲唔好意思, 但係諗諗吓又好似無謂提番件事, 無謂令佢又再難堪尷尬多一次, 所以同佢講咗聲我做埋呢兩日就唔做就走lu, 希望佢已經唔記得咗件事就好喇…

今日喺公司超無聊, 唔想做正經嘢, 又上網做咗啲好無聊好無聊好無聊嘅嘢, 其實几個月之前都試過一次, 不過唔成功, 今次終於成功喇, 哈哈哈~真係好無聊呀我, 睇嚟做咩呢?睇到又點呢? ^.^”

好激氣...

今朝老細一早又同我講嘢(成日都同我講嘢), 佢又改變主意喇, 好煩呀佢, 佢又問不如我做埋今個月呢几日好唔好喎, 又話費事阻我搵工, 真係想講粗口鬧爆佢, 其實講到尾就係佢已經有合適人選, 仲叫咗人哋2/1 返工, 如果我仲喺度佢就要俾多個月人工我之嘛, 正cheap 精, 五時花六時變, 搞到我個plan 亂晒, shit…

而家明明係我自己辭職, 但係搞搞吓好似俾人炒咁, 真係激死人…呢期成日都俾人激到紥紥跳, 好激心…不過阿Q 啲諗, 返埋12月就以後都唔使再對住佢, 都好啦…唉… : (

Happy Boxing Day

今朝一早起身, 帶埋菠蘿腸仔(我唔識整太複雜嘅嘢食… ^.^”), 11點几就去到Kennis 位於鴨利洲嘅屋企, 佢啲家姐細佬買咗好多嘢食, 有pizza、KFC 大舊雞, 仲有Kennis 尋晚整咗5個鐘嘅士多啤梨藍莓蛋糕, 個蛋糕好靚啊~雖然面頭「個蓋」咸咗少少(: P), 但係整體嚟講都好好味啊~嘩, 好多嘢食好開心, 食完之後我哋打咗陣麻雀、又玩咗陣啤牌, 玩到7點左右Kennis 家姐煮飯俾我哋食, 有4餸1湯, 好勁~食完飯大約8點半我哋又打麻雀, 打打吓收到黃小虹嘅電話, 佢話佢feel 到好似地震, 唔係fa?咁得人驚, 通常我哋都係後知後覺, 今次竟然feel 到, 咁真係震得好犀利喇…
因為听日要返工, 所以唔敢玩得太夜, 打麻雀打到9點半就出發歸家, 11點返到屋企…

今日玩得好開心, 多謝Kennis 一家嘅款待, 遲啲等Kennis 忙完希望再約到佢玩啦…hee~


P.S. 今日boxing day, 返到屋企拆開Able 送俾我嘅禮物, 原來係一張毛毯, 仲係我最愛嘅綠色格仔, 未用都暖笠笠, thanks so much!!! ^3^
P.P.S. 12月26日可能真係不祥之日…唔好再有天災發生可以嗎?

聖誕快樂!!!!!

今日本來約咗Kennis 去街玩, 但係個衰妹好晏先起身, 所以改咗听日先去佢屋企同佢屋企人一齊搞大食會…yeah~

見今日係聖誕大日子, 開咗其中一罐uncle 喺英國帶返嚟俾蓉蓉B 嘅來路貓罐頭餵佢, 佢好似好鍾意食咁, 不過唔可以成日食, 食得太密腸胃會受唔到…

今日冇出街, 喺屋企過咗個好平靜嘅聖誕, 多謝呢兩日打過電話俾我嘅朋友仔, 祝你哋聖誕快樂!!! ^o^

無奈 x 10000000000

尋晚臨瞓之前又唔覺意睇到啲嘢, 搞到瞓得唔好, 今日心情依然好差, 想喊又喊唔出, 好無奈...

唉...黃小姐, 當我求吓你, 你唔好成日要人擔心得唔得呢? >.<

Dinner w/Ship Ship

今晚終於約到璇璇食飯, 好開心啊~一別就3個月, 時間過得真係快...唔知點解見到璇璇好似有好多嘢想同佢講, 係咁不停講嘢(esp. 講老細壞話 : P), 可能我哋真係太耐冇見, 所以到分別嘅時候有少少依依不捨, 下次見璇璇又唔知要等到几時喇... : (

唔知璇璇鍾唔鍾意個貓貓日曆呢?我都要多謝番佢送兩張<父子>換票証俾我, 好靚啊~我諗我唔會再睇第三次喇, 因為嗰兩張換票証好靚, 如果我拎去換戲飛就會冇咗兩張咁靚嘅換票証喇... ^.^


P.S. 璇璇星期六就帶肥貓薯仔返屋企, 希望佢肯瞓我哋好耐之前買俾蓉蓉B、但係佢一次都冇瞓過嘅(舊)貓床啦, 用得唔好嘥嘛...

提早離職

前兩日老細又同我講咗啲嘢, 佢話既然係我自己辭職唔做, 咁不如唔好hea 我咁耐喎, 佢問我不如我做到1月尾好唔好, 我梗係話好啦, 早啲走就早啲正正經經一條心搵工...枉我之前仲咁多顧慮, 都係璇璇講得啱, 對住老細呢種人真係唔使為佢諗咁多, 成日都一時一樣, 唔知佢想點...
老細尋日已經拿拿聲去咗勞工處攞請人form, 兼且填埋交埋0添喇, 好似好趕住請人咁, 不過都好, 個女仔早啲嚟我就可以早啲交帶啲嘢俾佢知, 唔使咁趕都好嘅...

諗咗几日, 大約都知道自己想搵咩工, 努力search 吓先...


P.S. 今日終於見番蓉蓉B 正常嘅便便, 好感動...(唔好意思, 好似有啲核突, 不過真係好感動... T.T)

煩人

今日老細又同我講咗啲嘢, 其實佢講咁多呢啲說話只會令我更加覺得佢煩, 更加想快啲走, 睇嚟都要積極啲找工作, 如果找到就1個月前通知佢算喇, 我唔知我捱唔捱得到3月尾, 可能未到3月我已經俾佢啲音波功煩死咗喇… : (


P.S. 問過獸醫診所個姑娘, 佢話痾爛便便應該唔關杜蟲葯事, 咁蓉蓉B 點解會咁呢?我哋估佢可能係冷親, 因為佢呢几日間唔中會打乞嚏, 佢食得玩得瞓得, 應該冇事嘅, 瞓番多啲就應該會好0架喇啩...... ^.^"

蓉蓉打針針

今朝老細一早去咗澳門, 叫我都唔使返公司, 所以今日全日day off, 好嘢...

蓉蓉又係時候打一年一次嘅防疫針, 今朝等爸爸起身先可以將蓉蓉放入去街袋, 唔知蓉蓉B 做乜咁驚, 嚇到瀨咗少少尿喺爸爸條褲上面, 真係sor…

去到獸醫診所, 個vet 幫蓉蓉打咗支針, 又餵佢食埋杜蟲葯, 返到屋企唔知點解蓉蓉會痾爛便便, 唔知關唔關啲杜蟲葯事呢?听日打電話去獸醫度問吓先得...

駁咀

今日下晏因為一件小事忍唔住駁老細咀, 佢就即刻唔高興, 又話好奇怪我會用咁嘅語氣同佢講嘢, 之後又繼續bla bla bla 一輪咀係咁話我, 我又好順便咁話埋俾佢知其實我真係唔想繼續做, 佢听到都冇乜太大反應, 只不過又講咗啲難听嘅說話, 又話覺得我唔識珍惜咁啫…

俾佢教訓完之後, 叫做應承佢做到3月尾等佢請到人我先走, 諗諗吓, 仲有3個半月, 好難過...

唉, 喺間豆膶咁細嘅公司, 都俾我見識到啲咁自私、自大、自以為是、奄尖聲悶、吹水唔抹咀嘅人, 真係「大開眼界」、「獲益良多」… : P

近期的第一句說話...

近來同啲朋友仔講電話 / 見面嘅時候, 佢哋第一句講嘅說話就係:「你仲喺嗰間公司做呀?」或者係「你轉咗工未呀?」ha, 好多謝大家咁關心我嘅工作情況, 暫時都仲ok 嘅, 遲啲就唔知仲頂唔頂得住lu… ^.^

<父子>Director's Cut

今日如常去嫲嫲度, 不過上去之前同黃小虹去咗喺隔離街嘅百老匯電影中心睇第二次<父子>, 今次我哋睇足本版Director's Cut, 原來真係好睇好多…上次同表姐睇120分鐘普通版好似中間有啲嘢cut 走咗, 唔知頭唔知尾, 明啲唔明啲, 感覺好奇怪; 睇番160分鐘足本就知道來龍去脈, 明白好多, 同埋原來Charlie 出面個佬都係Aaron 飾演, 唔怪之得咁好笑囉… ^o^

哈, 好開心, 睇兩次<父子>都全院滿座 (雖然係迷你戲院), 不過都好感動, 原來Aaron 啲戲都有咁多人識欣賞(或者嘗試欣賞), 多謝大家... ToT

Kitty 畢業喇~

Kitty 今年畢業, 約咗我哋今日喺City 影相, 今日都ok齊人, 包括: 主角靚靚Kitty、Kitty's bf Alan、Percy、Lolo、Didi、張珮瑛、Ric、Miss Chow、筠姐、仲有我一齊影相相...數落好似几齊人咁, 不過其實肥佬哥哥臨時甩底, 哼, 真係冇心肝...

影影吓, 忽然醒起唔知璇璇今日會唔會返學, 拿拿聲打俾佢, 知道佢今日唔返學校真係有少少失望, 因為實在太耐冇見佢喇, 如果今日可以順便見吓佢就更加好喇...

影完相相之後, Percy、Lolo、筠姐、Ric 都走先, 凈番我哋6個人就喺又一城嘅Delifrance 飲嘢傾偈, 傾到咁上下就分道揚鑣lu...之後我就同Didi、張珮瑛去咗旺角行街睇嘢, 我哋個個都冇收穫, 行到7點左右我就搭車返屋企食飯, 兩位美少女就喺旺角同屋企人 / friend 食飯喇...

今日可以見到咁多人好開心呢, 尤其是可以見番「失散」咗差唔多6年嘅張珮瑛, so good...我哋一定要多啲約出嚟反(如果約到嘅話...)!


P.S. 多謝Kitty 叫埋我一齊影畢業相啊, thanks~

<父子>觀後感

今晚約咗表姐喺沙田睇<父子>, 入埸之前好緊張好期待, 希望會有預期中咁好睇...
睇完之後都覺得好睇嘅, 不過可能因為之前expect 會有10分滿分, 又expect 會喊得好犀利, 但係竟然喊唔出, 所以睇完之後有啲啲失望...不過無論如何呢套戲都好值得去睇, 因為成個故事好感人, Aaron 同阿仔都做得好好, 真係未見過Aaron 會講咁多粗口, 啲動靜又成個佬咁, 好唔係Aaron...不過呢, 我同表姐都覺得啲love scene 太多, Aaron 同Charlie 嗰段長少少都可以理解, 但係Aaron 同林熙蕾嗰段就真係too much, 嗰一刻真係覺得自己睇緊三級片...

原來我真係唔太鍾意睇唔係happy ending 嘅戲: 阿媽唔要個仔, 老豆因為生活又逼個仔去偷嘢, 阿仔入咗男童院, 大個咗又冇認番老豆, 唉...睇完個心好0翕...

睇唔睇多次好呢?如果睇, 我想今次睇導演版, 應該會原汁原味啲... ^.^

又係Aaron + 媽咪牛一

尋日同今日都好似好忙咁, 今晚Aaron、阿仔、徐天佑去大埔超級城宣傳<父子>, 我就帶埋相机好傻仔咁逼埋去啲人堆度等Aaron 佢哋嚟, 好彩等咗唔係好耐佢哋就坐住架開蓬跑車入場, 我就好努力咁企喺人堆中影相影相影相...跟住個口水佬又好長氣咁講嘢同玩遊戲, 仲同阿仔玩得好開心...阿仔好cute 好靚仔, Aaron 應該几錫佢... ^.^

睇到咁上下啲傳媒開始訪問佢哋, 咁我就走喇(個口水佬都唔知講几耐先講完 : P), 然後就同媽咪黃小虹去和民食飯慶祝媽咪今日50大壽, 仲買咗兩件蛋糕一齊吃, 好味好味~

食完飯我哋就返屋企lu, 好開心, 有得見Aaron, 又有得食蛋糕, 祝媽咪身體健康, 工作順利... ^o^

金馬影帝 - 郭富城

今日返半晏, 下晏喺屋企執嘢...7點几就去咗表姐屋企睇金馬獎頒獎典禮, 同表姐兩個叫咗啲外賣一路睇一路食...
睇到10點几終於頒最佳男主角, 几驚真係爆冷, 好開心啊~今年又係Aaron 冧莊, 除咗「阿爸」得獎之外, 「阿仔」吳景滔都攞咗個最佳男配角, 兩父子都好叻, 不枉我專程去表姐度睇佢攞獎...不過個口水佬真係超級長氣, 又講得慢, 真係失禮人... : P
除咗最佳男主角、最佳男配角之外, <父子>仲攞咗個最佳劇情片, 總共3個獎, 好犀利, 應該真係好好睇...<父子>11月30日就上畫喇, 好緊張好期待, 我諗我應該會睇多過一次... ^.^

興奮過後返到屋企11點几, 接到Julissa 嘅來電, Juli 好唔開心, 傻妹唔好再喊喇, 趁未作出任何錯誤決定之前諗清楚下一步應該點做都好緊要, 再睇情況啦, 唔好太唔開心, 無論如何我都會支持你0架, 加油加油... : )


P.S. 尋日24/11 有兩位美人生日, 小姐& Percy 生日快樂!

Dinner w/Julissa & Alice@Kwai Fong

今晚放工約咗Julissa 同好耐冇見嘅Alice 喺葵芳食飯, 臨上巴士電話忽然冇電, 又未約實佢哋喺邊度等(再加埋唔記得佢哋電話號碼), 惟有好「頻能」咁返屋企攞舊電, 跟住先再搭車出去...

去到都差唔多8點半, 要兩位美女久等真係唔好意思...我哋今晚食越南嘢, 不過我真係太唔食得辣嘢, 我凈係食到啲辣味... : P
食完飯我哋去許留山買咗嘢飲邊行邊傾偈, 傾到10點几就各自歸家lu...

間唔中見吓啲好耐冇見嘅朋友傾吓近況真係好...

好煩呀!!!

早几日老細又同我講, 叫我盡量唔好加自己意見/ idea 落平時嘅工作度, 我只要跟住佢嘅instruction 去做就得喇喎, 咁我而家同以前凈係打單打單打單有咩分別呢?雖然我唔醒目、又stubborn 又唔識轉彎, 但係我都唔鍾意做啲咁機械式嘅工作......
老細仲好自豪咁估我應該做得几舒服, 其實好想話佢知我做得舒服只不過係因為我習慣咗啲工作模式、知道啲嘢要點做, 咁樣並唔代表我真係做得開心/鍾意份工0架... : (


P.S. 唔該唔好再用啲懶係權威嘅語氣叫我要跟佢嘅方法做嘢, 其實end up 做到佢要嘅嘢咪得囉, 你理得我用咩方法唧... >.<

璇璇努力~

今日又同璇璇通電話, 佢而家自己一個搬咗出嚟住, 真係好叻女, 雖然佢要搬出嚟住係逼不得已, 不過可以順便學獨立, 都係一個好好嘅機會...不過呢, 璇璇而家又要返工又要返學, 仲接埋freelance 做, 真係要瞓多啲、小心身體啊~加油加油~

Interview again

今日又有另一個interview, 今次準備得好過上次, 起碼computer test ok 過上次好多, 至於interview 嗰part 雖然都唔係答得十分好, 但係見到几個笑容滿面嘅interviewer 個心都定過上次好多, 答問題嗰陣識答都盡量答, 應該算ok 啩...

听個interviewer 講完呢個department 嘅主要工作之後, 我諗我開始知道自己其實最想做啲咩...如果今次呢度真係請我就梗係好啦, 不過就算唔請都唔緊要, 起碼經過今次interview 我終於知道自己想做乜, 總算有得著...

<離場>

近來听番Aaron 啲陳年舊歌, 其中一首<離場>真係越听越好听…順個便點埋俾寶B 听…

<離場>
從前談電影 心中最愛是看劇情變好 而不感牽強
然而年漸長 只知道世事較劇情更糟 如今愛戀 有些故障
我曾讓愛放最上 發展得不理想 各位都猜到怎去下場
愛 誰願意看結局惆悵 怕淚腺任性的擴張
尋求著藉口 不想去看罷這齣戲 見諒 我先離場
從來無自欺 怎可以繼續看劇情變糟 人生極漫長
仍然是樂觀 只不過發現分開會更好 重整理想 有新志向
愛 臨近結尾氣氛極惆悵 努力接受那些真相
無聊時在想 想戀愛太像一齣戲 縱蕩氣多迴腸 但閉幕了應離場

Release

今日臨放工嘅時候老細問咗我一啲問題, 我趁機講埋擺咗喺心入面好耐嘅說話俾佢听, 雖然事情尚未解決, 不過講咗出嚟我個心舒暢咗好多, 起碼好似將心裏面嘅想法講咗俾最應該知嘅人知, 以後嘅事就以後再算, 諗得太多都幫唔到件事…

Happy B-day to Aaron

今晚放工同Able 去唱K, 好開心寶B 搵到Aaron 首<愛情>俾我唱, 個MV 好好睇啊, 不過個女主角同Aaron 太親密喇, 唔得咁0架喎~~ : P

今日係Aaron 生日, 預祝佢套<父子>將會攞好多好多個獎, 叫好又叫座… HAPPY BIRTHDAY!!!

求婚

今日本來心情唔多好, 但係夜晚接到Julissa 嘅來電, 佢話佢個朋友仔遲啲會返香港向佢求婚, 听到都已經好開心喇, 如果Juli 真係結婚嘅話, 將會係我識嘅朋友當中最早結婚嘅一個, 個傻妹好似好多顧慮咁, 雖然佢啲顧慮都好正常, 不過而家呢一刻唔使諗太多住啦, 開心吓先啦喂~ ^o^

Interview

今日「詐詐帝」請咗一日病假去interview, 第一part computer test 都已經焦焦地, 跟住interview 仲嚇死，一入到去就見到4個女子坐咗喺度，然後一個輪住一個問我啲唔係好識答嘅問題，都唔係好知自己答咗啲咩...不過算啦, 起碼叫做試過...

夜晚約咗Able 去旺角食咗餐好好味、個view 又好正嘅飯, 希望寶B 快啲冇事...加油加油~

My Nation

今朝掛住听老細嘅”morning call”, 差啲miss 咗個叫我下星期去interview 嘅電話, 好彩听得切, 好彩好彩…不過唔知點同老細講我想請一日假, 真係頭痕…

好開心, Aaron 最新CD 終於到手, 今次呢隻碟唔知點解會用隻英國短毛貓(如果冇認錯應該係)做主題/主角, 隻貓貓好肥好靚…至於啲歌, 大致上都几好听, 不過其實我自己麻麻地鍾意<銀色公路>, 好似<愛情>同另一首慢歌<避風港>好听啲… ^o^

我的工作

自從上次俾老細狠狠地「教訓」完之後, 近來不斷認真地諗到底我嘅性格係咪唔適合呢份工, 諗諗吓, 其實都係, 我諗我比較適合做文書性嘅工作, 老細要求我跟佢出去見人見客, 其實真係好想話佢知我唔鍾意咁樣… >.<

唉...呢几日不停諗到底我而家做緊呢份工做正經事多, 還是私人嘢多, 以下係我要做嘅工作...

1. 打document (e.g. quotation, media schedule, invoice, insertion order, proposal, delivery note, confirmation, etc.) ;
2. 聯絡客戶 / media sales / 報紙雜誌traffic department ;
3. 買報紙雜誌 & cut 廣告出嚟 ;
4. 同designer 跟稿 ;
5. 做速遞周圍拎嘢 / 俾嘢人 (一個星期至少兩次) ;
6. 去銅鑼灣business centre 收信 & 雜誌 (一個星期一次, 啲雜誌好x重, 次次都拎到隻手痛足一日) ;
7. 開cheque 找數 / 打電話俾啲客追數, 去啲客度收票, 然後去銀行入票 ;
8. 間中陪老細出去同啲客 / media sales 食晏 (食晏嘅時候要主動同啲客講嘢, 如果唔係又會俾人話)

9. 每朝幫老細準備麥皮, 佢食完之後要洗碗洗杯 ;
10. 吸塵 & 抹枱、抺柜 ;
11. 幫啲植物淋水 ;
12. 上老細屋企幫佢拎嘢上公司 ;
13. 陪老細食晚飯 (i.e. 睇住佢食, 我齋坐) ;
14. 老細打俾我嘅電話一定要听 (就算放咗工 or 星期日都要听, 如果唔听第二日返工又會俾人話) ;
15. 幫老細搞保險單 ;
16. 買文具、廁紙、麥皮、殺蟲水etc. ；
17. 幫老細續車牌 ；
18. 交電費
......

咁樣數一數,我覺得自己都几「multi-functional」(唔記得係邊個用呢個term 形容我), 咩都好似關我事咁, 不過唔係我做唔通老細做咩, 我覺得自己似打雜+ courier 多過我卡片上面寫住嘅title, 其實我只係想搵份文職工作比重多啲嘅工啫… : (

上個星期apply 咗几份工, 希望快啲有回音, 如果冇, 我嘅日子將會好難過…


P.S. 今日爸爸生日, 希望佢身體健康, 工作愉快!

紀念日

兩年前嘅今日係蓉蓉B 成為我屋企一份子嘅日子,唔經唔覺就過咗兩年,蓉蓉B 都兩歲几lu,託賴尚算精靈健康,肥肥白白,thanks god…

Able 呢個星期唔係好開心,我想見番個開心嘅寶B,信我啦,冇咗件C級貨,仲有大把A級貨等緊你呢… : P


P.S. 我諗我個腦都係記埋啲無謂嘢比較多,唔知點解成日都記埋啲唔等使嘅日子…14/10…4年喇… : (

Uncle 又返嚟喇...

Uncle 又喺英國返嚟香港玩,今晚約咗阿姨表姐uncle 佢哋喺三姨屋企打邊爐(呢排好似成日打邊爐),三姨真係好搞笑,笑到肚痛… ^o^

Uncle 又買咗手信返嚟俾我哋,連蓉蓉B 都有英國空運到港嘅來路貓罐頭,真係thank you 晒… = )


P.S. 知道璇璇咁快搵到新工真係開心,都話佢一定有人請0架啦,使乜驚… {^.^}

Mid-autumn Festival w/ Julissa

今日係中秋正日,上個禮拜食咗做節飯所以今晚唔使返屋企食,放工之後約咗Julissa 去睇<穿Prada 的惡魔>,好耐冇試過一路睇戲一路食爆谷飲汽水,感覺好得意…成套戲嘅節奏都几明快,都几好睇几好笑,唔知點解睇戲我通常都係留意女演員,女主角個口雖然大咗少少,不過越睇越靚女…

睇完戲同Juli 去味千食飯,Juli 今晚好叻食咗好多飯,俾一個叻佢...

多謝Juli 陪我過咗一個冇食月餅、冇玩燈籠但係都几開心嘅中秋節… ^.^

打邊爐 gathering

今晚約咗好耐冇見嘅朋友仔喺旺角打邊爐,Percy、Lolo、Kitty、肥佬哥哥、嫂嫂、筠姐、宋銘康都有嚟,好耐冇見佢哋喇好開心…我哋好似食咗好多嘢,又講咗好多嘢,好耐冇試過笑到抖唔到氣…成晚我好似吐咗几多苦水,真係覺得自己有啲長氣… ^.^”

唔知下次咁齊人又會係几時(好似成日都講呢句),如果今晚Didi 同Ric 都嚟到就更加開心lu…

冇鬼用

我係一個超級冇用嘅人,到咗呢個時候竟然仲會手震震、個胃赤赤痛、個心又跳得超快,點解?????

我真係好冇用...... >.<

期待<父子>首映禮

早几個星期先知道原來媽咪個同事珊珊係Aaron 嘅super fan,佢仲係fan club member,佢話呢,遲啲Aaron 套新戲<父子>首映禮睇吓可唔可以帶埋我去,如果佢可以有多一張飛帶到我去見Aaron 就好喇,諗起都興奮… ^.^

珊珊仲俾咗<父子>嘅official website 條link 我,可以止一止渴睇住先,thanks so much!!!!

<父子>official website:
http://www.afterthisourexile.com/

Sing K w/ Able

今晚約咗Able 唱K,我哋好耐冇約過出嚟反喇,真係開心…我哋兩個人唱咗4個鐘,唱咗好多歌,唔知點解覺得陳曉東啲快歌+MV 好好笑,笑到抖唔到氣… : P

唱完K 之後就輪到今晚嘅主菜,我嘗試將我工作上遇到嘅狀況原原本本咁話晒俾Able 知,我知道講俾佢知其實會令佢有啲為難,不過我真係唔想佢係最後一個知道我唔開心嘅人…唉…點都好啦,多謝寶B 嘅advise 同支持,我會乖0架喇,你唔使擔心我,我都會撐你0架... ^.^


P.S. 我愛泰文版<愁人節>… = )

孤軍作戰again

今日差唔多放工嘅時候璇璇終於同老闆講佢想辭職,點知無端端又俾老闆嚴厲地「話」咗半個鐘,我都係第一次听聞有人同老闆講想辭職而俾人話…唉,佢都冇做錯嘢,只不過係想辭職啫,都要無端端俾人炳一輪,會唔會真係有點兒黐線呢?璇璇真係几陰公,不過總算可以離開呢個唔適合佢嘅工作環境,希望佢休息一排之後會搵到一份佢真心喜歡、工作環境又理想嘅工作就好喇…

以後又會回復得番我一個人嘅日子,希望無風無浪、安然渡過...


P.S. 璇璇: 雖然只係識咗你短短一個月,同你相處落發覺你真係好cute 好得意,希望以後可以繼續同你保持聯絡,你要開開心心努力返學工作啊! 加油! 加油!

Dinner w/ 小姐

今晚屋企冇飯食,小姐咁啱約我食飯,我哋去咗朗豪坊食味千拉麵,一路食小姐一路講佢返工啲激氣、辛酸、搞笑嘢俾我听,真係十個爆笑… ^o^

小姐講完啲搞笑嘢我听之後就輪到我講番我啲激氣、無奈嘢俾佢听,喺唔使我詳細解說點樣無奈嘅情況之下,小姐都知道大約咩情況,因為佢有個同事個上司同我老闆基本上係同一種人,所以小姐advise 我盡快搵工,如果搵到就好拿拿聲轉喎…嗯…小姐暫時係第一個叫我快啲搵過第二份工嘅人,我會認真諗諗佢…

多謝小姐听我呻… ^.^

忍無可忍了...

再好脾氣嘅人,都總會有忍無可忍嘅時候,尤其是對住啲唔知自己EQ 低嘅人嘅時候,真係唔係好頂得住...
其實我本身已經係一個冇乜自信嘅人,呢兩日自信心更加跌至新低,到底我係咪真係老闆口中所講咁冇用、咩都做唔到呢?我真係唔知,我淨係知道就算我真係咁冇用,佢都冇必要兜口兜面咁數落我,完全唔顧及人哋感受,真係嚴重到非數我不可嗎?唉…

原來搵工都好睇彩數,要遇到好老闆都好講緣份…

To 璇璇﹕為咗我哋嘅「目標」,我哋要撐落去啊…


P.S. 突然多咗一筆橫財,本來應該几興奮先啱,但係今日真係冇心情… = (

Disneyland, I'm coming!

上個星期爸爸話佢公司有員工優惠,佢話如果喺9月去迪士尼佢自己張飛免費,仲可以半價帶多3個家人入場,听落好似好抵咁,所以几經辛苦爸爸、媽咪、我都同人調假 / 攞假,終於就到今日一家4個口一齊去迪士尼反…

因為之前我哋驚去到冇咩好玩,所以食埋晏12點先搭車出發,上車嗰陣都仲天朗氣清,點知搭搭吓車就落起滂沱大雨,去到售票處嗰陣好似仲落得大過之前,啲staff 話一部份機動遊戲因為紅色暴雨警告要暫停,搞到都唔知入唔入去好,但係一場去到冇理由唔入去0架,所以最後都係一人擔住一把遮咁入去玩…

一入到去我同黃小虹見到啲精品就有少少發癲,黃小虹買咗一件Minnie 衫 + 一把Minnie 遮,我就買咗對Marie 耳環 & 一個鋼牙鎖匙扣,鋼牙個表情唔知點解好似蓉蓉B,好得意… ^.^
買完嘢之後我哋就排隊玩Space Mountain,嘩,實在太耐冇玩過呢啲咁刺激嘅玩意,真係驚到不得了,我諗我都係唔係太適宜玩啲咁刺激嘅嘢…

玩完Space Mountain 之後我哋去咗玩旋轉木馬,跟住就去食個早飯,食完先去玩巴斯光年,我估爸爸應該几鍾意玩呢個game,因為有得射槍… : P
玩完巴斯光年之後我哋喺門口「見到」巴斯光年,排咗一陣隊就同到佢影相,佢不停擺pose,好生鬼、好好笑,我哋今日凈係同咗佢影相咋,不過好過一個都冇…

跟住行行吓又冇乜特別嘢想玩,就去咗玩轉到頭暈咖啡杯,未坐上去都唔知原來轉得咁快,除咗佢自己自轉之外,原來我哋都可以自己轉快啲,黃小虹就發癲係咁轉,轉到我頭都暈埋…
轉完一輪之後差唔多時間放closing 煙花,好彩冇落雨,所以有得睇煙花,加埋啲音樂墊底,真係寧舍好睇…

今日雖然落大雨又唔係玩咗好多嘢,但係其實都几好玩吖,如果有机會嘅話都想再去多次… ^o^

No Choice

每日都要面對同一個狀況,只有兩個解決方法: 一係醒醒目目繼續撐落去,一係離開…我諗我暫時只得一個選擇,即係冇選擇… = (

Dinner w/ Ablele

好似好耐冇約過Able 食飯,今晚終於約到佢喇,由於寶B 食完飯要趕住返去「做功課」嘅關係,我哋都係喺番大埔食飯,食完飯陪寶B 食咗杯軟雪糕,之後再兜咗個圈就各自歸家lu…

寶B 呢排又開始忙喇,希望佢小心身體,都係嗰句: 「最緊要夠瞓!」 ^.^

Dinner w/ 表姐

表姐星期五去泰國玩,問我借相机,今晚放工就拎部相机俾佢,順便同佢食個飯吹吓水…一路食我哋一路講番啲屋企嘢,講吓呢個又講吓嗰個,有好多嘢都真係估唔到會發生,只好嘆句世事多變…

Anyway,希望表姐呢几日會玩得開心,如果幫我買到Boots 就更加好喇… = P

Welcome!!!

今日新同事--Shirley (又名璇璇妹妹)第一日返工,welcome to Good Value~有多一個人陪吓我傾偈講吓嘢應該會几開心,希望佢會鍾意呢份工…

Surprise

黃小姐,好「多謝」你為我製造咁多「驚喜」,不過夠喇,我平平淡淡過我嘅日子就ok 0架喇,你再係咁搞法我真係遲早爆血管… >.<

工作一周年

舊年嘅今日係我正式返full-time job 嘅第一日,眨吓眼就一年,返工嘅時間真係過得特別快…呢一年其實都算係咁,做嘢唔算太辛苦,又唔算太無聊,不過有時都會做到個人吽吽地,好彩每一日返到屋企都有蓉蓉B 陪我玩,雖然佢多數時間都唔係好睬我,但係可以餵吓佢食魚仔、摸吓佢啲毛毛,其實心情都會好番好多,多謝蓉蓉B… ^3^

出嚟做咗一年嘢,開始見識到呢個世界不同「人種」,原來最令人討厭嘅並唔係煩人或者長氣嘅人,而係啲EQ 極低、自以為是、以為自己講嘅嘢人人都要听嘅人。唉…希望我會頂得住…

<狼羊物語>

今晚同Julissa & 馨儀妹妹(其實佢個名係咪咁寫呢?)喺九龍灣睇戲,睇<狼羊物語>,可能成套戲都係得個藍天or 黑媽媽嘅天空or 綠油油嘅草地,唔知點解越睇越眼瞓…同埋呢,成套戲嘅theme 係講一隻男仔狼& 男仔羊生死相隨嘅兄弟手足之情,唔知點解硬係覺得有啲怪怪地,好有斷背feel,Juli 仲問呢套係唔係gay film,我諗我哋可能諗得太多… ^.^”

今晚可以見到Juli 同馨儀妹妹真係好,下次再約過…

happy dinner w/ Kennis

今晚放工約咗好好好耐冇見嘅Kennis 去旺角食飯,差唔多半年冇見過佢喇,我同佢講我好掛住佢係發自內心0架,絕對唔係講大話氹佢開心呢…
多謝佢請我食飯 + 多謝佢喺菲律賓帶番嚟俾我嘅手信,個聖母鎖匙扣好靚、聖母個樣好慈祥啊~

正如佢所講,雖然我哋咁耐冇見,但係感覺依然好親切,希望喺佢開學之前可以再同佢玩多次,佢過埋呢個最後暑假,都唔知要隔几耐先約到佢出嚟玩喇… : P


P.S. Kennis 電孿啲頭髮 + 放散落嚟好好睇呀,又話要同佢影張相都唔記得咗,下次見到佢一定要影… ^.^

EQ 下降

近几晚都瞓得唔係太好,成日發埋啲奇怪夢,仲連續几晚夢見啲好耐冇見嘅朋友仔,係咪即係意味住我係時候約佢哋出嚟見吓呢?我都好想,不過下個&再下個禮拜六日都好似有嘢做,又唔知人哋几時得閒,都係遲啲先算罷啦...

發覺自己啲EQ 好似越來越低,越來越容易發脾四,點解會咁0架...... >.<

moov moov moov moov

今日晏晝喺屋企冇嘢做,終於上咗now 睇番Moov 歌舞會Aaron 嗰part,真係好精彩...雖然唔可以現場睇,但係隔住個mon 都feel 到當時血脈沸騰嘅氣氛,好正啊~不過Aaron 只係唱咗半個鐘,真係太少,如果可以唱多几首、跳多几首就好喇... ^.^


P.S. 原來Eva 同學都係當晚其中一個dancer,又可以同Aaron 日對夜對排舞,真係羡慕死人... : )

Moov 歌舞會 VS 書展

今晚係Love Music Moov 歌舞會嘅日子,本來我都夠net cash 換飛去睇,不過成晚有差唔多6-7個表演單位,Aaron 最多都係唱半個鐘,諗諗吓山長水遠去亞洲國際博覽館好似唔係好抵睇,所以最後都係冇換到飛,惟有等佢upload 上網先上番去睇啦… : (

今日下晏冇乜嘢做就同黃小虹去書展,今次都買咗几多本書+無聊文具,不過真係超多人,如果少啲人冇咁逼就好好多喇…

幽靈之子

呢兩日睇報紙,知道Aaron 又買咗架新車,成千萬買部車真係誇張,不過真係好靚好型…

名車配俊男,真係賞心悅目… ^o^

Dinner w/ Julissa

今晚放工約咗Julissa 喺旺角食飯,同Juli 傾咗好多偈,Juli 送咗一隻靚靚Melody 保溫杯俾我,仲有由美國空運抵港嘅hand lotion + 朱古力,加埋張好靚嘅Melody 生日咭,好開心呢,多謝Juli… ^3^


P.S. Juli 繼續俾心机搵工,千祈唔好灰心,希望我講俾佢听嘅嘢對佢搵工有幫助…

開張大吉

今日新office 啟用,希望老細生意越來越好,生意興隆,大展鴻圖!

恭喜恭喜!

My B-day

今日可以早啲放工,3點几就走,自己一個去咗北區醫院排期睇腳,生日流流去醫院好似唔係几好,不過如果唔係今日去都唔知几時先有時間去,所以都冇乜所謂…

排完期之後,返屋企hea 咗陣,7點几同Didi 去元氣食壽司,一路食一路傾偈,原來我哋都唔係好大食,好彩…Didi 送咗條Roxy 電話繩俾我,好靚呢,thank you! 佢專程去買俾我嘅栗子蛋糕都好好味… : P

多謝呢几日打過電話/ send SMS / send ICQ msg 俾我嘅各方親友,包括: Able, Kennis, Julissa, Wendy, 小姐, Didi, 表姐, Ric, Percy, Kitty, 二姨…多謝大家記得我呢個鵪鶉人生日… Thanks all!!!!!!!


P.S. 今年都冇咩特別生日願望,都係嗰啲啦,最緊要係身體健康,其他咩都good 就好喇… ^.^

提早來臨的生日禮物

今日返工見到Able,佢提早送生日禮物俾我,係一個好靚好實用嘅袋,我會成日用0架,thank you! ^3^

與Aaron (的蠟像) 近距離接觸

今日同Able 去玩去癲,very happy,行程如下:

3點由大埔出發搭車去山頂,去到山頂廣場我哋夾咗一大包糖食,啲糖咩造型都有,有大蜘蛛、老鼠、恐龍、蜥蝪,其實都几核突,不過又好搞笑…
--> 去到蠟像館,唔使行到好入就見到Aaron 個蠟像,好開心啊~我都有好似其他女仔咁攬住佢影相,不過Aaron 兩隻袖啲花花好大朵,阻住晒,搞到人家唔可以企埋啲影,如果可以再close 啲就仲好…除咗Aaron 之外,我哋仲同其他明星影咗好多相,我都係而家先知原來寶B 鍾意裴勇俊,ha… ^.^
--> 喺蠟像館玩完之後,我哋搭番船去尖沙咀,搭搭吓咁啱喺船度睇到幻彩詠香江嘅煙花,嘭嘭聲,好犀利…
-->去到尖咀碼頭寶B 請我食冰凍嘅雪糕,very 好味…
-->喺海港城閒逛咗一陣,喺櫥窗見到好大個軍曹頭型嘅唔知咩電器,影咗几張相,跟住我哋去杏花樓食蘿蔔糕、紅豆雙皮奶,食完就搭車返屋企lu…

好多謝寶B 喺難得嘅假期抽空陪我去蠟像館同Aaron (個蠟像)影相,如果唔係佢肯陪我去,我諗我都搵唔到人陪我去第二次…仲好多謝寶B 請我食咁多好味嘅嘢食,thank you very much!

悠閒的回歸日

今日放回歸日假唔使返工,晏晝同黃小虹出旺角睇戲,睇<加菲貓2-肥貓扮太子>,加菲好肥好好笑,好睇好睇… ^-^

睇完戲之後周圍逛,一路行一路食埋晒啲rubbish food,之後返屋企睇<電車男>,電車終於可以同青山小姐一齊真係感動… T.T

今日行街行到對腳好攰好痺,睇嚟要快些少去睇睇對腳先得…

爸爸節+黃小虹牛一

今日係爸爸節,夜晚我哋一家四口去咗食西餐慶祝+預祝黃小虹听日生日…不過今日我同爸爸都唔係好舒服,不停流鼻水,食飽之後我哋嘅dessert 就係兩碗超苦嘅中葯…希望啲鼻水快啲停,個鼻塞住抖唔到氣好辛苦… >.>

租office

今朝食完早餐同老細去睇寫字樓,一睇之下覺得几ok,喺番大埔又近我哋,地方又企理乾淨,真係唔錯…晏晝老細同auntie 就扑鎚決定租呢間office,遲啲要添置office 嘢可能會忙啲啲,不過都係開心嘅忙碌,good…

talk show

今日約咗Able 去街玩,本來我哋plan 咗做兩件事,不過由於時間關係,我哋晏晝凈係喺尖沙咀行咗陣街,跟住夜晚就去文化中心睇Able 個idol 嘅talk show…可能係我孤陋寡聞,Able 個idol 講嗰啲topic 我都唔係太听得明,听完都唔識笑,真係唔好意思… ^.^”

睇完talk show 之後我哋去咗食嘢,食飽飽就搭車返歸…今日好榮幸可以同寶B 捧佢idol 場,希望不久嘅將來又可以睇佢嘅show…

有家的貓咪最幸福

今日lunch 同老闆食食吓飯嗰陣收到媽咪嘅來電,佢話佢個friend 有隻一個月大嘅貓BB 等人收養,如果我哋唔要佢佢就要流落街頭可能會死,知道佢咁慘,我同媽咪都心思思想帶佢返屋企…好彩經過一個下晝之後,終於搵到有心人收養佢同另一隻貓BB,佢哋有屋企又有伴就唔使再喺街頭流浪冇人理,真係好…

P.S. Uncle 今晚返英國喇,下次再見…

P.P.S. Julissa 又過咗美國搵Mr White,唔知佢哋玩得開唔開心呢? ^.^

BBQ party

今晚趁uncle 得閒啲冇其他appointment,我哋放晒工之後上咗二姨天台燒嘢食,順道提早預祝蓉蓉、黃小虹同我嘅生日,除咗BBQ 嘅例牌嘢食之外,uncle 仲煲咗水蟹粥同煮咗其他嘢食,燒完嘢食之後我哋仲切埋蛋糕,成晚non-stop 咁食嘢,真係開心...不過我都覺得近來自己肥咗,尤其係對bye bye 手,都唔知點先可以減到,不過算啦,由得佢跟住我啦,最多收埋佢唔俾佢見人囉... ^.^"

Welcome back to HK

今日uncle 又喺英國返嚟玩,夜晚我哋又一棚人一齊食飯,順便食埋端午節飯,食咗好多嘢,好飽… : P

唔知點解呢几日好似食咗好多嘢,好似有啲滯滯地,跟住呢几日都係唔好食咁多嘢喇… : D

Annoying

我只想星期日可以安安樂樂、悠悠閒閒咁同屋企人飲茶行街睇嘢,呢個小小嘅願望似乎越來越難實現…… : (

五一假期

今日放假,帶咗蓉蓉去沖涼,我就去剪頭髮,洗完白白嘅蓉蓉B 香噴噴啖啖肉,爽爽… ^3^

急診

今日晏晝同阿姨婆婆佢哋飲茶,之後返咗屋企hea 咗陣,夜晚就同小姐、Wendy 喺沙田食飯,好味好味…

之後如常同兩位美女搭火車返屋企,返到大埔墟火車站等巴士嗰陣忽然覺得隻右眼好痕,於是就唔覺意好出力咁捽咗兩下眼,跟住就覺得隻con 好似唔見咗,睇嘢好朦…返到屋企搞咗一陣都整唔到隻con 出嚟,媽咪幫我整咗差唔多10分鐘都整唔到,搞搞吓我都唔知隻con 係跌咗,定係攝咗喺眼皮上面,穩陣起見,媽咪陪我去那打素睇急症,好彩冇乜人睇,唔使排隊就可以見醫生,醫生滴咗啲黃色眼葯水落我隻眼度,唔使10秒就幫我攞番隻con 出嚟…由出發去那打素到返埋屋企前後都唔使半個鐘,好彩冇人睇急症,如果唔係實俾媽咪哦死...

我咁大個人都係第一次睇急症,真係樣衰,希望唔會有下次… ^.^”

Play w/ Julissa & Alice

今日返半晏,放工之後出葵興搵Julissa、Alice 食lunch,食完之後去咗葵芳睇<獸猛猛奇兵>,唔知點解呢套好似冇上次套<荒失失奇兵>咁好笑,感覺怪怪的…睇完戲之後我哋坐咗喺商場花園傾偈,傾嗰陣都冇嘢,返到屋企先發現兩隻腳都俾蚊咬咗几啖,好痕好痕…

今日可以同Julissa、Alice 玩真係好,下次再約過… ^.^

西貢半日遊

今朝晨早7點起身,8點同媽咪爸爸黃小虹去到九龍塘集合上車出發去西貢行海下灣,雖然今日天氣麻麻地,都几大風几涼,不過都几適合行山…離遠望到個海,啲水好清好乾淨,啲空氣又好似真係清新啲,不過行得一個鐘就要上番車真係太少時間,如果可以有多啲時間行耐啲應該會開心啲,感覺上好似冇咁嘥時間搭車,好似冇咁戇居…

行完一陣山之後上番車,去咗藍田某屋村商場酒樓食lunch,啲嘢食算ok 唔太難食…食完之後又上車,唔知做乜車咗我哋去觀塘工廠區睇韓國嘢,啲嘢種類少又冇嘢睇,睇咗唔夠15分鐘就解散lu…

喺觀塘解散之後我哋去咗行apm,跟住又去旺角行街,到夜晚食埋飯先返屋企…今日好似做咗好多嘢咁,都几攰,不過如果今日嘅一日遊行程可以緊密啲多啲嘢睇應該會冇咁無聊…


P.S. 上個星期睇報紙見到一個好熟悉嘅名出現喺一則唔好嘅新聞,諗咗好耐,如果冇記錯應該係一位中學同學嘅屋企人…希望佢早日康復…

復活節假期活動

今日約咗老闆+兩個幫手整膠片嘅Karen、豪仔喺銅鑼灣睇戲,其實呢,我本人就覺得<至尊無賴>應該唔太好睇,因為睇過<龍咁威>真係笑唔出,但係老闆又好似好想睇咁(加上係佢請所以不得異議 : p),我哋一行4人最後都係睇咗<至尊無賴>,睇完出嚟大家都唔知講咩好… ^^”

睇完一套咁"精彩"嘅戲之後,我哋去咗唱K,有K buffet 食又有歌唱,真係開心...原來Karen 唱歌好好听,佢同老闆一齊唱合唱歌好好听啊…唱到12點我哋就分道揚鑣,各自歸家lu…

听朝要晨早起身,希望起到身... : O

肚痛

唔知係呢几日食錯嘢,定係星期日晚喺嫲嫲度食得太多餸食滯咗,呢几日個肚成日隱隱作痛,又有少少肚痾,為免繼續痾落去,今晚放工之後去咗睇醫生,醫生話有少少腸胃炎,食咗兩次葯好似好番好多,thanks god…

呢個故事教訓我唔好食得太多/亂食嘢… ^.^”

金象獎+曲奇餅

今晚金象獎頒獎典禮,今次係Aaron 第一次有份候選最佳男主角,其實作為佢嘅fans,佢上次攞台灣金馬獎都真係几喜出望外,因為Aaron 喺演戲方面嘅經驗始終唔夠佢嘅對手多,上次得獎可能係啲評審覺得佢進步咗好多,所以今次金象獎都冇太大期望,有份提名其實都已經好好…好期待可以快啲有得睇<父子>,Aaron 應該都會做得好好,如果佢出年都有份提名最佳男主角就好喇... ^.^

就喺我同黃小虹一路睇金象獎嘅時候,我哋一路嘗試用今日下晝同Able 行City Super 買嘅曲奇餅粉整曲奇餅,終於開齋用個焗爐喇...我哋一路掛住睇電視一路焗,頭嗰兩round 太多牛油焗到溶晒燶晒,第三round 先焗到正常嘅餅型出嚟,都ok好味(其實都只係將啲粉搞勻然後攞去焗啫)…好玩好玩…

今晚節目都几豐富,一啲都唔悶... : P

Long time no see

今晚放工約咗好耐冇見嘅Percy,Kitty,Didi 食飯,我哋又去咗仙茶居,原來我哋真係好掛住、好愛仙茶居…
雖然我哋唔係食咗好耐,但係可以同佢哋傾吓偈、講吓無聊搞笑嘢真係几開心… ^.^


P.S. 希望Percy、Kitty 听日同之後嘅interview 順利,好快搵到工...

陪小姐吃飯

今晚放工約咗小姐喺大埔和民食飯,叫咗4樣都几飽肚嘅嘢食,好味~我哋竟然食得晒…ha~ 一路食我哋一路講番以前上家政堂啲低b 搞笑嘢,講講吓bye bye 手唔知點樣又講咗去三級bye bye 胸,好低b,好好笑… ^o^

食完飯小姐陪我行番廣福,然後就各自歸家lu…遲啲姑爺唔使再返夜,小姐可能唔再搵我陪佢食飯,不過都好吖,佢哋終於多番啲時間見面,gd…


P.S. 頭先食食吓嘢咁啱Wendy 又喺大陸打電話俾小姐,我又同佢講咗几句,佢把聲好似唔係好精神,Wendy 要撐住啊~

F4 Forever4 Concert 2006

前晚係F4 concert 開show 嘅大日子,本來我都好想睇,但係又買唔到$120飛,買$250/$480飛又好似好貴,所以都預咗冇飛冇得睇…

尋晚又喺我開始沮喪嘅時候,肥佬哥哥打電話俾我,話嫂嫂個friend 有一張今晚嘅免費飛,問我睇唔睇,呵~有飛梗係睇啦,就算得自己一個去睇有啲戇居都唔怕啦… ^.^

雖然坐山頂位、個大電視又俾啲hi-fi 遮住,不過好彩仲睇到啲歌詞字幕,如果冇字幕我凈係記得啲歌嘅melody 就冇得跟住唱喇… : )
如果要俾分,我會俾9分呢個concert,因為4個靚仔都將自己辛辛苦苦練習咗好耐嘅嘢表演俾大家睇,出嚟效果都好好…旭旭同Vanness 啲舞都跳得好好,睇到拍爛手掌,听到旭旭跳到喘晒氣,真係辛苦晒; 至於仔仔,佢一路唱劉華首<我恨我癡心>一路跳舞真係好搞笑,冇諗過仔仔都可以跳舞跳得咁pro,如果媽咪都一齊嚟睇一定會讚佢叻仔; 而天天雖然只係跳咗啲比較簡單嘅舞步,但係佢打鼓同彈結他都好型,如果佢都"可以"脫嘅話,我諗現場反應應該會更加好… : P

本來以為要買VCD / DVD 先有得睇呢個concert,而家有得親身現場睇真係正好多,如果今次唔睇都唔知要等到几時佢哋4個先會再聚埋一齊開concert,好多謝肥佬哥哥仲記得我鍾意佢哋,仲要唔該晒嫂嫂,thanks~ ^3^


P.S. 原來哥哥同嫂嫂好番喇,yeah~

全日出勤

今日有几個appointment,由朝出去出到晚: 首先約咗兩個production 嘅妹妹/dee dee 喺香港仔食lunch; 跟住去跑馬地同個客傾本catalogue 嘅quality 問題; 再之後去柴灣放低啲鞋喺studio 影相; 最後就去奧海城同個designer 傾番啲catalogue 使唔使再印過…

搞掂晒返到屋企都9點lu,希望啲catalogue 如果真係再印過嘅話啲顏色會正常返啦,如果唔係就大件事…

Special Day

今日12點几老闆就俾我走,首先去咗一對舊同事嘅婚禮,佢哋喺教堂用天主教儀式行禮,都有少少感動,祝佢哋白頭到老,永遠幸福快樂…
之後見冇乜嘢做就上咗嫲嫲度坐…再之後就同Julissa、Alice 去旺角一間樓上café 食dinner,嗰度有一張好舒服嘅搖搖椅,我哋食完嘢坐喺上面傾偈,傾傾吓不經不覺原來已經差唔多11點,感覺不錯…


P.S. 今日係肥佬哥哥生日,過去嗰几年我都好似唔記得打電話俾佢同佢講生日快樂,今年終於記得打喇… ^^”

Sing K with Siu Je

今晚放工同小姐去旺角唱K,佢話佢要發洩吓,不過我哋掛住講嘢同食嘢,唱唔夠兩個鐘就要走,如果可以唱耐啲就好喇…最開心就係唱唱吓K 可以同身在大陸工作嘅Wendy 講咗一陣電話,佢好慘啊,晚晚做到三更半夜,第二朝又要晨早起身,听到佢把聲都攰到不得了,真係陰公…

唱完K 之後我同小姐閒逛咗一陣就搭車返歸lu…希望喺不久嘅將來Wendy 可以返落嚟香港抖吓啦…


P.S.今日先知原來小姐之前病咗一排,真係慘,大家都要小心身體…

New Job

13/3已經開始返Victor 哥哥份新工,呢個星期差唔多大部分時間都係同哥哥出去同啲media sales 食飯,又或者係我自己一個出去studio 攞嘢去還,其實都冇乜時間留喺office 做嘢,不過咁樣出出入入啲時間又好似過得快啲,好快就過咗一日…

最令我覺得自己有進步嘅,就係我自己一個人出去嘅時候竟然冇盪失路,次次都好順利咁去到第一次去嘅地方,好感動…希望之後嘅工作都一樣順順利利…


P.S.星期一買咗個焗爐,終於有焗爐可以試吓整嘢食… ^^

拆屋完畢

經過一個星期嘅拆屋事件之後,前日終於整完個廁所,今日終於可以叫個鐘點姨姨上嚟抹嘢,佢足足抹咗4個几鐘先叫做乾淨番啲,即時都覺得爽番晒,真係感動…

不過話就話我哋個單位整完晒,但係同層樓其他單位都仲未整,相信遲啲成條走廊應該都會沙塵滾滾…唉…快啲整完佢啦唔該… : (

Last Day

尋日啲同事好好,lunch 請我同另一位遲我一日遞辭職信嘅同事飲茶…

至於今日都係好似平時咁做嘢,冇乜特別,不過當我行嚟行去派餅仔請同事食嘅時候,其中一位運輸阿哥好奇怪咁問我做乜咁好請大家食嘢,我話我今日last day,佢好似好surprise 咁,有啲搞笑…
臨放工嗰陣同啲同事影咗几張相,令我諗番起F.5/F.7 last day 嘅情景,不過今次冇太多依依不捨嘅感覺,但係我都會掛住大家0架… : )

食lunch + (跟埋去)採訪

今日凈係返上晝,12點几接到Able 來電,佢話晏啲會去佐敦影嘢,咁我哋就約喺附近食lunch…食完好好味嘅沙嗲王白咖喱雞扒飯之後我又跟埋Able 去影嘢,今次Able 訪問呢位中醫師好pro,咩資料都準備好俾Able,所以唔使15分鐘就搞掂…
因為比預期中快完成,Able 未使返公司住,所以我哋有少少時間去書局搵書,但係都係搵唔到...睇到差唔多4點我就行去嫲嫲度,Able 就搭車返公司繼續做嘢…

今日冇專登約都可以同Able 反咗一陣,真係gd...

優閒的星期天

今日約咗Able 去睇戲,睇之前同Victor 哥哥、auntie 一齊去沙田馬會飲茶;飲完茶之後我同Able 去UA 買飛睇<天生一對>,我哋睇戲之前哥哥提議我去買少少化妝品for 遲啲見客用,我都係第一次俾化妝姐姐幫我化妝,搞掂之後哥哥仲sponsor 咗几件化妝品俾我,呢個老闆真係唔話得… ^.^
執完啲眼耳口鼻之後,凈番我同Able 去睇戲,都几好睇,千嬅今次做得几自然,唔係凈係識喪笑,不過講佢做完手術之後就跳到去講佢已經有個女就真係太快,想睇吓小齊同佢喜極而泣都唔得,個結尾好似有啲求其…

睇完戲之後我哋行咗一陣街,去咗食雪糕,又去咗買餅仔諗住過兩日帶返公司請同事食...行到晚飯時間我哋去咗小巴黎食越南嘢,食完就返大埔…返到去行咗一陣海濱、傾咗陣偈就各自歸家lu…

今日節目好豐富,食咗好多嘢,好開心…听日下晝有半日假,真係好…

拆屋

由1/3起屋企就開始整廁所啲水渠,而家個廁所拆到不知所謂,鏡箱、洗手盤、水箱、座廁乜都拆晒出嚟擺喺廳,成個廁所都係泥頭,最頭痛就係連個廳啲嘢都封晒一層啡色嘅灰塵,天呀~到底仲要整多几多日先整完啊???

一諗起成個廳都係嘢、個廁所又一地泥,個頭就好痛... T.T

有緣

今日返半晝,放工之後喺葵興食完lunch 諗住行去地鐵站搭地鐵去嫲嫲度,過緊馬路嘅時候竟然撞到Julissa,真係有緣,不過如果佢唔嗌我嘅話我都真係睇佢唔到…
陪完未食lunch 嘅Juli 食飯、傾咗一陣偈之後我哋就各自離開,4點几上到嫲嫲度坐,坐到6點几就搭車返屋企lu…

本來今日做嘅嘢冇乜特別,但係無端端喺街都撞到Juli,忽然令我諗起"有緣千里能相會"呢句說話... ^o^

Photo Shooting

上次同哥哥去澳門影相postpone 到今日,一早就出發,我哋個外籍model 好高好靚女,不過真係俾佢嚇死,我哋一行8人去到澳門過完海關等佢出嚟,初時以為佢拎visa 所以耐少少,但係等咗差唔半個鐘都仲未見佢出嚟,原來佢俾人拘留問話,好彩Victor 哥哥返轉頭搵佢擔保佢出嚟,如果唔係佢入唔到境我哋都唔知影乜...

虛驚一場之後我哋就趕去啲景開工影相,啲景好靚,好歐洲feel,我哋攞景嘅地方全部都係我去咁多次澳門都未去過嘅,雖然我只係行行企企睇人影相化妝,但係都覺得好新奇好有趣... : )

好心急想快啲睇吓啲相,相信應該會几靚,好期待見到本catalogue 同廣告嘅成品...


P.S. 今日哥哥提出咗兩個我要改善嘅地方:1) 食嘢太慢; 2) 唔識同第一次見面嘅人打開話題,我會努力改善...

一天假期

今日本來請咗一日假同Victor 哥哥去澳門影廣告相,但係個model 臨時有事要改期,咁我就無端端放咗一日假,都做咗几多嘢,几充實…

首先12點同爸爸帶蓉蓉去覆診,打埋最後一枝針,獸醫話蓉蓉已經好番晒,唔使再覆診,真係好…蓉蓉打完針爸爸就幫我帶佢返屋企,然後我就同哥哥去飲茶,飲完我哋出咗葵涌見一見客,我得到第一張client 嘅卡片,唔知點解好興奮… : )

唔知個photo shooting postpone 到几時呢?希望到時我都可以跟埋去睇吓成個過程就好喇...

請辭

今日終於遞咗辭職信,一個月後就可以離開呢個鬼地方…

做決定唔係太難,原來action 先有難度…

Happy B-day

今日係Able 生日嘅大日子,差唔多兩點先放工,之後約咗壽星女同狗狗喺尖沙咀食越南嘢;食完之後去咗打机,見到几個人好似排過舞咁一齊跳舞,好好笑…打完机之後我哋去咗唱k,同Able 唱k 好好笑,因為佢鍾意點90年代舊歌嚟唱,我第一次唱k 唱Aaron 首陳年舊歌I'm on fire,個MV 真係好搞笑,Aaron 嗰時仲係爆笑冬姑頭,佢不停轉圈show 舞功,好好笑… ^o^
唱到咁上下,又到切蛋糕時間,有免費蛋糕食、免費香檳飲,狗狗送咗條靚靚手鍊同小蜜蜂麥兜公仔(其實佢應該係扮蝸牛)俾Able,好開心…
Able 話未去過星光大道,唱完k 之後我哋就去行咗陣,超多自由行,感覺不太好…

行完之後我哋就搭火車返歸喇,今日嘅節目雖然冇乜驚喜,但係希望Able 都開心…


P.S. 今日同唔到小姐、Wendy玩真係唔好意思,希望下次Wendy 喺大陸返嚟可以約到佢出嚟玩啦…

驚嚇

今朝一早接到Victor 哥哥嘅來電已經遇到第一個驚嚇;放工之後小姐打俾我叫我返屋企睇報紙,又係第二個驚嚇…
睇完成篇報導之後都唔知講咩好,或者正如媽咪所講,有時讀書讀得太叻未必係好事,可能讀得太多諗嘢會諗埋一邊,跟住就好易做錯事…

真係唔知講咩好,希望所有有心病嘅早日康復,god bless them…

又打羽毛波

今日lunch 同阿姨婆婆飲茶,之後自己喺大中閒逛,逛到4點几會合Able,然後我哋又去打羽毛波,其實早兩日同Kennis 打完之後隻手痺到今日,今日同Able 打完一個鐘之後隻手真係舉唔高… ^.^”

打完波波之後我哋各自返歸食飯,唔知係咪啲火腿炒蛋有問題,食完之後超肚痛,好彩去完廁所就冇事… : [

節目豐富

今日約咗Kennis 去反,兩個傻人唔想行街睇戲又唔想唱k,諗諗吓就決定做啲好健康嘅嘢--打羽毛波...去到個場先知個衰妹原來book 咗兩個鐘場,諗住慢慢打都應該頂得順,點知原來個衰妹變變地態,唔俾人抖,打完之後隻右手痺到不得了…

打完波之後我哋去咗銅鑼灣食嘢傾偈,食完我就返大埔會合Able 食飯仔…
雖然仲有成個星期先到小寶寶嘅牛一,但係為免同人撞生日禮物,我提早送禮物俾佢,希望Able 鍾意"漢寶"、"漢萩"... ^o^

今日可以一次過約到兩位美人出嚟陪我反,真係開心,希望好快又可以見到佢哋(尤其係Kennis)...加油加油...


P.S. 好鍾意Able 夾牛仔骨俾我嗰陣講嗰句"官仔骨骨",承佢貴言,大家咁話, ha~

大年初二

晏晝同爸爸去嫲嫲度坐咗陣拜咗個年,跟住夜晚就去婆婆度拜年食飯...食完飯啲"大人"(其實我都已經係大人好耐… ^^")打麻雀,我就睇電視,睇睇吓<覆雨翻雲>真係俾佢悶暈,悶到喺梳化瞓著咗,真係...

喺婆婆度留到11點几就返屋企lu,好彩今年新年唔係好凍,如果唔係喺婆婆度實會凍到流晒鼻水...

年初一, 狗年大吉

今日唔使去拜年,留咗喺屋企hea,希望新一年人人身體健康,工作順利,開開心心,最緊要賺多啲…

恭喜恭喜~ ^.^

電髮好易發

又頂唔住個頭,直又唔係直、孿又唔係孿,今日食完早餐就去電髮,電完拿拿聲上Victor 哥哥度整嘢,可能我晏咗上去,唔係整咗好耐,整到7點左右陪完哥哥食飯就返屋企lu…

唔知係咪坐得多,條腰骨成日赤赤痛…希望抖几日會好啲… : P

團年飯+ 放假

今晚同阿姨婆婆佢哋食團年飯,過咗英國住咗几個月嘅二姨都返埋嚟過年,好耐冇見二姨,真係開心…

返埋听日工就開始放新年假,放到初七,yeah~ ^o^

蓉蓉看醫生+ 轉工

今日好曳明明冇唔舒服都請咗一日病假帶蓉蓉睇醫生,醫生話蓉蓉可能係膀胱有事,幫佢打咗兩支針,俾咗啲葯我返屋企餵佢,仲要俾過另一種糧蓉蓉食,暫時唔可以餵佢食魚仔,希望蓉蓉食咗葯,戒食魚魚會去到廁所好番啦… : )

夜晚約咗Victor 哥哥、Able、狗狗喺九龍城食團年飯,食飽飽之後仲去食好好味嘅甜品,啲燉蛋好好味… : P

今晚哥哥喺Able、狗狗面前"宣佈"我將會成為佢嘅員工,如果一切順利嘅話,應該3月頭左右我就可以轉投哥哥"旗下",希望一切順利…

蓉蓉病了

今日蓉蓉唔知點解成日行出行入廁所,但係又好似去唔到咁,夜晚仲去得密咗,差唔多隔兩三分鐘就入去一次,平時都唔係咁嘅,我上平時上開嗰個貓貓website 睇,原來呢啲都係貓貓尿道炎或者膀胱有問題嘅徵狀,真係有啲擔心… : (
過埋今晚睇吓佢仲有冇咁樣,如果仲係咁就要帶佢去睇醫生…

頹

今日又好頹,原來大家有咩唔開心通常都唔會同屋企人講,反而會同啲friend 講,好奇怪…

吃喝玩樂

今晚放工約咗Able、Victor哥哥同埋Able 個friend 狗狗一齊去尖咀食飯,我哋喺金牛苑食越南嘢,食食吓見到戴夢夢同個男性朋友坐喺隔隔離枱,我哋好八卦係咁偷望佢哋,好無聊…

飽餐一頓之後哥哥話咁早返去好似唔多夠喉,跟住我哋就去咗唱K,唱到12點几大家都好似仲想繼續,但係最衰我同狗狗听日都返早,哥哥就車我哋返屋企,搞掂晒上床瞓都兩點几lu…

今晚好開心,如果听日唔使返工可以玩耐啲就好喇…

Annual Dinner

今晚公司annual dinner,例牌食飯抽獎,我由細到大都冇抽獎運,竟然抽到個四獎,係咩5.1家庭影院組合,過几日先約時間送貨,相信應該會好大件,如果有人要就拿拿聲賣咗佢,間屋又唔係几千呎,咁大件都唔知擺喺邊… ^.^"

Anyway,希望呢啲好運會一路keep 住就好喇…

好平靜嘅除夕夜

尋日晏晝搞完公司啲麻煩嘢就拿拿聲上Victor 哥哥度整嘢,整完就返屋企食飯,本來諗住一路上網一路等到過埋12點先瞓,點知都係頂唔順,11點几send 咗几個SMS 俾人就瞓覺...今朝起身收到Able send 番俾我嘅SMS,唔知係咪尋晚啲network jam 晒,Able send 咗9個一模一樣嘅msg 俾我,好搞笑…

希望新一年所有事都順順利利,順心順意就好喇… ^.^